Inona no Nampianarin’i Jesosy Momba ny Fanjakan’Andriamanitra?

‘Lasa nitety tanàna sy vohitra i Jesosy, ka nitory ny vaovao tsaran’ny fanjakan’Andriamanitra.’—LIOKA 8:1.

TIANTSIKA ny miresaka momba an’izay zava-dehibe amintsika. Hoy i Jesosy: “Izay mameno ny fon’ny olona no lazain’ny vavany.” (Matio 12:34) Ny Fanjakan’Andriamanitra àry no tena zava-dehibe taminy rehefa jerena ny zavatra noresahiny nandritra ny fanompoany.

Inona ny Fanjakan’Andriamanitra? Fitondrana entin’ny mpanjaka ny hoe fanjakana. Fitondram-panjakana natsangan’Andriamanitra àry ny Fanjakan’Andriamanitra. Niresaka betsaka momba azy io i Jesosy, ary izany no foto-kevitry ny fitoriany. Resahina im-110 mahery izy io ao amin’ireo Filazantsara efatra. Nampianatra momba ny Fanjakan’Andriamanitra sy izay hataon’izy io i Jesosy, tsy tamin’ny teniny ihany fa tamin’izay nataony koa.

Iza no ho Mpanjaka? Tsy olona no mifidy ny Mpanjakan’ny Fanjakan’Andriamanitra, fa Andriamanitra mihitsy. Hita avy amin’ny fampianaran’i Jesosy fa izy ilay nofidin’Andriamanitra ho Mpanjaka.

Fantatr’i Jesosy ireo faminanian’ny Baiboly nilaza fa haharitra mandrakizay ny Fanjakan’ilay Mesia nampanantenaina. (2 Samoela 7:12-14; Daniela 7:13, 14; Matio 26:63, 64) Tadidio fa nilaza mazava i Jesosy hoe izy ilay Mesia nambara mialoha. Nekeny àry fa izy ilay Mpanjaka voatendrin’Andriamanitra. (Jaona 4:25, 26) Mety tsara raha niteny matetika izy hoe “ny fanjakako.”—Jaona 18:36.

Nampianarin’i Jesosy koa fa hisy olon-kafa hiara-manjaka aminy. (Lioka 22:28-30) Nantsoiny hoe “ondry vitsy” izy ireo, satria ho voafetra ny isany. Hoy izy momba azy ireo: “Sitraky ny Rainareo ny hanome anareo ny fanjakana.” (Lioka 12:32) Asehon’ny boky farany ao amin’ny Baiboly fa ho 144 000 ireo hahazo voninahitra hiara-manjaka amin’i Kristy.—Apokalypsy 5:9, 10; 14:1.

Aiza no misy an’ilay Fanjakana? Hoy i Jesosy tamin’i Pontio Pilato, filoha romanina: “Tsy anisan’ity tontolo ity ny fanjakako.” (Jaona 18:36) Tsy manana solontena olombelona ilay Fanjakan’Andriamanitra entin’i Kristy. Imbetsaka i Jesosy no niantso azy io hoe “ny fanjakan’ny lanitra.”a (Matio 4:17; 5:3, 10, 19, 20) Fitondram-panjakana any an-danitra àry ny Fanjakan’Andriamanitra.

Tena natoky i Jesosy fa hiverina any an-danitra izy, rehefa avy tetỳ an-tany. Nolazainy fa “hanomana toerana” ho an’ireo hiara-manjaka aminy izy rehefa tonga any, mba hahafahan’izy ireo hiaraka aminy.—Jaona 14:2, 3.

Inona no hataon’ilay Fanjakana? Nampianatra ny mpihaino azy hivavaka toy izao i Jesosy: “Ho tonga anie ny fanjakanao! Hatao etỳ an-tany anie ny sitraponao, tahaka ny any an-danitra!” (Matio 6:9, 10) Efa atao any an-danitra ny sitrapon’Andriamanitra. Ilay Fanjakana no ampiasainy hanatanterahana ny fikasany ho an’ny tany. Hitondra fiovana lehibe eto an-tany àry ilay Fanjakana.

Inona no hataon’ilay Fanjakana ho an’ny tany? Nampianarin’i Jesosy fa handringana ny ratsy fanahy ny Fanjakan’Andriamanitra ka tsy hisy intsony ny faharatsiana. (Matio 25:31-34, 46) Midika izany fa ho foana daholo ny kolikoly sy ny faharatsiana. Ho feno olona “malemy fanahy”, manao ny marina, mamindra fo, “madio am-po”, ary mpampihavana, eto an-tany, hoy i Jesosy.—Matio 5:5-9.

Tany voaloto ve no hiainan’ireo olona tsy mivadika ireo? Tsia. Nampanantena i Jesosy fa ho lasa faran’izay tsara ny tany rehefa hanjaka ny Fanjakan’Andriamanitra. Hoy ny lehilahy iray voaheloka ho faty teo anilany: “Jesosy ô, tsarovy aho rehefa tonga any amin’ny fanjakanao ianao.” Hoy ny navalin’i Jesosy azy: “Lazaiko aminao marina tokoa anio fa hiaraka amiko any amin’ny Paradisa ianao.” (Lioka 23:42, 43) Hanova ny tany manontolo ho paradisa toy ilay tany Edena tokoa ny Fanjakan’Andriamanitra!

Inona koa no hataon’ilay Fanjakana ho an’ny olombelona? Tsy nampanantenain’i Jesosy fotsiny ny zavatra hataon’ilay Fanjakana fa nasehony koa. Nanasitrana olona maro tamin’ny fomba mahagaga izy. Nasehony tamin’izany fa hanao zavatra lehibe lavitra izy rehefa hanjaka. Hoy ny Filazantsara momba azy: “Nandeha nanerana an’i Galilia manontolo [izy], ka nampianatra tany amin’ny synagoga sy nitory ny vaovao tsaran’ilay fanjakana ary nanasitrana ny karazan’aretina rehetra sy ny karazana kilema rehetra, teo amin’ny vahoaka.”—Matio 4:23.

Betsaka ny aretina nositranin’i Jesosy. “Nampahiratra mason’olona jamba hatrany an-kibon-dreniny” izy. (Jaona 9:1-7, 32, 33) Nanasitrana lehilahy boka izy. Tsara fanahy izy rehefa nikasika azy, na dia naharikoriko aza ilay aretina. (Marka 1:40-42) Nasehony koa fa vitany ny manao izay “handrenesan’ny marenina sy hitenenan’ny moana”, rehefa nentina teo aminy “ny lehilahy iray marenina sady niraiki-dela.”—Marka 7:31-37.

Vitan’ilay Mpanjaka voatendrin’Andriamanitra, hatramin’ny nanangana ny maty. Tantara telo ao amin’ny Baiboly no mampiseho izany. Natsangany tamin’ny maty ny zanaka lahitokan’ny vehivavy iray maty vady, sy ny zazavavy iray 12 taona, ary i Lazarosy namana tsy foiny.—Lioka 7:11-15; 8:41-55; Jaona 11:38-44.

Niresaka momba ny hoavy sambatra miandry ny vahoakan’ny Fanjakan’Andriamanitra i Jesosy. Hoy izy tamin’ny alalan’ny apostoly Jaona: “Eo amin’ny olombelona ny tranolain’Andriamanitra, ary izy hiara-mitoetra amin’izy ireo, ary ireo ho olony, ka Andriamanitra mihitsy no ho eo aminy. Ary hofafany ny ranomaso rehetra amin’ny mason’izy ireo, ka tsy hisy fahafatesana intsony, sady tsy hisy intsony ny alahelo na ny fitarainana na ny fanaintainana, fa efa lasa ny zavatra taloha.” (Apokalypsy 1:1; 21:3, 4) Eritrereto ange e! Tsy hisy intsony na ranomason’alahelo na fanaintainana na fahafatesana. Ho tanteraka amin’ny fomba feno ilay vavaka hoe hatao etỳ an-tany ny sitrapon’Andriamanitra, tahaka ny any an-danitra.

Rahoviana no ho tonga ny Fanjakan’Andriamanitra? Nampianarin’i Jesosy fa hanomboka hanjaka izy rehefa tonga ilay fotoana manokana nantsoiny hoe ‘fanatrehany.’ Nilaza faminaniana feno tsipiriany izy mba hampisehoana ny fotoana hanombohany hanjaka. Hampiavaka an’io fotoana io ny olana eran-tany, toy ny ady, mosary, horohoron-tany, areti-mandringana, ary ny fitomboan’ny fandikan-dalàna. (Matio 24:3, 7-12; Lioka 21:10, 11) Niharihary kokoa ireo sy ny olana maro hafa nolazain’i Jesosy, nanomboka tamin’ny 1914, taona nipoahan’ny Ady Lehibe I. Efa Mpanjaka àry izao i Jesosy. Kely sisa dia ho tonga ilay Fanjakana, ka hanao ny sitrapon’Andriamanitra etỳ an-tany.b

Midika inona ho anao ny fahatongavan’ny Fanjakan’Andriamanitra? Miankina amin’ny fandraisanao ny hafatr’i Jesosy izany.

[Fanamarihana ambany pejy]