Ny Fandrahonana Niokleary — Voaesotra Mandrakizay!
TSY irin’Andriamanitra ho an’ny taranak’olombelona ny fiainana ao anatin’ny tahotra mankarary. Amin’ny maha-“Andriamanitra finaritra” azy, dia iriny izy ireo hahita fiadanana sy hiaina ao anatin’ny tsy fananana ahiahy, raha fintinina, dia ny ho sambatra. (1 Timoty 1:11). Mazava fa tsy mety hisy izany ao anatin’ny tontolo iray feno fandrahonana niokleary.
“Miadana sy mandry fahizay” — Sandoka ihany
Tokony hiharihary fa tsy lasa velively ny fandrahonana niokleary. Kanefa, na dia eo aza ny fikorontanana lehibe ara-politika sy ara-toe-karena ary ara-tsosialy, dia toa mijery lafy tsaran-javatra ireo firenena amin’ny ankapobeny. Nisy fiezahana tsy an-kiato hampihena ny loza, niseho hatramin’ny Taona Iraisam-pirenena ho An’ny Fandriampahalemana naorin’ny ONU tamin’ny 1986.
Ny The Bulletin of the Atomic Scientists, tao anatin’ny folo taona farany, dia nanodina ny famantaranandrony manondro ny andro fitsarana — fomba fanondroany ny mety hisian’ny ady niokleary — avy teo amin’ny 3 minitra alohan’ny misasakalina, hiverina teo amin’ny 17 minitra alohan’ny misasakalina. Nanao fanamarihana ny Fikambanana Iraisam-pirenena ho An’ny Fikarohana Fandriampahalemana any Stockholm tamin’ny 1989 fa “ny fanantenana ny hisian’ny fanapahan-kevitra momba ny fifanoherana tsy hisy ady dia tsara orina kokoa noho ny tamin’ny fotoana hafa rehetra hatramin’ny Ady Lehibe Faharoa”.
Tao anatin’ireo taona faramparany, dia nohatanjahina ny Firenena Mikambana mba hanao zavatra mikasika ireo faritra misy fifandonana miverimberina iraisam-pirenena. Toa ampy mba handray anjara amin’ny fisian’ny toe-tsaina mahay mijery lafy tsaran-javatra amin’ny ankapobeny ny fahombiazan’ny Firenena Mikambana, na dia tsy feno aza. Azo inoana fa hitondra fisehoan-javatra vaovao sady hahitana fahombiazana ny hoavy. Mety hanjary ho mafy sy mahery kokoa ireo antsoantso hoe “miadana sy mandry fahizay”. Mety hanjary hinoana mihitsy aza izy ireny.
Kanefa tandremo! “Raha misy olona manao hoe: Miadana sy mandry fahizay”, hoy ny fampitandreman’ny Baiboly, “dia hanjo azy tampoka ny fandringanana, toy ny fahararian’ny vehivavy raha miteraka, ka tsy ho afa-mandositra mihitsy izy.” Araka izany, ireo antsoantso hoe “miadana sy mandry fahizay” dia hanome famantarana ny fotoana voatendrin’Andriamanitra ‘hanimbana [ireo] izay manimba ny tany [amin’ny alalan’ny fandotoana, niokleary sy hafa]’. — 1 Tesaloniana 5:3, 4; Apokalypsy 11:18.
Mariho fa tsy milaza ny Baiboly hoe hahatanteraka ‘fiadanana sy fandriampahalemana’ ireo firenena. Toa hiresaka momba izany amin’ny fomba tsy manam-paharoa izy ireo, amin’ny fampisehoana fahitana lafy tsaran-javatra sy fiekena tsy tsapa teo aloha. Toa ho akaiky kokoa mbola tsy nisy toy izany ireo fahafahana hanatanteraka fiadanana sy fandriampahalemana. Na dia eo aza ny fandrahonana niokleary mitohy, dia ho voarotsirotsy ho ao anatin’ny fahatsapana tsy fananana ahiahy sandoka ireo firenena.
Tsy ho voafitaka anefa ireo Kristiana marina. Amim-pahalianana lalina, izy ireo dia hibanjina any ankoatra ny fiadanana sy ny fandriampahaleman’olombelona ho amin-javatra tsaratsara kokoa!
Fiadanana sy fandriampahalemana — Ny tena izy
Araka ny Salamo 4:8, dia tsy hita afa-tsy ao anatin’ny fandaharan’i Jehovah Andriamanitra ny tena fiadanana sy fandriampahalemana: “Handry amin’ny fiadanana aho, ka dia hatory miaraka amin’izay, satria Hianao, Jehovah ô, no mampitoetra ahy mitokana irery tsy manana ahiahy.” Izay mety ho antsoantso hoe “miadana sy mandry fahizay” lazaina ivelan’ny faritry ny fandaharan’ny Fanjakan’i Jehovah dia tsy inona fa sandoka ihany. Tsy afaka manatanteraka na inona na inona manana vidiny maharitra izany.
Tsy hianina amin’ny fanomezana ala olana tapany ny Fanjakan’Andriamanitra eo ambanin’ny fitarihan’i Kristy. Hanao mihoatra noho ny fampihenana ny isan’ireo fitaovam-piadiana niokleary ny fitondram-panjakan’Andriamanitra; hanafoana tanteraka azy ireny sy ireo fitaovam-piadiana hafa rehetra izy io. Mampanantena ny Salamo 46:9 hoe: “Mampitsahatra ady hatramin’ny faran’ny tany Izy; manapaka ny tsipìka sy manito ny lefona Izy ary mandoro ny sariety amin’ny afo.”
Toy izany koa, dia ho zavatra efa lasa ireo fandrahonana niokleary avy amin’ny tsy fandehanan’ireo réacteurs niokleary tsara na avy amin’ny faikan-javatra radioaktifa. Raha tsy izany, dia tsy ho marina ireto teny ireto: “Samy hipetraka eny ambanin’ny voalobony sy ny aviaviny izy, ary tsy hisy hanaitaitra azy; fa ny vavan’i Jehovah, Tompon’ny maro, no efa niteny.” Tsy mahay mandainga Andriamanitra. Tsy manana antony hisalasalana ny amin’ny teniny isika. — Mika 4:4; Titosy 1:2.
Ho tianao ve ny hanana ny fanantenana hiaina ao amin’ny tontolo iray izay ho voaesotra mandrakizay ny fandrahonana niokleary teo aminy? Azonao atao izany, satria mirakitra mazava tsara ireo fepetra takina amin’izany ny Tenin’Andriamanitra. Amin’ny fianarana azy ireny sy amin’ny fananana fiainana mifanaraka amin’izy ireny, dia mety hanana ny fifaliana hilaza amin-tsento noho ny fanamaivanana ianao indray andro any hoe: “Ny fandrahonana niokleary — nifarana ihany!”
[Sary, pejy 7]
Hanjaka ao anatin’ny tontolo vaovaon’Andriamanitra tsy hisy izay mety ho fandrahonana niokleary ny fiadanana
[Sary nahazoan-dalana]
M. Thonig/H. Armstrong Roberts
[Sary nahazoan-dalana, pejy 6]
U.S. National Archives photo