Ya Arooma
10 Mayamunna, mi kimpheela wiira ayo yoopwe, iyo phiitthu impheelaaka wanrimani waka ni inonlepelaaka Nluku. 2 Kontha mi kinaavaha usaahiti wiira ayo anawiikurumica unswalela Nluku, masi kahi nlattu woocuwela ikhweeli. 3 Kontha nlattu woohicuwela isariya ca Nluku masi weettela isariya caya, khaaneewelela isariya ca Nluku. 4 Kontha Kristu homalamaliha nlamulo na Moceesi, wiira atthu otheene anhala umwaamini akhale anasariya.
5 Kontha Moceesi hantikha isariya inhimiya munlamuloni: “Ntthu neettela nnya citthunnya naahala ukhala nkumi nlattu wo nnya citthunnya.” 6 Masi isariya inwaana waamini ineera: “Nhiire wanrimani winyu co: ‘Tipani nohala uwela wiirimu?’ wiira amwiirihe Yesu ukhuruwa; 7 awula: ‘Tipani nohala ukela munlikittini nowiisya?’ Wiira ankumihe Yesu mmahiye.” 8 Masi Cowantikhiya Cowaarya cinhimyani? “Nuulumo niri wakhiviru ni weeva, wa malakuni waa ni wanrimani waa”; iyo maanaaya, “nuulumo” nowaamini, ninlalyeereehu. 9 Kontha walalyeeraka ni malakwaa waatthuni wiira Yesu akhanle Apwiiya, ni wanrimani waa wamwaaminiki Nluku wiira homunweleliha, unaahala woopwa. 10 Kontha ninaamini wanrimani wihu wiira nikhalane isariya ni ninlalyeera waatthuni nimalakweehu wiira noopwe.
11 Cowantikhiya cowaarya cineera: “Ule naamini nlattu wa Kristu khanhala ulolovaca.” 12 Kontha ayuuta ni akereeku khaavirikanne; ni Pwiiyaaya khanle mmoca ni nawaakavihera otheene ale anonlepela waakavihera. 13 Kontha “ule nohala uromola ncina na Yehova naahala woopwa.” 14 Masi anhala unromola cani woohimwaamini? Anhala umwaamini cani ule hiiwilyaaya oolumiyaka? Ni anhala wiiwa cani hikhanle ntthu owaalalyeera? 15 Awula anhala ulalyeera cani, uhikhanle wiira ahooveleelihiya? Khampa cantikhiyaaya: “Inyaa cooreera phinnye cinlalyeera ihapari co citthu comaana!”
16 Masi, kahi atthu otheene phiiwelenle ihapari comaana. Kontha Isaiya heera: “Yehova, tipani aaminni citthu cuulumileehu?” 17 Phimaana, ntthu naamini eewaka nuulumo. Ni ineewaawe inkhuma nnuulumoni nimmuuluma Kristu. 18 Masi mi kinawiikoha co: Kiireke khayiiwile? Khweeliini, “itthu yuulumilyaaya iheewannya ntuninyani motheene; ni ile ilalyenryaaya ihomwareela mpaka mapuro oottayi.” 19 Kinawiikoha-tho co: Kiireke asarayeli khayiiweehile? Yoopacera, Moceesi heera: “Kinaahala uwiirihani ukhalela ihace ile ihiri apoovu; ni kinaahala uwiirihani waaviruwela apoovu oohankhili.” 20 Ni mpaka Isaiya aheera: “Kihophwanyiya naatthu yahaakaavya; kihocuweliya naatthu yahaakikoha.” 21 Masi uyo neera co awaacaka asarayeli: “Mahuku otheene kaanaataphulela ntata naka apoovu oohiiwelela ni owiicuunuwiha.”