Tsy Misy Fitsaharana Amin’ny fanambarana ny Vaovao Tsara
1 Ireo Kristiana tany am-boalohany dia nihevitra ny fanompoany ho tena zava-dehibe. Nanao tatitra i Lioka hoe: “Isan’andro tao amin’ny tempoly sy isan-trano dia nanohy tsy nisy fitsaharana nampianatra sy nanambara ny vaovao tsara momba ny Kristy, dia i Jesosy, izy ireo.” (Asa. 5:42, NW ). Tsy nisy na inona na inona, na dia ny fanenjehana aza, afaka nampiahotra azy ireo! (Asa. 8:4). Niresaka tamin’ny hafa momba ny fahamarinana isan’andro izy ireo.
2 Ahoana ny amintsika? Manontania tena hoe: ‘Tsapako ve ny maha-maika ny fotoana? Mirona hanohy hanambara ny vaovao tsara tsy misy fitsaharana ve aho?’
3 Oha-pitoriana tsy misy fitsaharana amin’ny andro maoderina: Ny anabavy iray voan’ny polio, dia nampidirina tao anatin’ny havokavoka vy. Tsy afaka nankany amin’ny Efitrano Fanjakana na nanatrika fivoriambe izy. Kanefa, variana indrindra nanambara ny vaovao tsara izy. Nandritra ireo 37 taona naha-tao azy, dia afaka nanampy olona 17 hianatra ny fahamarinana izy! Ahoana no nanaovany izany? Na dia tsy afaka nandeha isam-baravarana aza izy, dia nahita fomba isan’andro nitoriana tsy ara-potoana tamin’ireo izay nifampikasoka taminy.
4 Ireo rahalahintsika any Bosnia dia voatery miatrika ady sy tsy fahampian-javatra tena ilaina. Na dia izany aza, dia manohy mitory tsy tapaka amin’ny hafa izy ireo. Any Sarajevo, ireo mpitory dia mandany, amin’ny antsalany, 20 ora isam-bolana iresahana amin’ny hafa momba ny vaovao tsara, ary mitarika, amin’ny antsalany, fampianarana Baiboly roa avy izy ireo. Na dia eo aza ny toe-javatra mafy misy azy ireo, dia mitory sy mampianatra tsy misy fitsaharana izy.
5 Ireo tanora koa dia maneho zotom-po ho amin’ny fanompoana. Ny fianakaviana Vavolombelona iray tatsy Rwanda, dia natao tao amin’ny efitrano iray nisy miaramila voaomana hamono azy ireo. Nangata-dalana hivavaka aloha ilay fianakaviana. Nekena izany, ary nivavaka tamin’ny feo avo i Deborah, ilay faravavy kely, hoe: “Jehovah ô, nahapetraka gazety dimy izahay sy i Dada tamin’itỳ herinandro itỳ. Ahoana no hiverenanay any amin’ireny olona ireny mba hampianarana azy ireny ny fahamarinana sy hanampiana azy ireny hahazo ny fiainana?” Noho ny finoana matanjaka nananan’io zazavavy io sy ny fitiavany ny fanompoana, dia voatsimbina ny ain’ilay fianakaviana manontolo.
6 Amin’izao andro izao, dia ilaina ny mitady fahafahana hitory amin’ny hafa sy hikaroka ireo izay ‘mirona araka ny mety ho amin’ny fiainana mandrakizay’. (Asa. 13:48, NW ). Arakaraka ny toe-javatra eo an-toerana, ireo loholon’ny kongregasiona dia manao fandaharana ho amin’ny fiaraha-mitory amin’ny fotoana mety, na maraina izany, na tolakandro, na takariva. Ireo lahatsoratra ao amin’ny Ny Fanompoantsika Ilay Fanjakana sy anjara amin’ny Fivoriana Momba ny Fanompoana, sy ny fivoriamben’ny fizaran-tany ary ny distrika, dia manome fanoloran-kevitra sy fampirisihana tonga amin’ny fotoana ilana azy, mba handraisana anjara amin’ny lafiny maro samihafa amin’ny fanaovana fanambarana momba ilay Fanjakana. Fanampin’ireo, ny mpiandraikitra ny fizaran-tany sy ny distrika dia mampiofana ireo mpitory amin’ny fitoriana eny amin’ny arabe sy mampiseho ny fomba hiasana ny faritany be fandraharahana ary manintona ny saina ho amin’ny fomba hafa hanaovana fanambarana na aiza na aiza ahitana olona. Izany rehetra izany dia manantitrantitra ny tsy fisian’ny fitsaharana amin’ny fanambarana ny vaovao tsara!
7 Nanambara tamin-kasahiana ireo apostolin’i Jesosy hoe: “Izahay tsy maintsy milaza izay zavatra efa hitanay sy renay.” Ahoana no naharetan’izy ireo na dia teo aza ny vato nisakana rehetra? Nangataka an’i Jehovah mba hanampy azy izy ireo, zavatra izay nataon’i Jehovah, ary dia “feno ny Fanahy Masina izy rehetra ka nitory ny tenin’Andriamanitra tamin’ny fahasahiana”. (Asa. 4:20, 29, 31). Mety tsy hahazo fitahiana amin’ny fanandraman-javatra miavaka eo amin’ny fanompoana ny rehetra, nefa raha tena maniry hanambara ny vaovao tsara tsy misy fitsaharana isika, ary raha miezaka hanao izany na dia isan’andro aza, dia hanampy antsika i Jehovah.