Sioka no “Ifampiresahany”

AVY AMIN’NY MPANORATRA NY MIFOHAZA! ANY MEKSIKA

◼ Tsy manana telefaonina ny Mazateky, any amin’ireo tendrombohitr’i Oaxaca, any Meksika. Afaka mifampiresaka anefa izy ireo, na dia mifanelanelana roa kilaometatra mahery aza, toy ny rehefa miasa any amin’ny havoana fambolena kafe. Ahoana no ataony? Efa ela ireo Mazateky no namorona fiteny amin’ny alalan’ny sioka. Hoy i Pedro, tovolahy mazateky: “Miaka-midina be ny toe-peo amin’ny teny mazateky. Maka tahaka ny toe-peo sy ny gadon’ilay fiteny àry izahay rehefa misioka. Ny molotra fotsiny no ampiasainay amin’izany, fa tsy mila rantsan-tanana.”a

Milaza i Fidencio, naman’i Pedro, fa tsara ny miresaka amin’ny alalan’ny sioka. Hoy izy: “Mampiasa azy io izahay, rehefa mifanalavitra be ka fohy ny resaka. Mety ho naniraka an-janany hividy mofo ny lehilahy iray, nefa hadinony ny nampividy voatabiha. Misioka àry izy, raha efa lasa lavitra ilay zanany ka tsy mandre ny teniny.”

Misioka koa indraindray ny Vavolombelon’i Jehovah, rehefa mifampiresaka. Hoy i Pedro: “Rehefa te hiantso rahalahy mba hiaraka amiko hitsidika faritany mitokana aho, dia misioka fotsiny, fa tsy mila mankany an-tranony.”

Hoy i Pedro: “Samy manana ny fomba fisiokanay izahay, mba hahafantarana hoe iza ilay misioka. Ny lehilahy mazateky matetika no mifampiresaka amin’ny alalan’ny sioka. Mety ho azon’ny vehivavy ilay izy, ary mety hampiasa izany izy rehefa miresaka amin’ny vady aman-janany. Tsy tokony hisioka anefa izy rehefa miresaka amin’ny lehilahy hafa. Heverina ho tsy fahalalam-pomba izany.”

Tsy ny Mazateky ihany no miresaka amin’ny alalan’ny sioka. Manao izany koa ny olona any Chine sy any amin’ny Nosy Canaries ary Papouasie-Nouvelle-Guinée. Ireo mipetraka any an-tendrombohitra sy any anaty ala no tena manao izany. Misy 70 mahery ny fiteny amin’ny alalan’ny sioka. Ny 12 amin’ireo, fara fahakeliny, no efa nodinihin’ny manam-pahaizana.

Tena mahatalanjona ny fahaizan’ny olona mamoron-javatra! Mitady fomba ifampiresahana foana koa izy ireo, ary hitohy foana izany raha tsy hoe tsy te hamoron-javatra intsony angaha izy.

[Fanamarihana ambany pejy]