MANONTANY NY TANORA

Ahoana no Hataoko Raha Misaraka i Dada sy Neny?

Anisan’ny zavatra mampiady saina be ny tanora ny fisarahan’ny ray aman-dreniny. Inona no hanampy anao hiatrika an’izany?

Ho hitantsika ato ireto:

Zavatra telo tsy tokony hatao

1. Aza manamelo-tena

“Nilaza tamiko i Neny, indray mandeha, hoe nanomboka nisy olana izy sy Dada rehefa teraka aho. Nieritreritra àry aho fa izaho no nampisy olana tamin’ny fanambadian-dry zareo.”—Diana.

Tadidio izao: Tsy ianao no nahatonga ny ray aman-dreninao hisaraka, fa ry zareo no misy olana. Tsy hoe avy aminao ilay izy ary tsy misy azonao atao mba handaminana an’izany. Ry zareo ihany no tokony handamina ny olana ara-panambadiany.

“Samy hitondra ny entany avy ... ny tsirairay.”—Galatianina 6:5.

2. Aza mitana lolompo

“Tezitra be amin’i Dada aho satria nampirafy an’i Neny izy. Sarotra be amiko ny hatoky azy indray.”—Rianna.

Tadidio izao: Rariny raha tezitra sy sosotra ianao noho ny zava-misy eo amin’ny ray aman-dreninao. Tsy mahasalama anefa ny mitana lolompo. Misy vokany eo amin’ny fahasalamanao sy ny fihetseham-ponao izany. Raha mitana lolompo ianao dia toy ny hoe mihinana poizina nefa manantena hoe ilay olona no harary.a

“Ialao ny hatezerana ary atsaharo ny fahavinirana.”—Salamo 37:8.

3. Aza mieritreritra hoe tsy hanana tokantrano sambatra ianao

“Matahotra be aho sao hamerina ny nataon’i Dada. Matahotra aho sao hamerina an’ilay zavatra nampisaraka ny ray aman-dreniko, raha manambady aman-janaka any aoriana any.”—Jessica.

Tadidio izao: Tsy hoe nisaraka ny ray aman-dreninao, dia ho tratran’izany koa ianao. Afaka mandray lesona avy amin-dry zareo kosa ianao. Mety ho hitanao, ohatra, hoe inona no toetra tianao hananan’izay ho vadinao. Mety hanampy anao hanatsara ny toetranao koa izany mba ho lasa vady tsara kokoa ianao.

“Aleo ... ny tsirairay samy handinika an’izay ataony.”—Galatianina 6:4.

Tovolahy iray mipetraka eo ambony sezalava sady mampiasa ny ordinaterany. Misy platra ny tongony. — Toy ny hoe tapa-taolana ianao rehefa misaraka ny ray aman-dreninao. Manaintaina ilay izy izao, nefa ho sitrana ihany rehefa mandeha ny fotoana

Zavatra telo azo atao

1. Miresaha. Matetika no lasa manimba ny tenany amin’ny toaka, zava-mahadomelina, na zavatra hafa, ny olona tsy miresaka ny zavatra mahakivy azy. Andramo izao mba tsy hahatonga anao hanao an’izany:

Miresaha amin’ny ray aman-dreninao. Raha mampiditra anao amin’ny olan’izy ireo ny iray amin’ny ray aman-dreninao na izy roa, dia hazavao amin’izy ireo hoe inona ny vokatr’ilay izy aminao. Tokony ho tony nefa hentitra ianao rehefa manao an’izany. Azonao anoratana taratasy koa ry zareo raha sarotra aminao ny hiresaka momba an’ilay izy mivantana.

Miresaha amin’ny namana azo itokisana. Hanampy anao ho maivamaivana ny manana olona vonona hihaino anao. Milaza ny Baiboly fa “tia amin’ny fotoana rehetra ny tena namana, sady tena rahalahy natao hanampy amin’ny fotoan-tsarotra.”—Ohabolana 17:17.

Miresaha amin’ilay Mpamorona. Vonona hihaino anao foana i Jehovah Andriamanitra, ilay “Mpihaino vavaka.” (Salamo 65:2) Milaza ny Baiboly hoe: “Apetraho aminy daholo izay rehetra mampanahy anareo, satria miahy anareo izy.”—1 Petera 5:7.

Iza amin’ny ray aman-dreninao no azonao iresahana, sady tony sy mahay mandanjalanja foana ianao rehefa miresaka aminy?
Iza no namana azonao itokisana (tanora na olon-dehibe) ho afaka hanampy anao hiatrika an’ilay olana?
Inona ny zava-manahirana azonao resahina amin’ny vavaka?

2. Ekeo ilay fiovana

Mety hisy zavatra hiova rehefa misaraka ny ray aman-dreninao. Mety hoe mila mifindra trano, ohatra, ianao na miova fianarana, ary mety hiova koa ny fari-piainanao sy ny namanao. Mahakivy sy mampikorontan-tsaina aloha izany e! Mety hahatsapa koa ianao hoe mitsimbadika ambony ambany ny fiainanao. Inona no azonao atao mba ho mora kokoa aminao ny hiatrika an’ilay fiovana? Miezaha hifantoka amin’izay azonao atao.

Inona ny fanovana lehibe nila nataonao satria nisaraka ny ray aman-dreninao?
Inona no hanampy anao hiatrika an’ilay fiovana?

“Efa nianatra ny hianina amin’izay zava-misy eo ... aho.”—Filipianina 4:11.

3. Fantaro ny toetra tsaranao

Marina hoe mampiady saina be ny fisarahan’ny ray aman-dreny. Afaka manampy anao hahita ny toetra tsaranao anefa izany, ary mety hanampy anao hanana toetra vaovao mihitsy aza. Nisaraka ny ray aman-drenin’i Jeremy tamin’izy 13 taona. Hoy izy: “Lasa nitombo ny andraikitro rehefa nisaraka i Dada sy Neny. Izaho no zokiny, dia nila nanampy kokoa an’i Neny aho sady nanohana an’ilay zandriko.”

Tovovavy manampy ny zandriny vavy hanao ny devoarany. Mikarakara sakafo ao an-dakozia ny maman-dry zareo. — Mety handrisika anao handray andraikitra kokoa ilay hoe misaraka ny ray aman-dreninao

Inona no toetra tsara lasa hitanao taminao rehefa nisaraka ny ray aman-dreninao?
Inona no toetra tianao hohatsaraina?

“Ny Soratra Masina iray manontolo dia avy amin’ny herin’ny fanahy masin’Andriamanitra, ary mahasoa mba ... hanitsiana an’izay tsy mety.”—2 Timoty 3:16.

a Jereo koa ilay lahatsoratra hoe “Inona no Ataoko fa Tsy Voafehiko ny Hatezerako?”