Ilana Rahalahy Betsaka Kokoa ao amin’ny Fanompoan’ny Mpisava Lalana
1 Nampirisika mafy antsika i Paoly mba ‘hahefa be mandrakariva eo amin’ny asan’ny Tompo’. (1 Kor. 15:58). Ho an’ny maro, izany dia midika ho firotsahana ao amin’ny fanompoan’ny mpisava lalana. Nanomboka tamin’ny Septambra 1995, dia 191 no nanatevin-daharana ny mpisava lalana!
2 Amin’izao fotoana izao, ny maro kokoa eo amin’ireo mpisava lalana eto amin’ny nosy dia anabavy. (Sal. 68:11). Hitondra fifaliana ho an’ny kongregasiona toy inona moa raha misy rahalahy betsaka kokoa afaka mamonjy ny laharan’ny mpanompo manontolo andro! (Sal. 110:3). Mora takatra fa rahalahy maro no voatery miantsoroka adidy ara-pianakaviana sy ara-nofo lehibe. Ny hafa koa miezaka mikarakara ny zavatra ara-panahy ilain’ny kongregasiona. Ankasitrahantsika ireny rahalahy izay mikely aina ho tombontsoan’ilay Fanjakana ireny. — 1 Tim. 4:10.
3 Na dia izany aza, mety hisy betsaka kokoa aminareo ve hirotsaka ao amin’ny fanompoan’ny mpisava lalana, ry rahalahy? Raha mpisava lalana ny vadinao, afaka manao toa azy ve ianao? Raha efa misotro ronono ianao, tsy hekenao ve fa tsy misy fomba mahafa-po kokoa handaniana ny fotoananao noho ny ao amin’ny fanompoana manontolo andro? Raha eo am-pamitana ny fianaranao ianao, moa ve ianao nanisy fiheverana lalina sy tamim-bavaka ny firotsahana ao amin’ny fanompoan’ny mpisava lalana ho dingana iray ho amin’ny tombontsoam-panompoana fanampiny? — Efes. 5:15-17.
4 Nivarotra ny fandraharahany niroborobo ny rahalahy iray ary nanomboka asa tapa-potoana mba hahafahany hanao ny asan’ny mpisava lalana. Noho ny fitarihany tsara dia tsara, dia tonga mpisava lalana ny telo amin’ireo zanany efatra raha vao nahavita ny fianarany. Ilay fahefatra dia may hanao toa azy ireo. Io rahalahy io sy ny fianakaviany dia nahazo fitahiana tondraka.
5 Varavarana lehibe no mivoha: Ny fanompoan’ny mpisava lalana dia afaka mamoha ‘varavarana lehibe ahazoana miasa’. (1 Kor. 16:9). Azo ampiasaina be dia be ao amin’ny kongregasiona ireo rahalahy mpisava lalana. Mampitombo ny toetrany ara-panahy sy mandray anjara amin’ny fandrosoany teokratika ny asa eny amin’ny saha ataony amin-jotom-po. Ny fanaovana ny asan’ny mpisava lalana dia afaka manokatra ny lalana ho amin’ny tombontsoam-panompoana fanampiny. Aorian’ny herintaona voalohany nanaovana ny asan’ny mpisava lalana, dia eo ilay fitahiana hanatrika ny Sekolin’ny Fanompoan’ny Mpisava Lalana. Ireo mpanampy amin’ny fanompoana sy loholona mpitovo dia mety hiezaka handroso mba hanatrika ny Sekoly Fampiofanana ho Amin’ny Fanompoana. Ireo mpivady izay mahafeno fepetra dia mety hangataka hiditra ao amin’ny Sekolin’i Gileada. Ireo rahalahy dia mety hahafeno fepetra ho amin’ny asa fitetezam-paritany amin’ny farany. Eny, ny fanompoan’ny mpisava lalana dia manokatra ny varavarana ho amin’ireo tombontsoam-panompoana lehibe kokoa ireo ao amin’ny fandaminan’i Jehovah.
6 Mety hahatsapa ilay fahasambarana lehibe kokoa izay avy amin’ny fampitomboana ny fanomezany ireo rahalahy izay afaka mandamin-javatra mba hanaovana ny asan’ny mpisava lalana maharitra. — Asa. 20:35.