Ny Sekolin’ny Fanompoana Teôkratika Amin’ny Taona 2000
1 Hita ho fitahiana tondraka ho an’ny vahoakan’i Jehovah ny Sekolin’ny Fanompoana Teôkratika. Nandritra ireo 50 taona mahery lasa, dia nanampy olona an-tapitrisany maro mba hampitombo ny fahaizany ho mpandahateny sy mpampianatra ny fahamarinana ara-baiboly, izy io. (Sal. 145:10-12; Matio 28:19, 20). Hitanao ve fa nanampy anao ilay sekoly? Afaka ny ho toy izany ihany izy io, mandritra ny taona 2000, raha mandray anjara feno sy mampihatra ny torohevitra omeny ianao.
2 Misy toromarika momba ny anjara sy ny zavatra vita an-tsoratra hampiasaina, hita ao amin’ny pejy voalohany ao amin’ilay fandaharana amin’ny sekoly ho amin’ny taona 2000. Tondroina ao ny fotoana hanaovana ny anjara tsirairay, ny loharanon-kevitra, ny fomba tokony hampisehoana ilay fanazavana, ary ny tsipiriany hafa. Manokàna fotoana hamakiana amim-pitandremana ireo toromarika ireo, ka ampiharo izy ireny.
3 Famakiana Baiboly isan-kerinandro: Misy fandaharam-pamakiana Baiboly isan-kerinandro roa miavaka tsara, hita ao amin’ny fandaharan’ny sekoly. Ny iray dia ilay fandaharam-pamakiana mahazatra, izay amakiana pejy dimy eo ho eo amin’ny Baiboly. Miorina amin’io famakiana io ny hevitra misongadina ao amin’ny Baiboly. Ilay fandaharam-pamakiana hafa dia fanampiny ary amakiana avo roa heny noho ilay voalohany. Amin’ny fanarahana io fandaharana io, dia ho afaka hamaky ny Baiboly iray manontolo ao anatin’ny telo taona ianao. Takatra fa mety haniry hamaky mihoatra noho izay ao amin’ilay fandaharana fanampiny ny sasany, ary ny hafa kosa mety tsy haharaka azy io. Mifalia amin’izay vitanao, fa aza mampitaha ny tenanao amin’ny hafa. (Gal. 6:4). Ny zava-dehibe dia ny hamakiana ny Tenin’Andriamanitra isan’andro. — Sal. 1:1-3.
4 Mba hisoratana anarana amin’ny Sekolin’ny Fanompoana Teôkratika, dia tokony hiresaka amin’ny mpiandraikitra ny sekoly ianao. Aoka ianao hihevitra ny anjaranao ho zava-dehibe, ary aza manafoana izany tsy amin’antony. Hevero ho toy ny fandaharana avy amin’i Jehovah ilay sekoly. Miomàna tsara, fantaro tsara ilay zavatra nanendrena anao, mitenena avy amin’ny fo, ary mandraisa soa feno avy amin’io sekoly tsy manam-paharoa io.