OBEDA-EDOMA
(Ôbèda-edôma) [midika hoe “Mpanompon’i Edoma”].
1. Lehilahy gatita, ary tao an-tranony no napetraka nandritra ny telo volana ny Vata misy ny fifanekena. Saika nianjera mantsy ilay Vata talohan’izay, ary maty i Oza vokatr’izany. Notahin’i Jehovah foana i Obeda-edoma sy ny ankohonany, satria tao an-tranony ilay Vata. Rehefa nahalala izany i Davida, dia nihevitra izy hoe tian’i Jehovah hafindra tany Jerosalema ilay Vata masina.—2Sa 6:10-12; 1Ta 13:13, 14; 15:25.
Voalaza fa “Gatita” i Obeda-edoma. Filistinina avy any Gata matetika no antsoina hoe Gatita. Ampiasaina koa anefa izy io mba hilazana olona avy any Gata-rimona, izay tanànan’ny Levita ao amin’ny faritanin’i Dana ary nomena ho an’ny Kehatita. (Js 21:20, 23, 24) Tsy maintsy hoe Levita i Obeda-edoma matoa nasaina niandraikitra an’ilay Vata. Midika izany fa Gatita avy any Gata-rimona izy, fa tsy Filistinina avy any Gata.
Voatonona imbetsaka ilay anarana hoe Obeda-edoma rehefa nisy firesahana momba an’ireo mpitendry mozika sy mpiandry vavahady, tamin’ny andron’i Davida Mpanjaka. Olona roa, fara fahakeliny, no nantsoina hoe Obeda-edoma, ary resahina ao amin’ny 1 Tantara 15:21, 24 sy 16:38 izy ireo. Any amin’ireo andininy hafa kosa, dia tsy fantatra raha ny iray tamin’izy roa lahy no noresahina, na mbola nisy hafa niara-belona taminy nitondra an’ilay anarana. Mety ho i Obeda-edoma Gatita ihany àry ilay No. 2 na ilay No. 3.
2. Mpitendry zavamaneno sady mpiandry vavahady, ary anisan’ireo olona tao amin’ilay filaharam-be nankany Jerosalema mba hanatitra ny Vata misy ny fifanekena. (1Ta 15:18, 21) Azo inoana fa izy ilay mpitendry zavamaneno nanompo foana teo anoloan’ny tranolay nisy an’ilay Vata, tany Jerosalema. (1Ta 16:4, 5, 37, 38a) Mety ho izy ihany ilay No. 1.
3. Mpiandry vavahady, ary anisan’ireo olona tao amin’io filaharam-be io ihany. (1Ta 15:24) Mety ho “zanak’i Jedotona” koa izy. (1Ta 16:38b) Mety ho izy ihany ilay No. 1 na ilay No. 4.
4. Korahita mpiandry vavahady, ary izy sy ny havany 62 no anisan’ilay fizarana niambina ny vavahady atsimo tamin’ilay toerana masina tany Jerosalema.—1Ta 26:1, 4-8, 13, 15; jereo No. 3.
5. Olona voatendry hiandraikitra ny volamena sy ny volafotsy ary ny fitaovana hafa tao an-tranon’i Jehovah, tamin’ny andro nanjakan’i Amazia. Nentina ho babo tany Samaria ireo zava-drehetra ireo, ary angamba i Obeda-edoma koa, rehefa nanafika an’i Jerosalema i Joasy, mpanjakan’ny Israely, teo anelanelan’ny 858 sy 844 T.K.—2Ta 25:23, 24.