MWAHA WOOSOMIYA 28
NCIPO 123 Nimwiiweleleke Yehova ni Mutthenkeso Awe
Nyuuva nnaakhitiri uvirikaniha ikhweeli ni itthu yowoothiya?
“Mwiilipihace, nwarelaka isintu yokhweeli.”—EFESU 6:14.
ITTHU INHALEEHU WIITTHUCA
Ninaahala woona mananna cinvirikanaaya ikhweeli cineetthuceehu ca Yehova ni citthu cowoothiya Sotwani nomwaruselaawe aavarelaka nteko anamavanyiha.
1. Manannani nyuuva nneecooneenyu nlattu wowiitthuca ikhweeli?
HIIVA apoovu a Yehova, cinaanicivela ikhweeli co mbiibiliyani. Ni hi ninawaamini nnyo ikhweelinnyo. (Aroo. 10:17) Hi ciicammo, ninaakupali wiira Yehova phitthenkacile nloko neekristau khampa “nipotto ni nkhikicero nokhweeli.” (1 Tim. 3:15) Ni hiiva ninaakhala ootteeliya nlattu wowaakavihera ‘ale annihoolela iriyariihu,’ ukhala wiira ayo mayamunnaayo hintaphulela ikhweeli co mbiibiliyani ni anaanikavihera upanka itthu inoncivela Nluku.—Mabere. 13:17.
2. Khampa cinthoonyeraaya Tiyaku 5:19, isiyani inhala wiirannya hataa neetthucaka ikhweeli?
2 Masi hataa niitthucaka ikhweeli ni nittharaka malakihero o mumphwinkoni wa Yehova, nanlelo hiiva pooti uhapusiya. (Nsome Tiyaku 5:19.a) Sotwani aahala ukhala ootteeliya anoonaka hiiva nihiyaka ukhuluvela Ibiibiliya ni mphwinko wa Yehova.—Efesu 4:14.
3. Nlattuni ninlamuliyeehu uhihiya weettela ikhweeli? (Efesu 6:13, 14)
3 Nsome Efesu 6:13, 14.b Woohipica, Sotwani naahala umwarusela citthu cowoothiya ni waatheperya ahooleli ontuninyani wiira yaatuphele apoovu a Yehova. (Apoka. 16:13, 14) Hiiva ciicammo, ninaacuwela wiira Sotwani naahala upanka yotheene inkhitiryaawe wiira aathepyathepye apoovu a Nluku. (Apoka. 12:9) Phimaana, ikhanle itthu yofayita wiitthenkaca nenna co, wiira nikhitiri ucuwelela isiyani ikhanle itthu yokhweeli ni itthu yowoothiya wiira nihihiye utthara ikhweeli. (Aroo. 6:17; 1 Pet. 1:22) Upanka commo, hiiva ninaahala ukhitiri woopwa ukati womasakha moolupale!
4. Isiyani inhaleehu woona nhina ula mwahoola?
4 Nhina ula mwahoola ninaahala woona makhalelo meeli anlamuliyeehu ukhalana napheelaka ucuwela ikhweeli co mbiibiliyani ni utthara mphwinko wa Yehova. Nuuwakatyaaya, ninaahala woopela mwaha citthu tthaaru cinlamuliyeehu upanka napheelaka uhihiya ulipihaca utthara ikhweeli.
MAKHALELO ANLAMULIYEEHU UKHALANA NAPHEELAKA UCUWELA IKHWEELI
5. Manannani unttitthimiha Yehova unhalaaya unikavihera ucuwela ikhweeli?
5 Unttitthimiha Yehova. Unttitthimiha Yehova maanaaya wiira hiiva ninanfenta cinene uyova ni khanimpheela upanka itthu yaahala umwiiriha ukhala ooriipiya nrima. Phimaana, hiiva nimpheela ucuwela uvirikana ukhanle nhina itthu yomaana ni itthu yoonanara awula itthu yokhweeli ni itthu yowoothiya wiira nikupaliye ni Yehova. (Miru. 2:3-6; Mabere. 5:14) Ni ukhala wiira citthu cinaacivela apinaatamu ikwaha cikhwaawe cinanrusa Yehova, hiiva khanimpheela wiira uwoova apinaatamu ukhale itthu yofayita cinene uvikana nifento nirineehu ni Yehova.
6. Manannani uwoova apinaatamu waawiirihilyaaya asarayeli uhiya weettela ikhweeli?
6 Natepaka uwoova apinaatamu uvikana unttitthimiha Yehova, pooti uniiriha uhiya utthara ikhweeli. Moone ntakihero naasarayeli 12 yaarweele uwehaweha ilapo Yehova akhuluvelihilyaawe apoovu osarayeli. Nhina iyo ikhurupwiiyo, yahaavo asarayeli 10 yoovile cinene uvikana mananna yanfentaaya Yehova. Ayo yaheerela asarayeli otheene co: “Nihirwe nwo naapoovwaayo kontha ayo nwo anakuru unipwaha hiiva.” (Manu. 13:27-31) Khweeliini, moonelo waapinaatamu, akananewu yaari okuru waapwaha asarayeli. Masi asarayeli wiira waya khayaahala ukhitiri waanaana awanannyaaya, ayo yoonihera wiira yahohiya unkhuluvela Yehova. Ayo alopwanaayo 10 ayo, yahohiya weettela ikano ca Yehova kontha yaapheela paahi upanka citthu caacivela. Ayo ciicammo, yahaana wuupuwela citthu Yehova caapankenlyaawe khalayi. Ayo yanhala wuupuwela wiira akananewu khanakhala atthu okuru yalattanihaka ni Yehova. Masi woovirikana ayo alopwanaayo, Josuwe ni Kalepe yaapheela utteeliha nrima wa Yehova. Phimaana, ayo yahowiirela apoovwaayo co: “Wakhalaka wiira Yehova ri nihiiva naahala univaha ilapo ikhuluvelihilyaawe.”—Manu. 14:6-9.
7. Manannani ninhaleehu ulipihaca unttitthimiha wihu Yehova? (Nwehe ciicammo ilatarato.)
7 Wiira nilipihace unttitthimiha wihu Yehova, khula ikwaha unlakeleehu upanka itthu, nihaana woopuwela waakhala wiira Yehova inaahala uncivela. (Isaa. 16:8) Mwasomaka myaha co mbiibiliyani, mwiikohe co: Waakhanle wiira ila itthwiila miiva haakikhumelenle, isiyani kaahalaaka ulakela upanka?’ Wootakihera, ukati asarayeli 10 yuulumacilyaaya nnye citthu cooriipiha nrimannye, nyuuva mwanhala waakupali ayo ni uwoova apinaatamu awula nifento ninyu ni Yehova nanhala utepa wuunuwa? Asarayeli khayaamini wiira Josuwe ni Kalepe yaahimya ikhweeli, phimaana, yaahohaleela ukela ilapo yaakhuluvelihiyaaya.—Manu. 14:10, 22, 23.
Isiyani nyuuva mwaahaleenyu ukupali? (Nwehe iparaagarafu 7)
8. Ikhaleloni hiiva inlamuliyeehu woonihera?
8 Wiiyeviha. Yehova naahimerya ikhweeli ale anthoonyera wiiyeviha. (Mat. 11:25) Nathoonyeraka wiiyeviha, hiiva ninaatthuna ukaviheriya wiira niitthuce ikhweeli. (Mite. 8:30, 31) Uhookhalaru commo, ninlamuliya ukhala oowehaweha wiira nihikhale ananttima. Yaniirannyeelaka iyo, hiiva pooti upacera wuupuwela wiira moopuwelelweehu hiri ocuwelaca uvikana moopuwelelo o mbiibiliyani ni mattharelelo o mumphwinkoni wa Yehova.
9. Manannani ninhaleehu uhihiya wiiyeviha?
9 Napheelaka uhihiya ukhala owiiyeviha, ninlamuliya wuupuwela wiira hiiva khaninakhala itthu uhoolo wa Yehova. (Isaa. 8:3, 4) Ciicammo, pooti ulompa nanlepelaka Yehova unikavihera wiira nikhale atthu owiiyeviha ni waamini wiitthucihiya. Yehova naaniitthuciha moopuwelelwaawe avarelaka nteko Ibiibiliya ni mphwinkwaawe, uyo naahala unikavihera uvaha ifayita cinene moopuwelelwaawe uhiya moopuwelelweehu. Mwasomaka Ibiibiliya mmananihe woona mananna Yehova unoncivelaaya wiiyeviha ni unonrusaaya wiittitthimiha ni nttima. Mwiimananihe ninrimeenyu wotheene wiira nhihiyerere wiiyeviha hataa mwaakhelaka nteko muulupale unwiirihani waahoolela akhwiinyu.
MANANNANI NINHALEEHU UVARESESA IKHWEELI?
10. Taapani Yehova navarelaawe nteko wiira yaahoolele ni yaavahe malakihero apoovwaawe?
10 Nkhuluvele mphwinko wa Yehova. Khalayi, Yehova ahonvarela nteko Moceesi, nuuwakatyaaya Josuwe wiira yaavahe malakihero apoovu o Isarayeli. (Jos. 1:16, 17) Asarayeli yancalihiya ukati ayo yaavaresesaaya ayo alopwanaayo khampa yaaruminya ni Yehova. Cinavinreene myaakha cinci, maloko eekristau anatthenkaciyeene, maapostolu 12 phaahoolela apoovu a Nluku. (Mite. 8:14, 15) Nuuwakatyaaya, iyo ikhurupwiiyo yaahoncererya ni yaahela nhina mahumu o Yerusalemu. Nlattu wootthara malakihero yaakhelaaya ayo alopwana ookhuluvelyaayo, “maloko yanlipihiya nhina mminepani ni yaanoncererya khula mahuku.” (Mite. 16:4, 5) Ileelo, hiiva ciicammo ninaacalihiya nattharaka malakihero o mumphwinkoni wa Yehova. Vano wuupuwela mananna Yehova caahalaawe wiicoona, waakhanle wiira hiiva khanaahala wiiwelela ale aathanlilyaawe wiira anihoolele? Pooti wanaakhuleehu nno nikohonno noonaka itthu yaakhumelenle Asarayeli ukati waarwaaya ile ilapo Yehova yaakhuluvelihiyaaya.
11. Isiyani yawiirannyeele ale yahanhisima aathanlilyaawe Yehova wiira yaahoolela apoovwaawe? (Nwehe ciicammo ilatarato.)
11 Ukati Asarayeli waarwaaya ilapo yaakhuluvelihiyaaya, alopwana oocuwelaciya yahopacera unttisaca Moceesi ni nteko Yehova wanvahacenryaawe. Ayo yeera co: “Atthu otheene va nikhanle owaarya [uhiya paahi Moceesi], otheene va Yehova ri iriyaryaaya.” (Manu. 16:1-3) Hataa waakhanle wiira yaari ikhweeli atthu otheene yaakhanle owaarya mmiithoni wa Yehova, masi Yehova ahonthanla Moceesi wiira ahoolele. (Manu. 16:28) Untarawaca waya Moceesi, ayo alopwana oohinamaanaayo, khweeliini, yantarawaca Yehova. Ayo khayaaweheeha citthu Yehova caapheelaawe, masi yaaweheeha citthu caacivela, venci-venci ikuru ni ifaama. Yehova ahaakwanyulaca ayo alopwanaayo wamoca naatthu otheene yaakavihera. (Manu. 16:30-35, 41, 49) Hataa mahukwaala ninaacuwela wiira Yehova khanaapheela atthu ahintthara malakihero ankhuma mumphwinkoni wawe.
Tipani nyuuva mwaahaleenyu unkavihera? (Nwehe iparaagarafu 11)
12. Kontha isiyani ninlamuliyeehu ukhuluvela mphwinko wa Yehova?
12 Hiiva pooti uhihiyerera ukhuluvela mphwinko wa Yehova. Yooneneliyaka itthu impheela upankiya marukunuso mananna neweeheehu ikhweeli yo mbiibiliyani awula mananna onswalela Yehova, mayamunna annihoolela khanoopuwela imaara piili wiira apanke marukunuso. (Miru. 4:18) Ayo anaapanka iyo apheelaka unciveliha Yehova. Ayo ciicammo anaapanka khula itthu inkhitiryaaya wiira alakele citthu cotheene yavarelaka nteko nuulumo na Nluku ni phi yeeyo aswali a Yehova otheene inlamuliyaaya upanka.
13. “Moolumo omaana ukiiwiilya,” maanaaya isiyani ni manannani cinhalaaya unikavihera uvaresesa ikhweeli?
13 “Uvaresese moolumo omaana ukiiwilya.” (2 Tim. 1:13) “Moolumo omaana” cinaaciya ikhweeli co mbiibiliyani makristau aneetthucaaya. (Joau 17:17) Nnyo ikhweelinnyo phinniiriha waamini citthu cineetthuceehu. Mphwinko wa Yehova unaaniitthuciha uvaresesa nnyo ikhweelinnyo. Napankaka iyo ninaacalihiya.
14. Manannani makristau okhalayi yaahilyaaya utthara moolumo okhweeli?
14 Isiyani yaahala uniirannyeela waakhanle wiira nihohiya wiiwelela “moolumo omaana”? Moone ntakihero. Iseekulu yoopacera, makristau akhwaawe yaahomwarusela ihapari cowoothiya yahimyaaka wiira nihuku na Yehova nihophiya. Atthunaka, ayo yaakhenle iwarakha yantikhilyaawe apostolu Paulu yaahimya uyo mwahooyo, masi ahiiweehile saana. Makristau akhwaawe o Tesalonika yahaamini nnyo ihaparinnyo ni yahopacera umwarusela. Unari wiira yahoopuwela itthu Paulu aawiitthucihilyaawe, ayo khayaahala uthepiya. (2 Atesal. 2:1-5) Paulu ahaahimerya ayo mayamunnaayo wiira ahikupali khula itthu yaahalaaya wiiwa. Wiira akavihere marikariko yaahalaaya waanna uhoolo, Paulu ahomalihera iwarakha yonayeeli ya Tesalonika eeraka: “Nnya phiri isalaamacaka, nintata naka, ala manannaala phinantikhaka khula iwarakha.”—2 Atesal. 3:17.
15. Manannani ninhaleehu wiikhikicera citthu cowoothiya cinlikana khampa citthu cokhweeli? Nvahe ntakihero. (Nwehe ciicammo ilatarato.)
15 Isiyani ineetthuceehu niitthu Paulu aahimenryaawe makristau o Tesalonika? Neewaka itthu ihinvaranaca niitthu niitthucileehu mbiibiliyani awula nacuwelaka ihantisi yooninyonnyiha, nihaana ukhala ocuwelaca. Ikwaha imoca, União Soviética okhalayi, awananiihu yahaavaha iwarakha mayamunna yaakhala khampa inkhuma mapuro anhooleliya miteko cihu. Iyo iwarakheeyo, yaakurumica mayamunna akhwaawe umpanka mphwinkwaaya ahihooleliyaka nintthu. Ni iyo iwarakheeyo yakhala toko yaari yootthenkaciya nipuro nihooleliyaaya miteko cihu, masi mayamunna akhwaawe yaari ookhuluvelya, khayaathepyaciye niiyo iwarakheeyo. Ayo yahocuwela wiira moolumo yaari nwarakhannyaayo khayaavaranaca ni citthu ceetthucilyaaya. Mahukwaala, mananna mamocaaru, ale cinaarusa ikhweeli co mbiibiliyani, anaavarelaka nteko interneti awula ile ineehaniya redes sociais wiira amananihe unikukuvaniha ni unikawaniha. Uhiya uviriha ukati noonaka nnyo citthunnyo, ninlamuliya uwehaweha awula wuupuwela saana wakhala wiira itthu neewileehu awula isomileehu inaavarihana niitthu niitthucileehu mbiibiliyani.—2 Atesal. 2:2; 1 Jo. 4:1.
Nhithepiye nicitthu cowoothiya cinkhala khampa cokhweeli (Nwehe iparaagarafu 15)d
16. Khampa cinthoonyeraaya Arooma 16:17, 18, isiyani inlamuliyeehu upanka wakhalaka wiira ntthu nonfenteehu naahiya weettela ikhweeli?
16 Nhihiye waataana naale anonswalela Yehova. Yehova noopheela wiira ninswalele wamoca nimayamunneehu. Wiira nikhitiri upanka iyo, nihaana nivaresesaka ikhweeli. Ntthu nomwarusela ihapari cihinvaranaca niikhweeli, namwalaniha nloko. Phimaana, Yehova nanihimeerya wiira nihaana waahuluwa ayo atthwaayo. Naahipankeke commo, hiiva naasineeneehu pooti upacera ukupali citthu cihikhanle cokhweeli ni uhiya unkhuluvela Yehova.—Nsome Arooma 16:17, 18.c
17. Ifayitani imphwanyeehu nlattu woocuwela ikhweeli ni uvaresesa iyo ikhweeliiyo?
17 Nacuwelelaka ikhweeli ni nivaresesaka cinene, ninaakhitiri umwaattamela Yehova ni ulipihaca waamini wihu. (Efesu 4:15, 16) Uhiya commo, khaninhala uhapusiya ni citthu cowoothiya Sotwani ceneetthucihaawe ni ninaahala ukhitiri ukhala okhikiceriya ni Yehova ukati womasakha moolupale. Vano, mwavaresesaka ikhweeli, “Nluku onnema noohala ukhala ni nyuuva.”—Afili. 4:8, 9.
NCIPO 122 Nikhaleke Oowiilipiha, ni Oohittikinyeya!
a Tiyaku 5:19 Miyamunnaaka, akhala ntthu iriyariinyu hapusiye weettela ikhweeli, ni ntthu nkiina ankavihera uhokoleela weettela ikhweeli.
b Efesu 6:13 Hataa phimaana, nwarele ikaruma cokhotto cotheene ca Nluku, wiira mwavilele naphiyaka nihuku nootakhala, ni nnamalihileene upanka citthu cotheene, mwakhale oolipeene. 14 Phimaana, mwiilipihace, nwarelaka isintu yo ikhweeli yootthukiya sana-saana, ni nware iyuuma inkhikicera ikhakaaca, ikhanle isariya.
c Arooma 16:17 Vano, kinookurumicani cole miyamunna, wiira nhihiye uweserera nuutta ale unaacivela waakawaniha ni waakakathula akhunanaya, yavirikanihaka ikhweeli ciitthucileenyu. Mwaasempe ayo atthwaayo. 18 Kontha ayo alopwanaayo khanakhala ipottha ca Kristu, apwiiyeehu, masi ipottha co citthu cinaacivela, ni nimoolumo omaana ni oncivihaca ntthu, ayo anaawathepya atthu oohikukurya.
d ILATARATO: Ilatarato imoca yo mayamunna o União Soviética okhalayi, ukati waakhenlyaaya iwarakha yaakhala khampa yaakhuma mapuro anhooleliya miteko cihu, masi yaari yaawananiihu. Mahukwaala, awananiihu pooti uvarela nteko interneti awula ile ineehaniya redes sociais wiira amwarusele citthu cowoothiya nhina mphwinko wa Yehova.