Ya Arooma
11 Kinawiikoha co: Kiireke Nluku howaakhotta apoovwaawe? Mena! Kontha miiva ciicammo kikhanle nsarayeli ucuulu wa Aparahaamu, nloko na Pencamii. 2 Nluku khaakhottile apoovwaawe aapacenryaawe waathanla. Khannocuwela wiira Cowantikhiya Cowaarya cinaamuuluma Eliyasi, ukati wanlepenlyaawe isontte Nluku nlattu wa asarayeli? 3 “Yehova, maporofeeteenyu otheene aheeviya, mapuro mwaaswaleliyeenyu ahokwanyulaciya, kihanle miiva veekha ni ayo atthwaayo ciicammo ampheela ukiiva.” 4 Masi Nluku aamwaakhunle isiyani? “Kihaana nanlelo alopwana 7.000 ahinaaya unswalela Pahaali.” 5 Inanna imocaaru, ciicammo mahukweehwaala, ahaavo atthu vakaani ahanle, athanliye nlattu woonamaana woonironya. 6 Wakhala wiira unamaana woonironya ninvahiya nlattu wo miteko cihu, paahi unamaana woonironya khawaahala ukhala unamaana woonironya.
7 Vano ninhala uhimyani? Itthu yaavyaaya asarayeli khayaaphwannye masi ale yaathanliye yaahophwanya. Kontha akiinaayo khayeewa, 8 toko cantikhiyaaya: “Nluku howiiriha urupa nhina mminepani, Nluku haavaha miitho ahinkhitiri woona ni haavaha manyaru ahinkhitiri wiiwa mpaka ilelo.” 9 Ciicammo Davidi heera: “Ifesta caya* cikhale khampa itapha, nryanko, nluku nookakatusa ni ahukhumwiye. 10 Miithwaaya yaaripele ni ahikhitiri woona ni nthanaaya ukhurupuwe mpaka.”
11 Vano kinkoha co: Niireke ayo ahokakathuwa ni ahomora mpaka? Khweeliini mena! Nlattu wo meettelwaaya oohinamaana uhaaphwanyiha woopwa amalaponi, wiira ayuuta yaakhalele nttima. 12 Vano, wakhala wiira meettelwaaya oohinamaana akhanle iparakha yo ila ituniyeela, ni uvukuwaca waya ikhanle iparakha yaatthu o ila ituniyeela, cinaahala utepa ukhala iparakha wanhalaaya umalela!
13 Vano, kinaawuulumanani nyuuva nhikhanle ayuuta, ukhala wiira miiva kikhanle apostolu aatthu ahikhanle ayuuta, ni kinaavaha ifayita ntekwaaka woolalyeera 14 wiira kiwiirihe apoovwaaka wuukhalelani nttima ni uwoopola apoovwaaka akiina. 15 Kontha ukhottiya waya uhaakavihera atthu akiina o watuniyani waataanaca ni Nluku, iyo maanaaya wiira yaakheleliyaka anhala ukhala toko ahonwelelihiya muukhwani. 16 Uhiya commo, wakhala wiira mphantte nkhwaawe wo iphaawu cinvahiya khampa itthuvo cikhanle cowaarya, iphaawu cotheene cikhanle cowaarya, ni wakhala wiira mitithari cikhanle cowaarya, mirittannyo ciicammo cowaarya.
17 Wakhala wiira iritta cikhwaawe cihokottolaciya, ni nyuuva nhookhalaru mwiri wooliveera wontakhwani, mwaaholuttiya ni mwiri nkhwaawe wooliveera wowapuwani ni mwaahophwanyera ifayita iparakha cinwanaaya mitithari co uyo mwiryuuyo, 18 phimaana nhiwacere pusya miritta. Mwaahiwacereke saana nnyo mirittannyo, muupuwele wiira khannolipiha mitithari masi mitithari phinoolipihani. 19 Vano nyuuva, nnaahala wiira: “Miritta cikhwaawe cahothikiliya wiira miiva kiluttanihiye ni miritta cikhwaawe.” 20 Khweeliini, nnyo mirittannyo cahothikiliya kontha khacaarina waamini, masi nyuuva nri oweemela kontha nhaana waamini. Masi nhiittottope, nhaana moovaka. 21 Kontha, wakhala wiira Nluku hothikila miri cooliveera, ni nyuuva ciicammo khannohala wooneliya uthunku. 22 Nyuuva nnaacuwela wiira Nluku khanle ooreera nrima masi ciicammo naaviruwaka. Uyo nawaaviruwela ale ammora nlattu wookhalana waamini woohilipa. Masi nyuuva nawuuthoonyiherani unamaana, mwapankaka itthu impheelaawe; mwaahipankeke itthu impheelaawe, ni nyuuva ciicammo nnaahala uthikiliya. 23 Ni ciicammo, yahiyaka ukhala atthu oohaamini, Nluku naahala waaluttaniha, kontha Nluku naakhitiri waaluttaniha-tho. 24 Vano, wakhala wiira nyuuva nhothikiliya wamwirini wooliveera wontakhwani ni nholuttanihiya ni mwiri wooliveera wowapuwani, uyo kahi phumpiyaaya commo, khuwanhala urika uluttaniha nipuro naathikiliyaaya nnyo irittannyo co mwiri wooliverooyo!
25 Mayamunna, kimpheela wiira ncuwele nnya isiiri cowaaryannya, wiira nhiicoone ukhala oocuwelaca: Asarayeli akiina yahokhala oohiiwelela mpaka waathanliyaaya atthu akiina yahaakhanle ayuuta, 26 ni ala manannaala asarayeli akiina phinhalaaya woopwa. Uhantikhiya co: “Moopoli nohala ukhuma u Siyau ni naahala umalamaliha citthu coohinamaana cimpankaaya ucuulu wa Yakopi. 27 Nna phinleehano ninhalaaka waapankana ukati unhalaaka umalamaliha matampyaaya.” 28 Ikhweeli wiira ayuuta akiina khacinaacivela ihapari comaana, iyo itthwiiyo inawuuphwanyihani ifayita, masi nlattu woothanliya ni Nluku, ayo anaafentiya nlattu waasinhiya-taataaya. 29 Kontha iparakha ni wiihaniya ni Nluku cikhanle citthu cihinhalaawe uturusela uttuli. 30 Kontha, toko nyuuva khalayi mwahaatthuneenyu umwiiwelela Nluku, masi vano nhooneliya ikiriri nlattu woohiiwelela wa ayuuta, 31 vano ayuuta khaaneewelela mpaka nnaco ni iyo itthwiiyo inaawiirihani wooneliya ikiriri, masi ciicammo ayuuta anaahala wooneliya ikiriri toko nyuuva cooneeliyeenyu ikiriri. 32 Nluku nowoona khampa ayo ahootthukiya nlattu woohiiwelela, ciicammo uyo naawoonela ikiriri otheene.
33 Khweeliini iparakha, ucuwela ni ankhili Nluku cikhanle citthu cuulupale! khaavo nkhitiri ucuwela ihukhumu cawe ni khaavo nkhitiri ucuwela iphiro cawe! 34 Vano “Tipani ncuwela moopuwelelo a Yehova, awula tipani tokile nvaha ikano?” 35 Awula “tipani pacenre unvaha itthu Nluku, wiira uyova anturusele?” 36 Kontha citthu cotheene uyo phumpile, ni cihokhala nlattu waawawe, ni cikhanle caawawe. Attottopeliye mpaka. Amem.