MPANTTA 47
Nheetthenkaca wiira mpattisiye?
Nlattu woosomihiya winyu Ibiiblya, nyuuva nheetthuca myaha cinci ca Yehova. Atthunaka ahaavo marukunuso apankileenyu muukumini winyu wiira mweettele citthu cineetthuceenyu. Masi atthunaka ihaavo inoorikarikihelani wiivaherera wa Yehova ni wiira mpattisiye. Nhina ula mpanttoola ninaahala woopela mwaha citthu atthunaka caahala wuurikarikihelani wiira mpattisiye ni itthu inlamuliyeenyu upanka wiira nttheme nnyo citthunnyo.
1. Wiira mpattisiye nhaana ncuwelaka citthu cotheene co mbiiblyani?
Wiira mpattisiye, nyuuva nhaana ‘ncuwelaka ikhweeli’ co mbiiblyani. (1 Timotiyu 2:4) Masi iyo khinhimya wiira nyuuva nhaana ncuwelaka waakhula makoho otheene ampankiya nhina itthu inhimyaaya Ibiiblya. Kontha hataa ale apattisiye khalayi khanhiyerera wiitthuca myaha ca Yehova. (Akolosu 1:9, 10) Masi wiira mpattisiye, nyuuva nhaana ncuwelaka mattharelelo o Nnuulumoni na Nluku. Mahumu anaahala wuukaviherani woonenela wakhala wiira nhophiyera wampattisiyeenyu.
2. Citthuni cinlamuliyeenyu upanka nhinaaya upattisiya?
Nhinaaya upattisiya, nyuuva nhaana ‘nrukunusaka nrimeenyu, ni uhiya meettelweenyu oohiloka.’ (Nsome Miteko 3:19.) Iyo maanaaya wiira nyuuva nhaana nhiyaka khula itthu yoohiloka yaapankeenyu khalayi ni unlepela Yehova wuulevelelani. Ni ciicammo maanaaya wiira nyuuva nholakela upanka ile impheelaawe Yehova ni wiira khannohala upanka-tho itthu inonrusa. Itthu ikhwaawe inlamuliyeenyu upanka, ukhanle urwaa mmikutthaanoni ni ulalyeera wamoca ni mayamunna o wanlokoni.
3. Kontha isiyani nhinlamuliyeenyu woova upattisiya?
Ahaavo anoova uhikhitiri upanka citthu cotheene cinkhuluvelihilyaaya Yehova. Khweeliini ikwaha ikhwaawe nyuuva nnaahala uvonya mpankaka citthu cinonrusa Yehova. Hataa, alopwana ni aathiyana ookhuluvelya anromoliya mbiiblyani yaanaavonyaka. Masi nhiliyale wiira Yehova khanaaweherera ale anonswalela uhivonya hataa vakaani. (Nsome Isaalimu 103:13, 14.) Uyo nokhala ootteeliya nrima mweekurumicaka upanka ile inkhitiriinyu! Ni uyo naahala wuukaviherani nyuuva. Khweeliini, Yehova naakhuluveliha wiira khiivo nanka itthu “inhala ukhitiri unimwalaniha nnifentoni [nawe].”—Nsome Arooma 8:38, 39.
MUNCERERE WIITTHUCA WINYU
Uncuwela saana Yehova ni utthuna ukaviheriya nuuyova, unaahala wuuvahani ikuru cimpheeleenyu wiira nkhitiri utthema khula itthu inhala upheela wuurikarikihelani wiira mpattisiye.
4. Muncuwele sana-saana Yehova
Manannani cinlamuliyeenyu uncuweleeha Yehova nhinaaya upattisiya? Nyuuva nhaana muncuwelaka Yehova wanhaleenyu unfenta ni upheela untteeliha nrima. Moone IVIDIYU, wiira ncuwele itthu ipankilyaaya anamasoma Ibiiblya amphwanyannya ntuninyani motheene wiira ancuweleehe Yehova. Mwamalihaka woona, moopele mwaha nna nikohonna:
Toko conneehu nvidiyunimmo, isiyani yaakavihenre atthu akhwaawe wiitthenkaca wiira apattisiye?
Nsome Arooma 12:2, ni mwamalihaka usoma, moopele mwaha ala makohwaala:
Cihaavo citthu cineetthucihiya mbiiblyani cinoorikani ukupali? Unawuurikani ukupali wiira Masaahiti a Yehova aneetthuciha ikhweeli?
Wakhala wiira unawuurikani ukupali, isiyani nyuuva inlamuliyeenyu upanka?
5. Nttheme marikariko wiira mpattisiye
Otheene cihu, nahaanana marikariko ukati waalakenleehu wiivaherera wa Yehova wiira nipattisiye. Wiira moone ntakihero nimoca, moone IVIDIYU, ni mwamalihaka woona, moopele mwaha ala makohwaala:
Ividiyu imalihileehu woona, marikarikoni anuunu Narangerel yaatthemilyaaya wiira akhitiri unswalela Yehova?
Unfenta Yehova waakavihenre cani anuunu Narangerel utthema marikariko yaananaaya?
Nsome Miruku 29:25 ni 2 Timotiyu 1:7. Mwamalihaka usoma, moopele mwaha nna nikohonna:
Citthuni cinonkavihera ntthu ulipa nrima wiira akhitiri utthema marikariko anaananaawe?
6. Nkhuluvele wiira Yehova naahala wuukaviherani
Yehova naahala wuukaviherani wiira nkhitiri untteeliha nrima. Moone IVIDIYU, ni mwamalihaka woona, moopele mwaha ala makohwaala:
Ividiyu yonneehu, isiyani yanrikarikihela namasoma Ibiiblya mmoca upattisiya?
Isiyani yaalipihacile unkhuluvela wawe Yehova?
Nsome Isaiya 41:10, 13, ni mwamalihaka usoma, moopele mwaha nna nikohonna:
Mweevahereraka wa Yehova, kontha isiyani nnolamuliyeenyu ukupali wiira Yehova naahala wuukavihera ukhitiri upanka ile inkhuluvelihileenyu?
7. Muncerere unsukhuru Yehova nifento ninoothoonyeraaweni
Wuupuwela inanna Yehova cinoofentaaweni, unaahala wuncerera unsukhurweela winyu ni upheela winyu unswalela mpaka. Nsome Isaalimu 40:5, ni mwamalihaka usoma, moopele mwaha nna nikohonna:
Iparakhani Yehova cinvahaawe cintepa wuucivelani?
Porofeeta Jeremiya anonfenta Yehova ni naanancivela Nuulumo na Yehova, ciicammo uyo anvaha ifayita iparakha yaarinaawe yonswalela Yehova. Jeremiya ahoolumaca eeraka: “Nuulumo ninyu nihokitteeliha nrima cinene, kontha mi kinaacisa ncina ninyu, oo Yehova.” (Jeremiya 15:16) Mwaakhule ala makohwaala:
Kontha isiyani ukhala Saahiti a Yehova ikhanle iparakha yuulupale?
Nyuuva nnaapheela upattisiya ni ukhala Saahiti a Yehova?
Ihaavo inoorikarikihelani upattisiya?
Woonela winyu, isiyani nyuuva inlamuliyeenyu upanka wiira mpattisiye?
ATTHU AKIINA ANEERA: “Mi kinawoova upattisiya ni wahoolo waya upanka citthu coohiloka.”
Nyuuva ciicammo phinoopuweleenyu?
UTHIKILELA
Nkaviheriyaka ni Yehova, nyuuva pooti utthema marikariko otheene yaahala wuuhiihani wiira mpattisiye.
Wuupuwela
Niireke nyuuva nhaana ncuwelaka citthu cotheene co mbiiblyani wiira mpattisiye?
Marukunusoni atthunaka anlamuliyeenyu upanka nhinaaya upattisiya?
Kontha isiyani nhinlamuliyeenyu uhiyerera woova wuuhihakani upattisiya?
MWAPHEELAKA UCUWELA CITTHU CIKIINA
Moone itthu inlamuliya uwiirihani ulakela upattisiya.
“Uheetthenkaca wiira upattisiye?” (Ukhalenla, yo Março yo 2020)
Moone citthu cikhwaawe atthunaka caahala wuurikarikihelani upattisiya.
“Isiyani inkihaleela wiira kipattisiye?” (Ukhalenla, yo Março yo 2019)
Moone mananna nlopwana mmoca, citthemilyaawe marikariko moolupale, wiira apattisiye.
Wuupaceroni nlopwana mmoca neehaniya Ataa aanawaanyihacera wakhala wiira pooti waalakelaawe upattisiya. Moone isiyani yankurumice ulakela upanka iyo itthu yofayiteeyo.