Tonga Soa ato Amin’ny Sekolin’ny Fanompoana

ANY amin’ny tany maherin’ny 200, dia misy mpianatra an-tapitrisany maro mandray soa isan-kerinandro avy amin’ny Sekolin’ny Fanompoana. Toerana an’aliny maro no anaovana an’io sekoly io. Na aiza na aiza onenanao, dia hahita izany fampianarana izany ianao. Afaka mandray io fampianarana avy amin’Andriamanitra io maimaim-poana ny olona rehetra na firy taona izy na firy taona, na inona na inona foko niaviany, na firy na firy fianarana vitany.

Fony natomboka tao amin’ireo Efitrano Fanjakanan’ny Vavolombelon’i Jehovah io sekoly io tamin’ny 1943, dia nambara toy izao ny zava-kendreny: “Mba hanomanana ny ‘lehilahy mahatoky’ rehetra, dia ireo nandre ny Tenin’Andriamanitra ka nanaporofo ny finoany azy io, mba ‘ho afaka hampianatra ny hafa’ . . . ka ny tanjona dia ny hahatonga ny tsirairay . . . hahay kokoa hampiseho ampahibemaso ny fanantenany.” (Fianarana ny Fanompoana Kristianina, frantsay, p. 4) Tsy niova fa mbola izany ihany no zava-kendren’ilay sekoly mandraka ankehitriny.

Inona moa, raha ny tena izy, no zavatra tsara indrindra azontsika ampiasana ny fitenenana, izay fanomezana avy amin’Andriamanitra? Mamaly toy izao ny Baiboly: “Aoka izay rehetra manam-pofonaina samy hidera an’i Jehovah.” (Sal. 150:6) Mampifaly ny fon’ilay Raintsika any an-danitra isika, rehefa manao izany. Asehontsika aminy fa velom-pankasitrahana ny fontsika, noho ny hatsaram-pony sy ny fitiavany. Tsy mahagaga raha ampirisihina “hanatitra ny fanati-piderana . . . ho an’Andriamanitra mandrakariva [ny Kristianina], dia ny vokatry ny molotra izay manaiky ny anarany”! (Heb. 13:15) Miarahaba anao izahay tonga soa ato amin’ny Sekolin’ny Fanompoana, izay hanampy anao hanatsara ny fahaizanao mampiasa ireo fanomezana nomen’Andriamanitra anao mba hiderana azy.

Ny famakian-teny ampahibemaso sy ny fahaizana miteny sy mampianatra no tena ifantohana ao amin’ny Sekolin’ny Fanompoana. Tsy izay ihany anefa no zavatra tsara ianarana ao. Rehefa mandray anjara amin’izy io ianao, dia hampiana mba hahazo fahaizana tena sarobidy toy ny famakian-teny, ny fihainoana sy ny fitadidiana, ny fanaovana fianarana, ny fanaovana fikarohana, ny fahaiza-mamakafaka sy mandamina hevitra, ny fahaiza-miresaka, ny famaliana fanontaniana, ary ny fanoratana izay hevitrao. Ny Baiboly sy ny boky miorina amin’ny Baiboly no ho fototry ny fianarana sy ny fanazavana ary ny anjara ao amin’ilay sekoly. Rehefa feno an’ireo fahamarinana sarobidy ao amin’ny Tenin’Andriamanitra ny sainao, dia hianatra hanana ny fihevitr’Andriamanitra ianao. Tena hitondra soa ho anao, eo amin’ny lafiny rehetra amin’ny fiainanao, tokoa izany! Hoy ny nosoratan’i William Lyon Phelps, mpampianatry ny oniversite tamin’ny taonjato faha-20: “Tena azo antsoina hoe nahita fianarana izay rehetra manana fahalalana lalina momba ny Baiboly. . . . Amiko, ny fahalalana ny Baiboly tsy arahin’ny fianarana ambony dia sarobidy kokoa noho ny fianarana ambony tsy arahin’ny fahalalana ny Baiboly.”

Ny fomba handraisan-tsoa feno

Mazava ho azy fa mba handraisan-tsoa feno avy amin’ny fampianarana omena ao amin’ny Sekolin’ny Fanompoana, dia tsy maintsy manao ezaka ianao mpianatra. Nampirisika an’i Timoty, namany kristianina, toy izao ny apostoly Paoly: “Mazotoa hihevitra izany zavatra izany, dia mikeleza aina fatratra amin’izany, mba hiseho amin’ny olona rehetra ny fandrosoanao.” (1 Tim. 4:15) Ezaka inona avy no azonao atao?

Raha mbola azo atao koa, dia manatreha ny Sekolin’ny Fanompoana isan-kerinandro. Ampiasao amim-pahendrena ity boky hoe Mandraisa Soa avy Amin’ny Sekolin’ny Fanompoana ity. Soraty eo amin’ilay toerana natao ho amin’izany eo amin’ny pejy voalohany ny anaranao. Ento foana ity boky ity, rehefa manatrika ilay sekoly ianao. Toy ny kahie koa izy ity. Rehefa mahita hevi-dehibe heverinao fa hanampy anao ianao, dia tsipiho ilay izy. Ampiasao ireo sisim-pejy malalaka mba hanoratana ireo hevitra ianaranao mandritra ireo anjara samihafa ao amin’ilay sekoly.

Ny taratasy fandaharana amin’ny Sekolin’ny Fanompoana dia homena mitokana. Hisy tsipiriany momba ny fomba hitarihana ilay sekoly koa io fandaharana io. Avelao ato anatin’ity boky ity ilay izy, mba ho mora hita sy ho mora raisina.

Rehefa manomana ilay sekoly isan-kerinandro ianao, dia tadidio fa ny Baiboly no boky fianarana lehibe indrindra ampiasaintsika. Ataovy loha laharana ny famakiana izay tapany ao amin’ny Baiboly asaina vakina amin’ilay herinandro. Tena hanampy be dia be koa ny famakiana mialoha ny fanazavana ho an’ireo anjara samihafa, raha vitanao.

Mandritra ilay sekoly, dia mety hisy fahafahana hanomezan’ny mpanatrika valin-teny. Hararaoty tsara ireny. Hanampy anao hitadidy izay renao sy hampihatra azy eo amin’ny fiainanao ny fandraisanao anjara amin’ireny fiaraha-midinika ireny.

Mazava ho azy fa hanana fahafahana hanao lahateny na fampisehoana eo anoloan’ny fiangonana ny mpianatra rehetra. Ampiasao tsara ny tsirairay amin’ireny fahafahana ireny. Miezaha mafy hanatsara izay toetra takina aminao, raha ny amin’ny fahaiza-miteny. Homena torohevitra ianao, mba hitohizan’ny fandrosoanao. Raiso an-tanan-droa izany fanampiana omena anao manokana izany. Soraty ato amin’ny bokinao izay fanoloran-kevitra natao mba hihatsaranao. Koa satria ny hafa no mahita anao tsara kokoa noho ny tenanao, ireo fanoloran-kevitra sy torohevitra miorina amin’ny Baiboly omena anao amim-pitiavana dia tena hanampy anao hanao fandrosoana. Marina izany, na dia efa mpianatra ao amin’ilay sekoly hatramin’ny taona maro aza ianao.—Ohab. 1:5.

Tianao ve ny hanao fandrosoana haingana kokoa? Afaka manao izany ianao, raha ny tenanao mihitsy no manao zavatra voalohany. Ianaro mialoha ny fanazavana horesahin’ny mpianatra tsirairay. Amin’izay, raha misy mpisolo toerana tadiavina, dia ho afaka hanolo-tena ianao, ary ho za-draharaha kokoa. Rehefa manao ny anjarany ny hafa, dia henoy tsara ny fomba amelabelarany azy. Maka fianarana avy amin’ny hafa daholo isika rehetra.

Fanampin’izany, dia hanafaingana ny fandrosoanao ianao, raha afaka mianatra mialoha ity boky ity. Rehefa avy nianatra tsara ny fanazavana ao amin’ireo lesona 15 manaraka ianao, dia tohizo ihany ny fianaranao mba hahafaoka ilay “Fandaharana mba Hianarana ny Fahaizana Miteny sy Mampianatra”, manomboka eo amin’ny pejy faha-78. Ianaro aloha ny lesona tsirairay, ary ataovy ireo fanazaran-tena mifandray aminy. Ampiharo eo amin’ny fanompoanao izay ianaranao. Tena hanampy anao hahay hiteny sy hampianatra ny Tenin’Andriamanitra izany.

Hanampy anao hiomana ho amin’ilay zavatra lehibe indrindra eo amin’ny fiainana ny fianarana azonao ao amin’ny Sekolin’ny Fanompoana. Koa satria noho ny sitrapon’Andriamanitra no mahavelona antsika, ny zava-kendren’ny fiainantsika dia ny hidera azy. Mendrika ny hahazo ny fiderana tsara indrindra i Jehovah Andriamanitra. (Apok. 4:11) Fomba iray hanatanterahana izany ny fianarana azontsika ao amin’ilay sekoly. Ao isika dia mianatra ny hisaina amin’ny fomba mazava, sy hitondra tena amim-pahendrena ary hampita tsara ireo fahamarinana mahatalanjona avy amin’ny Teny ara-tsindrimandrin’Andriamanitra.