Lesona Faha-5

Inona no Tian’Andriamanitra Hatao Amin’ny Tany?

Nahoana i Jehovah no namorona ny tany? (1, 2)

Nahoana no tsy paradisa ny tany ankehitriny? (3)

Hatao ahoana ny olona manao ratsy? (4)

Amin’ny hoavy, inona no hataon’i Jesosy ho an’ny marary? ny antitra? ny maty? (5, 6)

Mila manao inona ianao mba hahazoana ireo fitahiana ireo? (7)

1. Namorona ity tany ity i Jehovah mba hiainan’ny olombelona mandrakizay eto. Tiany hisy olo-marina sy sambatra foana hipetraka eto an-tany. (Salamo 115:16; Isaia 45:18) Tsy ho potika mihitsy ny tany, fa haharitra mandrakizay.—Salamo 104:5; Mpitoriteny 1:4.

2. Fony mbola tsy nanao ny olombelona Andriamanitra, dia nifidy faritra kely iray teto an-tany. Nataony lasa paradisa tsara tarehy izy io, ka nantsoiny hoe saha Edena. Tao no nametrahany ny lehilahy sy ny vehivavy voalohany, dia i Adama sy i Eva. Tian’Andriamanitra hiteraka izy ireo ka hameno ny tany manontolo. Tokony hanova tsikelikely ny tany manontolo ho paradisa izy ireo.—Genesisy 1:28; 2:8, 15.

3. Nanota i Adama sy i Eva rehefa ninia nandika ny lalàn’Andriamanitra. Koa noroahin’i Jehovah ho any ivelan’ny saha Edena izy ireo. Very ilay paradisa. (Genesisy 3:1-6, 23) Tsy hadinon’i Jehovah anefa ilay zavatra tiany hatao amin’ity tany ity. Mampanantena izy fa hataony tonga paradisa hiainan’ny olombelona mandrakizay ny tany. Ahoana no hanaovany izany?—Salamo 37:29.

4. Tsy maintsy esorina aloha ny olona manao ratsy, vao afaka ho tonga paradisa ity tany ity. (Salamo 37:38) Hitranga izany ao Haramagedona, dia ilay ady hamaranan’Andriamanitra ny faharatsiana. Avy eo dia hogadraina 1 000 taona i Satana. Midika izany fa tsy hisy olona manao ratsy ho tavela mba hanimba ny tany. Ny vahoakan’Andriamanitra ihany no ho tafita velona.—Apokalypsy 16:14, 16; 20:1-3.

5. Ho Mpanjakan’ity tany ity mandritra ny 1 000 taona i Jesosy Kristy amin’izay fotoana izay. (Apokalypsy 20:6) Hesoriny tsikelikely tsy ho ao amin’ny saintsika sy ny vatantsika ny ota. Ho lasa olombelona lavorary isika, toa an’i Adama sy i Eva talohan’ny nanotany. Tsy hisy intsony amin’izay ny aretina sy ny fahanterana ary ny fahafatesana. Ho sitrana ny marary, ary ho lasa tanora indray ny antitra.—Joba 33:25; Isaia 33:24; Apokalypsy 21:3, 4.

6. Hiasa mba hanova ny tany manontolo ho paradisa ny olona mahatoky, mandritra ny Fanjakana Arivo Taonan’i Jesosy. (Lioka 23:43) Hisy maty an-tapitrisany maro koa hatsangana mba hiaina eto an-tany. (Asan’ny Apostoly 24:15) Raha manao izay takin’Andriamanitra izy ireo, dia hiaina eto an-tany mandrakizay. Raha tsy izany, dia horinganina mandrakizay izy ireo.—Jaona 5:28, 29; Apokalypsy 20:11-15.

7. Amin’izay ny tany dia ho araka ilay tian’Andriamanitra hanaovana azy tany am-boalohany. Ho tianao ve ny hahazo ireo fitahiana ireo? Raha eny, dia mila manohy mianatra momba an’i Jehovah sy manao izay takiny ianao. Hanampy anao hanao izany ny fanatrehana fivoriana any amin’ny Efitrano Fanjakanan’ny Vavolombelon’i Jehovah, ao amin’ny faritra misy anao.—Isaia 11:9; Hebreo 10:24, 25.

[Sary, pejy 10]

Paradisa very

[Sary, pejy 11]

Hovana ho paradisa ny tany aorian’ny Haramagedona