Nameno ny Tsy Ampy ny Ambim-bavan’izy Ireo

Manao asa tena lehibe ny Vavolombelon’i Jehovah mba hanampiana olona any amin’ny tany 200 mahery. Ny tany 35 amin’ireo ihany anefa no tena mahazo fanomezana ampy tsara avy ao amin’ny tany misy azy, mba hisahanana ny fandaniana ao amin’ilay tany. Dia ahoana àry izany no atao mba hisahanana ny fandaniana any amin’ny tany mahantra kokoa?

Jeren’ny Filan-kevi-pitantanana hoe inona avy no ilain’ny Vavolombelon’i Jehovah maneran-tany, mba hahafahan’izy ireo manompo an’i Jehovah sy mitory ny vaovao tsara. Arakarak’izay avy eo no ampiasan-dry zareo ny vola fanomezana. Raha misy sampana mahazo fanomezana be dia be, ohatra, nefa tsy laniny ilay izy, dia azo omena an’izay sampana hafa mila fanampiana izany. Mitovy amin’ny nataon’ny Kristianina tamin’ny taonjato voalohany izany. Nifanampy mantsy ry zareo ‘mba hamenoana izay tsy ampy.’ (2 Korintianina 8:14) Nomen’izy ireo mba hanampiana an’izay Kristianina sahirana ny ambim-bavany, na izay tsy laniny.

Inona no tsapan’ireo rahalahy nahazo fanampiana avy amin’izay tsy lany tany amin’ny sampana hafa? Ny antsasany mahery amin’ny mponina any Tanzania izao, ohatra, no mivelona amin’ny karama 7 000 ariary eo ho eo fotsiny isan’andro. Nila nohavaozina anefa ny Efitrano Fanjakana ampiasain’ny fiangonana Mafinga any amin’io tany io, dia nahazo fanampiana ry zareo. Izao no nosoratan-dry zareo tao amin’io fiangonana io: “Lasa nitombo be ny mpivory ao aminay hatramin’ny nanavaozana an’ilay Efitrano Fanjakana. Tena mahatsiaro ho sambatra izahay hoe anisan’ny fandaminan’i Jehovah. Tena faly koa izahay fa malala-tanana ny rahalahy sy anabavinay maneran-tany, dia lasa tsara tarehy ity Efitrano Fanjakana ivorianay ity.”

Vokatry ny valanaretina COVID-19, dia lasa tratran’ny mosary ny rahalahintsika sasany any Sri Lanka. Anisan’izany izao i Imara Fernando sy Enosh zanany lahy. Soa ihany anefa fa teo ny fanomezana nataon’ny rahalahy sy anabavy avy any an-tany hafa, dia afaka nahazo an’izay nilainy ihany ry zareo. Nanoratra karta kely izy ireo hoe: “Tena misaotra an’ireo mpiara-manompo nanampy anay tao anatin’iny fotoan-tsarotra iny izahay, fa tena be fitiavana ry zareo. Faly be izahay fa anisan’ny fianakavian’ny mpirahalahy maneran-tany. Mivavaka foana izahay mba hampian’i Jehovah ny mpiara-manompo rehetra, mandritra an’izao andro farany izao.”

Na aiza na aiza misy an’ireo mpiara-manompo amintsika, dia vonona foana ry zareo hizara izay ananany. Nanamboatra boaty kely fasiana vola, ohatra, i Enosh, satria te hanangom-bola mba homena an’izay fianakaviana mila fanampiana koa izy. Tia manome hoatr’izany koa i Guadalupe Álvarez, mipetraka any amin’ny faritr’i Meksika. Tena kely karama ny olona any satria vitsy kely ny olona mba mahazo ny karama farany ambany, na hoe mba mahazo karama raikitra. Na izany aza anefa, dia mizara an’izay ananany i Guadalupe Álvarez. Hoy izy: “Misaotra an’i Jehovah aho satria tsara toetra sy be fitiavana izy ary tsy mivadika. Na dia kely aza ny fanomezana omeko dia fantatro hoe rehefa atambatra amin’izay fanomezana omen’ny mpiara-manompo hafa ilay izy, dia azo ampiasaina mba hanampiana ny mpiara-manompo sahirana.”

Faly be foana izay sampana mandefa vola any amin’ny tany mila fanampiana. Hoy i Anthony Carvalho, Komitin’ny Sampan’i Brezila: “Nila fanampiana avy any an-tany hafa foana izahay nandritra ny taona maro, mba hamitana ny asa teto Brezila. Lasa nisy fitomboana be teto vokatr’izany. Efa niova izao ny fari-piainana eto, dia lasa afaka manampy firenena hafa indray izahay. Mandinika ny fitoriana atao maneran-tany ny rahalahy sy anabavy eto Brezila, dia mijery hoe inona no azon-dry zareo atao mba hanampiana amin’ny famitana azy io.”

Inona no zavatra tsara indrindra azon’ny Vavolombelon’i Jehovah atao raha te hanampy ny mpiara-manompo aminy sahirana izy? Tsy hoe mandefa vola mivantana any amin’ny biraon’ny sampana any amin’ny tany anankiray, akory izy. Azony atao kosa ny manao fanomezana ho an’ny asa atao maneran-tany. Afaka manao an’izany izy any amin’ny fiangonana misy azy, rehefa mandrotsaka vola ao amin’ilay boaty ho an’ny “Asa Maneran-tany”, na manao fanomezana amin’ny alalan’ny tranonkala donate.jw.org. Tena ankasitrahana ny fanomezana rehetra atao amin’ny alalan’ireo.