Sariho ny Sain’ny Olona ho Amin’ilay “Fahazavan’izao Tontolo Izao”
1. Inona ilay mazava lehibe voalaza mialoha ao amin’ny Tenin’Andriamanitra, ary inona no fankalazana tena misarika ny sain’ny olona ho amin’izy io?
1 Hoy i Jehovah tamin’ny alalan’i Isaia mpaminany: “Ny olona izay mandeha amin’ny maizina dia mahita mazava lehibe; izay mitoetra amin’ny tany aloky ny fahafatesana no iposahan’ny mazava.” (Isaia 9:1) Hita tamin’ny asan’i Jesosy Kristy Zanak’Andriamanitra izany “mazava lehibe” izany. Nampahery ny olona tao anatin’ny haizina ara-panahy ny asa nataony sy ny soa nentin’ny sorona nataony. Fahazavana toy izany no ilain’ny olona amin’izao fotoan’ny haizina izao. Fotoana manokana azontsika isarihana ny sain’ny olona ho amin’ilay “fahazavan’izao tontolo izao” ny Sakafo Harivan’ny Tompo. (Jaona 8:12) Olona an-tapitrisany no nampiseho ny finoany tamin’ny taon-dasa, ka niara-nankatò tamintsika ilay didin’i Jesosy hoe: “Ataovy hatrany izao ho fahatsiarovana ahy.” (Lioka 22:19) Tsy ho ela isika dia hankalaza ny Fahatsiarovana indray. Ahoana àry no azontsika isarihana ny sain’ny olona ho amin’ilay mazava lehibe ampamirapiratin’i Jehovah?—Fil. 2:15.
2. Inona no azontsika atao mba hankasitrahantsika bebe kokoa ny sorom-panavotana, ary inona no ho vokatr’izany?
2 Ampitomboy ny fankasitrahanao: Tena tia antsika i Jehovah sy Jesosy, ka nanome ny sorom-panavotana. Fotoana mety tsara hisaintsainana momba ny fitiavan’izy ireo ny vanim-potoan’ny Fahatsiarovana. (Jaona 3:16; 2 Kor. 5:14, 15) Raha manao izany isika, dia azo antoka fa hitombo ny fankasitrahantsika an’io fankalazana masina io. Tokony hanokana fotoana hamakiana sy hisaintsainana ireo andinin-teny natao hovakina amin’ny Fahatsiarovana ny vahoakan’Andriamanitra rehetra. Hita ao amin’ny Fandinihana ny Soratra Masina Isan’andro izany. Manana toetra tsy manan-tsahala i Jehovah, ary niharihary tamin’ny fomba mahatalanjona izany rehefa nanome ny vidim-panavotana izy. Raha misaintsaina momba izany isika, dia hirehareha fa manana azy ho Andriamanitra. Hitombo ny fitiavantsika an’Andriamanitra sy ny Zanany, raha mieritreritra ny soa raisintsika tsirairay avy amin’ny vidim-panavotana isika. Handrisika antsika hiezaka mafy hanao ny sitrapon’Andriamanitra koa izany.—Gal. 2:20.
3. Ahoana no ampisehoantsika fa mankasitraka ny Fahatsiarovana isika?
3 Hafana fo isika hiresaka momba ny Fahatsiarovana, raha mampitombo ny fankasitrahantsika ilay fomba namonjen’i Jehovah antsika. Izany hafanam-po izany dia hifindra amin’ny mpianatra Baiboly, ny olona tsidihintsika, ny havana, ny mpiara-monina, ny mpiara-mianatra, ny mpiara-miasa, ary ny olon-kafa hasaintsika hanatrika io fotoana miavaka io. (Lioka 6:45) Manaova àry ezaka manokana hanasana azy rehetra ireo, ka omeo taratasy fanasana izy mba hitadidiany an’ilay fotoana. Maro no mahita fa tsy manadino ny olona tokony hasainy izy rehefa manao lisitra, ary ampiany olona vaovao foana izany isan-taona. Ataovy milamina tsara ilay lisitra, ary miezaha mafy hanasa ireo olona liana. Ho hita amin’izany fa tena mankasitraka an’i Jehovah Andriamanitra ianao, “noho ny fanomezany maimaim-poana tsy hay lazaina.”—2 Kor. 9:15.
4. Inona no hanampy antsika hanompo bebe kokoa amin’ny Martsa sy Aprily?
4 Manompoa bebe kokoa: Afaka manompo bebe kokoa ve ianao amin’ny Martsa sy Aprily? Tena hotahin’Andriamanitra ianao, raha mikely aina miresaka amin’ny hafa mahakasika ilay ‘vaovao tsara be voninahitra momba an’i Kristy.’ Nandidy antsika toy izao mantsy i Jehovah, ilay Loharanon’ny fahazavana ara-panahy rehetra: “Aoka ny hazavana hamirapiratra avy ao amin’ny haizina.” (2 Kor. 4:4-6) Raha ilaina, dia azon’ny anti-panahy ampitomboina ny isan’ny fivoriana alohan’ny fanompoana, ka hatao amin’ny toerana sy fotoana samy hafa. Tsara koa raha manohana ireo mpitory te hanompo bebe kokoa izy ireo. Azo atao, ohatra, ny mitory vao maraina eny an-dalana, na mitory amin’ny faritany be toeram-piasana na fivarotana, na mitory an-telefaonina, amin’ny tolakandro na amin’ny hariva. Mba hahafahanao hampitombo ny fanompoanao, dia farito mialoha izay habetsahan’ny ora tianao hatokana amin’izany. Ataovy araka ny antonony ny tanjonao, ary miezaha mafy hanatratra izany. Maro no mirotsaka ho mpisava lalana mpanampy, mba hanomezana ny tsara indrindra ho an’i Jehovah.—Kol. 3:23, 24.
5. Ahoana no nandraisan’ny maro soa, rehefa nahena ny ora notakina tamin’ny mpisava lalana mpanampy?
5 Afaka ny ho mpisava lalana mpanampy ve ianao? Efa fito taona mahery izay no nahena ny ora takina amin’ny mpisava lalana mpanampy, ka maro kokoa no afaka manao izany ary mandray fitahiana. Efa nanandrana azy io ve ianao? Misy mpitory zatra manao ny asan’ny mpisava lalana mpanampy isan-taona. Betsaka ny mpitory miara-manao an’izany any amin’ny fiangonana maro, ka lasa anisan’ireo zavatra miavaka sy mahafinaritra vitan’ny fiangonana ao anatin’ny taona ilay izy. Afaka ny ho mpisava lalana mpanampy mandritra ny iray volana ve ianao amin’ny vanim-potoan’ny Fahatsiarovana? Tena ho faly ianao raha manao izany. Mety tsara ho amin’izany ny Aprily, satria misy faran’ny herinandro dimy.
6. Inona avy no fandaharana mahafinaritra azonao andraisana anjara?
6 Hitsidika ny fiangonanareo ve ny mpiandraikitra ny faritra amin’ny Martsa na Aprily? Misy tombontsoa fanampiny mety ho azonao raha izany. Mivory miaraka amin’ny mpisava lalana mantsy izy amin’izay. Efa nambara teo aloha fa mandritra ny taom-panompoana 2006, dia afaka manatrika ny tapany voalohany amin’ilay fivoriana izay mpisava lalana mpanampy rehetra amin’ilay volana. Azo antoka fa hanampy mpisava lalana mpanampy maro mba ho lasa mpisava lalana maharitra, ny hevitra mampahery resahina amin’ilay fivoriana. Ho faly koa isika amin’ny Martsa hitondra fahazavana ara-panahy ho an’ny olona, amin’ny alalan’ilay boky vaovao hoe Inona Marina no Ampianarin’ny Baiboly? Nahoana raha atao tanjona ny hanomboka fampianarana Baiboly amin’izy io?
7, 8. a) Inona no hanampy antsika handamina ny fotoanantsika, mba ho mpisava lalana mpanampy? b) Nahoana no andraisan-tsoa ny fifanampian’ny mpianakavy, ary inona no soa raisin’izy ireo avy amin’izany?
7 Koa satria 50 ora no takina amin’ny mpisava lalana mpanampy, dia alamino ny fotoananao mba hahafahanao hampamirapiratra ny fahazavan’ny fahamarinana, mandritra ny 12 ora eo ho eo isan-kerinandro. Miresaha amin’ireo efa nahomby tamin’izany, sy amin’ny olon-kafa. Mety hirotsaka ho mpisava lalana mpanampy toa anao koa izy ireo amin’izay. Samy mahatsapa na ny tanora na ny antitra, fa tsy sarotra ny manatratra an’io tanjona tena tsara io, raha voalamina tsara ny fotoana. Mivavaha momba izany. Manaova fandaharam-potoana, ka raha hitanao fa mety dia ankafizo ny asan’ny mpisava lalana mpanampy!—Mal. 3:10.
8 Hitan’ny fianakaviana maro fa afaka manatratra io tanjona io ny mpianakavy iray, fara faharatsiny, raha mifanampy ny rehetra. Nanapa-kevitra ny fianakaviana iray fa ho mpisava lalana mpanampy izy dimy mianaka efa vita batisa. Ny ankizy roa mbola tsy vita batisa kosa nanao ezaka manokana mba hampitomboana ny fanompoany. Inona no soa noraisin’izy ireo tamin’izany? Hoy izy ireo: “Nahafinaritra tokoa iny volana iny. Tena tsapanay fa nihanifandray kokoa izahay mianakavy. Isaoranay i Jehovah noho izany fitahiana lehibe izany!”
9. Ahoana no hampamirapiratantsika ny fahazavantsika mandritra ny vanim-potoan’ny Fahatsiarovana?
9 Handrisika antsika hanatona akaiky kokoa an’i Jehovah Raintsika any an-danitra ve ny asa manokana hataontsika amin’ny Martsa sy Aprily? Izany dia miankina betsaka amin’ny ezaka ataontsika tsirairay, mba hampitomboana ny fitiavantsika an’Andriamanitra sy ny Zanany, sy hampitomboana ny fanompoantsika. Enga anie isika ho tapa-kevitra hanahaka an’ilay mpanao salamo, izay nihira hoe: “Hidera an’i Jehovah indrindra amin’ny vavako aho; eny, eo amin’ny olona maro no hiderako Azy.” (Sal. 109:30) Hitahy ny asa ataontsika amin-jotom-po amin’ny vanim-potoan’ny Fahatsiarovana i Jehovah. Enga anie àry isika hampamirapiratra an’ilay mazava lehibe, mba ho maro kokoa hatrany no hiala amin’ny maizina ka “hanana ny fahazavana manome fiainana.”—Jaona 8:12.