MWAHA WOOSOMIYA 32
NCIPO 38 Yehova Onimoovahani Ikuru
Manannani Yehova cinnikaviheraawe uvilela?
“Mwaneene Nluku noonihera unamaana . . . naahala wuulipihani, wuuvahani ikuru ni naahala uweesani nipuro noolipa.”—1 PET. 5:10.
ITTHU INHALEEHU WIITTHUCA
Nhina ula mwahoola, ninaahala woona mananna macese Yehova novarelaawe nteko wiira anikavihere uvilela ni manannani ninhaleehu uphwanyera ifayita.
1. Kontha isiyani ninlamuliyeehu uvilela ni tipani nohala unikavihera? (1 Peturu 5:10)
UKHALA wiira ninkhala mahuku ookhicera ni ootepa urika cinene, otheene cihu ninlamuliya ukhala atthu oovilela. Atthu akhwaawe, anaahuva nlattu woretta cinaawerya. Akhwaawe atthunaka anaahuva nlattu wookhweliya ntthu yanfentaaya. Ni akhwaawe atthunaka anawaanana ulupatthiya naamucyaaya awula naahooleli ookuvernu. (Mat. 10:18, 36, 37) Masi, pooti wankupaliinyu wiira Yehova naahala wuukaviherani uvilela, hataa mwaananaka masakhani.—Nsome 1 Peturu 5:10.a
2. Isiyani innikhitiriha uvilela khampa makristau?
2 Uvilela maanaaya wiira uhihiyerera ukhala oolipa ni ulipihaca niweherero nihu, hataa nalupatthiyaka, nattehattehiyaka ni masakha makhwaawe. Masi, hiiva khaninhala ukhitiri uvilela nakhuluvelaka ikuru cihu paahi, ninhala ukhitiri nakaviheriyaka ni Yehova, kontha uyo phinnivaha “ikuru cimpheeleehu.” (2 Akor. 4:7) Nhina ula mwahoola, ninaahala woona mananna macese Yehova anvarelaawe nteko wiira anikavihere ukhala atthu oovilela. Uhiya commo, ninaahala woona manannani ninhaleehu uphwanyera ifayita.
ULOMPA
3. Kontha isiyani nineereehu wiira ulompa ikhanle inanna imoca yoomuulumana Yehova?
3 Yehova hopanka itthu yootikhiniha wiira anikavihere uvilela. Uyo hokhitireeha wiira hataa nakhalaka atthu oopahuwa, pooti wammuulumaneehu. (Mabere. 4:16) Muupuwele co: Hi pooti unonlompeehu Yehova wo khula ukati ni khula itthu impheeleehu. Pooti wammuulumaneehu wo khula iluuka ni khula nipuro, hataa ninari veekha awula ninaatthukiye. (Jonas 2:1, 2; Mite. 16:25, 26) Ni nakhalaka niiwasiwaasi nihicuwelaka itthu nuulumileehu, Yehova naahala ucuwelela isiyani nimpheeleehu uhimya. (Aroo. 8:26, 27) Khweeliini, ulompa ikhanle inanna imoca yomuulumana Yehova!
4. Nincuwela cani wiira ulompa nalepelaka uvilela ikhanle itthu Yehova impheelaawe?
4 Mbiibiliyani, Yehova honikhuluveliha wiira pooti “unlepeleehu yotheene impheeleehu yakhalaru ile intthunaawe, uyo naahala uniiwa.” (1 Jo. 5:14) Niireke wiira pooti wanonlompeehu Yehova nanlepelaka unikavihera uvilela? Iyeeni! Kontha iyo phiitthu impheelaawe. Nincuwela cani iyo? Navilelaka masakha annikhumelela, ninankavihera Yehova umwaakhula ule khanle nwanannyaawe, Sotwani Tiyapu. (Miru. 27:11) Uhiya commo, Ibiibiliya ineera wiira Yehova naapheela “woonihera ikuru cawe ale anontotha ninrimaaya wotheene.” (2 Ikor. 16:9) Vano, pooti wankupaliihu wiira Yehova haana ikuru wiira anikavihere uvilela.—Isai. 30:18; 41:10; Luka 11:13.
5. Manannani ulompa unhalaaya unikavihera ukhalana nnema? (Isaiya 26:3)
5 Ibiibiliya, ineera wiira nanlompaka Yehova, ‘nnema na Nluku ninvikana moopuwelelweehu, ninaasunka nrimeehu ni moopuwelelweehu.’ (Afili. 4:7) Iyo ikhanle iparakha yuulupale. Atthu ahinonswalela Yehova, anawaanana itafaawuti cinci ni encyaayo anaamananihaka utotha ukhalana nnema niinanna coovirikana. Atthu enci anaaviriha ukati mwinci anamanle wiira amalamalihe moopuwelelo oohiloka anaakhaliha iwasiwaasi. Masi upanka ayo manannaayo, ikhanle itthu yowoopiha para nkristau. (Nwehe ciicammo Matewus 12:43-45.) Uhiya commo, nnema Yehova ninnivahaawe nalompaka, nikhanle nuulupale uvikana nnema nintothaaya ayo atthwaayo. Ukati unlompeehu, ninawoonihera wiira ninankhuluvela Yehova ni uyo naanivaha nnema noohimala. (Nsome Isaiya 26:3.b) Manannani Yehova nopankaawe iyo? Inanna imoca yoopanka iyo, ukhanle wiira uyo naanikavihera wuupuwelela iveerusu co mbiibiliyani cinnikhuluveliha wiira naanifenta ni nopheela wiira nikhale saana. Wuupuwela nnyo iveerusunnyo, cinaanimaaliha nrimeehu ni moopuwelelweehu.—Isaa. 62:1, 2.
6. Manannani nyuuva nnohaleenyu uphwanyera ifayita cinene ulompa? (Nwehe ciicammo ilatarato.)
6 Itthu ineetthuceehu. Mwaananaka itafaawuti inttehatteha waamini winyu, “munhimerye Yehova” ni munlompe mwanlepelaka wuuvahani nnema. (Isaa. 55:22) Munlepele ciicammo wuuvahani ucuwelaca umpheeleenyu wiira mwaanane itafaawuti cinyu. (Miru. 2:10, 11) Uhiya commo, ukati munlompeenyu, nhiliyale unsukhuru Yehova. (Afili. 4:6) Nweheehe citthu cinoonihera wiira Yehova nawuukaviherani ni nsukhuru nlattu wo nnyo citthunnyo. Nhihiyerere wiira itafaawuti cinyu cuuhiheni uweheeha iparakha cinaakheleenyu.—Isaa. 16:5, 6.
Mwalompaka, nnomuulumana Yehova. Mwasomaka Ibiibiliya, Yehova naawuulumanani nyuuva, awula Nalompaka, nimmuulumana Yehova. Nasomaka Ibiibiliya, Yehova nonuulumana hiiva (Nwehe iparaagarafu 6)f
NUULUMO NA NLUKU
7. Kontha isiyani usoma Ibiibiliya unnikaviheraaya uvilela?
7 Yehova honivaha Nuulumo nawe wiira anikavihere uvilela. Nasomaka Ibiibiliya, hi ninaaphwanya iveerusu cinci cinnikhuluveliha wiira Yehova naahala unikavihera. Wootakihera, ilivuru ya Matewus 6:8 ineera: “Apaapeenyu anaacuwela citthu cimpheeleenyu, nhinaaya waalepela.” Ntthu oolumile ala moolumwaala, khanle Yesu ni khaavo-tho noncuwela sana-saana Yehova unvikana Yesu. Phimaana, pooti wankupaliihu wiira naananaka itafaawuti, Yehova naacuwela itthu impheeleehu ni naahala uniwacera. Mbiibiliyani, cihaavo iveerusu cinci cinhala univaha ikuru wiira nivilele.—Isaa. 94:19.
8. a) Nhimye ntakihero no mbiibiliyani ninhala unikavihera uvilela. b) Isiyani inhala unikavihera wuupuwela iveerusu yo mbiibiliyani ukati umpheeleehu?
8 Ikano co mbiibiliyani, pooti unikavihera uvilela. Khweeliini, nnyo cinaanivaha ucuwelaca unnikavihera ulakela itthu yoohala upanka nimananna omaana. (Miru. 2:6, 7) Wootakihera, Ibiibiliya inaanikurumica uhikhala niiwasiwaasi nuupuwelaka itthu inhala wiirannya awula uhiirannya meelo. (Mat. 6:34) Nasomaka Ibiibiliya woohihiyerera ni nuupuwelelaka itthu isomileehu, khunhala unirikela wuupuwelela ikano co mbiibiliyani ukati umpheeleehu.
9. Manannani matakihero o mbiibiliyani annikaviheraaya?
9 Mbiibiliyani, ninaaphwanya matakihero aatthu yankhuluvela Yehova ni yaakaviheriye nuuyo. (Mabere. 11:32-34; Tiya. 5:17) Wuupuwela ayo matakiherwaayo, anaanikavihera wuncerera ukhuluvela wihu Yehova, khanle “ntthawelo nihu, ikuru cihu, nikavihero nimphwanyeehu woohihuvela ukati wo masankiho.” (Isaa. 46:1) Usoma matakihero omaana ayo aswalyaayo, anaanikurumica utakiha waamini waya ni uvilela waya.—Tiya. 5:10, 11.
10. Manannani nyuuva nnohaleenyu uphwanyera ifayita Nuulumo na Nluku?
10 Isiyani inlamuliyeenyu upanka? Nsome Ibiibiliya mahuku otheene ni mwantikhe iveerusu cinhala wuukaviherani. Atthu enci anawiicoona ukhala saana yasomaka ibroxura Nsome Cowantikhiya Cowaarya Khula Nihuku, kontha ayo pooti wuupuwela itthu inhala waakavihera nihuku notheene. Iyo phiitthu yaawiirannyenle anuunu amoca aneehaniya Marie.c Ukati athumwanaya ni anumwanaya waawerennyaaya iretta ineehaniya cancer. Isiyani yaakavihenre ukati waawaceraaya asithumwanaya ahinaaya ukhwa? Ayo aneera: “Khula nihuku, mi kansoma iveerusu co mbiibiliyani nhina ibroxura Nsome Cowantikhiya Cowaarya Khula Nihuku ni wuupuwelela. Naayo manannaayo, uhokikavihera ukhalana moopuwelelo o mbiibiliyani ni uhuupuwela masakha avirihilyaaka.”—Isaa. 61:2.
MAYAMUNNEEHU
11. Nineecoona cani nuupuwelaka uvilela wo mayamunneehu?
11 Yehova nawaavarela nteko mayamunneehu ni mayanuunwiihu wiira anikavihere uvilela. Ucuwela wiira ntuniyani motheene ahaavo mayamunna ni mayanuunu anviriha itafaawuti cimocaaru, unaaniiriha ukupali wiira khaniri veekha. (1 Pet. 5:9) Ntuniyani motheene, ahaavo mayamunna anviriha itafaawuti khampa hiiva ni anvilela. Iyo inawoonihera wiira, hataa yanikhumelelaka masakhani, hiiva ciicammo pooti wanvileleehu!—Mite. 14:22.
12. Manannani mayamunneehu anhalaaya unikavihera ni manannani ninhaleehu waakavihera? (2 Akorintu 1:3, 4)
12 Mayamunneehu ciicammo pooti unikavihera uvilela niitthu inuulumaaya ni ampankaaya. Apostolu Paulu ahokaviheriya ukati waatthukiyaawe. Nhina iwarakha cantikhilyaawe, uyo naasukhuru ukaviheriya nimayamunna ni hantikha macinaaya. Mayamunna yanonlipiha, yanommaaliha ni yanonvaha citthu caapheelaawe. (Afili. 2:25, 29, 30; Akol. 4:10, 11) Mahukwaala, hiiva ciicammo ninaakaviherana ukati ninkhalaneehu itafaawuti.—Nsome 2 Akorintu 1:3, 4.d
13. Isiyani yaakavihenre anuunu Maya uvilela?
13 Mwaakha wo 2020, mapoliisiya makhwaawe o Russia yahokela nluwani wa anuunu amoca aneehaniya Maya. Ayo yahocisiya mpaka utiripunaali wiira yaahimerye atthu itthu inkupalyaaya. Uyo ukatyuuyo, mayamunna yahaalipiha cinene anuunu Maya. Ayo aneera: “Wahophiya ukati miiva kaaryaaka ooriipiya nrima, vano mayamunna ni mayanuunu yahokilikarela ni yahokantikhela imensagem yiiraka ninawuufentani. Mi kahoona wiira kihaana amuci enci ni oofenta. Masi, ukhuma yooyo mwaakhooyo, mi kinoona ukhala itthu yofayita.”
14. Manannani ninhaleehu uphwanyera ifayita ukavihera wo mayamunna? (Nwehe ciicammo ilatarato.)
14 Isiyani inlamuliyeenyu upanka? Ukati unviriheenyu itafaawuti, nhikhale uttayi ni mayamunna. Nhoone ihaaya waalepela mahumu wuukaviherani. Ayo pooti ukhala khampa “nikhuku nookhikicera nihuku nophyoo ni nipuro nowiipithya nihuku ninvuka ipula.” (Isai. 32:2.) Uhiya commo, muupuwele wiira mayamunna ciicammo anawaanana itafaawuti. Mwaakaviheraka mayamunna ampheela ukaviheriya, nyuuva nnaahala woona citthu cofayita ni iyo ciicammo inaahala waakavihera uvilela.—Mite. 20:35.
Nkhale wakhiviru ni mayamunna (Nwehe iparaagarafu 14)g
NIWEHERERO NIHU
15. Manannani niweherero nankavihenryaaya Yesu ni manannani ninhalaaya unikavihera? (Maberewu 12:2)
15 Niweherero Yehova ninivahilyaawe nikhanle nookhuluvelya, phimaana, nno ninaanikavihera uvilela. (Aroo. 15:13) Iyo phiitthu yaamwiirannyenle Yesu. Uyo ancuwela wiira aahihiyerereke ukhala ookhuluvelyaa, anhala ukavihera ureeriha ncina na Yehova. Ciicammo Yesu khoona upica uphiya ukati wooturuwela ukhala nkhayi Naathumwaane wiirimu ni nuuwakatyaaya, ulamulela nkhayi nimayamunnaawe. Nno niwehereronno, nahonkavihera uvilela masakha yaavirihaawe, venci-venci nihuku noomalela nari va watuniyani vaa. (Nsome Maberewu 12:2.e) Inanna imocaaru, niweherero nihu nookhala mpaka upeephoni, ninaanikavihera uvilela masakha annikhumelela ila ituniya ya Sotwaniila.
16. Manannani niweherero naakavihenryaaya anuunu amoca uvilela ni isiyani mwiitthucileenyu niitthu ihimilyaaya?
16 Moone mananna niweherero nookhala upeephoni naakavihenryaaya anuunu amoca ankhala u Russia aneehaniya Alla. Awannyaya yahotthukeliya nkhattya yawehereraka wuulumeliya milattunnyo. Wiirannya waya iyo, anuunu Alla aneera: “Ulompa nhina niweherero noohoolo ni wuupuwelela uhokikavihera uhilolovaca. Mi kinaacuwela wiira ala masakhaala anaahala umala. Yehova naahala utthema ni hiiva ciicammo ninaahala utthema.”
17. Isiyani inlamuliyeehu upanka wiira niphwanyere ifayita niweherero Yehova ninivahilyaawe? (Nwehe ciicammo ilatarato.)
17 Isiyani inlamuliyeenyu upanka? Nkumihe ukati wiira muupuwele citthu comaana cinhala wiira uhoolo Yehova cikhuluvelihilyaawe. Mmananihe wuupuwela nkhalaka upeephoni ni wuupuwele citthu cotheene cinhaleenyu ukhalana ni cinhala uwiirihani ukhala ootteeliya. Naayo manannaayo, mahuviho nnoviriheenyu nna coo, “anaahala uvira ni khaanakhala moolupale.” (2 Akor. 4:17) Uhiya commo, mpanke yotheene inkhitiriinyu wiira mwaahimerye akhunaninyu nno niwehereronno. Muupuwele mananna atthu ahirina niweherero na Nluku unaarikelaaya uvilela masakha ankhumelela ila ituniya ya Sotwaniila. Woopana mwaha vakaani, pooti waavara nrima nhina niweherero nirineehu noohoolo.
Nkumihe ukati wiira muupuwele citthu comaana cinhala wiira uhoolo Yehova cikhuluvelihilyaawe (Nwehe iparaagarafu 17)h
18. Kontha isiyani nihaana ukhuluvela inatiri ca Yehova?
18 Uvilela wawe masakha otheene, Jó ahomwiirela Yehova co: ‘Vano koocuwela wiira nyuuva khiivo itthu ihinkhitiriinyu upanka ni ile yotheene inlakeleenyu nnaapanaka. (Jó 42:2) Jó aheetthuca wiira khiivo itthu inonhiiha Yehova upanka itthu impheelaawe. Ucuwela iyo, pooti univaha ikuru wiira nivilele. Muupuwele ila itthwiila: Athiyana amoca yaawerennya yanriipiya nrima kontha khaamala urwaa wo mameetiku menci, masi khaakhitinri uvonihiya iretta inaawerya. Masi vano, yahomoonanana meetiku mmoca oocuwelaca ni ookhuluvelyaa oonenenle iretta inaawerya ni aahimenrye mananna ootafitiya iyo iretteeyo. Hataa acuwelaka wiira yaanhala uviriha ukati mwinci wiira ukhala saana, ayo anaakhala ootteeliya. Itthu yaakavihenre ayo athiyanaayo uvilela nikhanle niweherero naarinaaya wiira yanhala ukhala saana. Inanna imocaaru, ukupali wiira niweherero nihu noohoolo ninaahala wiirannya, unaanikavihera uvilela.
19. Isiyani inlamuliyeehu upanka wiira nivilele?
19 Khampa noonileehu, ulompa, Nuulumo na Nluku, mayamunneehu ni niweherero nihu akhanle makavihero Yehova nivahilyaawe wiira nivilele. Ukumihera ifayita ayo makaviherwaayo, ninaahala woona wiira Yehova naanikavihera khula masakha annikhumelela. Ni ciicammo ninaahala ukhitiri uvilela mpaka ukati unhalaaya umalamalihiya masakha otheene ankhumelela ila ituniya ya Sotwaniila.—Afili. 4:13.
NCIPO 33 Ninvahererye Yehova Ovelavela Wahu
a 1 Peturu 5:10 Masi, nnalawihale uhuva vakaani, mwaneene Nluku noonihera maana otheene hataa ahiphwanelaka, Nluku wiihanenleni uttitthima Wawe woohimala urinaawe nkhayi ni Kristu, naahala umalihera ufunttiya winyu. Uyo naahala wuulipihani, naahala wuuvahani ikuru, ni naahala uweesani wanipuroni noolipa.
b Isaiya 26:3 Nnaahala waakhikicera ale anookhuluvelani. Nyuuva khannohala uhiya waavaha nnema, kontha ayo anookhuluvelani nyuuva.
c Macina makhwaawe ahaakakhanihiya.
d 2 Akorintu 1:3 Attitthimihiye Nluku ni Apaapaawe Pwiiyeehu Yesu Kristu, Apaapeehu oowinciva uthunku ni Nluku rina mamaalihero otheene, 4 nonimaaliha mmasakhani wihu otheene, wiira ni mananna Nluku cinnimaalihaawe, hiivano ciicammo naamaalihe akhwiihu mmasakhani waya otheene.
e Maberewu 12:2 ninweheehaka Nhooleli Muulupale ni nomalihera ulikana waamini wihu, Yesu. Nlattu wookhuluvelihiya utteeliya, uyo ahovilela wiiviya wanipottoni, khaawacenre woonihaciya wawe ihaaya, ni honkoma moono wonlopwana wo ihice ya Nluku.
f ILATARATO YO: Amunna amoca owuuluvala khanhiya uvilela khula nihuku.
g ILATARATO: Amunna amoca owuuluvala khanhiya uvilela khula nihuku.
h ILATARATO: Amunna amoca owuuluvala khanhiya uvilela khula nihuku.