Asongadino ireo bokikely mba hizarana ny fanantenanao momba ilay Fanjakana
1 Rehefa mahita ny fahatanterahan’ny faminaniana ao amin’ny Baiboly isika, dia mifaly amin’ny fanantenantsika momba ilay Fanjakana, ary voatosika hiresaka momba azy io amin’izay rehetra maniry hihaino. (Lioka 6:45; Rom. 12:12). Ny fampisongadinantsika ireo bokikely eo amin’ny asa fanompoana mandritra ny volana Jolay dia fomba iray ahafahantsika mizara ny fanantenantsika momba ilay Fanjakana amin’ny hafa, araka ny baikon’i Jesosy. — Matio 24:14.
2 Koa satria manana bokikely miloko sady ahitana fianarana maro azo ifidianana isika, iza amin’izy ireo no hifanentana indrindra amin’izay ilain’ireo olona eo amin’ny faritanintsika ary hanaitra ny fahalianany? Mba hahafahantsika hampiasa amin’ny fomba tsara indrindra ireo bokikely ireo, dia tsy maintsy mahalala izay raketiny avy isika. Ny famerenana fohy omena manaraka dia hanampy antsika amin’izany lafiny izany.
3 Ny fitondram-panjakana izay hitondra ny Paradisa: Fony teto an-tany i Jesosy, dia ny Fanjakan’Andriamanitra no fotokevitry ny fitoriany. Io bokikely io dia mampiseho fa io Fanjakana io dia tena fitondram-panjakana tokoa. Asehony ao koa fa izy io dia handamina ireo zava-manahirana izay mahatonga ny fiainana ho sarotra erỳ amin’izao andro izao.
4 Mifalia amin’ny fiainana eto an-tany mandrakizay!: Io dia manazava ny antony nanaovan’Andriamanitra ny olona ary koa ny fomba hahafahantsika hifaly amin’ny fiainana eto an-tany mandrakizay. Ireo sary manazava hevitra sy ny fanazavana voafintina tsara ao amin’io bokikely io dia manintona ny tanora sy ireo izay voafetra ny fahaizany mamaky teny. Azo ampiasaina koa izy io mba hampitana ireo fampianarana fototra ao amin’ny Baiboly amin’ireo izay tsy mahare tsara.
5 Ny anaran’Andriamanitra izay haharitra mandrakizay: Io bokikely io dia miresaka momba ny anaran’Andriamanitra araka ny asehon’ny Soratra Masina sy ny tantara. Asehony koa ny antony maha-tena ilain’ny Kristiana ny hahafantarana io anarana io sy ny hampiasana azy eo amin’ny fanompoam-pivavahany.
6 “Indro, havaoziko ny zavatra rehetra”: Io bokikely io dia milazalaza ny amin’ny paradisa ary mampiorina fankasitrahana ny Baiboly sy ny Mpamorona antsika. Rehefa avy miresaka ny amin’ny antony amelan’Andriamanitra ny faharatsiana hisy izy io, dia mifantoka amin’ny fampianarana fototra telo ao amin’ny Baiboly: ny avotra, ny fitsanganana amin’ny maty ary ilay Fanjakana. Misy fanontaniana koa isaky ny faran’ny pejy tsirairay amin’io bokikely io, ka izany dia manamora kokoa ny fitarihantsika fampianarana Baiboly amin’ny alalany.
7 Tokony hino ny Trinite ve ianao?: Mety hilaza ny olona fa mino ny Trinite izy, nefa samy hafa ny fahazoan’izy ireo ny heviny. Io bokikely io dia mamaly ny fanontaniana toy ny hoe: Inona moa ny Trinite? Mampianatra azy io ve ny Baiboly? Moa ve i Jesosy Kristy no ilay Andriamanitra tsitoha sady anisan’ny Trinite iray? Inona ny fanahy masina, ary ahoana no fiasany?
8 Raha vao avy nifidy ireo bokikely tiantsika hampiasaina eo amin’ny fanompoana isan-trano na rehefa manao fanambarana tsy ara-potoana isika, dia tokony hijery ireo lahatsoratra hita ao amin’ny pejy faha-6 sy faha-8 amin’ity Ny Fanompoantsika Ilay Fanjakana ity. Ao isika dia hahita fanipazan-kevitra momba ny fanolorana ireo zavatra vita an-tsoratra ananantsika sy ny fanaovana fiverenana mitsidika amin’ny fikendrena ny hampitombo ny fahalianan’ny hafa sy hanomboka fampianarana Baiboly.
9 Amin’ny toe-javatra maro, na eo amin’ny fanaovana fanambarana ara-potoana izany na tsy ara-potoana, dia hisy bokikely iray izay tena ilaina indrindra mba hanaovana fanambarana tsara dia tsara. Kanefa, tsy maintsy miomana isika, manana bokikely ampy tsara, mahafantatra izay raketiny avy ary hahay hanavaka. Enga anie, noho ny fitahian’i Jehovah ny fanompoana ataontsika amin-jotom-po, ka hisy olona maro hafa koa hiara-mifaly amintsika amin’ilay fanantenana momba ilay Fanjakana! — Asa. 13:47, 48.