MWAHA WOOSOMIYA 14
NCIPO 8 Yehova ti Ntthyawelo Nahu
“Munthanle . . . nnohaleenyu unswalela”
“Munthanle nnohaleenyu unswalela, masi mi naamucaaka ninhala unswalela Yehova.”—JOS. 24:15.
ITTHU INHALEEHU WIITTHUCA
Nhina ula mwahoola ninaahala wuupuwela citthu ciniirihile ulakela unswalela Yehova.
1. Wiira nikhalane utteeliya weekhweeli, isiyani inlamuliyeehu upanka ni kontha isiyani? (Isaiya 48:17, 18)
APAAPEEHU owiirimu, Yehova anaanifenta cinene, ayo ampheela wiira nikhalane ukumi womaana nna co ni wahoolo. (Ekles. 3:12, 13) Yehova honumpa nimakhalelo ootikhiniha, masi uyo khanumpale wiira niihoolele naasineneehu awula wiira nilakele itthu yomaana ni yoohinamaana. (Ekles. 8:9; Jer. 10:23) Wiira nikhalane utteeliya weekhweeli, ninlamuliya unswalela uyova ni wiiwelela citthu cinhimyaawe. Iyo phiitthu Yehova impheelaawe.—Nsome Isaiya 48:17, 18.a
2. Isiyani Sotwani impheelaawe unikupaliha ni isiyani Yehova impankaawe?
2 Sotwani nopheela unikupaliha wiira pooti wankhaleehu ootteeliya hataa nihinswalelaka Yehova ni wiira apinaatamu pooti unkhitiryaaya wiilamulela veekhaaya. (Upha. 3:4, 5) Para ucuwela wiira Sotwani khanle owootha, Yehova haahiyera ukati apinaatamu wiira yiilamulele. Masi nawehaka citthu cineerannya ila ituninyeela unawoonannya wiira Sotwani anootha. Uhiya commo mbiibiliyani inaawuuluma alopwana ni atthiyana enci yaari ootteeliya nlattu woolakela unswalela Yehova. Ntakihero nimoca nomaana cinene nikhanle na Yesu, nhina ula mwahoola, ninaahala woona kontha isiyani Yesu waalakenlyaawe unswalela Yehova ni kontha isiyani Yehova unamphwanela uswaleliya. Wiimaleloni ninaahala woona itthu inniiriha unswalela Yehova.
KONTHA ISIYANI YESU AATHANLILYAAWE UNSWALELA YEHOVA
3. Isiyani Sotwani yanvahilyaawe Yesu ni isiyani Yesu yaalakenlyaawe upanka?
3 Ukati waaryaawe watuninyani, Yesu aalamuliya ulakela tipani aahalaawe unswalela. Uvira waya ukati vakaani Yesu napattisiye, Sotwani aholakela unvaha ikuvernu cawe cotheene co watuninyani wakhalaka wiira anaahala unswalela imaara imoca paahi. Yesu ahomwaakhula co: “Ukhume vaa Sotwani! Kontha uhantikhiya: ‘unswalela Yehova Nlukwaa ni unvarele miteko co wuuswalini uyova paahi’” (Mat. 4:8-10) Kontha isiyani Yesu waalakenlyaawe ayo manannaayo? Nttwee noone itthu yaamwiirihile ulakela commo.
4-5. Citthuni caamwiirihile Yesu ulakela unswalela Yehova?
4 Itthu yuulupale yaamwiirihile Yesu ulakela unswalela Yehova nikhanle nifento nuulupale cinene nirinaawe naathumwaane. (Joau 14:31) Uhiya commo, Yesu ananswalela Yehova kontha iyo phiitthu yomaana yaalamuliyaawe upanka. (Joau 8:28, 29; Apoka. 4:11) Yesu ancuwela wiira Yehova phumpile ukumi, khanle okhuluvelya ni khanle namavaha. (Isaa. 33:4; 36:9; Tiya. 1:17) Yehova khaahiya unhimerya ikhweeli Yesu ni uyo ancuwela wiira citthu cotheene caarinaawe khampa ukumi ni citthu ceetthucihaawe caakhuma wa Yehova. (Joau 1:14) Sotwani khanle nwanani a Yehova. Uyo phikumiherenre itampi ni ukhwa, uyo khanle namootha ni citthu cotheene cimpankaawe cinaakurumica uthanyanaca ni wiicunuwiha. (Joau 8:44) Yesu anancuwela sana-saana Yehova ni Sotwani. Phimaana, uyo kaalakenle untakiha Sotwani ni unrukunuwela Yehova.—Afili. 2:5-8.
5 Itthu ikhwaawe yaamwiirihile Yesu ulakela unswalela Yehova, waari ucuwela wiira ukhuluvelya wawe wanhala uwaana citthu cinci comaana. (Mabere. 12:2) Uyo ancuwela wiira aahihiyerereke ukhuluvelya, anhala ureeriha ncina naathumwaane ni ukhitiriha umalamalihiya uhuva wotheene ukumiheriye ni Sotwani.
KONTHA ISIYANI YEHOVA UNOMPHWANELAAYA USWALELIYA?
6-7. Kontha isiyani atthu enci mahukwaala khaanonswalela Yehova ni kontha isiyani Yehova unamphwanela uswaleliya?
6 Atthu enci khaanonswalela Yehova kontha khancuwela makhalelwaawe omaana ni citthu cotheene caapankenlyaawe. Iyo phiitthu yaawiirannyenle atthu o Atenas yahancuwela Nluku ukati Paulu waalalyeenryaawe.—Mite. 17:19, 20, 30, 34.
7 Paulu ahaahimerya atthu yaakhala wa Atenas wiira Nluku nkumi nawaavaha ukumi atthu otheene ni citthu cotheene. Uyo aheera co: “Nlattu waawawe nihaana ukumi ninawiinyeenya ni nihaavo” Nluku khanle namapattusa nlattu wa nlopwana mmoca hiiriha uyaryaa atthu otheene watuninyani, phimaana unamphwanela uswaleliya.—Mite. 17:25, 26, 28.
8. Isiyani Yehova inhalaawe uhipanka ni manannani uyo nooniheraawe wiira naanifenta?
8 Ukhala wiira Yehova khanle Mpattusi ni nkhulupale o ntuninyani motheene, Yehova haana isariya yowaakhanyereriha apinaatamu unswalela, masi uyo khampanka commo. Uhiya commo, uyo naanikavihera woona wiira khanle Nluku nkumi ni naanifenta cinene. Uyo nopheela wiira atthu enci akhale asipatthannyaawe. (1 Tim. 2:3, 4) Unawoonannya wiira, Yehova naanitthenkaca wiira niwiitthucihe atthu akhwaawe citthu cikhuluvelihilyaawe waapankela apinaatamu. (Mat. 10:11-13; 28:19, 20) Uyo ciicammo, hotthenkaca maloko mapuro ninonswaleleehu ni ninkaviheriyeehu nimahumu oofenta.—Mite 20:28.
9. Manannani Yehova nooniheraawe wiira nawaafenta atthu otheene?
9 Hiiva pooti unooneehu nifento nuulupale na Yehova nawehaka mananna naawaceraawe ale ahinaamini wiira uyo haavo. Wootakihera, ikhumelo yokhalayi atthu anaalakela weetta yattharaka citthu cinoonaaya ukhala comaana awula coohinamaana uhiya umwiiwelela Yehova. Hataa ukhalaka commo, Yehova khanle namaana, uyo nawaavaha citthu cotheene cimpheelaaya wiira akhale akumi ni waatteele nrima. (Mat. 5:44, 45; Mite. 14:16, 17) Ayo pooti ukhalana amuci ni asipatthannyaaya onifento, ukhalana asaana ni uphwanyera ifayita nteko unvaraaya. (Isaa. 127:3; Ekles. 2:24) Khweeliini, unawoonannya wiira apaapeehu owiirimu anawaafenta atthu otheene. (Nkw. 34:6) Vano nttwee nuupuwele citthu cikhwaawe ciniirihile unswalela Yehova ni manannani nnicaalihaawe nlattu woopanka commo.
KONTHA ISIYANI NINLAKELEEHU UNSWALELA YEHOVA
10. a) Isiyani inniiriha unswalela Yehova? (Matewus 22:37) b) Manannani nneecooneenyu nlattu woocuwela wiira Yehova khanle oovilela ni nakiriri? (Isaalimu 103:13, 14)
10 Khampa Yesu, hiiva ninanfenta Yehova venci-venci nlattu wo nifento nawe. (Nsome Matewus 22:37.) Ukati neetthuceehu makhalelo a Yehova, upatthaniihu unaatepa ukhala woolipa. Muupuwele uvilela ni unamaana wa Yehova, ukati asarayeli waahiilyaaya umwiiwelela, uyo ahowiirela co: “Nrukunuse mirimaciinyu.” (Jer. 18:11) Iyo inawoonihera wiira Yehova naacuwela wiira hiiva nikhanle oopahuwa ni nikhanle ntthupi. (Nsome Isaalimu 103:13, 14.b) Mweemelaka ni muupuwelaka unakiriri ni makhalelo makhwaawe a Yehova, khunuucivelani unswalela mpaka?
11. Citthuni cikhwaawe cinniiriha unswalela Yehova?
11 Itthu ikhwaawe inniiriha unswalela Yehova ukhalaka wiira phiitthu inlamuliyeehu upanka. (Mat. 4:10) Ciicammo, ninaacuwela wiira unswalela wihu Yehova unaahala uniphwanyiha iparakha cinci cinene. Ninaakavihera ureeriha ncina na Yehova ni woonihera wiira Sotwani khanle namootha. Ciicammo, ninaahala waatteeliha nrima apaapeehu. Ni nalakelaka unswalela Yehova mahukwaala, ninaahala ukhalana ukati wonswalela mpaka!—Joau 17:3.
12-13. Isiyani ineetthuceehu niitthu yaamwiirannyeenle Jane ni Pamela?
12 Anamwane ni amirawo pooti ukhalana nifento noolipa ni Yehova, nihinhala uhiya wuncereryaa nuuwakatyaaya. Nwehe itthu yaamwiirannyeenle Jane ni Pamela.c Jane aapacenre usoma Ibiibiliya narina myaakha 11 ni Pamela narina myaakha 10. Asithumwanaya khayaatthuna usoma Ibiibiliya, masi yaahahiya asaanaaya yasomihiyaka, “yarwaaru ukereeca nkhayi naayo khula isumana.” Jane neera: “Itthu kiitthucilyaaka mbiibiliyani ni Masaahiti a Yehova ihokikavihera cinene uhipanka citthu asipatthannyaaka yaahimyaaya khampa ulya citthu coohapala ni uraruwa.”
13 Uvira waya mwaakha, Jane ni Pamela yahokhalaca anamalalyeera. Nuuwakatyaaya, yahokhalaca mapiyoneera ni yahokela waawaceraca asithumwanaya owuuluvala. Oopuwelaka citthu cotheene Yehova campankenlyaawe, Jane neera: “Mi kihoona nimiithwaaka mananna Yehova cinaawaceraawe asipatthannyaawe, uyo nawaacuwela sana-saana asipatthannyaawe. Khampa cinhimyaaya 2 Timotiyu 2:19, woohaanyihacera, ninaakupali wiira Yehova khanhiya waawacera ale anlakela unfenta ni unswalela!”
14. Manannani ninreeriheehu ncina na Yehova? (Nwehe ciicammo ilatarato.)
14 Hiiva ciicammo nimpheela ureeriha ncina na Yehova nhina wo citthu cotheene cowoothiya cinuulumeliyaawe. Muupuwele nnarina mpatthaniinyu omaana, namavaha ni namalevelela. Vano nnaamwiiwa ntthu eeraka uyo mpatthaniinyuuyo khanle ntthu oohinamaana. Isiyani yaahaleenyu upanka? Khweeliini, nyuuva mwanhala umwaakiha uyo mpatthaniinyuuyo. Inanna imocaaru, Sotwani nkhayi naatthwaawe, anawuuluma citthu cowoothiya apheelaka unanariha makhalelo omaana a Yehova. Masi hi ninaapanka yotheene inkhitiriihu wiira naakihe ncina na Yehova ni wuuluma ikhweeli nhina uyova. (Isaa. 34:1; Isai. 43:10) Nlattu wo moolumacerweehu ni citthu cimpankeehu, ninawoonihera wiira nimpheela unswalela Yehova muukumini wihu wotheene.
Vano nyuuva, nnaahala ukavihera ureeriha ncina na Yehova? (Nwehe iparaagarafu 14)d
15. Kontha isiyani marukunuso apostolu Paulu yaapankilyaawe muukumini wawe yankavihenryaaya? (Afilipo 3:7, 8)
15 Uhiya commo hi ninaakhala ootteeliya napankaka marukunuso muukumini wihu wiira nintteelihe nrima Yehova awula wiira niikurumice uvara miteko cawe. Wootakihera, Paulu ahaana nteko wofayita cinene iriyari ya ayuuta otheene, masi uyo ahohiya miteko cotheene wiira answalele Yehova. (Akalas. 1:14) Nlattu wo iyo, uyo ahokhala nimakhalelo omaana answalelaka Yehova ni haana iparakha yoorwaa ulamulela nkhayi ni Kristu wiirimu. Paulu khaattharuwile nlattu wonswalela Yehova ni hiiva khaninhala uttharuwa. —Nsome Afilipo 3:7, 8.
16. Isiyani ineetthuceehu nintakihero naanuunu Julia? (Nwehe ciicammo ilatarato.)
16 Nahooleliheraka miteko ca Yehova muukumini wihu, uyo naahala unicaaliha nenna co ni wahoolo. Nwehe ntakihero nimoca naarokorihu amoca aneehaniya Julia. Ikhumelo inamwannyaaya, ayo yancuwela wiipa ukereeca.nlattu woocuwela wiipa, anuunu Julia yahopacera utthenkaciya wiira akhale kantoora oocuwelaciya cinene. Ayo yahocuweliya ukhala mmirawo aacuwela wiipa saana hataa anaryeene mmirawo ni yahocuwelaciya mapuro menci. Ukati waasomaaya icikola imoca yo makantoore, ntthu mmoca yansomanaaya ahopacera uwoopana myaha ca Nluku ni ahaahimerya wiira Nluku haana ncina, Yehova. Uvira waya ukati vakaani, anuunu Julia yahopacera usoma Ibiibiliya ikwaha piili khula isumana. Vano, yaholakela uvarela nteko ukatyaaya ni ikuru caya wiira answalele Yehova, uhiya ukhala kantoora. Iyo yaari itthu yoorika cinene. Anuunu Julia yeera: “Miiva kanhononaca ucuwela waka wiipa masi kaapheela uvarela nteko ukumyaaka wiira kinswalele Yehova.” Manannani anuunu Julia cineecoonaaya mahukwaala uviriha waya myaakha 30 yanswalelaka Yehova? Ayo aneera: “Mi kinaakhala ootteeliya ni ninnema nlattu woolakela unswalela Yehova. Kinaakupali wiira wahoolo uyo naahala ukikavihera ni citthu cotheene cimpheelaaka.”—Isaa. 145:16.
Wakhalaka wiira ninaahala uhoolelihera unswalela Yehova muukumini wihu, ninaahala ukhalana ukumi womaana (Nwehe iparaagarafu 16)e
NHIHIYE UNSWALELA YEHOVA
17. Kontha isiyani uryaaya itthu yofayita ucuwela ukati unkhaleehu?
17 Hiiva ninkhala ukati wookhicera wo ila ituninya yo masakheela. Apostolu Paulu hantikha co: “Uhanle ukati vakaani paasi ni ule nowa, naahala uwa ni khanhala upicapica.” (Mabere. 10:37) Isiyani yaapheelaawe uhimya? Unhaleela ukati vakaani wiira atthu alakele wakhala wiira anaahala unswalela Yehova awula mena. Ayo anlamuliya wuupuwela woohipicapica wakhitiryaaka. (1 Akor. 7:29) Ni wakhala wiira niholakela unswalela Yehova, pooti unkhuluveleehu wiira masakha anaananeehu anaahala uvira woohipicapica.
18. Isiyani Yehova ni Yesu impheelaaya wiira nipanke?
18 Yesu ahaakurumica attharyaawe uhiya paahi uhihiya untthara, masi uhihiyerera upanka iyo. (Mat. 16:24) Wakhala wiira nyuuva nhoviriha myaakha cinci mwanswalelaka Yehova, nhihiyerere upanka commo. Otheene cihu ninlamuliya wiikurumica wiira nihihiyerere unswalela Yehova. Atthunaka iyo pooti unirikela, masi napankaka commo, ninaakhala ootteeliya ni ninaaphwanyera iparakha. Ni wiira nipanke commo, ninlamuliya ukhumanaca nenna co!—Isaa. 35:27.
19. Isiyani mwiitthucileenyu niitthu yaamwiirannyeenle Jim?
19 Atthu enci anooniha wiira wanswalelaaka Yehova khuneelawa muukumini wa. Wakhala wiira nyuuva mwa mmirawo, niireke wiira nnawuupuwela wiira mwanswalelaka Yehova khannohala wiilawa? Mmirawo mmoca neehaniya Gene neera: “Mi koopuwela wiira akinhala wiilawa muukumini waka nlattu wookhala Saahiti a Yehova, waakhala khampa atthu yaasomanaaka pheelawa nlattu woorwaa mmafestani, wookhalana umweetti ni woottikha ijooku cowoopiha. Vano mi kaarwaaka paahi umikutthaanoni ni wuulalyeerani.” Manannani ayo moopuwelelwaayo yaarukunusilyaaya makhalelo a Gene? Uyo neera: “Mi kahopacera upanka citthu coohinamaana wowiipithya. Nuuwakatyaaya, kahancera woona khampa yaari itthu yomaana, masi khawaavinre ukati mwinci, noopacera wiicoona uhikhalana utteeliya weekhweeli. Vano kahancera wuupuwela ikano co mbiibiliyani kaalakenlyaaka uhitthara. Ni kaholakela uturuwela weettela ikano co mbiibiliyani ninrimaaka wotheene. Ukhuma uyo ukatyuuyo, kahopacera woona mananna Yehova caakhunlyaawe mavekelwaaka.”
20. Isiyani inlamuliyeehu ulakela?
20 Nasaalimu mmoca aheepa ncipo amwaacaka Yehova, eeraka: “Ootteeliya nrima thi ule unonthanla ni unonwaana wiira akhale wapuwani wa.” (Isaa. 65:4) Khaninlamuliya uhiyerera ulakela khampa Josuwe enre: “Mi naamucaaka ninhala uswalela Yehova.”—Jos. 24:15.
Ncipo 28 Tipani nohala ukhala mpatthani a Yehova
a Isaiya 48:17 Coo phineeraawe Yehova, Moopolyaa, Owaarya o Isarayeli: “Miiva Yehova, ki Nlukwaa, Ule nowiitthuciha itthu inoophwanyiha ifayita, Ule noweettiha munttalani unlamuliya weetta. 18 Caahalaaya ureera weeva uneewelenle sana-saana malamulwaaka! Commo, nnema naa ninhala ukhala khampa mooloko, ni isariyaa inhala ukhala khampa mawimpi o mpahari.
b Isaalimu 103:13 Toko nyari cimmoonelaawe ikiriri mwanawe, Yehova ciicammo naawoonela ikiriri ale ammoova. 14 Kontha uyova naacuwela sana-saana inanna cumpiyeehu, khanliyala wiira hiiva nikhanle ntthupi.
c Macina makhwaawe ahaakakhanihiya.
d ILATARATO YO: Uvira waya atthu ootakhala nrima nipuro naapankiya ikonkereesu, athiyana amoca anawaattamela nipuro neemenlyaaya mayamunna niikariinyu ni anaapheela ucuwela ikhweeli.
e ILATARATO: Nthoonyere ninoonihera itthu anuunu Julia ihiilyaaya wiira answalele Yehova.