Ya Arooma
12 Phimaana, mayamunna, nlattu wo ikiriri ya Nluku kinawuulepelani wiira nvaherere irutthu cinyu khampa itthuvo yomaana inoncivela Nluku, munvarelaka nteko wowaarya nimoopuwelelweenyu. 2 Ni nhiye utakiha makhalelo o ila ituniyeela, masi munhiye Nluku wiira arukunuse moopuwelelweenyu, wiira ncuwele itthu impheelaawe ikhanle yomaana.
3 Kontha, nlattu woonamaana wookironya kivahiyaaka, kinwiirelani wo khula ntthu, wiira nhiicoone ukhala niifayita waapwaha akhunaninyu, masi khula ntthu oonihere wiira haana ankhili anvaranaca nuunamaana Nluku oovahilyaaweni. 4 Toko cirineehu miphantte cinci mwiirutthuni wihu, cihivaraka nteko mmocaaru, 5 ciicammo hiiva, hataa ukhala wiira niri atthu enci, nikhanle irutthu imoca paahi naataanaka ni Kristu masi nikhanle miphantte cinkaviherana. 6 Nihaana citthu cinci cinkhitiriihu upanka coovirikana nivahiyeehu nuunamaana woonironya wa Nluku; wakhala wiira ninkhitiri ulalyeera, nilalyeereke uvaranacaka nuwaamini urineehu; 7 wakhala wiira wowaavarela nteko akiina, naavarele; wakhala wiira nteko wowiitthuciha, mwiitthucihe; 8 ule nokhitiri ulipiha, aalipihe akhunanawe; ule nokawa, apanke iyo itthwiiyo ooniheraka ukhala namavaha; ule nohoolela, apanke iyo itthwiiyo eekurumicaka; ule khanle nakiriri apanke iyo itthwiiyo atteeliyaka nrima.
9 Nifento ninyu nikhale neekhweeli. Nthanye citthu cootakhala; nvaresese citthu comaana. 10 Mooniheraneke nifento no mayamunna. Nkhale oopacera waahisima akhunaninyu. 11 Mwiikurumice, nhikhale atthu oonyonyaciya. Nkhale oolipa nhina mminepani. Nvare nteko khampa ipottha ca Yehova. 12 Nvilele, ntteeliyeke nrima nlattu woniweherero ninyu. Nvilele yookhumelelakani masakha. Nhihiyerere ulompa. 13 Mmeelane ile irineenyu ni mayamunna, nvahanaka citthu cinoothwaani. Nwaakhele aletto. 14 Nhihiyerere waacaaliha ale anoolupatthani; mwaacaalihe ni nhaalaphakace. 15 Ntteeliye nrima ni ale antteeliya, munle ni ale anonla. 16 Mwaawacere akhunaninyu toko cineewacereenyu; nhuupuwele citthu cinhala uwiirihani wiittottopa, masi nhoolelihere citthu cinhala uwiirihani wiiyeviha. Nhiicoone ukhala oocuwelaca waapwaha akhunaninyu.
17 Mwapankiya itthu yootakhala nhilivyaanihere ni itthu yootakhala. Mwiikurumice waapankela citthu comaana atthu otheene. 18 Wakhitirya vale, nkhale ninnema naatthu otheene. 19 Mayamunna nhilivyaaniherane, munhiye Nluku oonihere uviruwa wawe, kontha uhantikhiya wiira: “‘Thi miiva kinlamuliya ulivyaanihera,’ neera Yehova.” 20 Masi uhiya commo, “Nwananiinyu yanvola itala munvahe iyoolya; nanvola ntthona, munvahe maaci; kontha mwapanka commo, nnaahala umwiitthela makhala omooro wa muru wawe.” 21 Nhiihiyerere ntthemiyaka ni citthu cootakhala, masi nttheme citthu cootakhala mpankaka citthu comaana.