Ataovy Mahafinaritra ny Vanim-potoanan’ny Fahatsiarovana
1. Ahoana no hampitomboanao ny fifalianao amin’ny vanim-potoanan’ny Fahatsiarovana?
1 Te hampitombo ny fifalianao ve ianao amin’ny Martsa sy Aprily ary Mey? Ampitomboy àry ny fanompoanao, ary manaova mpisava lalana mpanampy raha afaka. Nahoana izany no hahafaly kokoa anao?
2. Nahoana isika no ho faly kokoa raha manompo bebe kokoa?
2 Ampitomboy ny fifalianao: Noforonin’i Jehovah isika mba ho faly sy ho afa-po rehefa manompo azy sy mifandray akaiky aminy. (Mat. 5:3) Faly koa isika rehefa manampy olona, satria izany no nanaovany antsika. (Asa. 20:35) Sady manompo an’i Jehovah isika no manampy olona rehefa mitory sy mampianatra. Ho faly kokoa àry isika raha manompo bebe kokoa. Hihamahay koa isika arakaraka ny hitoriantsika, ka hatoky tena kokoa sy tsy dia hatahotra. Ho afaka hitory sy hanomboka fampianarana Baiboly imbetsaka noho ny mahazatra isika raha manompo bebe kokoa. Mampitombo ny fifaliantsika ireo rehetra ireo.
3. Nahoana no mety tsara hanaovana mpisava lalana mpanampy ny volana Martsa sy Aprily?
3 Mety tsara hanaovana mpisava lalana mpanampy ny volana Martsa sy Aprily, satria ho afaka hifidy isika hoe hanatratra 30 na 50 ora. Hanao ezaka manokana hizarana taratasy fanasana amin’ny Fahatsiarovana koa isika, manomboka amin’ny asabotsy 22 Martsa ka hatramin’ny alatsinainy 14 Aprily, andron’ny Fahatsiarovana. Hientanentana ny fiangonana satria hiray hina ny rehetra mba hamitana faritany betsaka araka izay azo atao.—Zef. 3:9.
4. Inona no tokony hataonao raha te hanao mpisava lalana mpanampy ianao?
4 Miomàna dieny izao: Raha mbola tsy niomana ianao, dia diniho ny fandaharam-potoananao ka jereo raha afaka manompo bebe kokoa ianao mandritra ny iray volana na mihoatra. Mivavaha momba an’ilay izy. (Jak. 1:5) Resaho amin’ny fianakavianao sy amin’ny mpiara-manompo ilay izy. (Ohab. 15:22) Mety hoe marary na miasa tontolo andro ianao, nefa mety ho afaka hanao mpisava lalana mpanampy ihany ka ho faly kokoa.
5. Inona no ho vokany raha manompo bebe kokoa isika mandritra ny vanim-potoanan’ny Fahatsiarovana?
5 Tian’i Jehovah ho faly ny mpanompony. (Sal. 32:11) Ho faly kokoa isika sady ho faly ilay Raintsika any an-danitra, raha miezaka manompo bebe kokoa isika mandritra ny vanim-potoanan’ny Fahatsiarovana.—Ohab. 23:24; 27:11.