MWAHA WOOSOMIYA 10
NCIPO 31 Neetteke ni Muluku!
Ntakihe moopuwelelo a Yehova ni Yesu
“Ukhala wiira Kristu ahohuva nari pinaatamu, vano mwiitthenkace wiira nkhalane moopuwelelo khampa a Kristu.”—1 PET. 4:1.
ITTHU INHALEEHU WIITTHUCA
Nhina ula mwahoola, ninaahala woona mananna Peturu eetthucilyaawe ni moopuwelelo a Yesu ni isiyani ineetthuceehu.
1-2. Isiyani inhela nhina unfenta Yehova ni manannani Yesu oonihenryaawe nno nifentonno?
YESU ahohimya nlamulo nikhanle nofayita cinene nhina malamulo a Moceesi ukati wenryaawe co: “Unfente Yehova Nlukwaa, ninrima wotheene, nuukumyaa wotheene, niikuru caa cotheene, nimoopuwelelwaa otheene ni unfente nkhunanaa khampa cineefentaa.” (Luka 10:27) Unfenta wihu Yehova unaahela nhina itthu impheeleehu wanrimani wihu ni makhalelweehu. Ciicammo unaahela nhina unswalela nuukumiihu wotheene ni niikuru cihu cotheene. Uhiya commo, ufenta Yehova unaahela nhina moopuwelelweehu. Khweeliini, unawoonannya wiira khaninhala ucuwela sana-saana moopuwelelo a Yehova. Masi pooti waneeweheehu moopuwelelo a Yehova nasomaka mananna “Yesu cinoopuwelaawe.” Yesu notakiha moopuwelelo oohipahuwa aathumwaane.—1 Akor. 2:16.
2 Yesu aananfenta Yehova ni moopuwelelwaawe otheene. Uyo ancuwela isiyani Yehova yaapheelaawe wiira apanke ni aholakela upanka iyo itthwiiyo, hataa yankumihereraka masakha. Yesu apheela paahi upanka itthu yaapheelaaya athumwaane. Vano uyo, khaahiyerenre wiira citthu cikhwaawe cikhale cofayita uvikana itthu yaapheelaawe Yehova.
3. Iparakhani Peturu yaarinaawe ni isiyani uyo yaakurumicilyaawe makristau upanka? (1 Peturu 4:1)
3 Peturu ni maapostolu akhwaawe yahaana iparakha yookhala nkhayi ni Yesu ni woona mananna coopuwelaawe. Ukati Peturu wantikhilyaawe iwarakhaawe yoopacera, uyo ahaakurumica makristau wiitthenkaca wiira yuupuwele khampa Kristu.a (Nsome 1 Peturu 4:1.b) Nuulumo “wiitthenkaca” aavarenlyaawe nteko Peturu, naari nuulumo nuulumiya yaaciyaka anatoropa. Vano, hiiva pooti waneereehu wiira wuupuwela khampa Kristu ikhanle ikaruma yokuru inhala unikavihera waanana moopuwelelo oopanka itthu yootakhala ni waanana ila ituniya ya Sotwaniila. —2 Akor. 10:3-5; Efesu 6:12.
4. Isiyani inhaleehu woona nhina ula mwahoola?
4 Nhina ula mwahoola, ninaahala woona manannani ninhaleehu ukhalana (1) moopuwelelo khampa a Yehova, isiyani inhala unikavihera waataana ni moopuwelelweehu, (2) wiiyeviha, ni (3) ukhalana moopuwelelo omaana nankhuluvelaka Yehova ni unlompa. Wiira niitthuce mananna oohala upanka iyo, ninaahala woopela mwaha mananna Yesu coopuwelaawe ni manannani ninhaleehu utakiha.
MUUPUWELE KHAMPA YEHOVA
5. Isiyani yaakhumelenle ukati Peturu wahuupuwenlyaawe khampa Yehova?
5 Ikwaha imoca, Peturu khoonihenre ukhalana moopuwelelo mamocaaru khampa Yehova coopuwelaawe. Yesu ahowiirela maapostolwaawe wiira anhala urwaa u Yerusalemu ni nwo anhala utthukiya naahooleli ottiini, uttarusiya ni mpaka wiiviya. (Mat. 16:21) Peturu ancuwela wiira Yesu aari Mesiya aakhuluvelihiye wiira awoopole apoovu a Nluku. Phimaana, yahomwiiriha Peturu uhikupali wiira Yehova anhala unhiya mwanawe ahuvaka cinene. (Mat. 16:16) Vano Peturu aahomwihana Yesu ni aahomwirela co: “Mwiicooneleke ikiriri Pwiiya, iyo itthwiiyo khinhala uwiirannyeelani hataa vakaani.” (Mat. 16:22) Masi Yesu khaakupanli itthu Peturu yaahimilyaawe kontha uyo khoopuwenle khampa Yehova.
6. Manannani Yesu oonihenryaawe wiira antakiha moopuwelelo a Yehova?
6 Yesu aantakiha moopuwelelo oohipahuwa athumwaane. Phimaana, uyo aahomwiirela Peturu co: “Ukhume vaa Sotwani, weeva ukhanle nluku ninkikakathula, kontha khurina moopuwelelo a Nluku, masi aapinaatamu.” (Mat. 16:23) Atthunaka itthu yaahimyaawe Peturu yaari yomaana, masi Yesu kheewelenle ikano cawe. Yesu ancuwela wiira Yehova khaapheela wiira eecuupuwele paahi uyova. Uyo ukatyuuyo, Peturu aaheetthuca ifayita urinaaya ukhalana moopuwelelo khampa a Yehova. Ni iyo ikhanle itthu yuulupale ineetthuceehu hiiva ciicammo.
7. Manannani Peturu aarukunusilyaawe moopuwelelwaawe wiira uupuwele khampa Yehova? (Nwehe ilatarato yo wakaapani.)
7 Nuuwakatyaaya, Peturu aahopheela urwaa ukhala u sintonia ooniheraka wiira nawuupuwela khampa Yehova. Iyo inawoonihera wiira wahophiya ukati ale yahancuwela Yehova awula yahaari Ayuuta, waahalaaya uncuwela Yehova ni upanka mphantte waamucyaawe. Yehova ahonthanla Peturu wiira anlalyeere Cornelio, nlopwana mmoca ahancuwela Yehova aapacenre ukhala nkristau. Ayuuta yannyema ukhala nkhayi naale yahaari Ayuuta. Vano, iyo yaanonanya wiira Peturu aalamuliya upanka marukunuso mananna owuupuwela. Vano Yehova unkavihera wawe Peturu ucuwela itthu yaapheelaawe, Peturu ahorukunusa mananna caaweheraawe ale yahaari Ayuuta ni aahorwaa unthotola Cornelio “woohoova itthu.” (Mite. 10:28, 29) Itthu yiirannyeele phiila: uyo ahonlalyeera Cornelio nkhayi naamucyaawe otheene ni yahopattisiya.—Mite. 10:21-23, 34, 35, 44-48.
Peturu akelaka mpaani wa Cornelio (Nwehe iparaagarafu 7)
8. Manannani ninhaleehu woonihera wiira ninoopuwela khampa Yehova? (1 Peturu 3:8)
8 Uvira waya myaakha, Peturu ahaakurumica makristau ukhalana “moopuwelelo mamocaaru.” (Nsome 1 Peturu 3:8.c) Ninhala ukhitiri upanka iyo nasomaka mbiibiliyani mananna Yehova cinoopuwelaawe ni natakihaka. Wootakihera, Yesu ahaakurumica attharyaawe uhoolelihera Umwene wa Nluku muukumini waya. (Mat. 6:33) Nuupuwelaka iyo, munna mmoca o wanlokoni wihu atthunaka naapheela ukhala piyoneeru awula ukavihera miteko cikhwaawe. Hi khaninlamuliya umuulumela citthu cinhala unloloviha awula cinhala umwiiriha wiicuupuwela paahi uyova. Uhiya commo, nihaana umuulumana nimananna omaana nhina mipika co mminepani ciiphimenlyaawe ni unkavihera.
NKHALE NTTHU OWIIYEVIHA
9-10. Ntakiheroni Yesu nivahilyaawe nhina wiiyeviha?
9 Uhiyu mmoca hinaaya ukhwa, Yesu ahomwiitthuciha Peturu ni maapostolu makhwaawe ifayita urinaaya wiiyeviha. Unahanle ukati vakaani, Yesu ahonlepela Peturu ni Joau wiira yaatthenkace iyoolya yoomalela hinaaya ukhwa. Itthu imoca ayo yaapankilyaaya, waari utthenkaca ipasiya ni ituwaliya wiira ntthu avululace inyaa cawe hinaaya ulya. Masi tipani aahala uthoonyera wiiyeviha wiira avare uyo ntekooyo?
10 Vano, Yesu aahovaha ntakihero nuulupale nhina wiiyeviha. Uyo ahopanka itthu yaalamuliya upanka nanteko ni iyo yahowiiriha maapostolu ukhala ootikhinihiya cinene. Ibiibiliya ineera wiira Yesu ahorula ikuwaawe yoovate ni aheetthukela nyuununi ituwaliyeeyo, ahohela maaci mpasiyanimmo ni ahopacera uvululaca inyaa co maapostolu otheene. (Joau 13:4, 5) Yesu aahovululaca inyaa co maapostolu otheene unhela nhina Yuda aahala unvariiha. Uyo waari nteko waahala uviriha ukati mwinci, masi Yesu ahoonihera wiiyeviha ni ahomaliha waavululaca otheene. Vano, uyo ahaahimeerya co: “Nhocuwelela maanaaya isiyani itthu yuupankilyaakani? Nyuuva mwaatthi nnokiihanaa miiva ‘Mwiitthucihi ni Pwiiya’, ni khannavonya itthu. Vano, wakhala wiira mi kikhanle Pwiiyeenyu ni mwiitthucihiinyu, kihovululaca inyaa cinyu, nyuuva ciicammo nhaana uvululaca inyaa caakhwiinyu.”—Joau 13:12-14.
Wiiyeviha weekhweeli unaahela nhina moopuwelelo o wanrimani wihu
11. Manannani Peturu oonihenryaawe wiira aahaana eetthucaka wiiyeviha? (1 Peturu 5:5) (Nwehe ciicammo ilatarato.)
11 Peturu heetthuceera wiiyeviha wa Yesu. Yesu uturuwela wawe wiirimu, Peturu ahopanka mwiiriirya mmoca. Uyo aahonvoniha nlopwana mmoca ahaakhitiri weetta iyareliywaawe. (Mite. 1:8, 9; 3:2, 6-8) Apoovu yahoona uyo mwiiriiryooyo ni yaahotikhilihiya. (Mite. 3:11) Niireke nlattu wo iyo itthwiiyo, Peturu aahaana isariya yowiittottopa mwaanenyaawe, ukhala wiira ilapo yuunuwenlyaawe ukhalana ifaama yaari itthu yofayita? Mena. Peturu ahoonihera wiiyeviha, khaatthunne wiittottopa ni uttitthima wotheene waari wa Yehova ni Yesu, uyo enre co: ‘Nlattu wo ncina na Yesu ni nlattu wo waamini ncina nawe, ula nlopwana nyuuva nnomooneenyu ni nnoncuweleenyu metto cawe coolipihiya.’ (Mite. 3:12-16) Nhina iwarakhaawe, Peturu naakurumica uwara wiiyeviha. Nna nuulumonna ninaanuupusera ukati Yesu weetthukenlyaawe ituwaliya nyuununi wawe wiira avululace inyaa co maapostolwaawe.—Nsome 1 Peturu 5:5.d
Upanka wawe mwiiriirya, Peturu aahoonihera wiiyeviha ni unttottopela Yehova ni Yesu. Ni hiiva ciicammo pooti wanoonihereehu ukhala atthu owiiyeviha naapankelaka citthu comaana akhunanihu nihiwehereraka uliviya (Nwehe iparaagarafu 11-12)
12. Manannani ninhaleehu uhihiyerera ukhala atthu o wiiyeviha khampa Peturu?
12 Hiiva pooti wantthareehu ntakihero na Peturu ni uhihiyerera woonihera wiiyeviha. Masi muupuwele: wiiyeviha khunakhala paahi wuulumaca saana. Peturu uvarela wawe nteko nuulumo ‘wiiyeviha wo mwiirutthuni’, unthoonyera wiira wiiyeviha weekhweeli unaahela nhina moopuwelelo o wanrimani wihu. Ninaawapankela citthu comaana atthu akhwaawe kontha ninanfenta Yehova ni atthu, khanimpanka iyo nlattu woopheela ukhalana ifaama. Ninawoonihera wiiyeviha weekhweeli nanswalelaka Yehova ni naakaviheraka mayamunneehu wanitteelaka nrima, hataa ukhalaka wiira atthu akhwaawe khannicuwelela. —Mat. 6:1-4.
‘UKHALANA MOOPUWELELO OMAANA’
13. Isiyani inhela nhina ‘ukhalana moopuwelelo omaana’?
13 Isiyani nhela nhina ‘ukhalana moopuwelelo omaana’? (1 Pet. 4:7) Nkristau rina moopuwelelo omaana naapanka yotheene inkhitiryaawe wiira alakele nimananna omaana itthu yoohala upanka avarelaka nteko moopuwelelo a Yehova. Uyo naacuwela wiira khiivo-tho itthu ikhwaawe ikhanle yofayita uvikana upatthannyaawe ni Yehova. Uhiya commo, nawiiwehacera saana mwaanenyaawe ni naacuwela wiira uyo khancuwela citthu cotheene. Ntthu rina moopuwelelo omaana nawoonihera wiira nankhuluvela Yehova anlompaka ni anlepelaka ikano cawe.e
14. Ukatini Peturu wahankhuluvenlyaawe Yehova?
14 Yoole uhiyuule, Yesu hinaaya ukhwa, ahowiirela attharyaawe co: “Ula uhiyuula, otheene cinyu nnaahala ukikhotta.” Vano, Peturu ahaakhula eeraka co: “Hataa atthu otheene yookhottakani, mi akinhala wuukhottani!” Yoole uhiyuule, Yesu ahaakurumica attharyaawe, eeraka co: “Nhiitthaale ni nlompe woohihiyerera.” (Mat. 26:31, 33, 41) Unari wiira Peturu aahotthara iyo ikanweeyo, uyo anhala woonihera ulipa nrima ni uhimya wiira aari ntthari a Yesu. Masi uyo aahonkhotta Pwiiyaawe ni wahonriipa nrima nlattu wo itthu yaapankilyaawe.—Mat. 26:69-75.
15. Isiyani yankavihenre Yesu uhihiya ukhalana moopuwelelo omaana hinaaya ukhwa?
15 Yesu anonkhuluvela cinene Yehova. Hataa ukhalaka wiira aari ntthu oohipahuwa, uyo aaholompa ikwaha cinci hinaaya ukhwa. Iyo yahonkavihera ulipa nrima wiira apanke itthu Yehova yaapheela wiira apanke. (Mat. 26:39, 42, 44; Joau 18:4, 5) Peturu ahoona ukati Yesu waalompalyaawe nhina masakha oorika yankhumelenle ni iyo yaahorukunusa makhalelwaawe.
16. Nincuwela cani wiira Peturu aahopacera ukhalana moopuwelelo omaana? (1 Peturu 4:7)
16 Nuuwakatyaaya, Peturu aahopacera unkhuluvela cinene Yehova ni ulompa anlepelaka malakiherwaawe. Wunwelelihiya wawe, Yesu aahonkhuluveliha Peturu ni maapostolu akhwaawe wiira yanhala waakhela nnepa wowaarya wiira akhitiri ulalyeera ihapari comaana. Masi Yesu ahaalepela urwaa u Yerusalemu wiira yawehererace mpaka wiirannya. (Luka 24:49; Mite. 1:4, 5) Isiyani Peturu yaapankilyaawe ukati waawehereraawe? Peturu nkhayi nimayamunna makhwaawe “yanlompa woohihiyerera.” (Mite. 1:13, 14) Nuuwakatyaaya, nhina iwarakhaawe yoopacera, uyo nawaakurumica makristau ukhalana moopuwelelo omaana ni uhihiyerera ulompa yalepelaka malakihero a Yehova. (Nsome 1 Peturu 4:7.f) Peturu aheetthuca unkhuluvela Yehova ni aahokavihera maloko menci.—Akalas. 2:9.
17. Isiyani inlamuliyeehu uhihiyerera upanka, hataa naavaraka mitekoni? (Nwehe ciicammo ilatarato.)
17 Wiira nikhalane moopuwelelo omaana, nihaana uhihiyerera unlompa Yehova, hataa nipanka isiyani. Nalakelaka itthu yoohala upanka, nihaana ulompa nanlepelaka Yehova univaha ikano ni nakhuluvelaka wiira uyo phincuwela itthu yomaana para hiiva.
Peturu aaheetthuca unkhuluvela Yehova ni uhihiyerera unlompa. Wiira nikhalane moopuwelelo omaana, nihaana ciicammo nalepelaka ikano ca Yehova, venci-venci wakhalaka wiira ninlakela upanka citthu cofayita (Nwehe iparaagarafu 17)g
18. Manannani ninhaleehu untakiha Yehova?
18 Ikhanle itthu yomaana Yehova unumpa ni moopuwelelo ootakiha makhalelwaawe! (Upha. 1:26) Khweeliini, unawoonannya wiira khaninhala ukhitiri untakiha cinene Yehova woohivonyaniha. (Isai. 55:9) Masi khampa Peturu, hi nimpheela ukhalana moopuwelelo a Yehova, ukhala ntthu o wiiyeviha ni ukhalana moopuwelelo omaana.
NCIPO 30 Muluku Aka, Moopoli Aka, ni Tiithi Aka
a Nuulumo “upheela” nimphwanyannya nhina iwarakha 1 Peturu 4:1 ciicammo pooti utaphulela khampa “ankhili; makhalelo; mananna owuupuwela.”
b 1 Peturu 4:1 Ukhala wiira Kristu aahohuva nari pinaatamu, vano mwiitthenkace wiira nkhalane moopuwelelo khampa a Kristu, kontha ntthu nohuva nawoonihera wiira hohiya upanka itampi.
c 1 Peturu 3:8 Woothikilela, otheene cinyu muupuwele inanna imocaaru, nwacerane, nthoonyere nifento no mayamunna, uthunku ni wiiyeviha.
d 1 Peturu 5:5 Inanna imoca, nyuuva alopwana amirawo mwaahisime oolupale. Masi, otheene mwiiyevihe uhoolo waakhwiinyu, kontha Nluku unrusa atthu owiicoona, masi nawaathoonyera unamaana wowaaronya atthu owiiyeviha.
e Wiira ncuwele-tho nhina ukhalana moopuwelelo omaana maanaaya, nwehe mwaha uneera “Bom senso”, nsayitini jw.org awula mwaapilikatiivuni JW Labrary® nhina mwaha “2 Timotiyu 1:7 — ‘Deus não nos deu o espirito de temor’”, mphantte uneera “Textos Bíblicos Explicados.”
f 1 Peturu 4:7 Masi, wiikhiceroni wo citthu cotheene uhattamela. Phimaana, nhaana nkhalanaka moopuwelelo omaana ni ulepele woohiitthaala.
g ILATARATO YO: Arokorihu amoca alompaka woohiwanya awehereraka upanka intrevista wantekoni.