“Aoka isika hanambara ny tena fiadanana sy filaminana”
1 Loharano tokana ihany no mety hiavian’ny tena fiadanana sy filaminana, dia: Jehovah Andriamanitra. Milaza amintsika i Mika fa ‘hitsara ny adin’ny firenena maro ka hampiaiky ny firenena mahery’ i Jehovah. Inona no ho vokany? “Ny firenena tsy hanainga sabatra hifamely na hianatra ady intsony.” — Mika 4:3.
2 Koa satria i Jehovah no hany loharanon’ny tena fiadanana, dia tena ilain’ny olombelona ny ‘miakatra any amin’ny tendrombohitr’i Jehovah’ mba hampianarany azy ny lalany ka handehanany amin’ny atorony. (Mika 4:2). Amin’izany dia ho fantany fa i Jehovah Andriamanitra, amin’ny alalan’ny Fanjakany, no hitondra ny tena fiadanana eto an-tany. Ahoana anefa no azontsika anampiana olona maro kokoa hahafantatra ny Loharanon’ny tena fiadanana sy filaminana?
AOKA ISIKA HANOLOTRA NY BOKY FIADANANA
3 Ny boky Fiadanana dia manome fanazavana tena ilaina ho an’ireo izay maniry hiakatra any amin’ny tendrombohitr’i Jehovah. Nahazo boky Fiadanana ny mpitsabo iray tany Finlanda. Tsy namaky azy avy hatrany izy fa nampirina azy tao amin’ny fitahirizam-bokiny. Tatỳ aoriana dia tsaroan’ny vadiny fa manana an’io boky io izy ireo ka novakiny hatramin’ny farany ilay izy. Niaiky avy hatrany izy fa nahita ny fahamarinana ka nanomboka nianatra Baiboly. Tsy ela tatỳ aoriana, dia niaraka taminy koa ralehilahy vadiny. Vita batisa izy ireo amin’izao fotoana izao ary ny zanany koa dia mpitory ny vaovao tsara. Io zava-nitranga io dia mampiseho fa zava-dehibe ny hametrahana ny boky Fiadanana any amin’ny tokantrano faran’izay betsaka indrindra.
4 Rehefa miomana ho amin’ny asa fitoriana isika dia tokony handinika ny fanondroam-pejin’ilay boky, indrindra ireo toko mety hahaliana ny olona. Azontsika atao koa ny mifidy hevitra hentitra avy ao amin’ilay boky ka mampiasa izany amin’ny dinidinika ataontsika amin’ny olona.
5 Indro misy fanipazan-kevitra azonao arahina: Rehefa avy namaky sy nanazava ireo andininy ao amin’ny foto-dresaka ianao dia tariho ho eo amin’ny pejy faha-7 ao amin’ny boky Fiadanana ny sain’ilay olona. Raha mamela izany ny fotoana dia jereo ny sasantsasany amin’ireo andininy voatonona eo mba hanehoana ny tsy fitoviana misy eo amin’izay hoentin’ny Fanjakan’Andriamanitra sy izay tsy vitan’ny mpitondra olombelona. Avy eo dia vakio ny fehintsoratra faha-11 eo amin’ny pejy faha-8. Manaraka izany dia anontanio ilay miresaka aminao raha ho tiany ny handinika hevitra vitsivitsy izay velabelarina ao amin’ny toko manaraka. Amin’izany fomba izany dia azo atomboka avy hatrany ny fianarana Baiboly. Raha tsy izany, dia manandrama manomboka fianarana rehefa miverina mitsidika ilay olona ianao.
6 Miharihary fa tsy afaka mitondra ny tena fiadanana sy filaminana ny olombelona tsy tanteraka. Mba hamelomana fanantenana mafy orina dia ilain’ny olombelona ny mino an’Andriamanitra. Nefa “hataony ahoana no fino izay Olona tsy reny? Ary hataony ahoana no fandre, raha tsy misy mpitory?” (Rom. 10:14). Mihafohy ny fotoana tavela ho an’ny olona mba hanatonana an’ilay tena Loharanon’ny tena fiadanana sy filaminana. Enga anie isika hanao izay rehetra azontsika atao amin’ny volana Septambra mba hanambarana ny hafatra momba ny tena fiadanana amin’ny olona tso-po rehetra izay monina ao amin’ny faritanin’ny kongregasiona misy antsika!