Tahafo ny Tsy Fizahan’i Jehovah Tavan’olona
1 Miahy ny olona i Jehovah. Ekeny tsy misy fizahan-tavan’olona na iza na iza manao ny sitrapony. (Asa. 10:34, 35). Fony i Jesosy nitory tamin’ny olona, dia tsy nizaha tavan’olona toy izany koa izy. (Lioka 20:21). Mila manahaka ny ohatr’izy ireo isika, tahaka ny nataon’i Paoly, izay nanoratra hoe: “Iray ihany no tompon’izy rehetra, sady manan-karena homeny izay rehetra miantso Azy Izy.” — Rom. 10:12.
2 Ny fanambarana ny vaovao tsara momba ny Fanjakan’Andriamanitra amin’izay rehetra hitantsika, dia mitondra voninahitra ho an’Andriamanitra. Tsy maintsy manohy mizara an’io hafatra mahatalanjona io amin’ny hafa isika, na inona na inona firazanany, toerany ara-tsosialy, fanabeazana azony, na vola ananany. (Rom. 10:11-13). Izany dia midika hoe mitory amin’ireo maniry hihaino — lehilahy, vehivavy, tanora, ary zokiolona. Mila mitsidika isam-baravarana isika, mba hanomezana ho an’ny tompon-trano tsirairay ny fahafahana handre ny fahamarinana.
3 Manehoa fiahiana ny olona rehetra: Ny tanjontsika dia ny hiresaka amin’izay rehetra azontsika iresahana. Nitadidy izany ny mpitory sasany, ka nahita fahombiazana tamin’ny fitoriana tamin’ny olona tao amin’ny biraon’ny dokotera, ny hopitaly, ny trano fitaizana ny be antitra, ny biraon’ny fanampiana ara-tsosialy, ary ny foibe fanarenana. Fanampin’izany, ireo mpitory dia nitory tamin’ny mpikarakara fandevenana sy ny tale sy mpanolo-tsain-tsekoly, ary ny mpitsara. Rehefa manatona manam-pahefana, dia mety ny maneho fankasitrahana azy ireo, noho ny asa soa ataony eo amin’ny fiaraha-monina. Manehoa fanajana ary mifantena lahatsoratra tonga amin’ny fotoana ilana azy, izay mivaofy indrindra ny karazan’asany sy ny zava-manahirana mifandray amin’izy io.
4 Ny anabavy iray, ohatra, dia nahavita niresaka tamin’ny mpitsara iray tao amin’ny biraony. Taorian’ny resaka nafana iray, dia tsy nisalasala nilaza ilay mpitsara hoe: “Fantatrao ve hoe inona no tiako amin’ny Vavolombelon’i Jehovah? Manana foto-pitsipika mafy orina, izay tsy ialany mihitsy, izy ireo.” Fanambarana tsara dia tsara no natao tamin’io olona nanam-pahefana be io.
5 Tsy afaka mamaky ny ao am-pon’ny olona isika. Kanefa, rehefa miresaka amin’izay rehetra sendra antsika isika, dia mampiseho ny finoantsika ny fahaizan’i Jehovah mitarika ny asantsika. Fanampin’izany, dia manome ho an’ny olona ny tombontsoa hihaino sy hanaiky ilay hafatra momba ny fanantenana izany. (1 Tim. 2:3, 4). Aoka àry isika hampiasa amim-pahendrena ny fotoanantsika, ary hiezaka mafy hanahaka ny tsy fizahan’i Jehovah tavan’olona, amin’ny fitondrana ny vaovao tsara any amin’ny olona rehetra hitantsika. — Rom. 2:11; Efes. 5:1, 2.