Noravan’ny Romanina i Jerosalema

TALOHA kelin’ny hahafatesan’i Jesosy tamin’ny taona 33, dia nilaza izy fa “mpamono ny mpaminany sy mpitora-bato an’izay irahina ho any aminy” i Jerosalema. Nanahaka ny razambeny fahiny ny mponina tao, ary nanda ny Zanak’Andriamanitra.​—Mt 23:37.

Nilaza mialoha izay hitranga i Jesosy hoe: “Ho avy aminao ny andro hananganan’ny fahavalonao fefy hazo maranitra manodidina anao.” (Lk 19:41-44) Hoy koa izy: “Rehefa hitanareo fa misy miaramila mitoby manodidina an’i Jerosalema ... izay any Jodia, aoka handositra any an-tendrombohitra.” ​—Lk 21:20, 21.

Tonga nanafika an’i Jerosalema ny tafika romanina notarihin’i Cestius Gallus tamin’ny taona 66, rehefa nikomy ny Jiosy. Nilaza anefa i Josèphe fa nasain’i Gallus “niala tampoka ny miaramilany, ... ary tsy nampoizina mihitsy ny fialany tao amin’ilay tanàna.” Lasa afaka nandositra ny Kristianina noho izany, ka niala tao Jerosalema tokoa izy ireo. Vetivety dia niverina ny tafika romanina notarihin’i Titus. Nanangana “fefy hazo maranitra manodidina” nahatratra 7,2 km izy ireo. Taorian’ny fahirano dimy volana teo ho eo, dia noravana tanteraka ilay tanàna sy ny tempoliny. Telo taona tatỳ aoriana (taona 73), dia lasan’ny tafika romanina koa i Masada, ilay tanàna voaro mafy farany nofehezin’ny Jiosy, izay niorina teny an-tampon-tendrombohitra.

Rava tokoa i Jerosalema. Asehon’izany fa tena ilaina ny manaraka izay lazain’ny faminanian’ny Baiboly.