Inona no Lazain’ny Baiboly Momba ny Ady Niokleary?

Atahorana hisy ady niokleary foana hatramin’izao eto an-tany, satria mbola mitahiry fitaovam-piadiana niokleary ny firenena matanjaka sady vao mainka mampitombo ny tahiriny. Ara-dalàna àry raha miady saina ny olona hoe raha mihabetsaka ny fitaovam-piadiana niokleary dia vao mainka atahorana hisy ady niokleary koa. Matahotra mihitsy aza ny olona hoe raha misy firenena mandefa baomba niokleary kely anankiray fotsiny, dia efa mety hampisy ady niokleary lehibe handravarava an’izao tontolo izao. Milaza ny Gazetin’ny Mpahay Siansa Momba ny Ataoma (anglisy) hoe ‘amin’izao no tena atahorana indrindra hoe hisy ady niokleary.’

Mety hisy ady niokleary tokoa ve indray andro any? Dia tsy ho potika ve ity planetantsika ity raha misy izany? Inona no azontsika atao mba tsy hanahy be loatra isika hoe sao dia hisy ady niokleary? Inona no lazain’ny Baiboly?

Ho hitantsika ato hoe:

Efa nilaza mialoha ve ny Baiboly hoe hisy ady niokleary?

Tsy miresaka mivantana ady niokleary ny Baiboly. Atahorana hisy ady niokleary anefa indray andro any, noho ny toetran’ny olona sy ny zavatra hitranga efa noresahin’ny Baiboly mialoha.

Ampitahao amin’ny zava-misy eran-tany ange ny voalazan’ireto andinin-teny ireto e!

Izao no resahin’ny Baiboly: Nanontany an’i Jesosy ny mpianany hoe: “Inona no ho famantarana hoe efa manatrika ianao ary efa akaiky ny faran’izao tontolo izao?” Dia namaly i Jesosy hoe: “Hisy firenena hiady amin’ny firenena, ary hisy fanjakana hiady amin’ny fanjakana.”—Matio 24:3, 7.

Izao ny zava-misy: Matetika no lasa mampiasa fitaovam-piadiana ireo firenena rehefa miady, anisan’izany ireo firenena afaka manamboatra fitaovam-piadiana niokleary.

“Vao mainka mahery setra be ny olona tato ho ato. Mihabetsaka ny ady mitranga etsy sy eroa.”—The Armed Conflict Location & Event Data Project.

Izao no resahin’ny Baiboly: “Amin’ny fotoanan’ny farany, dia ho avy ny mpanjakan’ny atsimo ka hifanosika [amin’ny] mpanjakan’ny avaratra.”—Daniela 11:40.

Izao ny zava-misy: Mifanosika na mifaninana ny firenena mifandrafy sy ny mpanohana azy ireo mba hampisehoana hoe ry zareo no matanjaka indrindra, araka ny efa voalazan’ny Baiboly. Marina aloha hoe mety tsy hifamely mivantana ireo firenena manana fitaovam-piadiana niokleary betsaka indrindra amin’izao. Samy mbola miezaka anefa ry zareo mba ho mahery vaika kokoa ny fitaovam-piadiana niokleary ananany.

“Hitanay hoe lasa be dia be ny tany miady, tato anatin’ny folo taona, ary misy firenena matanjaka manohana ny andaniny na ny ankilany amin’ny ady sasany.”—The Uppsala Conflict Data Program.

Izao no resahin’ny Baiboly: “Amin’ny andro farany, dia hisy fotoan-tsarotra tsy mora atrehina. Fa ny olona ... tsy ho azo ifanarahana, ho mpanendrikendrika, tsy hahafehy tena, ho masiaka be.”—2 Timoty 3:1-3.

Izao ny zava-misy: Tsy mifanaraka matetika ny mpitondra eo amin’izao tontolo izao, hoatran’ny olona maro amin’izao ihany. Tsy mitady marimaritra iraisana anefa ry zareo rehefa miezaka mandamina an’izany, fa mandrahona na mampiasa herisetra. Vao mainka atahorana hisy ady niokleary eto an-tany vokatr’izany.

“Raha tsy mitady fomba mandaitra mba hahavitana miara-miasa tsara ny olona, dia vao mainka hitombo be ny ady.”—S. Saran sy J. Harman, tamin’ny Fihaonam-be Momba ny Toe-karena Eran-tany.

Havelan’Andriamanitra hisy ady niokleary ve eto an-tany?

Tsy miresaka an’izany ny Baiboly. Resahina ao kosa hoe “hisy zavatra mampahatahotra ho hitan’ny olona”, na zava-mitranga mampihorohoro. (Lioka 21:11) Anisan’izany, ohatra, ilay fandatsahana baomba ataomika nandritra ny Ady Lehibe II. Hazavain’ny Baiboly koa hoe maninona no avelan’Andriamanitra hisy ny ady. Raha tianao ny hahafantatra bebe kokoa momba an’izany, dia jereo ilay video hoe Nahoana Isika no Avelan’Andriamanitra Hijaly?

Tsy ho potika ve ny Tany?

Ie. Na mbola hampiasa fitaovam-piadiana niokleary indray aza ny olona, dia tsy havelan’Andriamanitra hisy vokany ratsy be izany ka hoe ho foana tanteraka izao tontolo izao. Milaza ny Baiboly hoe tsy ho potika mihitsy ity Tany ity, na dia misy zavatra atahorana hanimba azy io aza. Resahina ao koa hoe hisy olona hipetraka foana eto mandrakizay.

“Ny tany ... maharitra mandrakizay.”—Mpitoriteny 1:4.

“Andriamanitra [no] namolavola ny tany. ... Tsy hoe tsy misy antony ny namoronany azy fa nataony honenana.”—Isaia 45:18.

Misy mieritreritra hoe olona vitsy kely sisa no hiaina eto an-tany any aoriana any, ary hiady mafy ry zareo vao ho tafavoaka velona satria efa lasa ngazana sy misy zavatra mahafaty ny tany amin’izay vokatry ny fipoahan’ny baomba niokleary. Milaza anefa ny Baiboly hoe haverin’Andriamanitra tanteraka amin’ny laoniny ny zavatra rehetra simba eto an-tany, vokatry ny ady.

“Hifaly ny tany efitra sy ny tany ngazana, ary hiravoravo ny lemaka karakaina sady ho feno voninkazo.”—Isaia 35:1.

Olona miara-miasa sady falifaly ao amin’ny paradisa eto an-tany. — Tian’Andriamanitra ho sambatra isika dia hiaina eo amin’ny tany tsara tarehy

Nataon’ilay Andriamanitra Mpamorona mahavita manarina an’izay simba eo aminy ny tany. Hampiasa ny heriny koa anefa izy mba hamerenana ny tany ho hoatran’ny tamin’ny voalohany indrindra, dia ho lasa toerana mahafinaritra be hipetrahan’ny olombelona mandrakizay izy io.—Salamo 37:11, 29; Apokalypsy 21:5.

Inona no azonao atao mba tsy hanahy be loatra ianao hoe sao dia hisy ady niokleary?

Misy olona mijaly satria manahy be hoe sao hisy ady niokleary dia hizaka ny vokatr’izany isika. Afaka manampy azy ireny tsy hatahotra be loatra ny fampanantenana sy torohevitra ao amin’ny Baiboly. Amin’ny fomba ahoana?

Miresaka hoavy mahafinaritra be ho an’ity tany ity sy izay mipetraka eto ny Baiboly. Ho toy ny “vatofantsiky ny aintsika” izany fanantenana izany raha ezahintsika fantarina, dia hanampy antsika tsy hanahy be loatra. (Hebreo 6:19) Tsy hitebiteby be koa isika raha ny androany ihany aloha no eritreretintsika, fa tsy miasa saina be amin’izay mety hitranga amin’ny hoavy. Hozy mantsy i Jesosy hoe “efa ampy ny olana mitranga amin’ny andro tsirairay.”—Matio 6:34.

Tena mila miezaka isika rehetra mba ho salama tsara foana, na ara-tsaina izany na ara-pihetseham-po. Inona, ohatra, no azontsika atao? Aza mandany fotoana be loatra hamakiana na hijerena na hihainoana fanazavana mety hahatonga antsika hanahy. Anisan’izany, ohatra, ny dinidinika na tombantombana na hevitr’olona momba ny fivoaran’ny famokarana fitaovam-piadiana niokleary tato ho ato. Tsy midika anefa izany hoe tsy raharahiantsika ny tena zava-misy. Miezaka kosa isika mba tsy hieritreritra foana an’izay zavatra tsy azontsika fehezina sady mety tsy hitranga akory.

“Ny tebiteby ao am-pon’ny olona no mahakivy azy, fa ny teny mampahery kosa no mahafalifaly azy.”—Ohabolana 12:25.

Aza vaovao ratsy foana no ifantohana, fa miezaha hifantoka amin’ny zavatra mahafinaritra mitranga eo amin’ny fiainanao.

“Ilay Andriamanitra manome fanantenana anie hameno fifaliana sy fiadanana ny fonareo, satria matoky azy ianareo!”—Romanina 15:13.

Sary: Lehilahy mijery tsara any aloha sady tsy matahotahotra. 1) Misy olona miady ao aoriany. Misy fiaramanidina ampiasain’ny tafika, bala afomanga niokleary, ary setroka avy amina baomba nipoaka. 2) Tany madio sy milamina no eo alohany, dia misy tendrombohitra, havoana maitso, renirano mikoriana, ary vorona. — Misy fampanantenana azo antoka ao amin’ny Baiboly hoe ho tsara be ny hoavy

Afaka manampy anao hanana fanantenana sy ho faly ary hilamin-tsaina ny hoe mianatra bebe kokoa momba ny zavatra ampanantenain’Andriamanitra.

Ady niokleary ve ilay Aramagedona resahin’ny faminaniana ao amin’ny Baiboly?

Misy milaza fa ady niokleary maneran-tany ilay hoe Aramagedona. Azo antoka fa mieritreritra ry zareo hoe hahatsiravina be mihitsy ny vokatr’izany.

Inona anefa no tian’ny Baiboly holazaina amin’ilay hoe “Aramagedona”? Ady ifanaovan’Andriamanitra sy ny “mpanjakan’ny tany manontolo” na ny fitondram-panjakan’olombelona izy io.a (Apokalypsy 16:14, 16) Tsy hoe handravarava na hamono olona befahatany fotsiny akory Andriamanitra amin’ny Aramagedona, hoatran’ny ataon’ny olona rehefa mandatsaka baomba niokleary. Ny ratsy fanahy ihany no haringany amin’io fotoana io, amin’izay vao tena hiadana sy hilamina ny eto an-tany.—Salamo 37:9, 10; Isaia 32:17, 18; Matio 6:10.

Inona no resahin’ny Baiboly hoe vahaolana amin’ny ady?

“Ataony tsy misy ady intsony eran-tany. Tapatapahiny ny tsipìka, ary potipotehiny ny lefona; Dorany ny kalesy fitondran’ny miaramila miady.”—Salamo 46:9.

Hampihatra ny fahefany amin’ireo firenena miady i Jehovahb Andriamanitra, ka tsy havelany hiady intsony izy ireo ary hopotehiny ny fitaovam-piadian’izy ireo. Ny Fanjakany any an-danitra no hasainy hanao an’izany. Io fitondram-panjakana io indray no hitondra ny tany manontolo.—Daniela 2:44.

Hampianarin’ny Fanjakan’Andriamanitra ny olona hoe ahoana no hatao raha te hiadana sy hiray saina. Tsy hisy intsony izany hoe fitondram-panjakana samihafa tsy mifanaraka izany, satria fanjakana iray ihany no hitondra maneran-tany. Na ny olona aza tsy hianatra hiady intsony! (Mika 4:1-3) Dia inona no ho vokatr’izany? “Samy hipetrapetraka eny ambanin’ny voalobony sy ny aviaviny [ny olona], ary tsy hisy hampatahotra azy.”—Mika 4:4.

a Jereo ilay lahatsoratra hoe “Inona no Atao hoe Ady Aramagedona?”

b Jehovah no anaran’Andriamanitra. (Salamo 83:18) Jereo ilay lahatsoratra hoe “Iza moa i Jehovah?”

Miresaka ady niokleary ve ny bokin’ny Apokalypsy ao amin’ny Baiboly?

Misy mieritreritra hoe fandringanana tambabe amin’ny alalan’ny ady niokleary no tian’ny bokin’ny Apokalypsy horesahina. (Apokalypsy 6:14; 8:7-12; 16:1-21) Resahina ao mantsy, ohatra, hoe hisy ‘afo avy any an-danitra hilatsaka etỳ an-tany.’ (Apokalypsy 13:11-13) Ahoana kosa no fahazoan’ny Vavolombelon’i Jehovah an’izany? Hoe tsy ady niokleary lehibe no tiany horesahina, fa ilay fampiasana baomba ataomika nandritra ny Ady Lehibe II.

Marina fa miresaka an’ireny fotoana nampiasana fitaovam-piadiana niokleary ireny ny bokin’ny Apokalypsy. Tsy ny hiresaka tsipiriany momba an’ireny zava-nitranga mampihorohoro ireny anefa no tanjon’io boky io. Rehefa mamaky ny bokin’ny Apokalypsy ianao, dia tadidio ireto:

Miresaka famantarana be dia be tsy tokony horaisina ara-bakiteny io boky io.—Apokalypsy 1:1.
Tsy natao hampihorohoroana ny mpamaky azy io boky io. Mahasambatra kosa ny zavatra voasoratra ao ho an’ny olona mahazo sy mampihatra azy.—Apokalypsy 1:3.

Raha mila fanazavana fanampiny ianao, dia jereo ilay lahatsoratra hoe “Inona Marina no Voalaza ao Amin’ny Apokalypsy?”