Andramo Ireo Soa Entin’ny Fampianarana Araka An’Andriamanitra
“Izaho, Jehovah Andriamanitrao, no nampianatra anao hahita soa”. — ISAIA 48:17.
1. Hanao ahoana isika raha mampihatra ny fampianarana araka an’Andriamanitra eo amin’ny fiainantsika?
MAHAFANTATRA amin’ny fomba tsara indrindra i Jehovah Andriamanitra. Tsy misy olona mihoatra azy amin’ny fisainana na amin’ny teny, na amin’ny asa. Amin’ny maha-Mpamorona antsika azy, dia mahafantatra izay ilaintsika izy ary manome izany amin’ny fomba tondraka. Azo antoka fa hainy ny fomba fampianatra antsika. Ary raha mampihatra ny fampianarana araka an’Andriamanitra isika, dia handray soa sy hahita fahasambarana marina ny tenantsika.
2, 3. a) Tamin’ny ahoana ny vahoakan’Andriamanitra fahiny no ho nandray soa raha nankato ny didiny? b) Inona no hitranga raha mampihatra ny fampianarana araka an’Andriamanitra eo amin’ny fiainantsika isika amin’izao andro izao?
2 Ny fampianarana araka an’Andriamanitra dia mampiharihary ny fanirian’Andriamanitra mafy dia mafy ny hanalaviran’ireo mpanompony loza sy ny hahitan’izy ireo fahafinaretana amin’ny fiainana, amin’ny fanoavana ny lalàny sy ny fotopoto-pitsipiny. Raha nihaino an’i Jehovah ny vahoakany fahiny, dia ho nahazo fitahiana nanana amby ampy izy ireo, satria nilaza tamin’izy ireo toy izao izy: “Izaho, Jehovah Andriamanitrao, no nampianatra anao hahita soa sady mitarika anao amin’ny làlana tokony halehanao. Toy izay anie hianao mba nihaino ny didiko! Dia ho tonga tahaka ny ony ny fiadananao, ary ho tahaka ny onjan-drano-masina ny fahamarinanao”. — Isaia 48:17, 18.
3 Ho nandray soa ireo vahoakan’Andriamanitra fahiny raha nanisy fiheverana ireo didiny sy fampianarany. Tsy ho nizaka loza tamin’ny tanan’ny Babyloniana izy ireo fa ho nahita fiadanana sy fanambinana feno sy lalina ary naharitra toy ny ony kosa. Ambonin’izany, ny asam-pahamarinan’izy ireo dia ho tsy tambo isaina toy ny onjan-dranomasina. Toy izany koa, fa raha mampihatra ny fampianarana araka an’Andriamanitra eo amin’ny fiainantsika isika, dia afaka manandrana ireo soa maro entiny. Inona avy ny sasany amin’izany?
Manova fiainana izy io
4. Amin’ny ahoana ny fampianarana araka an’Andriamanitra no misy fiantraikany eo amin’ny fiainan’olona maro?
4 Nitondra soa ho an’olona maro ny fampianarana araka an’Andriamanitra tamin’ny nanovan’izany ny fiainan’izy ireo ho amin’ny tsara. Ireo izay mampihatra ny fampianaran’i Jehovah dia manary ireo “asan’ny nofo”, toy ny fitondran-tena tsy voafehy, ny fanompoan-tsampy, ny spiritisma sy ny fifandirana ary ny fialonana. Maneho ny vokatry ny fanahy kosa izy ireo, dia ny fitiavana, fifaliana, fiadanana, fahari-po, hatsaram-panahy, hatsaram-po, finoana sy fahalemem-panahy ary fifehezan-tena. (Galatiana 5:19-23, NW ). Arahin’izy ireo koa ilay torohevitra ao amin’ny Efesiana 4:17-24 (NW ), izay nampirisihan’i Paoly ireo mpiray finoana taminy mba tsy handeha toy ny nataon’ireo firenena, araka ny sainy tsy mamokatra zava-tsoa, ao amin’ny haizina ara-tsaina, lavitra ny fiainana izay an’Andriamanitra. Noho izy ireo tsy tarihin’ny fo tsy mihontsina, ireo olona manana ny toetran’i Kristy dia ‘manaisotra ilay toetra taloha izay mifanaraka amin’ny fitondran-tenany taloha, ary nohavaozina izy ireo raha ny amin’ny hery izay manetsika ny sainy’. Izy ireo dia ‘mitafy ny toetra vaovao izay noforonina araka ny sitrapon’Andriamanitra amin’ny rariny sy fahatokiana marina’.
5. Inona no fiantraikan’ny fampianarana araka an’Andriamanitra eo amin’ny fomba fandehan’ny olona?
5 Soa iray tsara dia tsara azo amin’ny fampiharana ny fampianarana araka an’Andriamanitra ny hoe, izy io dia maneho amintsika ny fomba fiaraha-mandeha amin’Andriamanitra. Raha miara-mandeha amin’i Jehovah toy ny nataon’i Noa isika, dia hanaraka ny lalam-piainana voasoritr’ilay Mpampianatra antsika Lehibe. (Genesisy 6:9; Isaia 30:20, 21, NW ). Ireo olona eo amin’ny firenena dia “mandeha araka ny sainy tsy mamokatra zava-tsoa”, araka ny nolazain’ny apostoly Paoly. Ary tena afaka ny tsy hahitan-tsoa inona na inona tokoa ny sasany amin’ireo soratra avoakan’ireny saina ireny! Nahamarika ireo soratsoratra nataon’ny sasany teo amin’ny rindrina iray tany Pompéi ny mpitazana iray, ka nanoratra toy izao: “Mahagaga ry rindrina ô, ny mbola tsy nirodananao ihany teo ambanin’ny havesatry ny soratra feno hadalana be dia be toy izao.” Tsy misy hadalana anefa ao amin’ny “fampianaran’i Jehovah” sy ny asa fitoriana ilay Fanjakana izay manjary azo atao noho ny aminy. (Asan’ny Apostoly 13:12, NW ). Amin’ny alalan’io asa io, ireo olona tia ny fahamarinana dia nampiana mba hanao zavatra amim-pahaiza-misaina. Ampianarina azy ireo ny fomba itsaharana tsy handeha amin’ny lalan’izy ireo feno haratsiam-panahy, noho ny tsy fahalalana ny fikasan’Andriamanitra. Tsy ao anatin’ny haizina ara-tsaina intsony izy ireo, na atosiky ny fo tsy mihontsina hikatsaka zava-kendrena tsy hahitan-tsoa.
6. Inona no fifandraisana misy eo amin’ny fankatoavantsika ny fampianaran’i Jehovah sy ny fahasambarantsika?
6 Mitondra soa ho antsika koa ny fampianarana araka an’Andriamanitra noho izy io mahatonga antsika hahafantatra manokana an’i Jehovah sy ny fomba fiasany. Ny fahalalana toy izany dia mampanakaiky antsika kokoa an’Andriamanitra sy mampitombo ny fitiavantsika azy ary mandalina ny faniriantsika hankato azy. Hoy ny 1 Jaona 5:3: “Fa izao no fitiavana an’Andriamanitra, dia ny hitandremantsika ny didiny, sady tsy mavesatra ny didiny.” Toavintsika koa ireo didin’i Jesosy satria fantatsika fa avy amin’Andriamanitra ny fampianarany. (Jaona 7:16-18). Miaro antsika amin’ny fahasimbana ara-panahy sy mampitombo ny fahasambarantsika ny fankatoavana toy izany.
Tena zava-kendrena eo amin’ny fiainana
7, 8. a) Ahoana no tokony hahazoantsika ny Salamo 90:12? b) Ahoana no ahafahantsika manao izay hahazoana fo hendry?
7 Mahasoa ny fampianaran’i Jehovah noho izy io mampiseho amintsika ny fomba fampiasa ny fiainantsika amin’ny fomba misy zava-kendrena. Raha ny marina dia asehon’ny fampianarana araka an’Andriamanitra amintsika ny fomba fanisa ireo androntsika amin’ny fomba manokana iray. Ny halavan’ny androm-piainana 70 taona dia mampanantena andro iainana 25 550 eo ho eo. Ny olona iray 50 taona dia efa nandany ny 18 250 amin’ireo andro ireo sahady, ka toa tena vitsy dia vitsy ireo andro hiainany 7 300 sisa mbola antenainy ho azo. Amin’izay indrindra izy no mety hahatakatra amin’ny fomba feno kokoa ny antony nivavahan’i Mosesy mpaminany tamin’Andriamanitra toy izao, ao amin’ny Salamo 90:12: “Mampianara anay hanisa ny andronay, hahazoanay fo hendry.” Inona anefa no tian’i Mosesy holazaina tamin’izany?
8 Tsy te hilaza akory i Mosesy hoe Andriamanitra dia hampiharihary ny isa marin’ireo andro tao anatin’ny androm-piainan’ny Isiraelita tsirairay. Araka ny Salamo 90, Sl 90:9, 10 andininy faha-9 sy faha-10, dia nanaiky io mpaminany hebreo io fa mety haharitra 70 na 80 taona ny halavan’ny androm-piainan’ny olona iray — tena fohy dia fohy. Miharihary àry fa ireo teny ao amin’ny Salamo 90:12, dia naneho ny fanirian’i Mosesy nataony am-bavaka, ny mba hampisehoan’i Jehovah, na hampianarany azy sy ny vahoakany ny fomba hanehoana fahendrena amin’ny fiheverana ho sarobidy ‘ireo andron’ny taonany’ sy amin’ny fampiasana azy ireo amin’ny fomba ankasitrahan’Andriamanitra. Koa ahoana àry ny amintsika? Moa ve isika mankasitraka ny andro sarobidy tsirairay avy? Moa ve isika manao izay hahazoana fo hendry amin’ny fitadiavana handany ny andro rehetra amin’ny fomba mendrika, ho voninahitr’ilay Mpampianatra Lehibe antsika, dia i Jehovah Andriamanitra? Manampy antsika hanao izany indrindra ny fampianarana araka an’Andriamanitra.
9. Inona no azo antenaina raha mianatra manisa ny androntsika isika ho voninahitr’i Jehovah?
9 Raha mianatra manisa ireo androntsika ho voninahitr’i Jehovah isika, dia mety ho afaka hanohy hanisa azy ireo tsy misy fitsaharana, satria ny fampianarana araka an’Andriamanitra dia manome fahalalana ho amin’ny fiainana mandrakizay. “Ary izao no fiainana mandrakizay”, hoy i Jesosy, “dia ny mahafantatra Anao, Izay Andriamanitra tokana sady marina, sy Jesosy Kristy, Izay efa nirahinao.” (Jaona 17:3). Mazava ho azy fa na dia mahazo ny fahalalana araka an’izao tontolo izao rehetra misy aza isika, dia tsy hitondra fiainana mandrakizay ho antsika izany. Afaka mahazo fiainana mandrakizay anefa isika raha mahazo sy mampihatra ny fahalalana marina momba ireo persona lehibe indrindra roa eo amin’izao rehetra izao, ka tena maneho finoana.
10. Inona no lazain’ny firaketana iray momba ny fahitana fianarana, ary amin’ny ahoana izany no mitovy amin’ireo soa entin’ny fampianarana araka an’Andriamanitra?
10 Na hafiriana na hafiriana efa nahavelomantsika, dia aoka isika hitadidy itỳ soa miavaka avy amin’ny fampianarana araka an’Andriamanitra itỳ: Manome zava-kendrena marina eo amin’ny fiainan’izay mampihatra azy izy io. Hoy ny The World Book Encyclopedia: “Ny fahitana fianarana dia tokony hanampy ny olona ho tonga mpikambana misy ilana azy eo amin’ny tany ama-monina. Izany koa dia tokony hanampy azy ireo hampitombo fankasitrahana ny fitaizana ara-kolontsaina azony ka hanana fiainana mahafa-po kokoa.” Ny fampianarana araka an’Andriamanitra dia mahasoa eo amin’ny fanampiana antsika hanana fiainana mahafa-po. Mampitombo ao amintsika fankasitrahana lalina ny fitaizana ara-panahy azontsika amin’ny maha-vahoakan’Andriamanitra antsika, izy io. Ary azo antoka fa mahatonga antsika ho mpikambana misy ilana azy eo amin’ny tany ama-monina izy io, satria mahatonga antsika hanana anjara asa tena lehibe eo amin’ny fanomezana izay ilain’ny olona manerana ny tany. Nahoana no azo lazaina izany?
Fandaharam-pampianarana maneran-tany
11. Ahoana no nanazavan’i Thomas Jefferson ny ilana fampianarana araka ny tokony ho izy?
11 Tsy sahala amin’ny fandaharam-pampianarana hafa rehetra ny fampianarana araka an’Andriamanitra, fa manome izay ilain’ny olona eo amin’ny fianarana. Ny hoe ilaina ny mampianatra ny olona dia nomarihin’i Thomas Jefferson, izay tonga ny prezidàn’i Etazonia fahatelo. Nanoratra toy izao i Jefferson tao amin’ny taratasy iray tamin’ny 13 Aogositra 1786, ho an’i George Wythe, namany sady mpiara-nanao sonia taminy ny Fanambarana ny Fahaleovan-tena: “Tena mihevitra aho fa ny lalàna lehibe indrindra ao amin’ny fitambaran-dalàntsika manontolo dia ny an’ny fampielezana fahalalana eo amin’ny olona. Tsy misy fanorenana azo antoka hafa azo aorina, ho fiarovana ny fahafahana sy ny fahasambarana. (...) Tohano, ry sakaiza hajaiko indrindra, ny ezaka mafy manokana hanoherana ny tsy fahalalana; aoreno ary hatsarao ny lalàna hampianarana ny sarambabem-bahoaka. Aoka ireo mpiray tanindrazana amintsika hahafantatra (...) fa ny hetra haloa mba hahazoana [fianarana] dia tsy hihoatra ny ampaharivon’izay haloa amin’ireo mpanjaka sy pretra ary andriana hipoitra avy eo anivontsika raha avelantsika ho ao anatin’ny tsy fahalalana ny vahoaka.”
12. Nahoana no azo lazaina fa ny fampianarana araka an’Andriamanitra no fandaharana mahomby sy mahasoa indrindra ho an’ny fampianarana maneran-tany?
12 Ny fampianaran’i Jehovah dia tsy mamela velively ny olona manana fironana ho amin’ny fahamarinana ho ao anatin’ny tsy fahalalana, fa manome ny fandaharana tsara indrindra kosa ho an’ny fampianarana maneran-tany ho tombontsoan’izy ireo. Raha mbola namely mafy ny Ady Lehibe Faharoa, 50 taona lasa izay, ny Komity Amerikana Momba ny Fanarenana ny Fampianarana dia nahita fa nilaina maika dia maika ny “fampianarana maneran-tany”. Mbola eo ihany io zavatra ilaina io, kanefa dia ny fampianarana araka an’Andriamanitra ihany no hany fandaharana mahomby ho an’ny fampianarana maneran-tany. Izy io koa no mitondra soa indrindra noho izy manandratra ny olona hiala amin’ny famoizam-po, mampisondrotra azy ireo ara-pitondran-tena sy ara-panahy, mamonjy azy ireo amin’ny eboebon’izao tontolo izao sy ny fitsarany an-tendrony, ary manome fahalalana mitondra ho amin’ny fiainana mandrakizay. Ambonin’izany rehetra izany, dia mitondra soa ho an’ny olona hatraiza hatraiza io fandaharana io amin’ny fampianarana azy ireo hanompo an’i Jehovah Andriamanitra.
13. Ahoana no ahatanterahan’ny Isaia 2:2-4 amin’izao andro izao?
13 Ankafizin’olona sesehena tonga mpanompon’Andriamanitra izao ireo soa entin’ny fampianarana araka an’Andriamanitra. Mahatsapa izy ireo fa mila zavatra ara-panahy ary fantany tsara fa akaiky ny andron’i Jehovah. (Matio 5:3, NW; 1 Tesaloniana 5:1-6). Dieny atỳ “am-parany”, ireny olona avy amin’ny firenena rehetra ireny dia mitanjozotra mankany amin’ny tendrombohitr’i Jehovah, dia ny fanompoam-pivavahana madio aminy. Miorina mafy izy io ary asandratra ho avo dia avo noho ny fanompoam-pivavahana rehetra izay mifanohitra amin’ny sitrapon’Andriamanitra. (Isaia 2:2-4). Raha Vavolombelon’i Jehovah vita fanoloran-tena ianao, moa ve ianao tsy ravoravo anisan’ireo vahoaka sesehena tsy mitsaha-mitombo izay manolotra fanompoam-pivavahana amin’i Jehovah ka mandray soa avy amin’ny fampianarana araka an’Andriamanitra? Mahafinaritra toy inona moa ny hoe eo anivon’ireo izay mihiaka hoe: “Haleloia [“Miderà an’i Jah, ianareo ry olona”, NW ]”! — Salamo 150:6.
Vokany mahasoa eo amin’ny toe-tsaintsika
14. Inona no soa entin’ny fanarahana ny torohevitr’i Paoly ao amin’ny 1 Korintiana 14:20?
14 Anisan’ireo soa maro entin’ny fampianarana araka an’Andriamanitra ny vokany tsara dia tsara mety hananany eo amin’ny eritreritsika sy ny toe-tsaintsika. Mandrisika antsika hieritreritra zavatra marina sy madio, feno hatsaran-toetra sy mendri-piderana izy io. (Filipiana 4:8, NW ). Ny fampianaran’i Jehovah dia manampy antsika hanaraka ilay torohevitr’i Paoly hoe: “Raha amin’ny [faharatsiana, NW ] dia aoka ho zaza bodo aza, fa amin’ny fahalalana kosa dia aoka ho lehilahy lehibe tokoa.” (1 Korintiana 14:20). Raha mampihatra io fananarana io isika, dia tsy hitady fahalalana ny amin’ny faharatsiana. Nanoratra toy izao koa i Paoly: “Esory aminareo ny fo-lentika rehetra sy ny fahavinirana sy ny fahatezerana sy ny fitabatabana sy ny fitenenan-dratsy ary ny [faharatsiana, NW ] rehetra”. (Efesiana 4:31). Ny fanarahana ny torohevitra toy izany dia hanampy antsika hanalavitra fahalotoam-pitondran-tena sy fahotana lehibe hafa. Na dia afaka mitondra soa ara-batana sy ara-tsaina aza izany, izy io dia hitondra ho antsika indrindra ilay fifaliana avy amin’ny fahafantarana fa mampifaly an’Andriamanitra isika.
15. Inona no afaka manampy antsika ho tsara toetra hatrany eo amin’ny fisainana?
15 Raha tiantsika ny ho tsara toetra hatrany eo amin’ny fisainana, dia fanampiana iray ny fanalavirana ‘ny naman-dratsy izay manimba ireo fahazarana mahasoa’. (1 Korintiana 15:33, NW ). Amin’ny maha-Kristiana antsika, dia tsy hiaraka amin’ny mpijangajanga sy ny mpanitsakitsa-bady ary ny mpanao ratsy hafa isika. Araka ny fandrindran-kevitra àry, dia tsy tokony hiaraka amin’olona toy izany isika amin’ny famakiana zavatra mahakasika azy ireo noho ny fahafinaretan’ny nofo, na amin’ny fijerena azy ireo ao amin’ny televiziona, na any amin’ny sinema. Ny fo dia mamitaka, afaka mandray faniriana zava-dratsy mora foana, ary mety halaim-panahy hanao izany. (Jeremia 17:9). Aoka àry isika hanalavitra ny fakam-panahy toy izany amin’ny fifikirana amin’ny fampianarana araka an’Andriamanitra. Mety hisy fiantraikany mahasoa eo amin’ny eritreritr’ireo “tia an’i Jehovah” izany ka ho tonga hatramin’ny ‘fankahalana ny ratsy’ izy ireo. — Salamo 97:10.
16. Ahoana no ahafahan’ny fampianaran’Andriamanitra hisy fiantraikany eo amin’ny toe-tsaina asehontsika?
16 Izao no nolazain’i Paoly tamin’i Timoty mpiara-miasa taminy: “Ho amin’ny fanahinao [“toe-tsaina asehonao”, NW ] anie ny Tompo. Ho aminareo anie ny fahasoavana.” (2 Timoty 4:22). Naniry ilay apostoly ny mba hankasitrahan’Andriamanitra, amin’ny alalan’i Jesosy Kristy Tompo, an’ilay hery manetsika izay nanosika an’i Timoty sy ireo Kristiana hafa. Ny fampianaran’Andriamanitra dia manampy antsika haneho toe-tsaina feno fitiavana sy hatsaram-panahy ary fahalemem-panahy. (Kolosiana 3:9-14, NW ). Ary toy inona moa ny fahasamihafan’izany amin’ny toe-tsain’ny maro amin’izao andro farany izao! Miavonavona izy ireo, tsy mahay mankasitraka, tsy manana firaiketam-po voajanahary, tsy azo ifampiraharahana, mafy hatoka, tia fahafinaretana ary tsy manana fifikirana marina amin’Andriamanitra. (2 Timoty 3:1-5, NW ). Arakaraka ny anohizantsika mampihatra ny soa entin’ny fampianarana araka an’Andriamanitra eo amin’ny fiainantsika anefa, dia maneho toe-tsaina izay mahatonga an’Andriamanitra sy ny mpiara-belona amintsika hankamamy antsika, isika.
Mahasoa eo amin’ny fifandraisan’olombelona
17. Nahoana no zava-dehibe aoka izany ny fiaraha-miasa amim-panetren-tena?
17 Ny fampianaran’i Jehovah dia manampy antsika hahita ny soa entin’ny fiaraha-miasa amim-panetren-tena amin’ireo mpiara-mivavaka amintsika. (Salamo 138:6, NW ). Tsy sahala amin’olona maro amin’izao andro izao, isika dia tsy mandika ireo fotopoto-pitsipika marina, fa vonona hifampiraharaha kosa. Soa maro, ohatra, no azo satria vonona hifampiraharaha ireo mpiandraikitra voatendry, mandritra ny fivorian’ireo loholona. Afaka miresaka amim-pahatoniana ireny lehilahy ireny, ho tombontsoan’ny fahamarinana, kanefa dia tsy mamela ny fihetseham-po hanakona ny fandrindran-kevitra na hahatonga fisaratsarahana. Ny mpikambana rehetra ao amin’ny kongregasiona dia handray soa avy amin’ny toe-tsaina miray hina izay hitantsika, raha samy tsy mitsahatra mampihatra ny fampianarana araka an’Andriamanitra isika rehetra. — Salamo 133:1-3.
18. Manampy antsika hanana fomba fijery manao ahoana mikasika ireo mpiray finoana amintsika ny fampianarana araka an’Andriamanitra?
18 Ny fampianarana araka an’Andriamanitra dia mahasoa koa eo amin’ny fanampiana antsika hanana fomba fijery araka ny tokony ho izy mikasika ireo mpiray finoana amintsika. Hoy i Jesosy: “Tsy misy olona mahay manatona Ahy, raha tsy taomin’ny Ray Izay naniraka Ahy”. (Jaona 6:44). Hatramin’ny 1919 indrindra, dia nasain’i Jehovah nambaran’ny mpanompony ny didim-pitsarany, ary voahilangilana sy voahozongozon’izany fampitandremana maneran-tany izany ny fandehan-javatry ny tontolon’i Satana. Mandritra izany fotoana izany, ireo olona matahotra an’Andriamanitra — “ireo zavatra faniry” — dia notaomin’Andriamanitra mba hisaraka amin’ireo firenena sy handray anjara, miaraka amin’ireo Kristiana voahosotra, amin’ny famenoana voninahitra ny trano fivavahana amin’i Jehovah. (Hagay 2:7, NW ). Azo antoka fa tokony hijery ireny olona faniry notaomin’Andriamanitra ireny ho namana malala isika.
19. Inona no ahariharin’ny fampianarana araka an’Andriamanitra mikasika ny fandaminana tsy fifanarahana manokana amin’ny Kristiana namana?
19 Noho isika rehetra tsy tanteraka, dia mazava ho azy fa tsy handeha tsara foana akory ny zava-drehetra. Taloha kelin’ny niaingan’i Paoly hanao ilay diany misionera faharoa, dia tapa-kevitra ny hitondra an’i Marka hiaraka aminy i Barnabasy. Tsy nanaiky izany i Paoly satria “nandao azy tany Pamfylia ka tsy niaraka taminy ho any amin’ny raharaha” i Marka. Tamin’izay, dia nisy ‘fifandirana mafy’ vokatr’izany. Nitondra an’i Marka niaraka taminy tany Kyprosy i Barnabasy, ary i Paoly kosa nanana an’i Silasy niaraka taminy nanerana an’i Syria sy i Kilikia. (Asan’ny Apostoly 15:36-41). Tatỳ aoriana dia niharihary fa voaravona io fihavanana tapaka io satria niaraka tamin’i Paoly tany Roma i Marka, ary nilaza zavatra tsara momba azy ilay apostoly. (Kolosiana 4:10). Soa iray entin’ny fampianarana araka an’Andriamanitra ny fanehoany amintsika ny fomba fandaminana ireo tsy fifanarahana manokana eo amin’ny samy Kristiana, amin’ny fanarahana torohevitra toy ilay nomen’i Jesosy ao amin’ny Matio 5:23, 24, sy ny Matio 18:15-17.
Mitondra soa sy mandresy mandrakariva
20, 21. Tokony hanosika antsika hanao inona ilay fandinihantsika ny fampianarana araka an’Andriamanitra?
20 Na dia avy amin’ilay fandinihana fohy nataontsika mikasika ny soa sy fandresena sasany entin’ny fampianarana araka an’Andriamanitra aza, dia tsy isalasalana fa isika rehetra dia afaka mahita ny ilana ny haharetana eo amin’ny fampiharana izany eo amin’ny fiainantsika. Amin’ny toe-tsaina vonona hivavaka àry, dia aoka isika hanohy hianatra avy amin’ilay Mpampianatra antsika Lehibe. Tsy ho ela ny fampianarana araka an’Andriamanitra dia handresy mbola tsy nisy toy izany. Ho mpandresy izy io rehefa ho faty mandrakizay ireo olo-mahay eo amin’itỳ tontolo itỳ. (Ampitahao amin’ny 1 Korintiana 1:19, DIEM.) Ambonin’izany, arakaraka ny hianaran’ny olona an-tapitrisany maro fanampiny ny sitrapon’Andriamanitra, dia hanenika ny tany ny fahalalana an’i Jehovah toy ny anaronan’ny rano ny fanambanin’ny ranomasina. (Isaia 11:9). Ary amin’ny fomba lehibe toy inona moa no hitondran’izany soa lehibe ho an’olombelona mankato sy hanamarinan’izany an’i Jehovah, amin’ny maha-Tompom-piandrianana azy eo Amin’izao Rehetra Izao!
21 Hitondra soa sy handresy mandrakariva ny fampianaran’i Jehovah. Hanohy handray soa avy amin’izy io ve ianao, toy ny mpianatra mafana fo iray an’ilay Boky Fianarana lehibe avy amin’Andriamanitra? Miaina mifanaraka amin’ny Baiboly ve ianao ka mizara ny fahamarinana ao aminy amin’ny hafa? Raha izany no izy, dia afaka miandry amim-panantenana ianao mba hahita ny fandresena fenon’ny fampianarana araka an’Andriamanitra, ho voninahitr’ilay Mpampianatra Lehibe antsika, dia i Jehovah Mpanjaka Tompo eo Amin’izao Rehetra Izao.
Inona no Nianaranao?
◻ Inona no mety ho vokatry ny fampianarana araka an’Andriamanitra eo amin’ny fiainantsika?
◻ Ahoana no anomezan’ny fampianaran’i Jehovah izay ilaina eo amin’ny fampianarana?
◻ Vokany mahasoa inona no mety hananan’ny fampianarana araka an’Andriamanitra eo amin’ny eritreritsika sy ny fihetsitsika?
◻ Ahoana no hitondran’ny fampianaran’Andriamanitra soa eo amin’ny fifandraisan’olombelona?
[Sary, pejy 15]
Asehon’ny fampianarana araka an’Andriamanitra amintsika ny fomba fiaraha-mandeha amin’Andriamanitra toy ny nataon’i Noa
[Sary, pejy 17]
Mitanjozotra mankany amin’ny tendrombohitr’i Jehovah ny olona avy amin’ny firenena rehetra