Ihapari Comaana Cantikhiye ni Joau
2 Anavinreene mahuku meeli, u Kanaa-OoKalileeya yahopankiya ifesta yokacamentu ni anumwaane Yesu yaari wonwo. 2 Yesu wamoca naattharyaawe, ciicammo yaholattuliya nwo ufestaninwo.
3 Yahaleelaka vakaani umala iviinyu, Yesu ahiireliya naanumwaane co: “Iviinyu yaarinaaya atthwaala va, ihomala.” 4 Masi Yesu ahaakhula: “Vano nyuuva ni miiva ninkela vayi nhina ula mwahoola? Ukatyaaka khunaphiya.” 5 Anumwaannyaayo yahowiirela atthu yaakawa iviinywaayo co: “Mpanke yotheene inhalaawe wuurumani.” 6 Nne nipuronne cahaavo myaapu 6 co maluku, caaheliya maaci, khampa caahimyaaya nlamulo naayuuta nhina wiirattela; khula mwaapu caakela ilituru coophiyaka 44 awula 66. 7 Yesu ahowiirela: “Nhelele maaci mmamyaapunimmo.” Ni ayova yahohelela mpaka ucarihaca. 8 Vano, uyo ahowiirela co: “Nrike vakaani ni mwanvahe nhooleli ofesta.” Ni ayo atthwaayo yahopanka itthu yeereliyaaya. 9 Nhooleli ofestooyo ulawiha wawe maaci yaatatusiye iviinywaayo, hicuwelaka nipuro yaakhumaniyaaya ivinywiiyo (hataa ukhalaka wiira ale yanvahile yancuwela nipuroni yaakhumanaaya), uyo ahomwiihana nthelyuuyo 10 ni ahomwiirela: “Atthu enci ampacera uvaha iviinyu yomaana, atthwaayo yahapalaciyaka, phinaavahaaya iviinyu yoohinamaaneeyo. Masi weeva uhoosunka mpaka nna.” 11 Yesu aapankile iyo itthwiiyo u Kanaa-Ookalileya, iyo phaari ikhwaha Yesu yaapacerihaawe upanka miirirya cawe, ni ayo manannaayo ahoonihera ukhulupalyaawe ni attharyaawe yahomwaamini.
12 Wiirannya waya iyo itthwiiyo , uyova nkhayi naanumwaane, asihimaawe ni ciicammo attharyaawe yahohokoleela u Kafarnau, masi nwo khayaavirihile mahuku menci.
13 Vano, ahanca waattamela Paasikuwa aayuuta, ni Yesu ahorwaa u Yerusalemu. 14 Uyova ukela wawe ntempulu, ahaaphwanya anonkomacileene atthu yaatumiha imope, ikhontwaa, ikhuntta, ni ale yaakakhaniha nsurukhu. 15 Vano, upanka wawe nrepettho wonkhoyi, ahowoomola atthu otheene yaari ntempulu, niikhontwaa cayannyo, imope cayannyo, ahopinttulaca meeca aatthu yaakakhaniha nsurukhu ni ahomwarusaca nsurukhwaayooyo. 16 Ni uyo ahowiirela co atthu yaatumiha ikhuntta: “Nkumihe nnya citthunnya mu! Nhiye upanka inupa yaapaapa nipuro nootumihaciya!” 17 Vano, attharyaawe yahoopuwela itthu yantikhiye: “Inanna kinhalaaka ufenta inupeenyu, unhala ukhala khampa mooro umpharela wanrimani waka.”
18 Ayuuta woona waya iyo itthwiiyo, yahonkoha: “Isiyani inhalaa unithoonyihera inoonihera wiira weeva uhaana ukhulupale woopanka nnya citthunnya?” 19 Yesu ahowaakhula: “Nkomole ila itempulwiila, ni mi kinaahala uteka nhina mahuku mararu paasi.” 20 Vano, ayuuta yahomwiirela: “Ila itempulwiila itekiye nhina myaaka 46, vano weeva uneera wiira unaahala uteka nhina mahuku mararu paasi?” 21 Masi itempulu Yesu yaacaawe yaari irutthwaawe. 22 Ukati wunwelelihiyaawe, vano attharyaawe yahoopuwela itthu Yesu yoolumasakaawe, ayova yahaamini ile yaahimyaaya Cowantikhiya Cowaarya, ni itthu Yesu yuulumilyaawe.
23 Ukati waryaawe u Yerusalemu wafestani yo Paasikuwa, atthu enci yahanca umwaamini nlattu wo miiriirya caapankaawe. 24 Masi Yesu khaakhuluvela ayo atthwaayo, kontha anaacuwela otheene caya 25 ni kontha uyo khaapheela wiira ntthu anvahe usaahiti wapinaatamu, ukhala wiira uyo ancuwela itthu yaari wanrimani waya.