MWAHA WOOSOMIYA 46
Yehova honikhuluveliha wiira ituninya inaahala ukhala ipeephoni
“Ule neepheelacera iparakha watuninyani, naahala uvahiya iparakha ni Nluku eekhweeli.”—ISAI. 65:16.
NCIPO 3 Yehova Onninivaha Ikuru, Nlipelelo, ni Nroromelo
NINHALA WIITTHUCANI?a
1. Isiyani porofeeta Isaiya yaahimenryaawe asarayeli?
POROFEETA Isaiya hantikha amwaacaka Yehova wiira khanle Nluku eekhweeli. Nuulumo nitaphuleliye “ikhweeli” maanaaya wiira “Amem.” (Isai. 65:16, niwehero) “Amem” maanaaya wiira “wakhale vava” awula “khweeliini.” Mbiiblyani naromoliyaka nuulumo “Amem” aaciyaka Yehova ni Yesu, umpheela uhimiya wiira itthwiiyo ikhanle yeekhweeli. Phimaana, Itthu Isaiya yaahimenryaawe asarayeli yaari yoohirikarika. Itthu inkhuluvelihaawe Yehova inkhala yookhuluvelya. Yehova ahoonihera iyo ukati weerannyeehilyaawe citthu cotheene caakhuluvelihilyaawe.
2. Kontha isiyani nihaana ukhuluvela inatiri ca Yehova, ni makohoni anhaleehu waakhula nhina ula mwahoola?
2 Pooti hiiva ciicammo wankhuluveleehu citthu Yehova nokhuluvelihaawe coohoolo? Uvira waya myaakha 800 Isaiya nakhwile, apostolu Paulu ahotaphulela kontha isiyani citthu cinkhuluvelihaawe Nluku cinkhalaaya citthu cookhuluvelya. Paulu aheera wiira ‘Nluku khanlamuliya wootha.’ (Mabere. 6:18) Hi ninaacuwela wiira khawankhitirya ukhuma maaci oociva ni oohiciva nhina iluusi imocaaru. Yehova ciicammo phinonkhumakhuma ikhweeli ni uyo khinlamuliya unkhuma ile ikhanle yowoothiya. Phimaana, pooti wankhuluveleehu citthu cotheene Yehova cinhimyaawe, hataa citthu coohoolo cinikhuluvelihilyaawe. Nhina ula mwahoola, ninaahala woopela mwaha ala makohwaala: Isiyani Yehova nikhuluvelihilyaawe univaha uhoolo? Ni isiyani Yehova yuulumilyaawe innikupaliha wiira naahala wiirannyeeha citthu cotheene cikhuluvelihilyaawe?
ISIYANI YEHOVA IKHULUVELIHILYAAWE?
3. a) Iparakhani yomaana Yehova inikhuluvelihilyaawe? (Nwehe Apokalipise 21:3, 4.) b) Manannani atthu akhwaawe cinaakhulaaya naalalyeeraka iyo iparakheeyo?
3 Iparakha nimpheeleehu woopela mwaha ikhanle iparakha inaacivela aswali a Nluku o ntuninyani motheene. (Nsome Apokalipise 21:3, 4.b) Yehova hokhuluveliha wiira nuuwakatyaaya, khunrwaa ukhala-tho ukhwa, ucukulaca, wunla ni hataa uwerennya. Hi ninaavarela nteko nnyo iveerusu co mbiiblyaninnyo wiira naalalyeere atthu mananna cinhalaaya ukhala ukumiihu upeephoni. Manannani atthu akhwaawe cinaakhulaaya naahimeryaka nno niweheronno? Ayo atthunaka aneera co: “Iyo itthwiiyo ihotepa ukhala yooreera cinene. Akinaamini wiira inaahala wiirannya!”
4. a) Yehova ukhuluveliha wawe ipeephoni, isiyani yaacuwelaawe? b) Uhiya upanka paahi inatiri, isiyani Yehova ipankilyaawe?
4 Ukati Yehova waamuulumannyaawe apostolu Joau wiira antikhe mananna cinrwaaya ukhala ukumiihu upeephoni, Yehova ancuwela wiira hiiva ilelo naanaahala uvarela nteko nnyo iveerusunnyo wiira naalalyeere atthu ihapari comaana co Umwene wa Nluku. Yehova ciicammo ancuwela wiira atthu enci wanhala waarika ukupali wiira uhuva unaahala umala wahoolo. (Isai. 42:9; 60:2; 2 Akor. 4:3, 4) Vano ninhala waakavihera cani akhunanihu ukhuluvela wiira iparakha cihimiye nhina Apokalipise 21:3, 4 cinaahala wiirannya? Ni manannani hiiva ninlamuliyeehu ulipihaca unkhuluvela wihu Yehova ni ukhuluvela wihu inatiri cawe? Yehova khakhuluvelihile paahi nnyo citthu comaanannyo. Masi ciicammo hooluma itthu inniiriha ukhuluvela wiira cinaahala wiirannya. Isiyani yuulumilyaawe?
YEHOVA HONIKHULUVELA WIIRA INATIRI CAWE CINAAHALA WIIRANNYA
5. Iveerusuni cinnikavihera ukhuluvela inatiri ca Nluku, ni nnyo iveerusunnyo cinhimya isiyani?
5 Nhina Apokalipise 21:5, 6a, ninaaphwanya citthu cikhwaawe cinniiriha ukhuluvela inatiri ca Yehova cinooluma ipeephoni. Mmo ninsoma co: “Ule onkomale wahiceni enre co: ‘Woone! Kinaakhaliha conaanaano citthu cotheene.’ Uyo ciicammo aheera-tho co: ‘Wantikhe, kontha ala moolumwaala akhanle ookhuluvelyaa ni okhweeli.’ Ni uyo ahokiirela co: ‘Ala moolumwaala aheerannya! Mi kikhanle Alfa ni Oomeka, oopacera ni oomalela.’”
6. Kontha isiyani itthu inhimyaaya Apokalipise 21:5, 6 inaalipihaca ukhuluvela wihu inatiri ca Yehova?
6 Manannani nnya iveerusu co mbiiblyani nnya cinhalaaya ulipihaca ukhuluvela wihu citthu Nluku cikhuluvelihilyaawe? Ilivuru Clímax de Revelação iheera co yaacaka nnyo iveerusunnyo: “Ukhala toko Yehova ahaasinari ideclaração yaathoonyera wiira naahala wiirannyeeha nnyo iparakha coohoolonnyo.”c Apokalipise 21:3, 4 inaahimya citthu Yehova cinikhuluvelihilyaawe. Vano, nhina iveerusu 5 ni 6, ninaaphwanya assinatura a Yehova anoonihera wiira naahala upanka itthu ikhuluvelihilyaawe. Vano, nttwee noone itthu Yehova yuulumilyaawe inniiriha ukhuluvela inatiri cawe.
7. Tipani oolumile moolumo amphwanyannya nhina iveerusu 5, ni kontha isiyani iyo itthwiiyo inaanilipiha?
7 Wuupaceroni iveerusu 5 wiiriye co: “Ule onkomile wahiceni heera.” (Apoka. 21:5a) Ala moolumwaala amphwanyannya paahi mapuro mararu Yehova anoolumaawe nlivuruni yo Apokalipise. Khanaari nlayikha noolumacile ni khaari Yesu, masi Yehova mwaneene phoolumile! Iyo itthwiiyo inaaniiriha ukhuluvela moolumo otheene amphwanyannya nhina iveerusu 5. Kontha isiyani? Kontha Yehova “khanootha.” (Titu 1:2) Phimaana, nihaana nikhuluvelaka moolumo amphwanyannya nhina Apokalipise 21:5, 6.
“WOONE! KINAAKHALIHA CONAANAANO CITTHU COTHEENE”
8. Isiyani Yehova yuulumilyaawe inthoonyera wiira moolumwaawe anaahala wiirannya? (Nwehe Isaiya 46:10.)
8 Nuulumo nikiina Yehova nuulumilyaawe nikhanle “Woone!” (Apoka. 21:5) Nuulumo “woone!” nitaphuleliya niiluka ikereeku ninaaromoliya mapuro menci nlivuruni yo Apokalipise. Ilivuru imoca ihohimya wiira nno nuulumo nno nakhumelaka ninantikhiye nkhayi niipontu de esclamação nimpheela unkavihera ntthu nosoma weeserera nuuta awula uviriyana sana-saana itthu inhimiya nno nipuronno. Isiyani Nluku ihimilyaawe nhina iyo iveeruswiiyo? Uyo heera: “Kinaakhaliha conaanaano citthu cotheene.” Yehova naarwaa upanka ayo marukunuswaayo wahoolo. Uyo naakupaleela wiira naahala wiirannyeeha itthu ikhuluvelihilyaawe. Uyo nooluma khampa wiira aheerannya ayo marukunuswaayo.—Nsome Isaiya 46:10.d
9. a) Moolumo “kinaakhaliha conaanaano citthu cotheene” maanaaya wiira cani? b) Isiyani inhala wiirannya ‘niirimu’ ni ‘niituninya’ yo mahukwaala?
9 Nhina Apokalipise 21:5, Yehova enre: “Kinaakhaliha conaanaano citthu cotheene.” Iyo itthwiiyo maanaaya isiyani? Ala moolumwaala anaaca citthu piili Yehova cinhalaawe upanka. Yoopacera: Yehova naahala umalamaliha ila ituninya yo masakheela. Yonayeeli: Uyo naarwaa uwaana ituninya yonaanaano. Nhina ilivuru yo Apokalipise 21:1, ninsoma co: “Irimu yokhalayi ni itthaya yokhalayi cahovira.” Yeeriyaka “irimu cokhalayi,” cinaaciya ikuvernu cinhooleliya ni Sotwani ni nimaciinnyaawe. (Mat. 4:8, 9; 1 Jo. 5:19) Ni mbiiblyani weeriyaka “ituninya” anaaciya atthu ankhala va watuninyani va. (Upha. 11:1; Isaa. 96:1) Phimaana, weeriyaka “ituninya yokhalayi” anaaciya atthu ampanka citthu coohiloka. Kahi wiira Yehova naahala ulokihaca ikuvernu ca apinaatamu ni waalokihaca atthu oohinamaana wiira aakhalihe onaanaano. Masi, uyo nohala waamalamaliha wiira ahikhale-tho, ni uwaana irumu yonaanaano ni ituninya yonaanaano. Maanaaya wiira naahala uwaana ikuvernu yonaanaano inhala waalamulela atthu anhala upanka citthu comaana.
10. Manannani Yehova cinhalaawe ukhaliha conaanaano citthu cotheene?
10 Manannani Yehova cinrwaawe ukhaliha citthu cotheene conaanaano? (Apoka. 21:5) Yehova naarwaa ulokihaca ituninya ni uwiiriha apinaatamu ukhala oohipahuwa. Toko cinhimyaaya inatiri imphwanyannya nhina Isaiya, Yehova naarwaa ukhaliha ituninya yotheene nipuro nooreera, toko ijardim yo Eeteni. Nwo ulokihaciya nwo ciicammo unaarwaa waatteeliha nrima apinaatamu. Yehova hokhuluveliha wiira naarwaa umaliha iretta cotheene. Atthu oohoona, oohiiwa ni ooheetta anaarwaa uvonihiya; ni ciicammo ale akhwile anaarwaa wunwelelihiya.—Isai. 25:8; 35:1-7.
“ALA MOOLUMWAALA AKHANLE OOKHULUVELYA NI OKHWELI. . . . AHEERANNYA!”
11. Isiyani Yehova yanlepenlyaawe Joau wiira apanke, ni nlattuni wanrumilyaawe upanka commo?
11 Isiyani-tho Nluku oolumilyaawe innikupaliha wiira naahala wiirannyeeha citthu cikhuluvelihilyaawe? Yehova ahomwiirela apostolu Joau co: “Wantikhe, kontha ala moolumwaala akhanle ookhuluvelyaa ni okhweeli.” (Apoka. 21:5) Yehova uhiya unlepela paahi apostolu Joau wiira antikhe, uyo ahonhimerya kontha isiyani aalamuliyaawe wantikha ayo moolumwaayo. Yehova aheera: “Kontha ala moolumwaala akhanle ookhuluvelya ni okhweeli.” Iyo itthwiiyo inthoonyera wiira moolumo a Nluku akhanle ookhuluvelya. Hi ninansukhurweela cinene apostolu Joau utthuna wawe wantikha ayo moolumwaayo. Nlattu wo iyo itthwiiyo, ilelo hi unaanicivela usoma nno nweherero nookhala upeephoni nno ni wuupuwela nnyo iparakha comaana nnyo.
12. Nlattuni Yehova winryaawe “ala moolumwaala aheerannya”?
12 Isiyani-tho Yehova yuulumilyaawe? Uyo heera: “Ala moolumwaala aheerannya!” (Apoka. 21:6) Nhina iyo iveeruswiiyo, Yehova oolumile citthu cikhuluvelihilyaawe khampa wiira ciheerannya. Ni Yehova hooluma ayo manannaayo kontha khiivo itthu inhala unhiiha upanka ile impheelaawe. Ciicammo, Yehova hooluma-tho itthu ikhwaawe inhala unikupaliha wiira citthu cikhuluvelihilyaawe cinaahala wiirannya. Itthuni yeeyo?
“MI KIKHANLE ALFA NI OOMEKA”
13. Nlattuni Yehova wenryaawe “mi kikhanle Alfa ni Oomeka”?
13 Toko nuulumileehu wiipaceroni, Yehova mwaneene hooluma ikwaha tthaaru nhina iwooni ca Joau. (Apoka. 1:8; 21:5, 6; 22:13) Ikwaha cootthaaru, Yehova aheera: “Mi kikhanle Alfa ni Oomeka.” Nuulumo “Alfa” ikhanle ileetra yoopacera nhina abecedário oluuka ikereeku; ni nuulumo “Oomeka” ikhanle ileetra yoomalela. Yehova wiira wawe “mi kikhanle Alfa ni Oomeka,” apheela woonihera wiira apaceraka upanka itthu, uyo khanhiyerera iyo itthwiiyo mpaka wammaliheraawe ni mpaka ikhumeke saana.
Yehova apaceraka upanka itthu, uyo naapiiha mpaka wuumaleloni (Nwehe iparaagarafu 14, 17)
14. a) Ukatini Yehova wenryaawe “Alfa” ni ukatini unhalaawe wiira “Oomeka”? b) Uphattuwaca 2:1-3 innikhuluveliha isiyani?
14 Uwakati Yehova waamumpilyaawe Atamu ni Hawa, uyo ahaahimerya itthu yaalakelenlyaawe apinaatamu watuniyani. Ibiiblya ineera co: “Vano, Nluku ahaavaha iparakha ni aheerela: ‘Mwaayare asaana ni mwincive; ncare ni nwacere ituninya.’” (Upha. 1:28) Uwakati Yehova waahimenryaawe itthu yaapheelaawe, unkhala toko uyo oolumile nuulumo “Alfa.” Itthu Yehova yaapheelaawe inaahala uwiirannyeela asiculawe Atamu ni Hawa ammwiiwelela Nluku. Iyo itthwiiyo inhala wiirannya ukati unhalaaya ukhala oohipahuwa, uyaranaca, winciva ni ukhaliha ituninya ipeephoni. Wiirannya iyo itthwiiyo unhala ukhala toko Yehova enre “Oomeka.” Yehova umaliha wawe wumpa irimu, ituninya ni citthu cotheene, uyo honikhuluveliha itthu. Hi ninaaphwanya iyo itthwiiyo nhina Uphattuwaca 2:1-3. (Nsome.e) Yehova enre wiira nihuku nonasaapa nikhanle nihuku nowaarya. Iyo itthwiiyo maanaaya isiyani? Iyo inthoonyera wiira Yehova naarwaa wiirannyeeha itthu yaapheelelaawe apinaatamu wiimaleloni nno nihuku nonasaapanno.
15. Nlattuni Sotwani atthunaka woopuwenlyaawe wiira anhala ukhitiri unhiiha Yehova upanka itthu yaapheelaawe?
15 Atamu ni Hawa uhimwiiwelela waya Yehova, yahophwanya matampi. Nlattu wo iyo itthwiiyo, matampi ni ukhwa uhaaphwanya asaanaaya. (Aroo. 5:12) Wiirannya waya iyo itthwiiyo unkhala toko wiira Sotwani aamananiha unhiiha Yehova waacariha watuninyani atthu oohipahuwa ni oomwiiwelela. Waakhala toko wiira Yehova khaahala ukhitiri umalihera upanka itthu yaapheelaawe ni wiira “Oomeka.” Atthunaka Sotwani oopuwela wiira Yehova khaahala ukhitiri wiirannyeeha itthu ikhuluvelihilyaawe. Ciicammo, atthunaka uyo oopuwela wiira Yehova anhala ummalamaliha Atamu ni Hawaa, ni umumpa nlopwana ni nthiyana nkiina wiira eerannyeehe itthu yaapheelelaawe apinaatamu. Masi Yehova, unari wiira ahopanka iyo itthwiiyo, Sotwani aahala wuupuwela wiira Yehova khanle owootha. Nlattuni? Toko cinhimyaaya Uphattuwaca 1:28, Yehova ahomwiirela Atamu ni Hawa wiira ucuulwaaya unaahala uyaranaca ni winciva watuninyani.
16. Isiyani yaamwiirihile Sotwani wuupuwela wiira Yehova khayaahala unkhumela saana itthu yaapheelaawe upanka?
16 Isiyani-tho Sotwani yoopuwelaawe wiira Yehova anhala upanka? Atthunaka Sotwani oopuwenle wiira Yehova anhala unhiya Atamu ni Hawa yaayaracaka asaana ni ayo khayaahala ukhitiri ukhala atthu oohipahuwa. (Ekles. 7:20; Aroo. 3:23) Unari wiira iyo phi itthu yeerannyeele, Sotwani aahala wiira Yehova khinkhumenle saana itthu yaalakenlyaawe upanka. Kontha isiyani? Kontha unari commo, Nluku khaahala ukhitiri upanka itthu yaalakenlyaawe: ukhaliha ituninya ipheephoni yookhaliya naatthu enci oohipahuwa ni oomwiiwelela.
17. Isiyani Yehova yaapankilyaawe wiira amalihe marikariko yaawannyaawe Sotwani, Atamu ni Hawa, ni isiyani yeerannyeele nlattu Yehova woopanka iyo itthwiiyo? (Nwehe ciicammo ilatarato.)
17 Masi Sotwani khaacuwela itthu Yehova yaahalaawe upanka. Yehova ahopanka citthu cawe sana-saana wiira yiirannye itthu impheelaawe. (Isaa. 92:5) Yehova ahaahiyaca Atamu ni Hawa wiira yaayarace asaana. Ayo manannaayo, uyo hoonihera uhikhala owootha. Yehova ciicammo ahonveleeliha Mwanawe, eehaniye “ucuulu,” wiira awoopole asaana a Atamu ni Hawa yaahala umwiiwelela. Commo, yanhala wiirannya itthu yaalakenlyaawe. (Upha. 3:15; 22:18) Ala manannaala, Yehova caanaahala unkhumela saana citthu caalakenlyaawe upanka. “Ucuulu” Yehova waakhuluvelihilyaawe wanhala uvaha ukumi wiira uwoopole apinaatamu. Sotwani khoopuwenle wiira Yehova anhala upanka iyo itthwiiyo. Kontha isiyani? Kontha Yehova nooponle nlattu wo nifento nawe nuulupale. (Mat. 20:28; Joau 3:16) Ni Sotwani kharina nifento ni uyo khanle nlayikha nowiicoona. Vano, isiyani inhala wiirannya nlattu wo uyo ucuuluuyo woovaha ukumyaaya wiira uwoopole atthu? Wiimaleloni Umwene wo myaakha 1.000 wa Kristu, asiculawe Atamu ni Hawa ammwiiwelela Nluku ni oohipahuwa anaahala ucara va watuniyani ni ituninya inkookhala ipeephoni, khampa Yehova caapheelaawe. Uyo ukatyuuyo, unhala ulikanaca toko Yehova enre “Oomeka.”
MANANNA OOLIPIHACA UKHULUVELA WIHU INATIRI YA YEHOVA
18. Citthuni tthaaru cinniiriha ukhuluvela inatiri ca Yehova? (Nwehe ikwaaturu ineera “Citthu tthaaru cinniiriha ukhuluvela inatiri ca Yehova.”)
18 Nhina ula mwahoola, nihoona citthu cinci cinhala uniiriha ukupali wiira ituninya inaahala ukhala ipeephoni. Vano, ninhala waakavihera cani akhunanihu ukupali wiira itthu ikhuluvelihilyaawe Yehova inaahala wiirannya? Yoopacera: Yehova mwaneene phikhuluvelihile. Ilivuru yo Apokalipise ineera co: “Ule onkomile wahiceni heera: ‘Woone! Kinaakhaliha conaanaano citthu cotheene.’” Yehova haana ucuwelaca ni ikuru wiira apanke itthu ikhuluvelihilyaawe. Yonayeeli: itthu Yehova ikhuluvelihilyaawe inkhala khampa iheerannya. Phimaana, uyo heera co: “Ala moolumwaala akhanle ookhuluvelya ni okhweeli. . . . Ala moolumwaala aheerannya!” Yoneeraru: khiivo itthu inhala unhiiha Yehova umalihaca itthu ipacenryaawe. Phimaana, uyo heera co: “Mi kikhanle Alfa ni Oomeka.” Wiimaleloni, unaahala woonannya wiira Sotwani phiri owootha, kahi Yehova.
19. Moonaka wiira ntthu unanrika ukupali inatiri ya Nluku, nnohala upankani?
19 Ukati wotheene nyuuva nnomuulumaneenyu ntthu wuulalyeerani ni uyo ooniheraka unkhuluvela Yehova ni citthu cikhuluvelihilyaawe, nyuuva nnaalipihaca ukhuluvela winyu inatiri ca Yehova. Vano, muupuwele wiira nyuuva nhonsomela ntthu Apokalipise 21:4 ni uyo eera co: “Iyo itthwiiyo ihotepa ukhala yooreera cinene. Akinaamini wiira inaahala wiirannya!” Mwaahala upankani? Munsomele ni muntaphulele iveerusu 5 ni 6. Ni munhimerye ntthuuyo wiira nhina nnyo iveerusunnyo unkhala khampa Yehova naasinari ideclaração inoonihera wiira naahala upanka itthu yuulumilyaawe.—Isai. 65:16.
NCIPO 145 Muluku Ooleiherya Eparayiisu
a Nhina ula mwahoola, ninaahala woona mananna Yehova cinnikhuluvelihaawe wiira inatiryaawe inaahala wiirannya. Khula ukati hiiva ninaalalyeereehu atthu nno niwehereronno, ninaalipihaca ukhuluvela wihu inatiri ca Yehova.
b Apokalipise 21:3 Vano, kaheewa ncuu nuulupale naakhuma wahiceni niiraka: “Woone! Inupa ya Nluku iri naapinaatamu ni uyo naarwaa ukhala naayova ni ayova ankookhala nloko-nawe. Ni Nluku naarwaa ukhala wamoca naayova. 4 Ni naarwaa uwuta miithoori, khunhala ukhala-tho ukhwa, ucukulaca, wunlanliya, ni hataa yoowerya. Citthu cokhalayi cihovira”.
d Isaiya 46:10 Ukhuma wuupaceroni kinnolalyaa unkhica, ni ukhuma mahuku okhalayi kinnohimya citthu cihinatthi upankiya. Kineera co: “Ilakenlyaaka inaahala wiirannya ni kinaahala upanka yotheene yookicivela.”
e Uphattuwaca 2:1 Coo, caahomala upankiya irimu, itthaya ni citthu cotheene cimphwanyannya. 2 Nihuku nonasaapa, Nluku ahomaliha miteko cawe ni nno nihukunno, uyo ahomumulela miteko cawe cotheene. 3 Nluku ahocaaliha nihuku nonasaapa ni ahokhaliha nihuku nowaarya, kontha nno nihukunno Nluku naamumulela miteko cawe cotheene cipankilyaawe ni cotheene cumpilyaawe.