Moa ve Isika Mitoetra ho Mifoha ka Manalavitra Fanelingelenana?
1 I Jesosy dia nanome fampitandremana hoe: “[Mifohaza hatrany, NW] (...) mba hahery hianareo ka handositra” ny loza izay azo antoka fa ho avy. (Lioka 21:36). Miaina amin’ny fotoana mampidi-doza indrindra eo amin’ny tantaran’ny olombelona isika. Loza no miandry an’ireo izay manaiky ho resin’ny faharendremana ara-panahy. Loza manambana ho an’ny tsirairay amintsika izany. Nanonona ny fihinanana sy ny fisotroana ary ny fanahiana eo amin’ny fiainana andavanandro i Jesosy. Nahoana? Satria na dia ireo zavatra ireo aza dia mety hahavariana antsika, ka hanjary fanelingelenana ary hitarika ho amin’ny faharendremana ara-panahy hampidi-doza.
2 Fanelingelenana fahita: Ny sasany dia nanjary variana tamin’ny fanarian-dia tafahoatra na mampisalasala, nanjary andevozin’ny televiziona mihitsy aza. Mazava ho azy fa ny fikatsahana voalohany indrindra ilay Fanjakana dia tsy midika hoe tsy maintsy manalavitra ny fanarian-dia amin’ny endriny rehetra isika. Rehefa mampiasa fahalalana ny antonona sy fahalalana onony isika, dia afaka ny hahasoa ny fanarian-dia. (Ampitahao amin’ny 1 Timoty 4:8.) Lasa fanelingelenana anefa izy io rehefa tonga zava-dehibe eo amin’ny fiainantsika, satria maka betsaka amin’ny fotoanantsika, ny fananantsika, na ny fandraisantsika anjara amin’ny asa fitoriana ilay Fanjakana.
3 Ny fanelingelenana fahita hafa iray, izay mahatonga faharendremana ara-panahy, dia ny faniriana hahazo zavatra ara-nofo tsy tena ilaina. Izany dia mitaky ny handanian’ny olona iray fotoana bebe kokoa any am-piasana, ka mahatonga ny raharaha ara-panahy ho voailika. Nanadino ireo tanjona ara-panahy ny sasany noho izy nanjary revo tamin’ny fikatsahana fananana ara-nofo mba hanatratrarana fomba fiaina mampiadana kokoa. Na dia mila ‘hanina sy fitafiana’ aza isika, dia tsy maintsy mitandrina mba tsy hamboly fitiavam-bola, izay afaka ny hampivily antsika hiala amin’ny finoana. (1 Tim. 6:8-10). Raha tsy mihazona ny masontsika hifantoka amin’ireo tombontsoan’ilay Fanjakana isika, dia mety hanjary ho moramorainy eo amin’ny fikarakarana izay ilain’ny fianakaviantsika amin’ny ara-panahy ka tsy hahatanteraka ny fanompoantsika. — 1 Tim. 5:8; 2 Tim. 4:5.
4 Ny hafa kosa mamela ny ‘fony hovesaran’ny [fanahiana, NW] izao fiainana izao’ ka lasa resin-tory ara-panahy. (Lioka 21:34). Indraindray, ny fanahiana dia noho ny zava-manahirana ara-pahasalamana na ny tarehin-javatra ara-pianakaviana mampahory. Izany fanahian’ny tena manokana izany anefa dia tsy tokony havela hampihena ny fahatsapantsika fa mihamanatona haingana ny faran’itỳ fandehan-javatra itỳ. — Marka 13:33.
5 Tsy misy zavatra hampifaly ny Devoly mihoatra noho ny fahombiazany hametraka antsika ho toy ny ao anatin’ny nofy, hanatratra nofinofy iray eo amin’izao tontolo izao. Tsy maintsy miady isika mba hifohazana hatrany ara-panahy. Fantatsika fa ‘ho avy toy ny mpangalatra ny andron’ny Tompo’, ary iankinan’ny aina ny ‘[hitoerana ho mifoha, NW] ka hahonon-tena’. (1 Tes. 5:2, 6). Raha hitantsika fa misy fambaran’ny faharendremana eo amintsika, dia ilaina maika dia maika ny ‘hanariantsika ny asan’ny maizina’. — Rom. 13:11-13.
6 Fanampiana mba hanampy antsika hitoetra ho mifoha: Inona avy izany fanampiana izany? Tena ilaina ny vavaka. Tokony tsy hitsahatra hivavaka isika. (1 Tes. 5:17). Ny fitoerana ho akaiky ny kongregasiona kristiana dia ‘hampandroso antsika ho amin’ny fitiavana sy ny asa tsara’. (Heb. 10:24). Ny fandinihana ny tenantsika tsy tapaka sy amim-pahamarinana dia afaka manampy mba hahamailaka antsika hatrany hahita ny ilantsika handresy fahalemena. (2 Kor. 13:5). Ny fahazarana tsara manao fianarana manokana dia ‘hitaiza antsika hatrany amin’ny tenin’ny finoana’. (1 Tim. 4:6). Raha mazoto isika, dia afaka matoky fa ho afaka hanalavitra fanelingelenana, ka ‘hitoetra ho mifoha, sy hiorina mafy amin’ny finoana’. — 1 Kor. 16:13, NW.