Ry Tanora — Inona avy Ireo Tanjonareo Ara-panahy?
1 Fantatr’i Jehovah fa zava-dehibe ny asa misy heviny sy ny tanjona azo tratrarina mba hahazoana fahasambarana. (Jereo ny Genesisy 1:28; 2:15, 19.) Amin’izao andro izao, dia nanome ho an’ny vahoakany ny fanendrena hitory sy hampianatra i Jehovah. Manana ny tanjona farany, dia ny hanatratra ny fiainana mandrakizay ao amin’ny Paradisa koa isika. Mandra-pahatongan’izany, dia mila mametra tanjona ara-panahy miandalana isika, raha tsy tiantsika ho diso fiantefa ny herintsika sy ny fananantsika. — 1 Kor. 9:26.
2 Tanjona mifanaraka amin’ny zava-misy ho an’ny tanora: Tokony hanana tanjona teokratika izay azony tratrarina, mifanaraka amin’ny fahaizany manokana, ny tanora. (1 Tim. 4:15). Ny ankizikely sasany dia nahavita nitadidy an-kandrina ireo boky ao amin’ny Baiboly, na dia talohan’ny nahaizany namaky teny aza. Amin’ny alalan’ny fianaram-pianakaviana, dia mianatra miomana ho amin’ny fivoriana ny ankizy, mba hahafahany hanatratra ny tanjona ny amin’ny fanomezana valin-teny misy heviny ary hisoratra amin’ny Sekolin’ny Fanompoana Teokratika. Rehefa miaraka amin’ny ray aman-dreniny eo amin’ny fanompoana eny amin’ny saha ny ankizy, dia mianatra mandray anjara amin’ny fitoriana eo am-pandrosoany mba ho tonga mpitory tsy vita batisa. Tokony hoantitranterin’ny ray aman-dreny amin’ny zanany kely ny tanjona ny amin’ny fanoloran-tena sy ny batisa.
3 Raha zatovo ianao, inona avy no tafiditra amin’ireo tanjonao ara-panahy? “Tsarovy ny Mpanao anao amin’ny andro fahatanoranao”, amin’ny fampifantohana ny saina amin’ireo tanjona tena lehibe eo amin’ny fiainana. (Mpit. 12:1; Sal. 71:17). Nahoana raha manao ny asan’ny mpisava lalana mpanampy mandritra ny vakansy? Efa noeritreretinao ve ny hanomboka ny fanompoana manontolo andro, ka ho mpisava lalana maharitra? Ahoana ny amin’ny fianarana fiteny vaovao iray mba hanampiana groupe na kongregasiona iray miteny vahiny ao amin’ny faritra misy anao na any an-toeran-kafa, amin’ny hoavy? Maro amin’ireo izay manompo any amin’ny Betela na mpiandraikitra mpitety faritany na misionera ankehitriny, no nametra ho tanjony ny fanompoana manontolo andro manokana, fony izy mbola tany an-tsekoly. Nahoana ny tenanao raha manao toy izany koa?
4 Na dia mbola kely aza ianao, dia mikeleza aina mba hanahaka ny ohatr’i Jesosy. Vonona ny hiresaka momba ireo zavatra ara-panahy izy, na dia mbola vao 12 taona aza. (Lioka 2:42-49, 52). Ny famerana tanjona mahasoa ho an’ny tenanao mba hanao fianarana manokana, hamaky ny Baiboly isan’andro, sy hifanerasera tsy tapaka amin’ireo Kristiana matotra any amin’ny fivoriana sy eo amin’ny fanompoana, dia hanampy anao hahay hampianatra ny hafa momba ny Fanjakan’Andriamanitra, araka ny nataon’i Jesosy.