Fivoriamben’ny Distrika sy Iraisam-pirenena 1998 “Fomba Fiaina Araka An’Andriamanitra”
1 Mampahatsiahy antsika ny Ohabolana 10:29 fa ny “làlan’i Jehovah dia fiarovana mafy”. Foto-kevitra mifanentana amin’ny fivoriamben’ny distrika amin’itỳ taona itỳ — “Fomba Fiaina Araka An’Andriamanitra” re izany! Ahoana indrindra no hamelabelarana io foto-kevitra io mandritra ny fandaharana telo andro? Isika rehetra dia miandrandra amim-panantenana mafy ny zavatra nomanina ho antsika.
2 Ary hisy hevi-dehibe hasongadina. Mety hisy misionera sy mpanompo iraisam-pirenena ary mpanompo hafa ivelan’ny taniny hanatrika ny fivoriambenao. Antenaina fa hisy solontena an’arivony maro avy any amin’ny tany hafa ho tonga any amin’ny tanàna hanaovana ny fivoriambe iraisam-pirenena. Angamba hifankahita amin’ny sasany amin’ireny mpitsidika ireny ianao. Ny fandaharan’ny fivoriambe dia hanasongadina tatitra momba ny fomba itahian’i Jehovah ny asa any amin’ny faritany maro samihafa.
3 Mendrika ny hatao ny ezaka mba hanatrehana: Maro amin’ireo rahalahintsika atsy Afrika no nahita fahasarotam-piainana noho ny ady sy ny tabataba nitranga tany amin’ny faritra sasany. Mihevitra ireo fivoriamben’ny vahoakan’i Jehovah ho zava-dehibe iankinan’ny ainy izy ireo. Tsy maintsy mandeha an-tongotra lavitra be ny sasany mba hanatrehana fivoriambe iray, nefa dia tsy hieritreritra ny hanapaka na dia iray aza izy ireo. Ny rahalahy iray 73 taona, any amin’ny Repoblika Demokratikan’i Congo (Zaïre taloha), dia nandeha an-tongotra 450 kilaometatra teo ho eo mba hanatrehana fivoriambe. Tonga 16 andro taorian’ny niaingany izy, nivonto ny tongony, nefa faly izy tonga tany. Taorian’ny fivoriambe, dia dibo-kafaliana sy nohatanjahina ara-panahy izy, ary niverina an-tongotra tany aminy. Izany no fahazarany efa hatramin’ny taona maro!
4 Tany Mozambika, ny mpiandraikitra ny distrika iray sy ny vadiny dia nananika tendrombohitra iray avo be sy namakivaky an-tongotra faritra midadasika iray toy ny efitra mba hanatrehana fivoriamben’ny fizaran-tany. Nanao dia 90 kilaometatra tao anatin’ny 45 ora izy ireo. Nahazo fampaherezana lehibe tamin’ny ohatra tsaran’io mpivady io ny rehetra izay nanatrika. Nanao ezaka nitovy tamin’izany ny fianakaviana maro tonga teo. Nanao tatitra ilay mpiandraikitra ny distrika fa ny rahalahy sasany, anisan’izany ny iray izay 60 taona, dia nanao dia an-tongotra 200 kilaometatra!
5 Efa nanao fandaharana mialoha voafaritra tsara ve ianao mba hanatrehana ny fivoriambe amin’itỳ taona itỳ? Toa tsy ho voatery handeha an-tongotra lavitra ianao, nefa misy ezaka sy sorona tena ilaina hataonao, mba hanatrehanao sy ny fianakavianao izany. Manaova fandaharana mba hanatrika ny fandaharana iray manontolo, manomboka amin’ny voalohany ka hatramin’ny farany. Mpianatra Baiboly maro no mandroso ho amin’ny fanoloran-tena. Hanampy azy ireo hanao ny fanapahan-kevitra mety ny fanatrehan’izy ireo ny fivoriamben’ny distrika. Efa nanasa ireo miara-mianatra Baiboly aminao sy ny olona liana hafa mba hiara-manatrika aminao ve ianao?
6 Fandaharana telo andro: Ny fandaharana amin’itỳ taona itỳ dia hatao ao amin’ny fivoriambe 10 eto Madagasikara. Ho fanampin’ny fivoriambe hatao amin’ny teny malagasy, dia hisy iray amin’ny teny frantsay. Ny Fanompoantsika Ilay Fanjakana Martsa 1998, dia manome lisitry ny daty sy ny toerana hisy ireny fivoriambe ireny. Amin’izao fotoana izao ianao dia efa nampahafantarina ny amin’ilay fivoriambe izay nanendrena ny kongregasionanao.
7 Fanamarihana manokana: Zava-dehibe indrindra ny hanatrehanao ilay fivoriambe izay nanendrena ny kongregasionanao. Aza mikasa ny hanatrika ny iray amin’ireo fivoriambe iraisam-pirenena raha tsy notendrena ho any ny kongregasionanao. Ny toerana hanaovana ny fivoriambe iraisam-pirenena dia tsy hahazaka an’ireo rehetra haniry hanatrika any akory. Ny fanajan’ny tenanao manokana sy ny fanarahanao ireny fandaharana ireny dia hanome toky fa hatao amin’ny fahamendrehana sy ny filaminana ny zavatra rehetra. — 1 Kor. 14:33, 40.
8 Hanomboka amin’ny 9 ora sy sasany maraina ny fandaharana ny zoma sy ny asabotsy ary ny alahady. Hifarana amin’ny 5 ora tolakandro ny fandaharana ny zoma sy ny asabotsy, ary amin’ny 4 ora tolakandro ny alahady. Isan’andro dia ho azo idirana ny toerana amin’ny 8 ora maraina. Ireo manana asa nanendrena azy ihany no homen-dalana hiditra aloha kokoa. Kanefa, tsy hisy olona homen-dalana hamandrika toerana raha tsy aorian’ny amin’ny 8 ora maraina.
9 Rehefa manao dia mandroso sy miverina any amin’ilay fivoriambe isika, dia tokony hitady fahafahana hanao fanambarana tsy ara-potoana. Mety ho liana amin’ny hafatra momba ilay Fanjakana ny mpivaro-dasantsy sy ny mpivarotra an-trano na eny amoron-dalana ary ny mpiasan’ny hotely. Miomàna ho amin’izany amin’ny fitondrana taratasy mivalona, gazety farany, bokikely, na zavatra vita an-tsoratra hafa any aminao, mba hahafahanao hanararaotra ny fahafahana hanao fanambarana amin’ny olona izay mety tsy handre ny vaovao tsara raha tsy amin’izany fomba izany. — 2 Tim. 3:17.
10 “Tandremo ny fihainoanareo”: Haneho fahendrena ireo mpanatrika ny fivoriambe, amin’ny fanarahana ilay torohevitra hita ao amin’ny Lioka 8:18. Ampirisihina ny rehetra hitondra Baiboly, ary koa fihirana sy fandraisana an-tsoratra. Henoy amim-pitandremana ny hevitra fototra avy amin’ny lahateny tsirairay, ary mandraisa naoty fohy. Manontania tena ny amin’ny fomba ahafahanao manao fampiharana manokana ilay zavatra renao. Isan’alina, mandritra ny fivoriambe, alohan’ny hatorianao, nahoana raha mijery indray ny naotinao ary mamakafaka raha manaraka akaiky ny fomba fiaina araka an’i Jehovah ny tenanao. — Ohab. 4:10-13.
11 Voamarika fa nandritra ny fotoam-pivoriana, dia nandao ny faritry ny fivoriambe ny sasany, ka tsy nanaraka ny fandaharana. Nisy hafa voamarika ho nandehandeha tsy amin’antony teny amin’ny lalan’ny olona, raha tokony ho nipetraka sy nihaino izy ireo. Nisy antokona tanora hita nandao ny toeram-pivoriambe nandritra ny tolakandro. Nanao fahadisoana lehibe teo amin’ny fiainany ny mpanompon’i Jehovah sasany tamin’ny lasa, satria tsy nihaino tamim-pitandremana ny fampahatsiahivan’i Jehovah. Azo antoka fa haniry hanalavitra ny fanaovana fahadisoana toy izany isika. (2 Mpanj. 17:13-15). “Ny mpanompo mahatoky sy malina” dia nanomana fampianarana izay ilaintsika rehetra. Tena zava-dehibe indrindra ny ‘tokony hitandremantsika mafimafy kokoa izay efa rentsika’ mandritra ny fotoam-pivoriana tsirairay amin’ny fandaharam-pivoriambe telo andro. Hisy zavatra mahaliana antsika manokana hasongadina isan’andro, anisan’izany ny filazalazana izay azo antoka fa hisy vokany tsara eo amin’ny fomba fiainantsika amin’ny hoavy. Amin’ny fihainoantsika tsara sy amin’ny fampiasantsika amin’ny fomba feno ireo fanomezana ara-panahy avy amin’i Jehovah any amin’ny fivoriambe ho avy, dia hiorina mafy ny fanantenantsika “fandrao hindaosina hiala” amin’ny fomba fiaina araka an’Andriamanitra isika. — Matio 24:45, NW; Heb. 2:1.
12 Fitafiana izay manome voninahitra an’i Jehovah: Amin’izao andro sarotra izao dia ilaintsika ny maneho fitandremana mihoatra noho ny mahazatra mba tsy hanan-kery eo amintsika ny toe-tsain’itỳ tontolo itỳ. (1 Kor. 2:12). Ny fitafiantsika sy ny fisehoantsika ankapobe dia tokony hanome taratry ny fahamendrehan’ilay Andriamanitra ivavahantsika. (1 Tim. 2:9, 10). Tsy takina ny fitafiana lafo vidy mba ho anisan’ireo izay “hampahamendrika ny fampianaran’Andriamanitra, Mpamonjy antsika”. (Tit. 2:10). Mariho ny torohevitra faran’izay tsara azo ampiharina sy araka ny Soratra Masina ao amin’ny Tilikambo Fiambenana 15 Jona 1997, pejy 17 sy 18, fehintsoratra 14-18. Aza hamaivanina na oviana na oviana ny fanambarana mahery azontsika atao amin’ny fiakanjoana amin’ny fomba manome voninahitra an’i Jehovah.
13 Nitantara ny Vavolombelona iray 16 taona, fa rehefa nandeha tany amin’ny hotely fisakafoana izy sy ny anadahiny indray hariva taorian’ny fotoam-pivoriana, dia nahamarika izy ireo fa ireo rahalahy sy anabavy sasany izay tany dia nisolo akanjo ka nanao fitafiana tsy nety. Kanefa, nanana fihetsika tsara tamim-pankasitrahana ny tompon’ilay hotely fisakafoana tamin’ny fahitana Vavolombelona nitafy tamin’ny fomba nilamina sy tamin’ny fomba nety, ary nanao insignes. Izany dia nanokatra ny lalana ho amin’ny fanaovana fanambarana tamin’ny sasany tamin’ireo tompon’ny hotely fisakafoana.
14 Fitondran-tena izay midera an’i Jehovah: Fantatsika fa ny fitondran-tenantsika kristiana dia afaka ny hisy fiantraikany eo amin’ny fomba fijerin’ny hafa ny fanompoam-pivavahana marina. Noho izany, dia irintsika ny hitondra tena amin’ny fomba mendrika ny vaovao tsara sy mitondra fiderana an’i Jehovah amin’ny fotoana rehetra. — Fil. 1:27.
15 Tamin’ny taon-dasa, dia natao voalohany tany avaratr’i Angola ny fivoriamben’ny distrika iray. Tamin’ny andro faharoa tamin’ilay fivoriambe, dia nirahina teny amin’ilay toerana fanaovana ny fivoriambe ny polisy roa teo an-toerana, mba hitandroana ny filaminan’ny vahoaka. Nijanona tontolon’ny andro tany izy ireo. Ny hariva, dia nilaza teny fiderana noho izay reny sy ny fihetsika nilamina hitany izy ireo. Hoy ny fanazavan’ny iray tamin’izy ireo: “Nahoana àry izahay no nirahina tatỳ? Fantatray fa mihazona ny filaminana ny Vavolombelon’i Jehovah any amin’ireo fivoriany.”
16 Ny mpikambana iray tao amin’ny antoko ara-politika iray tatsy Afrika dia nandositra tany Eoropa, rehefa novonoina ho faty ny mpikambana hafa rehetra tao amin’ny antoko nisy azy. Nahita zava-nanahirana manokana maro izy, ka nanjary kivy be. Tamin’ny farany, dia nanaiky fampianarana Baiboly izy. Fony nanatrika voalohany ny fivoriamben’ny distrika izy, dia nampiaiky volana azy ny olona avy tamin’ny fiaviana maro samihafa niara-nivory tamim-piadanana sy firindrana. Niaiky izy fa nahita ny fahamarinana, ary nandritra izany fivoriambe izany, dia nanapa-kevitra ny hanapaka ny fifandraisany rehetra tamin’ny politika izy. Tatỳ aoriana, dia natao batisa izy, ary manompo an’i Jehovah izao izy sy ny zanany.
17 Inona no ho vokatry ny fitondran-tenantsika any amin’ny fivoriambe amin’itỳ taona itỳ eo amin’ireo izay mety hanatrika fivoriambe voalohany? Ho voamarik’izy ireo ve ilay toe-tsaina tia fiaraha-miasa miharihary rehefa miara-manao fanompoana an-tsitrapo isika? Hampiaiky volana azy ireo ve ny fahadiovan’ny faritra manodidina antsika sy ny fahitany fa, alohan’ny handaozana ny toeram-pivoriambe, isika sy ny zanatsika dia mitsimpona ireo fako izay mety ho niangona teo akaikin’ny toerantsika? Ho voadinik’izy ireo ve ny fitondran-tenantsika tsara rehefa hivezivezy eo amin’ny toerana hilasiantsika sy ny toeran’ny fivoriambe isika? Ho voamarik’izy ireo ve fa amin’ny maha-ray aman-dreny antsika, dia manara-maso akaiky ny zanatsika amin’ny fotoana rehetra isika? Aoka isika hahazo antoka fa hamela ny soritra tsara indrindra araka izay azo atao amin’izay rehetra mandinika antsika isika.
18 Fisahanana ireo fandaniana amin’ny fivoriambe: Ho lafo ny tapakila fidirana hijery fanatanjahan-tena na fampisehoana hafa any amin’ny kianja na ny trano fanaovana fivoriambe iray ankehitriny. Ny antony iray dia ny fiakaran’ny hofan-trano any amin’ny faritra an-tanàn-dehibe. Nanaraka foana ny hoe “tsy misy vidim-pidirana, tsy misy rakitra” ny Fikambanana, tany amin’ireo fivoriambe. Ahoana àry no hisahanana ny fanofana sy ny fandaniana hafa amin’ny fivoriambe? Amin’ny alalan’ny fanomezana amim-pahalalahan-tanan’ireo mpanatrika. Matoky izahay fa haneho fahalalahan-tanana toy izay nasehon’ireo mpanompon’Andriamanitra tamin’ny lasa koa ianareo, ho fanahafana an’i Jehovah Andriamanitra sy i Jesosy Kristy. (2 Kor. 8:7). Hisy fitandremana lehibe hatao mba hahazoana antoka fa ny fanomezana rehetra dia ho ao amin’ny toerana azo antoka, sy ho voaray an-tsoratra, ary hampiasaina amin’izay nikendrena azy. Ny fanomezana rehetra atao amin’ny alalan’ny seky dia tokony ho amin’ny anaran’ny “Vavolombelon’i Jehovah”.
19 Toerana ipetrahana: Mbola mihatra ihany ireo toromarika nomena efa hatramin’ny taona maromaro hoe: IREO HAVANA AKAIKY SY IZAY METY HIRAY FIARA AMINAO IHANY NO AZONAO AMANDRIHANA TOERANA. Nahafinaritra ny nahita fihatsarana lehibe tamin’io lafiny io, ary izany dia nanatsara ny rivo-piainana feno fitiavana naseho tany amin’ireo fivoriambe. Any amin’ny ankabeazan’ireo fivoriambe dia misy toerana ipetrahana mora idirana kokoa noho ny hafa. Mba manehoa fiheverana, ka avelao ireo toerana tsy mampananosarotra kokoa ho an’ireo be taona sy ny hafa mila azy ireny. Tadidio fa ny ‘fitiavana tsy mitady ny azy’. — 1 Kor. 13:4, 5; Fil. 2:4.
20 Fakan-tsary sy caméscopes ary magnétophones: Azo atao ny mampiasa fakan-tsary sy fitaovana hafa fakana feo sy sary any amin’ireo fivoriambe. Kanefa, tsy tokony hanelingelina ny hafa ny fampiasanao azy ireny. Ny fivezivezena maka sary mandritra ny fotoam-pivoriana dia hanelingelina ny hafa izay miezaka mifantoka amin’ny fandaharana. Tsy tokony hisy fitaovana fakana feo na inona na inona hampifandraisina amin’ny fanamafisam-peon’ny fivoriambe, no sady tsy tokony hisy hanakantsakana ny lalan’ny olona na ny fahitan’ny hafa.
21 Fitsaboana vonjimaika: Natao ho an’ny toe-javatra ilana fitsaboana vonjimaika ihany io Sampan-draharaha io. Mitondrà ny aspirines hilainao, fanafody fandevonan-kanina, fitaovana fanaovana pansement, paingo-jaza sy ny toy izany, satria tsy hisy an’ireo zavatra ireo any amin’ny fivoriambe. Ny olona fantatra fa hihetsika ny androbeny, na hypoglycémie avy amin’ny insuline (fanafodin’ny diabetika), na ny aretim-po, sy ny sisa, dia tokony hitondra miaraka aminy ny fanafody hilainy. Tokony hisy mpianakavy na mpikambana ao amin’ny kongregasiona mahafantatra ny toe-javatra misy azy, hiaraka aminy ary ho afaka hanome fanazavana raha sendra misy hilana izany. Nisy zava-nanahirana nipoitra tany amin’ny fivoriambe, rehefa navela ho irery ny olona nanana aretina nitaiza ka nanjary narary. Raha tsy manana mpianakavy afaka manampy azy ireo izay mila fitsaboana manokana, dia hilaina hampahafantarina ny amin’ilay toe-javatra ireo loholona ka hanao fandaharam-panampiana ilaina. Tsy hety ny hanaovana fandaharana any amin’ny fivoriambe mba hisian’ny toerana manokana ho an’ireo izay manana aretina mitaiza sy tsy fahazakan-javatra.
22 Sakafo any amin’ny fivoriambe: Ny mpanatrika tsirairay dia tokony hitondra ny sakafony fa tsy handao ilay toerana mandritra ny fiatoana amin’ny antoandro mba hividy zavatra any ivelany. Azo inoana fa ho ampy ny sakafo maivana tsotra izay mahasoa sy mora entina. Manome hevitra sasany ny amin’izay zavatra azo entina Ny Fanompoantsika Ilay Fanjakana May 1995, fehintsoratra faha-25. Tsy azo atao ny mitondra zava-pisotro misy alkaoka any amin’ny toerana hanaovana ny fivoriambe. Misy mpanatrika sasany mihinana sy misotro mandritra ilay fandaharana. Tsy fanehoam-panajana ilay fisehoan-javatra izany.
23 Toy inona moa ny hafaliantsika satria hanomboka tsy ho ela ny Fivoriamben’ny Distrika 1998 “Fomba Fiaina Araka An’Andriamanitra”! Efa vitanao ve ny fandaharanao mialoha mba hanatrehana? Enga anie ho tonga soa aman-tsara any ianao ary hahazo famelombelomana rehefa hody, ka ho tapa-kevitra ny handroso hatrany eo amin’ny fanompoana an’i Jehovah sarobidy ary hanohy hanaraka ny fomba fiaina araka an’Andriamanitra, ho fitahiana anao mandrakizay.
[Efajoro, pejy 6]
Fampahatsiahivana ny Amin’ny Fivoriamben’ny Distrika
▪ Batisa: Ireo mpilatsaka hatao batisa dia tokony hipetraka eo amin’ny faritra voatondro ho azy ireo, alohan’ny hanombohan’ny fandaharana ny asabotsy maraina. Izay mikasa ny hatao batisa dia tokony hitondra maillot de bain maotina sy lamba famaohana. Tamin’ny lasa, dia nanao karazam-pitafiana tsy mendrika, ka tsy nampifantoka ny saina ho amin’ilay fisehoan-javatra, ny sasany. Tokony hataon’ireo loholona izay miara-mandinika ireo fanontaniana ao amin’ny boky Ny Fanompoantsika amin’ny mpilatsaka hatao batisa azo antoka fa mahatakatra ireo hevitra ireo ny tsirairay. Ny batisa ho mariky ny fanoloran-tenan’ny olona iray, dia raharaha manokana eo aminy sy i Jehovah. Araka izany, dia tsy mety ny hifampisakambinana na hifampitantanan’ny mpilatsaka hatao batisa eo am-panaovana batisa azy ireo.
▪ Insignes: Mba anaovy amin’ny fotoana rehetra, aza fady, ny insigne natao ho an’ny 1998, ao amin’ny tanàna hanaovana ny fivoriambe ary mandritra ny dianao mandroso sy miverina avy any. Matetika izany no manome antsika fahafahana hanao fanambarana tsara dia tsara. Tokony horaisina amin’ny alalan’ny kongregasionanao ny insigne sy ny tranony, satria tsy hisy any amin’ny fivoriambe. Aza miandry andro vitsivitsy alohan’ny fivoriambe vao hangataka insignes ho anao sy ny fianakavianao. Tadidio ny hitondra ny karatrao tsy lany andro hoe Fitakiana Mialoha Ara-pitsaboana/Fanalana Andraikitra.
▪ Filasiana: Rehefa mangataka filasiana ianao, dia aoka hazava tsara ny daty hahatongavanao sy hiainganao, ny isan’ny olona hiaraka aminao sy ny taonan’izy ireo avy. Lazao raha vita batisa na tsia izy ireo sy ianao koa.
▪ Fanompoana an-tsitrapo: Afaka manokana fotoana sasany ve ianao eny amin’ny fivoriambe mba hitondrana fanampiana ao amin’ny iray amin’ireo sampan-draharaha? Tena hilaina sady hitondra fahafaham-po lehibe ho an’ny tenanao ny fanompoana an’ireo rahalahinao, na dia ora vitsivitsy monja aza. Raha afaka manampy ianao, dia iangaviana mba hanatona ny Sampan-draharahan’ny Fanompoana An-tsitrapo any amin’ny fivoriambe. Afaka mandray anjara ireo ankizy latsaka ny 16 taona, amin’ny fiasana miaraka amin’ny rainy na ny reniny na ny olon-dehibe hafa mahay mandray andraikitra.
▪ Teny fampitandremana: Ataovy azo antoka fa mihidy ny fiaranao amin’ny fotoana rehetra, ary aza mamela mihitsy zavatra hitan’ny maso ao anatiny, ka haka fanahy olona hamaky ilay fiara. Ireo mpangalatra sy mpangarom-paosy dia voasarik’ireo fihaonambe. Tsy ho fahendrena ny hamela zavatra sarobidy eo amin’ny toeranao. Tsy afaka mahazo antoka ianao fa Kristiana avokoa ny olona rehetra manodidina anao. Nahoana no hampiditra olona amin’ny fakam-panahy? Nisy tatitra voaray nilazana fa nisy olona avy tany ivelany nanandrana nitaona tamim-pitaka ankizy kely ho eny ivelany. ARAHO MASO IREO ZANAKAO AMIN’NY FOTOANA REHETRA.
▪ Firarian-tsoa: Raha tsy misy antony manokana, dia tsy hovakina ireo firarian-tsoa avy amin’olona manokana. Azo vakina kosa anefa ireo firarian-tsoa avy amin’ireo sampana na fivoriambe hafa. Raha ampy ny fotoana, dia hovakina ny firarian-tsoa avy amin’ireo kongregasiona.