Katsaho Voalohany Indrindra ny Fanjakan’Andriamanitra — Amin’ny Fanaterana Fanati-piderana Mandrakariva
1 Ireo izay mikatsaka voalohany indrindra ny Fanjakan’Andriamanitra dia mahatadidy mandrakariva ny hiresaka momba an’i Jehovah sy hilaza ny Fanjakany. (Sal. 145:11-13). Isan’andro dia misy fahafahana azo hararaotina mba hisaorana ny anarany sy hiresahana momba ny vaovao tsara. (Sal. 96:2). Ny fiderana an’i Jehovah dia fahafinaretana ho an’ilay mpanao salamo izay nanambara hoe: “Andriamanitra no ankalazainay mandrakariva”. (Sal. 44:8). Raha toy izany koa no tsapantsika, dia ho dodona isika ny handray anjara tsy tapaka amin’ny fanompoana mifandray amin’ilay Fanjakana.
2 I Jehovah dia tsy nametra zavatra tokony hotratrarina voafaritra tsara raha ny amin’ny habetsahan’ny fotoana tokony holanintsika eo amin’ny fanompoana, nefa mampirisika antsika hidera azy “mandrakariva” izy. (Heb. 13:15). Raha mamela antsika ireo toe-javatra misy ny tenantsika, dia tokony hataontsika ho tanjontsika ny handany fotoana hiderana an’i Jehovah isan-kerinandro. Ireo izay efa manao izany dia mety ho afaka handamina ny raharahany mba hanaovana ny asan’ny mpisava lalana mpanampy indraindray na amin’ny fomba mitohy mihitsy aza. Ny sasany izay efa nankafy ny asan’ny mpisava lalana mpanampy dia mety ho afaka hirotsaka hanao ny asan’ny mpisava lalana maharitra.
3 Na manao ahoana na manao ahoana toe-javatra misy ny tenantsika, moa ve azontsika atao ny mampitombo ny fanati-piderantsika? Ny zotom-po dia voarisiky ny fankasitrahana. Ny fianarana manokana ny Tenin’Andriamanitra dia mampitombo ny fankasitrahana. Ireo fivorian’ny kongregasiona dia manosika antsika haneho izany fankasitrahana izany amin’ny fomba azo tsapain-tanana. Afaka ‘mampandroso antsika ho amin’ny asa tsara’ ny fifaneraserana akaiky amin’ireo mpidera an’i Jehovah be zotom-po hafa. (Heb. 10:24). Amin’ny fahaizana manararaotra amin’ny fomba feno ireo fandaharana ataon’ny kongregasiona, dia mety ho afaka hampitombo ny fanati-piderantsika isika.
4 Namela ohatra tsara dia tsara teo amin’ny fanompoana an’i Jehovah i Ana mpaminanivavy. Na dia efa 84 taona aza izy, dia “tsy niala teo an-kianjan’ny tempoly izy, fa nanompo (...) andro aman-alina”. (Lioka 2:37). Ny fandraisany anjara tamin’ny fanahiny rehetra tamin’ireo asan’ny kongregasiona dia nitondra fahafaham-po lehibe ho an’ny tenany. Manome fampaherezana ho antsika amin’izao andro izao ny fitantarana ao amin’ny Baiboly momba ny fanompoany tamim-pahatokiana.
5 Nanoro hevitra i Paoly fa ireo “izay matanjaka dia tokony hitondra ny fahalemen’ny malemy”. (Rom. 15:1). Azo inoana fa misy handray soa avy amin’ny fanampianao sy ny fampirisihanao feno hatsaram-panahy, ao amin’ny kongregasionanao. Ny fanasanao ny mpitory iray hiaraka aminao eny amin’ny asa fitoriana dia mety ho ny hany zavatra hilaina. Mety hila fitaterana na olona hiarahana miasa ny mpitory iray. Ny fahakiviana no mety ho zava-manahirana ny olon-kafa iray, ary ianao no mety ho ilay afaka manome azy ny fampaherezana ilaina mba hamelomana indray ny zotom-pony ho amin’ny fanompoana mifandray amin’ilay Fanjakana. (1 Tes. 5:14). Ny fahavononanao ‘hiantra ny olona masina araka izay ilainy’ dia porofon’ny fanirianao amim-pahatsoram-po hampitombo ny fideranao ny anaran’i Jehovah. — Rom. 12:13.
6 Tsy ho afaka hitanisa ireo zavatra rehetra efa nataon’i Jehovah sy mbola hataony ho antsika isika. Tsy misy mihitsy fomba hahafahantsika hamaly aminy ireny fitahiana rehetra ireny. Misy antony manery toy inona moa ‘hideran’izay rehetra manam-pofonaina an’i Jehovah’! — Sal. 150:6.