Sarobidy Indrindra ny Fahendrena avy Amin’Andriamanitra
1 Misy mihevitra fa tokony hifantoka indrindra indrindra amin’ny famahana ny olan’ny olombelona ankehitriny ny Vavolombelon’i Jehovah. Tsy tsapan’ireny olona ireny fa sarobidy ny asa fampianarana Baiboly ataontsika. Hoy ny apostoly Paoly momba izany: “Amin’izay ho ringana, dia hadalana ny teny momba ny hazo fijaliana, fa amintsika izay vonjena kosa, dia herin’Andriamanitra izany.” (1 Kor. 1:18) Fantatsika tokoa, fa ny fanompoana kristianina no asa lehibe indrindra atao etỳ an-tany ankehitriny.
2 Fiainana tsara kokoa dieny izao: Tena voafetra ny fahafahan’ny olombelona mamaha ny olana mianjady aminy. Tsy nampihena ny asan-jiolahy ny lalàna maro natao hanasaziana ny mpanao ratsy. Tsy nahavita nampitsahatra ny ady ireo fifanekena sy tafika mpampandry tany. Tsy nahafoana ny fahantrana ireo fandaharana mba hanampiana olona. (Sal. 146:3, 4; Jer. 8:9) Mifanohitra amin’izany kosa ny hafatra momba ilay Fanjakana. Nanova ny fiainan’ny olona an-tapitrisa izy io, ary nanampy azy ireo hitafy toetra vaovao. (Rom. 12:2; Kol. 3:9, 10) Hankafy fiainana tsara kokoa dieny izao izy ireo, raha manao izany.—1 Tim. 4:8.
3 Hoavy mamirapiratra: Sady manampy antsika hiatrika ireo olana ankehitriny ny fahendrena avy amin’Andriamanitra, no ahazoantsika manomana ny hoavy koa. (Sal. 119:105) Hisakana antsika tsy hiezaka hanova ity tontolo ity izy io, satria ho very maina fotsiny izany. (Mpit. 1:15; Rom. 8:20) Tena velom-pankasitrahana tokoa isika, satria tsy lany andro mikatsaka nofinofy tsy azo tanterahina! Mifantoka amin’ny fampanantenana azo antoka avy amin’i Jehovah kosa isika, dia ilay fampanantenana “lanitra vaovao sy tany vaovao” hitoeran’ny fahamarinana. Rehefa ho tonga ny andro fitsaran’i Jehovah, dia hiharihary fa ireo niankina tamin’ny fahendrena avy amin’Andriamanitra no nanao ny safidy tsara.—2 Pet. 3:10-13; Sal. 37:34.
4 Ny fahendrena avy amin’Andriamanitra ihany no tena mahasoa, na dia toa tsy azo ampiharina aza izy io ho an’ireo efa vonton’ny “fahendren’izao tontolo.” (1 Kor. 1:21; 2:6-8) Aoka àry isika hanohy hitory maneran-tany, ny hafatra avy amin’ilay Andriamanitra “hany manam-pahendrena.”—Rom. 16:27.