Aoka Isika Hikojakoja Tsara Hatrany ny Toeram-pivavahantsika
1 Misy 94 000 mahery ny fiangonan’ny Vavolombelon’i Jehovah maneran-tany. Ny ankamaroan’izy ireny dia miara-mianatra Baiboly sy mifanerasera any amin’ny Efitrano Fanjakana, izay ampiasaina ho foiben’ny fivavahana madio eo an-toerana.
2 Fandaharam-panadiovana tsy tapaka: Tapany lehibe amin’ny fanompoana masina ataontsika ny fikojakojana ny Efitrano Fanjakana. Milaza toy izao ny boky Ny Fanompoantsika, eo amin’ny pejy faha-61: “Tokony hoheverin’ireo rahalahy ho tombontsoa ny fahafahana atolotra azy, handray anjara amin’ny fikarakarana [ny Efitrano Fanjakana], tsy eo amin’ny lafiny ara-bola ihany, fa amin’ny filatsahana an-tsitrapo koa mba hanao ny asa ilaina rehetra mba hampahadio sy mahafinaritra ary tsara azy foana. Tokony hampiseho amim-pahamendrehana ny fandaminan’i Jehovah ny Efitrano Fanjakana amin’ny endriny anatiny sy ivelany.” Mila diovina sy kojakojaina tsy tapaka ny Efitrano Fanjakana, satria ampiasaina matetika ao anatin’ny herinandro. Olona avy amin’ny fiangonana mampiasa ilay Efitrano Fanjakana mazàna, no manolo-tena hisahana izany. Tokony hazoto ‘hanamboatra sy hanamafy’ ny toeram-pivavahany ny mpanompon’i Jehovah ankehitriny, toy ny tamin’ny andron’ny Baiboly.—2 Tant. 34:10.
3 Tokony hapetaka eo amin’ny tabilao misy ny filazana, ny fandaharam-panadiovana ny Efitrano Fanjakana isan-kerinandro. Tokony hifandimby hanadio azy io isan-kerinandro ny fianarana boky rehetra, ary hanaraka ny lisitr’ireo zavatra tokony hatao. Izay rehetra afaka dia tokony handray anjara amin’izany tombontsoa izany, mba hadio sy ho mendrika foana ny Efitrano Fanjakana. Afaka mandray anjara koa ny ankizy, fa mila manara-maso azy ny ray aman-dreniny. Hampianatra azy ireo hankasitraka io tombontsoa io izany. Zava-dehibe ny fiaraha-miasa, indrindra rehefa mampiasa Efitrano Fanjakana iray ihany ny fiangonana maromaro. Tsy olona vitsivitsy fotsiny amin’izay no hanatontosa io lafiny lehibe amin’ny fanompoantsika io. Raha maromaro ny fiangonana mampiasa ny Efitrano Fanjakana, dia afaka mifandimby izy ireo manadio azy io isam-bolana. Azo apetaka eo amin’ny tabilao misy ny filazana, ny fandaharam-potoana momba izany.
4 Azo apetaka eo akaikin’ny fasiana ny fitaovana, ny lisitr’ireo zavatra tokony hatao. Tokony hanazava ireo asa tokony hatao isan-kerinandro io lisitra io. Anisan’izany ny fanadiovana ny varavarankely sy ny seza na dabilio, ny famafana ny latabatra famoahana boky sy gazety, ny fanariana ny fako, ary ny fanadiovana ny gorodona sy ny fitaratra. Misy asa tsy voatery atao matetika: Tsy voatery diovina be matetika, ohatra, ny fanaka hazo sy ny seza ary ny jiro. Toy izany koa ny fanasana ridao.
5 Tena ilaina ny misoroka ny loza any amin’ny Efitrano Fanjakana. (Deot. 22:8) Ilay efajoro eo amin’ny pejy faha-4, dia manome ny lisitr’ireo zavatra ilaina harahi-maso matetitetika mba hisorohana ny loza.
6 Fikojakojana ny Efitrano Fanjakana: Manana andraikitra hanara-maso ny fikojakojana ny Efitrano Fanjakana ireo anti-panahy. Misy anti-panahy na mpanampy amin’ny fanompoana iray mazàna, tendrena handrindra ny asa. Mandamina ny asa tokony hatao tsy tapaka ao amin’ny Efitrano Fanjakana izy. Ataony azo antoka fa madio sy voakojakoja tsara izy io, ary ampy tsara ny fitaovana. Tsy tokony hisy zavatra mampidi-doza mihitsy ao amin’ny efitrano na ny manodidina azy. Hanendry komity iray hikarakara ny efitrano ireo anti-panahy, raha fiangonana roa na maromaro no mampiasa azy io. Handamina ny fikarakarana ilay trano sy ny manodidina azy io komity io, ary hanaraka ny tari-dalan’ireo anti-panahy.
7 Hojerena amin’ny an-tsipiriany ny Efitrano Fanjakana isan-taona. Manao fandaharana ny anti-panahy avy eo, mba hikarakarana tsara ny zava-drehetra ilaina hamboarina sy hokojakojaina. Mety hasaina hanampy amin’izany ny mpitory. Tokony hiezaka hanamboatra ireo zavatra madinidinika ny rehetra, ary ho mailaka hisahana izay rehetra ilaina hokarakaraina.
8 Mety hila torohevitra na fanampiana momba ny fikojakojana ny Efitrano Fanjakana ny anti-panahy. Azon’izy ireo atao amin’izay ny mifandray amin’ny Biraon’ny Fanorenana Efitrano Fanjakana, any amin’ny Betela. Mety hahakasika ny fanamboarana ny fanamafisam-peo izany, na rehefa holokoana indray ny trano, na rehefa misy zavatra simban’ny hamandoana ka ilaina hamboarina.
9 Mahaiza mampiasa ny tahirim-bolan’ny fiangonana: Mpiasa an-tsitrapo no manatanteraka ny ankamaroan’ny asa atao any amin’ny Efitrano Fanjakana sy ny manodidina azy. Mampiseho fitiavana izy ireo rehefa mahafoy tena toy izany, ary tena mampihena ny vola lany koa. Mifandraisa amin’ny Biraon’ny Fanorenana Efitrano Fanjakana any amin’ny Betela, aza fady, raha misy fanavaozana lehibe ilaina hatao. Mifandraisa aloha amin’ny Sampana, fa aza tonga dia mandany vola be amin’ny fanavaozana. Kanefa, karakarao avy hatrany ny ampola, ny hidim-baravarana, ny ridao, ny dabilio, ny raobine mitete sy ny zavatra madinidinika toy izany, mba ho voakojakoja tsara hatrany ny efitrano.
10 Hihazona tahirim-bola mitokana ny komity mpikarakara ny efitrano, raha fiangonana maromaro no mampiasa azy. Handefa tatitra an-tsoratra any amin’ny anti-panahin’ny fiangonana tsirairay ilay komity, mba hampahafantarana azy ireo ny fomba andaniana ny vola. Ny anti-panahy no tompon’andraikitra amin’ny fampiasana tsara ny tahirim-bolan’ny fiangonana.
11 Fikojakojana sy fanavaozana be: Mitady ny tari-dalan’ireo anti-panahy ny komity mpikarakara ny Efitrano Fanjakana, rehefa misy zava-dehibe ilaina hokarakaraina na hohavaozina mahakasika ny Efitrano Fanjakana. Tokony hifandray amin’ny Biraon’ny Fanorenana Efitrano Fanjakana ny anti-panahy, raha hita fa misy fikojakojana na fanavaozana be ilaina hatao, na koa raha mila fanampiana ireo fiangonana mivory ao amin’ilay efitrano. Efa za-draharaha ireo rahalahy ireo, ka afaka hanome torohevitra azo ampiharina sy hitari-dalana amin’ny asa hatao. Raha mitaky vola be ny zavatra hatao, dia tokony hofantarina marina izay mety ho lany. Tokony hisy koa fanapahan-kevitra haroso holanin’ny fiangonana.—Jereo Ny Fanompoantsika Ilay Fanjakana Febroary 1994, Valin’ny Fanontanianareo.
12 Manome voninahitra an’i Jehovah ny fahadiovana: Nisy fepetra hentitra notakin’ny Lalàn’i Mosesy, mba ho azo antoka ny fahadiovana. Lasa firenena niavaka ny Isiraelita, satria notakina tamin’izy ireo ny fahadiovana ara-batana sy ara-panahy. (Lev. 11:35, 36; 15:1-11; Isaia 52:11) Nanome voninahitra an’Andriamanitra sy nahasalama ilay firenena izany fahadiovana izany. Marika amantarana ny vahoakan’i Jehovah koa ny fahadiovana amin’izao fotoana izao. Mampiavaka antsika tsirairay koa ve izy io? Raha miezaka mba hadio sy hilamina isika, dia ho hita amin’izany fa azontsika hoe mahasoa ny zavatra takin’i Jehovah amintsika.
13 Asaina hankafy sakafo ara-panahy any amin’ny Efitrano Fanjakana ireo olona liana. Mazàna isika no may erỳ manasa olona, satria manintona sy milamina tsara ilay efitrano. Misy asa tsy maintsy atao anefa mba ho toy izany foana izy io. Jereo ny manodidina ny efitranonareo. Madio ve ny seza sy ny gorodona ary ny rindrina? Voadio tsara matetika ve ny kabine? Vetivety dia mety hoheverintsika fa azo ekena ny gorodona maloto, na ny loko miendaka amin’ny rindrina, raha zatra mahita izany isika. Tokony hanao araka izay fara herintsika isika, mba ho tsara sy hanintona hatrany ny efitranontsika, ka handray anjara rehefa tonga ny fotoana fanadiovana. Na tsy miteny aza isika, dia afaka manome voninahitra an’Andriamanitra, rehefa madio sy milamina tsara ny Efitrano Fanjakanantsika. Tsy hanafintohina ny hafa ny ohatra tsara omentsika, fa hanaporofo kosa hoe madio sy marina ny fivavahantsika.—1 Kor. 10:31, 32; Jak. 1:27.
14 Tena mankasitraka ny tombontsoantsika hiara-mivory ao amin’ny Efitrano Fanjakana isika! Tsy tokony hanao tsirambina ny fivoriantsika mihitsy isika, na hihevitra azy ireny ho tsy dia misy vidiny firy. Afaka mampandeha tsara ny fivoriana ny rehetra, ka hahazo fampaherezana, rehefa mazoto mandray anjara amin’ny fikojakojana ny Efitrano Fanjakana. Manandratra ny fivavahana madio sy manome voninahitra ny anaran’i Jehovah izany. Koa enga anie àry isika ho tapa-kevitra ny hikojakoja tsara hatrany ny toeram-pivavahantsika.
[Fanontaniana]
1. Ampiasaina anaovana inona ny Efitrano Fanjakana?
2. Nahoana ny Efitrano Fanjakana no tokony hadio sy hilamina foana?
3. Ahoana no andaminana ny fanadiovana ny Efitrano Fanjakana, ary iza no afaka mandray anjara amin’izany?
4. Ahoana no hahafantaran’ny fiangonana izay tokony hatao, rehefa manadio Efitrano Fanjakana?
5. Tena zava-dehibe ve ny fisorohana ny loza, ary inona avy no ilaina harahi-maso matetitetika? (Jereo ilay efajoro eo amin’ny pejy faha-4.)
6. Ahoana no handrindrana ny asa fikojakojana ny Efitrano Fanjakana?
7. a) Inona no atao isan-taona mba hahazoana antoka fa voakojakoja tsara hatrany ny Efitrano Fanjakana? b) Inona avy no zavatra mila asiana fiheverana matetika? (Jereo ilay efajoro eo amin’ny pejy faha-5.)
8. Rahoviana ny anti-panahy no mety hifandray amin’ny Biraon’ny Fanorenana Efitrano Fanjakana?
9. Ahoana no azo ampiasana ny tahirim-bolan’ny fiangonana?
10. Inona no atao mba hahazoana antoka fa ampiasaina araka ny tokony ho izy ny tahirim-bolan’ny fiangonana?
11. Inona no tokony hatao raha misy fikojakojana na fanavaozana be ilaina hatao?
12. Inona no notakin’ny Lalàn’i Mosesy tamin’ny vahoakan’Andriamanitra?
13. a) Inona no tokony ho hitantsika, rehefa mijery ny manodidina ny Efitrano isika? b) Inona no vokany rehefa madio sy milamina ny Efitrano?
14. Ahoana no azontsika anehoana ny fankasitrahantsika ny tombontsoantsika hiara-mivory any amin’ny Efitrano Fanjakana?
[Efajoro, pejy 4]
Lisitra Fanamarinana ny Aro Loza
◻ Tokony ho mora handehanana ny lalana mivoaka sy ny tohatra, ary ho azo antoka ny arofanina.
◻ Tokony hadio sy hilamina ary tsy hisy zavatra mora mirehitra, entan’olona, na fako, ny efitra fitahirizana entana sy ny kabine.
◻ Tokony hojerena sy hodiovina tsy tapaka ny tafo sy ny fantson-dranonorana.
◻ Tsy tokony hisy zavatra mety hampibolisatra na hampianjera eny an-tokotany sy ny manodidina ary ny parking.
◻ Tokony hojerena sy hokojakojaina tsara ny fitaovana elektrika sy ny prizy.
◻ Tokony hamboarina haingana ny tafo mitete, mba hisorohana ny olana lehibe vokatry ny hamandoana.
◻ Tokony hohidiana ny trano rehefa tsy misy olona.
[Efajoro, pejy 5]
Fikarakarana ny Trano sy ny Manodidina
◻ Ivelany: Mbola tsy misy simba ve ny tafo, ny rindrina, ny loko, ny varavarankely, ary ilay takelaka misy ilay soratra hoe Efitrano Fanjakana?
◻ Manodidina: Voakarakara tsara ve ny tokotany sy ny manodidina, ny fefy, ary ny parking?
◻ Anatiny: Madio sy mendrika ve ny ridao, seza, jiro, lokon-drindrina, ary ny arimoara fitoerana boky sy gazety?
◻ Fitaovana: Mandeha tsara ve ny jiro sy ny fanamafisam-peo ary ny vantilatera?
◻ Kabine: Madio sy mandeha tsara ve izy io?