Nekena ho Ara-dalàna Indray ny Fikambanan’ny Vavolombelon’i Jehovah
1 “Ny kely ho tonga arivo, ary ny malemy ho tonga firenena mahery”. (Isaia 60:22). Endre ny fahamarinan’ireo teny ireo raha ny amin’ny Vavolombelon’i Jehovah eto Madagasikara! Tany am-piandohan’ireo taona 1950, dia nisy mpisava lalana manokana roa avy tany Frantsa nanomboka nitory ny vaovao tsara teto Madagasikara. Tatỳ aoriana, dia nisy misionera tonga mba hanampy azy ireo, ary dia tsy nitsahatra nitombo ny isan’ny mpitory.
2 Arakaraka ny fandehan’ny fotoana, dia nanjary nilaina ny hanoratana ara-dalàna ny asantsika. Noho izany dia natsangana “Ny Fikambanan’ny Vavolombelon’i Jehovah”, ary neken’ny fanjakana ho ara-dalàna izy io tamin’ny 1965. Izany dia nanome antsika fahafahana bebe kokoa mba hampiditra zavatra vita an-tsoratra sy hanasa misionera hafa koa ary handamina fivoriambe. Tamin’ny 1970, dia nisy mpitory mahery kelin’ny 400 teto.
3 Kanefa, teo antenatenan’ny taona 1970, vokatry ny fahadisoan-kevitry ny manam-pahefan’ny fitondram-panjakana, dia voaray ny vaovao ratsy hoe hofoanana ny fikambanantsika. Tena diso fanantenana ireo rahalahy, nefa nanohy tamin-kerim-po nianatra ny Baiboly sy nitory ny Vaovao Tsaran’ny Fanjakan’Andriamanitra izy ireo. Nitahy ny ezaka nataon’izy ireo i Jehovah, ka nahatratra 5 000 mahery ny isan’izy ireo tamin’ny 1993.
4 Nanjary nilaina ny nanatona indray ireo manam-pahefana tompon’andraikitra mba hangatahana ny hanekena ho ara-dalàna indray ny fikambanantsika. Nandritra ny tokony ho herintaona teo ho eo, dia niandry valin’ny fangatahana nataony ireo rahalahy tompon’andraikitra. Faly izahay mampandre anareo fa tamin’ny 4 Oktobra 1994, dia nahazo izany valiny izany izahay, dia ny hoe nekena ho ara-dalàna indray “Ny Fikambanan’ny Vavolombelon’i Jehovah”! Vaovao tsara toy inona moa izany ary velom-pankasitrahana an’i Jehovah toy inona moa isika noho izy nanome antsika io fahalalahana lehibe kokoa io!
5 Ny FI.MPI.BA.MA. dia nanampy be dia be antsika teo amin’ny fandikana ho amin’ny teny malagasy ireo zavatra vita an-tsoratra ara-baiboly sy tamin’ny fampidirana azy ireo teto amintsika. Tena ilaintsika eo amin’ny fianarantsika ny Baiboly sy ny asa fitoriana ataontsika izy ireo. Mbola hanohy hanao ny asany ihany io fikambanana io, fa “Ny Fikambanan’ny Vavolombelon’i Jehovah” kosa dia hisahana ny asa fitoriana sy fampianarana ny Baiboly. Hisy tsipirian-javatra fanampiny homena anareo momba izany amin’ny fotoana mety.
6 Voafetra ny fotoana tavela ho an’itỳ tontolo itỳ. Noho izany, dia aoka isika hanao izay lazain’i Paoly ao amin’ny Galatiana 6:10 manao hoe: “Koa araka ny ananantsika [fotoana mety hanaovana izany, NW], dia aoka isika hanao soa amin’ny olona rehetra, indrindra fa amin’ny mpianakavin’ny finoana.” Izao dia tena fotoana mety handehanantsika hitory ny Vaovao Tsaran’ny Fanjakan’i Jehovah. Ary satria efa nekena ho ara-dalàna izao ny fikambanantsika, dia aoka isika tsy hiahotra ny hilaza hoe “Vavolombelon’i Jehovah aho”.