Aoka Isika Hizara Amin’ny Hafa Araka Izay Ilainy
1 Manao fandaharana i Jehovah mba hanomezana fahafaham-po amin’ireo zavatra ilaintsika ara-panahy, amin’ny alalan’ny “mpanompo” mahatoky. (Matio 24:45-47). Maro amin’ireny fanomezana ireny no amin’ny endrika boky, Baiboly, volumes reliés, vidéos, cassettes nandraisana feo, ary disques compacts fampiasa amin’ny ordinatera mba hanaovana fikarohana ara-baiboly. Izay omen’i Jehovah dia ampy foana, nefa koa tsy misy fandanilaniana foana. Manantena antsika hifampizara amin’ny hafa izy, ka manao izay hahazoana antoka fa mandray soa amin’ny fomba mitovy ny rehetra.
2 Vola tsy toko tsy forohana no lany amin’ny famokarana ny fanomezana rehetra toy izany. Ny fitambaran-drahalahy maneran-tany no misahana an’ireny fandaniana ireny. Sampana maro no mahazo ireny fanomezana avy amin’ny Fikambanana ireny amin’ny vidiny ahafahan’ireo rahalahy manana izay ilainy ho amin’ireo fivoriana sy ho amin’ny asa eny amin’ny saha, na dia tena kely fidiram-bola aza izy ireo.
3 Ny fomba ahafahantsika manampy: Afaka mamaly ny fananaran’i Paoly hizara amin’ny hafa “araka izay ilainy” isika. (Rom. 12:13). Rehefa manao fanomezana ara-bola ho an’ny asa maneran-tany isika, dia mizara mivantana izay ananantsika, amin’ireo rahalahintsika manerana ny tany. Amin’ny fanaovana izany ao an-tsaina, ny sasany dia nanapa-kevitra hanokana vola mba handraisana anjara isam-bolana amin’ny asa maneran-tany, tsy misy hafa amin’izay ataony amin’ny fandaniana ao amin’ny Efitrano Fanjakana. Manaiky izy ireo fa ireny vola ireny dia ampiasaina, tsy amin’ny famokarana zavatra vita an-tsoratra fotsiny, fa ho amin’ny lafiny rehetra amin’ilay asa koa. Alao sary an-tsaina ny soa lehibe ho azon’ny fitambaran-drahalahy maneran-tany misy antsika raha betsaka kokoa no mandray anjara tsy tapaka amin’izany fomba izany.
4 Fanampin’izany, dia afaka mizara amin’izy ireo isika amin’ny fahalalana ny antonona rehefa manafatra zavatra izay azontsika raisina mora foana. Ny tsy fanafarana afa-tsy izay tena ilaintsika dia mamela ireo rahalahintsika any an-toeran-kafa hahazo ireo fanomezana ara-panahy izay ilain’izy ireo koa mba hampahatanjaka azy hatrany sy mba hampandrosoany ny fitoriana ny vaovao tsara any amin’ny faritra misy azy eo amin’izao tontolo izao. — Heb. 13:16.
5 Tokony hotadidintsika ao an-tsaina indrindra izany rehefa manafatra zavatra izay andanian’ny Fikambanana vola be ny famokarana azy, isika. Anisan’izany ny vidéos, ny CD-ROM, ny boky fakan-teny lehibe, ny volumes reliés, ary ny famandrihana amin’ny cassettes nandraisana feo. Toy izay hanafatra zavatra iray ho an’ny mpianakavy tsirairay, ho afaka hianina amin’ny iray ihany ve ny fianakaviana manontolo? Raha ferantsika izay alaintsika ho an’ny tenantsika, izany dia hamela ny hafa mba hahazo ireny zavatra tsara ananantsika ireny koa. — Fil. 2:4.
6 Ny vidin’ny zavatra vita an-tsoratra apetratsika eny amin’ny saha dia misy azo onerana amin’ny fanomezana ho an’ny asan’ny Fikambanana maneran-tany atolotsika any amin’ny Efitrano Fanjakana, sy atolotr’ireo olona liana izay mandray azy ireny. Kanefa, raha ny amin’ny zavatra vita an-tsoratra hafarantsika mba hampiasaintsika manokana, anisan’izany ny fihirana, ny Diary, ny Baiboly de luxe, sy ny toy izany, dia tsy afaka manantena ny hisahanan’ny olona tsy mpikambana ny zavatra ilaintsika isika. Ny mpanompon’i Jehovah nanolo-tena no loharano voalohany indrindra iavian’io fanohanana ara-bola io. Amin’ny fanaovana izany ao an-tsaina, dia mpitory maro no manombana izay mety ho vidin’ireny zavatra ireny raha vokarina mba hamidy izy ireny, ary avy eo dia mandray anjara mifanaraka amin’izany izy ireo. Ohatra, ny Baiboly de luxe iray misy sisiny ranom-bolamena dia mety hitentina mora foana 80 000 FMG na mihoatra, ny boky fakan-teny lehibe iray dia mety hihoatra ny 16 000 FMG, ny kalandrie iray miloko fanao amin’ny rindrina dia mety ho lafo fara fahakeliny 20 000 FMG, ny encyclopédie iray ao anaty CD-ROM dia 200 000 FMG ka hatramin’ny 400 000 FMG na ambony kokoa noho izany, ny disque compact mirakitra mozika dia mitentina 80 000 FMG eo ho eo mazàna, ary ny vidéos sasany dia lafo lavitra noho izany matetika. Ny tsy fanaovana fanomezana ampy mba hanonerana ny lany, amin’ny farany, dia hametra izay mety ho azon’ny fandaminana tanterahina, raha tsy izany, ho fampandrosoana ny asa maneran-tany.
7 Nanambara i Jesosy fa ny tena mpianany dia ho fantatra mazava amin’ny fifankatiavany. (Jaona 13:34, 35). Ny fahalalahan-tanantsika amin’ny fanomezana eo amin’ny lafiny ara-nofo sy ny tsy fitiavantsika tena eo amin’ny fizarana amin’ny hafa araka izay ilainy, dia azo antoka fa fomba tsara dia tsara hanaporofoana fa Kristiana marina ny tenantsika.