Ry tanora, manaova zavatra amim-pahaiza-manavaka any an-tsekoly
1 Samy nahazo tombontsoa ‘hidera ny anaran’i Jehovah’ na ny tanora na ny efa be taona kokoa. (Sal. 148:12, 13.) Mifamatotra akaiky amin’ny fanambarana ampahibemaso ny finoantsika izany asa izany. Noho izany dia hanararaotra ny fahafahana atolotra antsika isika hiresahana ny amin’i Jehovah sy hampitana ny hafatra momba ilay Fanjakana amin’ny hafa.
2 Ampirisihana ireo tanora Vavolombelon’i Jehovah hiresaka ny amin’ny zavatra inoany ara-pivavahana mandritra ny fotoana andehanany any an-tsekoly. Momba izany, ny Fanompoantsika ilay Fanjakana tamin’ny volana septambra 1989 dia mirakitra lahatsoratra iray navoaka maneran-tany, mitondra ny foto-kevitra hoe “Ry tanora, manaova fanambarana amin’ny fomba mandaitra any an-tsekoly”. Nanipy hevitra izy mba hampiasana ireo boky sy ireo gazety ao amin’ny faritry ny sekoly.
3 Any Frantsa anefa dia mety ny hanehoana fahaiza-manavaka amin’izany lafiny izany. Taorian’ny fisehoan-javatra vao haingana, dia namerina ny fandrarana ny fitaomana olona hiray hevitra amin’ny tena any an-tsekoly ny fanjakana (anisan’izany ny fampielezana boky sy gazety momba ny fivavahana). Hanaja izany fandaharana natolotry ny lalàna izany àry ny tanora Vavolombelon’i Jehovah sady mbola hanambara hatrany ny finoany. Ahoana no hahavitany izany?
4 Amin’ny fananana fihetsika faka tahaka any an-tsekoly, mba hahazoana ny hafa tsy amin’ny teny, fa amin’ny fitondrantenany fotsiny (jereo ny fotopoto-pitsipika naorina ao amin’ny 1 Petera 3:1). Ho vonona hatrany izy ny hanome ny anton’ny fanantenany, “amin’ny fanaovana izany amim-pahalemem-panahy sy fanajana lalina”. (1 Petera 3:15, MN.) Koa satria tsy mitondra tena amim-pihatsarambelatsihy ireo tanora kristiana, dia tsy maintsy hanaitra ny fahalianan’ireo namany hahafanta-javatra. Ho mailaka izy hanararaotra izany fahafahana izany mba hanambarana ny zavatra inoany.
5 Ilaina koa ny fahaiza-manavaka mandritra ny fotoana hampianarana ny amin’ny “préhistoire” (vanim-potoana talohan’ny nisian’ny soratra) na ny evaolisiona (fivorana miandalana). Tsy anjaran’ny tanora kristiana ny mifandahatra ny amin’ny fampianarana toy izany na dia tsy ekeny aza ny daty na ny fanazavana aroso. Ny La Tour de Garde tamin’ny 15 martsa 1965, pejy faha-189 (BI 6 bis/65, pejy faha-55), dia namaritra toy izao: “Raha toa ny fanontaniana iray momba ny evaolisiona ka mitaky ny hanomezana valiny avy ao amin’ny boky fianarana, dia azonao atao ny manome izany valiny izany. (Ny fanomezana valinteny akory tsy manaporofo hoe mino izany fampianarana izany ianao, fa hoe fantatrao fotsiny ilay izy.) Na dia ilaina aza ny hianarana amin’ny antsipiriany ny teôria diso toy ny evaolisiona, dia aza heverina hoe very fotoana fotsiny ianao. Ny fahalalana azo avy amin’izany fomba izany dia hahafahanao mahatakatra kokoa ny fomba fijerin’ny hafa, ary tena hilainao izany mba hanampiana azy ireny hiala amin’ireo filôzôfia dison’ny olombelona.”
6 Tsy azon’ny tanora kristiana iray atao ny miala amin’ny finoany amin’ny filazana fa mandia fianarana izy. Hataony am-po anefa ny fanajana ny zavatra inoan’ny hafa. Hatosiky ny toe-tsaina tony sady malefaka izy amin’ny toe-javatra rehetra, ary hanao zavatra amim-pahaiza-manavaka mba ‘hahafantarana ny fomba hamaliana ny olona rehetra’.—Kol. 4:6.