Aoka isika hanohy ny fanompoantsika tsy ankiato
1 Eo am-piovana haingana ny sehatr’izao tontolo izao raha mbola mandroso ao anatin’ny andro farany isika. (1 Kor. 7:31, MN). Mifanaraka amin’ireo faminanian’ny Baiboly, dia mitranga ny fisehoan-javatra manaitra. Raha toa isika ka mihevitra amim-pitandremana izay miseho, na eo amin’izao tontolo izao na ao anatin’ny fandaminana teokratika, dia hahatsapa hoe hatraiza no mahadodona ny fitoriana ny “vaovao tsara” momba ilay Fanjakana.—Marka 13:10, MN.
2 Jesosy Kristy, ilay Mpitarika sy Ohatra ho antsika no nanome baiko hanao mpianatra. Nanome antoka ny amin’ny hahombiazan’io asa io ihany koa izy raha nanao izao fampanantenana izao: “Indro, Izaho momba anareo mandrakariva ambara-pahatongan’ny fahataperan’izao tontolo izao.” (Matio 28:19, 20). Nandray am-po ireo teny ireo ny mpianatr’i Jesosy ary, na dia teo aza ny fanoherana mahery vaika hitany, dia “tsy nitsahatra nampianatra sy nitory ny vaovao tsara momba an’i Kristy, dia i Jesosy, izy”. (Asa 5:42, MN.) Endrey izany ohatra tsara navelany ho antsika!
3 Amin’ny famakiana ny Diary 1990, rehefa ho voaraintsika io boky io, dia hahatsapa isika fa mitahy ny fanompoantsika i Jehovah amin’ny fanomezana antsika fitomboana lehibe. Ahitana fandrosoana tena mahagaga tokoa any amin’ny tany sasany. Izany fitomboana hita hatrany amin’ny faran’ny tany izany dia mihoatra lavitra noho izay azontsika nosaintsainina, taona vitsivitsy lasa monja izay (Isaia 60:22). Nefa, ahoana ny ao amin’ny faritanintsika? Ary inona no holazaina raha ny amin’ny asantsika manokana? Moa ve izany mahafaly antsika tahaka ny an’ny fitambaran’ny asan’ny namantsika maneran-tany? Raha ny amin’ny tenantsika manokana, moa ve isika manohy tsy ankiato ny fiezahantsika amin’ny fanompoana?
AOKA ISIKA HANAO NY ANJARANTSIKA
4 Miharihary fa tsy mamokatra amin’ny fomba mitovy avokoa ireo faritany (jereo Matio 13:35). Marina koa fa ny faritany sasany, toa an’i Irlande na Québec, dia tsy nanjary namokatra raha tsy taorian’ny asa mafy nataon’ireo minisitra kristiana be zotom-po, nandritra ny taona maro. Misy mpanohitra maro be any amin’ny faritany sasany, ary mangatsiaka sy tsy miraika amin’ny hafatra momba ilay Fanjakana kosa ny olona any amin’ny faritra hafa. Misy faritra be mpitory, hany ka mihena ny faritany iasana. Nefa na manao ahoana na manao ahoana ny faritany itoriantsika, dia tsy tokony hamela ny zotom-pontsika hihamangatsiaka mihitsy isika. Izao no nosoratan’ny apostoly Paoly: “Aza mba ketraka amin’ny fanaovan-tsoa isika; fa amin’ny fotoan’andro no hijinjantsika, raha tsy reraka isika.” (Galatiana 6:9). Mahakasika ny kristiana rehetra izany fampirisihana izany. Ahoana no hahafahantsika hanao toy izany? Inona no hanampy antsika hanohy tsy ankiato ny fanompoantsika?
5 Mba hitoerana ho mazoto miasa sy mba hahatonga ny fanompoantsika hamokatra, dia ilaintsika ny mametraka ny fitokiantsika amin’i Jehovah sy miantehitra amin’ny heriny mba hanohanana antsika. Aoka hotadidintsika hatrany fa izy no mahatonga ny faritanintsika hamokatra. (1 Kor. 3:6). Ho valin’ny vavaka ataontsika, dia manampy antsika i Jehovah amin’ny alalan’ny torohevitra sy fampiofanana azo ampiharina ary zavatra vita an-tsoratra momba ny Baiboly maro be hampiasaintsika manokana, nefa koa mba hanampiantsika olona hafa hahafantatra azy. Moa ve isika manararaotra amin’ny fomba feno izany fandaharana izany?
AOKA ISIKA HITANA FIHETSIKA TSARA
6 Mety hanimba be ny fahombiazan’ny fanompoantsika ny fihetsika tsy manorina. Raha mampiteraka fiheverana ratsy eo amin’ny olona ao amin’ny faritanintsika isika noho ny tsy firaikana nasehony teo aloha, dia ho hita amin’ny feontsika izany sy amin’ny toetry ny endritsika ary amin’ny tsy dia fahamaikantsika loatra hiomana hanompo. Nahazo baiko hitory sy hampianatra isika, ary tsy mbola voalaza fa vita izany asa izany. Ny faniriantsika ho mpankato sy hanaiky ny fitarihan’Andriamanitra no tokony hanosika antsika hanohy tsy ankiato ny fanompoantsika.
7 Mifanaraka amin’ny fikasan’i Jehovah, dia hampiomanina ireo ratsy fanahy ary hangonina ireo mpianatra, alohan’ny hahatongavan’ny farany. Dieny izao isika dia afaka mahita fifaliana amin’ny fandraisana anjara amin’ny fanompoana sy mifaly sahady amin’ireo fitahiana mandrakizay miandry ny vahoakan’Andriamanitra, raha mampiseho ny finoantsika sy ny fitiavantsika amin’ny fanohizana tsy ankiato ny fanompoantsika.