MWAHA WOOSOMIYA 49
Yehova nawaakhula ulompa waka?
“Nyu nnaahala ukilompa, ni mi kinaahala uwaakhulani.”—JER. 29:12.
NCIPO 41 Xontte Mwiiwe Ovekela Waka
NINHALA WIITTHUCANI?a
1-2. Nlattuni ukati nkhwaawe ninooneehu wiira Yehova khanaakhula ulompa wihu?
ISAALIMU 37:4 ineera: “Mphwanyihiye ni Yehova utteeliya nrima wooverihela ni uyo naahala wuuvahani citthu cimpheeleenyu wanrimani winyu.” Nno nikhanle nikhuluveliho nomaana! Niireke wiira Yehova khweeliini naanivaha yotheene inonlepeleehu? Nlattuni ninkoheehu commo? Muupuwele ala matakihero meelyaala. Anuunu amoca ahitheliye ananlompa Yehova wiira aakavihere urwaa usoma Icikola Yaanamalalyeera Umwene. Cinaavira myaakha cinci, masi ayo khanlattuliya. Vano munna mmoca mmirawo nanlompa Yehova wiira ankavihere uvona iretta yuulupale, wiira uyo aakavihere cinene miteko co wanlokoni. Masi uyo khanvona. Asithumwanawe mmirawo mmoca anaalompa wiira mwanaya hihiye weettela ikhweeli, masi wahoolo, uyo naalakela uhiya unswalela Yehova.
2 Atthunaka nyuuva ciicammo nhopaca unlepela Yehova itthu, masi itthu ilepenleenyu khineerannya. Nlattu wo iyo itthwiiyo, nyuuva mwahoopuwela wiira Yehova nowaakhula atthu akhwaawe paahi, kahi nyuuva. Awula, pooti wancera wuupuwela wiira ihaavo itthu yoohiloka ipankileenyu, phimaana khannaakhuliya. Anuunu amoca aneehaniya Janiceb pheecoonaaya commo. Ayo ni awannyaya yahonlompa Yehova yanhimeriyaka wiira yaanaapheela urwaa uvara nteko Upeteli. Ayo aheera: “Mi kaanaakupali wiira woohipica, nanhala ulattuliya Upeteli.” Masi wahovira ukati, myeeri ni myaakha cene ayo woohilattuliya. Anuunu Janice aheera: “Mi wahokiriipa nrima ni kahokhala oonyoonyiya. Mi kahancera wuupuwela wiira ihaavo itthu yaapankilyaaka yanriipihile nrima Yehova. Mi kihonhimeriya Yehova itthu impheelaaka, vano nlattuni uhikaakhunlyaawe?”
3. Ninhala wiitthucani nhina ula mwahoola?
3 Ukati nkiina, hi pooti wancera wiikoha wakhala wiira khweeliini Yehova naaviriyana ulompa wihu. Hataa aswali a Yehova ookhuluvelya okhalayi yaheekoha commo. (Jó 30:20; Isaa. 22:2; Mabere. 1:2) Isiyani inhala wuukaviherani ukhuluvela wiira Yehova naahala uwaakhulani mwanlompaka? (Isaa. 65:2) Wiira naakhule nno nikohonno, nttwee noopele mwaha nnya ipontu tthaarunnya: (1) Isiyani ninlamuliyeehu uweherera wiira Yehova apanke? (2) Isiyani Yehova inwehereraawe wiira hiiva nipanke? (3) Nlattuni ninlamuliyeehu urukunusa mananna cinonlompeehu Yehova?
ISIYANI YEHOVA INWEHERERAAWE WIIRA HIIVA NIPANKE?
4. Toko cinthoonyeraaya Jeremiya 29:12, isiyani Yehova innikhuluvelihaawe?
4 Yehova hokhuluveliha wiira naahala uviriyana ulompa wihu. (Nsome Jeremiya 29:12.c) Nluku nawaafenta aswalyaawe ookhuluvelya, phimaana uyo nawaaviriyana yanlompaka. (Isaa. 10:17; 37:28) Masi, uyo khannivaha citthu cotheene cinonlepeleehu. Citthu cikiina cinlepeleehu, nohala unipankela upeephoni.
5. Yehova aniviriyanaka nilompaka, noopuwela isiyani? Ntaphulele.
5 Yehova nawuupuwela wakhala wiira itthu inlepeleehu inaavirikaniha awula mena itthu uyova nopheelaawe. (Isai. 55:8, 9) Itthu Yehova impheelaawe ukhanle waacariha watuninyani atthu owiiwanana ni ootteeliya anhala uhooleliya niikuvernwaawe. Masi Sotwani neera wiira atthu anhala ukhala ootteeliya yeehoolelaka asineennyaaya. (Upha. 3:1-5) Yehova nopheela uthoonyera wiira Sotwani nawootha. Phimaana, uyo naahiyerera wiira cikhale ikuvernu ca apinaatamu. Masi ikuvernu ca apinaatamu phintepa ukumihaca masakha anooneehu ilelo ntuninyani. (Ekles. 8:9) Hi ninaacuwela wiira Yehova khanhala umaliha nenna co masakha o ntuninyani, kontha amalihaka ayo masakhaayo, ahaavo atthu yaahala wuupuwela wiira ikuvernu ca apinaatamu cinaalamulela saana ni cinaakhitiri umaliha masakha a apinaatamu.
6. Nlattuni ninlamuliyeehu ukhuluvela wiira Yehova naahala woonihera nifento ni isariya ukati wotheene?
6 Atthu eeli awula araru yanlepelaka Yehova itthu imocaaru, uyo pooti uwaakhula nimananna oovirikana. Wootakihera, uwakati mwene Ezekiya waawerennyaawe, ahonlepela Yehova wiira anvonihe. Ni Yehova ahonvoniha. (2 Mam. 20:1-6) Masi ukati apostolu Paulu wanlepenlyaawe Yehova wiira akumihe ‘mwiiwa wo mwiirutthuni wawe’—uyo mwiiwooyo aathunaka yaari iretta—Yehova khanvonihile Paulu. (2 Akor. 12:7-9) Vano muupuwele ciicammo itthu yaamwiirannyenle apostolu Tiyaku ni Peturu. Mwene Heroti aapheela uwiivakaca ooyeeli waya. Mayamunna o wanlokoni yahonlompela Peturu ni atthunaka ciicammo yahonlompela Tiyaku. Masi, Tiyaku aheeviya ni Peturu ahoopoliya ninlayikha. (Mite. 12:1-11) Vano hiivano atthunaka ninawiikoha co: ‘Nlattuni Yehova waamooponlyaawe Peturu ni khaamooponle Tiyaku?’ Ibiiblya khinhimya.d Masi ihaavo itthu ninlamuliyeehu ukupali: Yehova ‘khampanka citthu coohisariya.’ (Deut. 32:4) Ni hi ninaacuwela wiira Yehova aananfenta venci Peturu ni ciicammo Tiyaku. (Apoka. 21:14) Ukati nkhwaawe, Yehova pooti waakhula ulompa wihu niinanna yahaaweherereehu. Masi hi ninaakupaleela wiira yotheene Yehova impankaawe, nopanka nlattu wo nifento ni niisariya. Phimaana, khaninlamuliya umuuluma pusya nlattu wo mananna cinaakhulaawe ulompa wihu.—Jó 33:13.
7. Isiyani ihinlamuliyeehu upanka, ni nlattuni?
7 Hi khanimpheela ulattaniha itthu inniirannyeela niitthu inwiirannyeela akhunanihu. Wootakihera, pooti ukhalaka wiira hiiva nihonlepela Yehova wiira anikavihere, masi ninawoona wiira khanaakhunle. Nuuwakatyaa, ninaacuwela wiira ntthu nkiina aholompa alepelaka itthu hiiva yaalepenkeehu. Masi uyo haakhuliya ni Yehova. Arokorihu amoca aneehaniya Anna yahowiirannyeela iyo itthwiiyo. Ayo yaholompa wiira awannyaya yeehaniya Mateus avone iretta yo cancro. Yooyo ukatyuuyo, yahaavo mayanuunu eeli yaawerya iyo iretteeyo. Anuunu Anna yaholompa venci wiira awannyaya ni ayo mayanuunwaayo avone otheene. Mayanuunu ooyeeli yahovona, masi awannyaya anuunu Anna yahokhwa. Vano, ayo yahancera wiikoha wakhala wiira ayo mayanuunwaayo yaavonne nlattu wookaviheriya ni Yehova awula yaanoovona paahi. Ayo ciicammo yahokela wiikoha co: ‘Wakhala wiira Yehova phaavonihile, nlattuni uhaavonihilyaawe awannyaka?’ Hi khanincuwela nlattuni ale mayanuunwaawe waavonnyaaya. Masi ninaacuwela wiira Yehova naahala umalamaliha uhuva wihu wotheene. Ni ninaacuwela wiira uyo naapheela venci uwunweleliha asipatthannyaawe akhwile.—Jó 14:15.
8. a) Toko cinthoonyeraaya Isaiya 43:2, Yehova nnikavihera cani? b) Ulompa unnikavihera cani yaniphwanyaka masakha? (Moone ividiyu Ulompa unaanikavihera waanana masakha.)
8 Yehova khanhala unihiya veekha. Khampa Apaapeehu oonifenta, Yehova khunoncivela unoona nihuvaka. (Isai. 63:9) Unookhalaru commo, uyo khaneeriha wiira ahinikhumelele masakha muukumini oolikanaca ‘nimyooloko awula mooro.’ (Nsome Isaiya 43:2.e) Masi uyo naanikhuluveliha wiira naahala unikavihera uviriha ayo masakhaayo, ni wiira khanhala uhiyerera yanikhumelelaka masakha oohimala. Ciicammo, Yehova naanivaha nnepaawe wowaarya wiira unikavihere uvilela. (Luka 11:13; Afili. 4:13) Phimaana, pooti wankhuluveleehu wiira ninaahala ukhalana ikuru cimpheeleehu wiira nikhitiri uvilela ni unvaresesa Yehova.f
ISIYANI YEHOVA INWEHERERAAWE WIIRA NIPANKE?
9. Toko cinthoonyeraaya Tiyaku 1:6, 7, nlattuni ninlamuliyeehu ukhuluvela wiira Yehova naahala unikavihera?
9 Yehova noweherera wiira ninkhuluvele. (Mabere. 11:6) Ukati nkhwaawe, masakha annikhumelela pooti ukhala oorika cinene, mpaka hiiva wuupuwela wiira khaninkhitiri uvilela ni uhikupali wiira Yehova naahala unikavihera. Masi Ibiiblya ineera wiira ikuru ca Nluku pooti unikhitiriha “uwela mwaako.” (Isaa. 18:29) Phimaana, uhiya ukhala nuupuwelaka wiira Yehova khanhala unikavihera, nihaana nilompaka, ulompa nooniheraka waamini cinene ni ukhuluvela wiira Yehova naahala unaakhula.—Nsome Tiyaku 1:6, 7.g
10. Nttonkace ntakihero ninoonihera wiira nalompaka, nihaana nipankaka mphantteehu.
10 Yehova noweherea wiira nanlepelaka itthu, hiiva ciicammo nihaana nipankaka mphantteehu. Wootakihera, pooti ukhalaka wiira munna mmoca nanlepela Yehova wiira aleviye untekoni wiira arwee oone ikonkereesu. Manannani Yehova caahalaawe waakhula nwo ulompanwo? Yehova nanvaha uyo munnooyo ulipa nrima wiira arwee awuulumane apatarawaawe. Masi uyo munnooyo khanlamuliya weemela paahi awehereraka iyo itthwiiyo wiirannya. Uyo haana apankaka mphanttyaawe, urwaa uwuulumana apatarawaawe ni waalepela wiira anleve. Ni atthunaka uyo munnooyo hanaa arwaaka uwuulumana ikwaha cinci mpaka wanhalaaya untthunihera. Pooti ukhalaka wiira uyo haana anlepelaka ntthu nkhwaawe nonvaranaawe nteko wiira aakakhanihe mahukwaayo. Ni ciicammo, pooti ukhalaka wiira apatarawaawe anaahala untthunihera urwaa ukonkereesuni, masi anaahala unthikila nsurukhu unhalaawe upokhera wamalaka mweeri.
11. Kontha isiyani ukati nkiina nihaana naakulelihaka ulepela itthu imocaaru imaara cinci?
11 Yehova noweherera wiira nihiyerere unlepela ile inooneehu ukhala yofayita. (1 Atesal. 5:17) Yesu ahoonihera wiira citthu cikhwaawe cinonlepeleehu Yehova khaninhala uvahiya wowaakuvyaacawene. (Luka 11:9) Phimaana, nhihiyerere ulompa, nlompe ninrimeenyu wotheene ikwaha cinci. (Luka 18:1-7) Naahihiyerereke unlompa Yehova nanlepelaka itthu impheeleehu, ninaamoonihera wiira itthu inonlepeleehu ikhanle yofayita ni khinakhala itthu yoovyaavyaaca impheeleehu mahuku vakaani paahi. Ciicammo, ninawoonihera umwaamini wiira uyo naahala unikavihera.
NLATTUNI NINLAMULIYEEHU URUKUNUSA MANANNA CINONLOMPEEHU YEHOVA?
12. a) Isiyani ninlamuliyeehu wiikoha, ni nlattuni? b) Ninhala woonihera cani wiira ninanhisimu Yehova? (Nwehe ikwaaturu “Ulompa waka unawoonihera unhisimu Yehova?”)
12 Wakhalaka wiira itthu inonlepeleehu Yehova khineerannya, nihaana niikohaka nnya citthu tthaarunnya. Yoopacera: ‘Kiireke wiira itthu inlepelaaka ikhanle yomaana?’ Ukati nkhwaawe, hi ninoopuwelaka wiira ninaacuwela itthu impheeleehu. Masi atthunaka, ninlepela itthu ihinhala uniphwanyiha ifayita wahoolo. Nalepelaka wiira masakheehu amalihiye, pooti ukhalaka wiira ahaavo mananna makhwaawe owaanana ayo masakhaayo. Ni citthu cikhwaawe cinonlepeleehu Yehova atthunaka cinaavirikaniha ile impheelaawe. (1 Jo. 5:14) Nwuupuwele ayari aromoliye iparaagarafu yoopacera. Ayo yahonlepela Yehova wiira mwanaya hihiye weettela ikhweeli. Unkhala toko wiira itthu ilepenlyaaya khinakhala yoonanara. Masi muupuwele: Yehova khanhala unkhanyereriha ntthu unswalela. Uyo nopheela wiira otheene cihu, hataa ciicammo asaaniihu, athanle unswalela. (Deut. 10:12, 13; 30:19, 20) Phimaana, uhiya unlepela Yehova wiira amwiirihe mwaninyu uhihiya weettela ikhweeli, nyuuva ayari nnolamuliya unlepela Yehova wiira ookavihereni unvara nrima mwaninyu ni unkurumica wiira mwaneennyaawe alakele unfenta Yehova ni ukhala mpatthannyaawe.—Miru. 22:6; Efesu 6:4.
13. Toko cinthoonyeraaya Maberewu 4:16, ukatini Yehova unhalaawe unikavihera? Ntaphulele.
13 Itthu yonayeeli ninlamuliyeehu wiikoha phi ila: ‘Kiireke wiira ula ukhanle ukati womaana wiira Yehova akivahe itthu inlepenlyaaka?’ Atthunaka nyuuva nnopheela wiira Yehova awaakhuleni woohipicapica. Masi, Yehova phincuwela ukati wooreera unaakhula. (Nsome Maberewu 4:16.h) Noonaka wiira ulompa wihu khawaakhuliye ukati waapheeleehu, hiiva atthunaka ninoopuwela wiira Yehova niirenle “mena”. Masi khweeliini, pooti ukhalaka wiira uyo niirenle “uweherere.” Wootakihera, mmuupuwele mmirawo aalompile anlepelaka Yehova wiira anvonihe. Unari wiira Yehova ahonvoniha, Sotwani aahala umwiirela Yehova wiira uyo munnooyo nonswalela Yehova nlattu woovonihiya. (Jó 1:9-11; 2:4) Ciicammo, nihiliyale wiira Yehova honikhuluveliha wiira wahoolo naahala umaliha iretta cotheene. (Isai. 33:24; Apoka. 21:3, 4) Niwehereraka uphiya uyo ukatyuuyo, hi khaninlamuliya uwehera wiira Yehova naahala univoniha nawerennyaka. Phimaana, ule munnoole aalamuliya unlepela Yehova ikuru ni nnema wiira hihiye uvilela ni unswalela Nluku, hataa awerennyaka.—Isaa. 29:11.
14. Itthu yaawiirannyenle anuunu Janice iwiitthucihaleni isiyani?
14 Nyuuva nnaawuupuwela anuunu Janice, yaalompile wiira arwee yavare nteko Upeteli? Cahovira myaakha 5, vano ayo phaakhitinryaaya woona mananna caakhuliyaaya ni Yehova. Ayo aheera: “Myaakha cotheene nnyo, Yehova hokiitthuciha ni hokikavihera ukhala nkristau omaana. Mi kahaana kinkhuluvelaka. Kahaana kiitthucaka upanka saana usoma wo veekha. Ciicammo, kahaana kiitthucaka wiira mi pooti unswalela Yehova ukitteelaka nrima, hataa kirwaaka Upeteli awula kihirwaaka.” Wahoolo, anuunu Janice ni awannyaya yaholattuliya urwaa uvara nteko wo wootola maloko. Yoopuwelaka uttuli, anuunu Janice aneera: “Yehova haakhula ulompa waka, masi kahi nimananna caawehereraaka. Uhovira ukati mwinci wiira kicuwelele mananna cikaakhunlyaawe. Uyo hokivaha iparakha yuulupale ni mi kinansukhuru nlattu wookifenta ni ukiwacera.”
Moonaka wiira Yehova khanaakhula ulompa winyu, nnoonela cani unlepela citthu cikiina (Nwehe iparaagarafu 15)j
15. Kontha isiyani ukati nkiina khaninlamuliya utepa uhimyeeha itthu impheeleehu nalompaka? (Nwehe ciicammo ilatarato.)
15 Itthu yoneeraru inlamuliyeehu wiikoha phi ila: ‘Kiireke wiira kihaana kirukunusaka ulompa waka ni ulepela itthu ikiina?’ Khweeli, ukati woolompa unaareera uhimyeeha itthu impheeleehu. Masi wiira nicuwele itthu Yehova innipheelelaawe, atthunaka khaninlamuliya utepa uhimyeeha ile impheeleehu. Moone itthu yaawiirannyenle arokorihu yaapheela urwaa usoma Icikola Yaanamalalyeera Umwene. Ayo yaapheela urwaa usoma iyo icikoleeyo wiira yakavihere nipuro nahaarivo anamalyeera enci. Masi ukati waawehereraaya ulattuliya wiira arwee yasome iyo icikoleeyo, ayo yaalamuliya unlompa Yehova wiira aakavihere woonelela mananna makhwaawe oovara cinene miteko cawe. (Mite. 16:9, 10) Vano, ayo yanhala upanka mphanttyaaya yarwaaka umuulumana mootoli osirikwiitu ni unkoha wakhala wiira nihaavo nloko nihirina mapiyoneeru enci. Awula ayo yanhala waaveleelihera iwarakha mayamunna o Peteli yaakohaka wakhala wiira khanivo nipuro nimpheeliya anamalyeera.i
16. Isiyani ninlamuliyeehu ukhuluvela?
16 Khampa ciitthucileehu nhina ula mwahoola, pooti wankupaliihu wiira Yehova naahala waakhula ulompa wihu, ooniheraka unifenta ni isariya. (Isaa. 4:3; Isai. 30:18) Ukati nkiina, atthunaka khanhala unaakhula khampa caapheeleehu, masi naahala unaakhula. Uyo naanifenta cinene ni khanhala unihiya veekha. (Isaa. 9:10) Phimaana, nhihiye ‘unkhuluvela’ munlompaka ninrimeenyu wotheene.—Isaa. 62:8.
NCIPO 43 Nivekelo Noomuxukhurela Muluku
a Ula mwahoola unaahala woonihera nlattuni ninlamuliyeehu ukhuluvela wiira Yehova naahala waakhula ulompa wihu, ooniheraka unifenta ni isariya.
b Macina makhwaawe ahaakakhanihiya.
c Jeremiya 29:12 Nyu nnaahala ukiihana mwalompaka ni mi kinaahala wuuviriyanani.
d Nwehe mwaha uneera “Nkhuluvele mananna Yehova nopankaawe citthu cawe” nhina irevista Ukhalenla yo Fevereiro yo 2022, iparaag. 3-6.
e Isaiya 43:2 Ukati weeva unhalaa ulapuwa maaci, mi kinhala unkhala niweeva; ni ukati woolapuwa myooloko, weeva khunhala uttittha. Weeva weettaka wamooroni, khunhala uvya ni mooro khunhala wuupaha.
f Wiira moone mananna Yehova cinnikaviheraawe uvilela masakha, moone ividiyu Ulompa unaanikavihera waanana masakha nsayitini jw.org.
g Tiyaku 1:6 Masi, hihiyerere ulepela athoonyeraka waamini, woohaakanyacaka, kontha ule naakanyaca nolikanaca ni niwimpi nompahari, nincisiya niiphyoo nirwaaniyaka uno nuuno. 7 Uyo ntthuuyo khanlamuliya uweherera uvahiya itthu ni Yehova.
h Maberewu 4:16 Phimaana, hi ninaakhitiri umwaattamela Nluku nihoovakeetthu, wiira anoonihere uthunku ni maana oonironya wiira anikavihere ukati nimpheeleehu ukaviheriya.
i Mwapheela ucuwela isiyani inlamuliyeenyu upanka wiira nkavihere ulalyeera ncoko unhooleliya niipeteeli ikiina, nwehe ilivuru Organizados Para Fazer a Vontade de Jeová, ikapiitulu 10, iparaag. 6-9.
j ILATARATO: Mayanuunu eeli anaalompa ahinaaya wantikhaca ipetição wiira arwee usoma Icikola Yaanamalalyeera Umwene. Wahoolo, anuunu amocaayo anaalattuliya, masi akiinaayo khanaakuva ulattuliya. Anuunu ahilattuliyaayo khankhala oonyoonyiya. Ayo ananlepela Yehova wiira aakavihere woona mananna makiina onvarela nteko cinene. Ayo anaaveleeliha iwarakha Upeteli yiivahereraka ukavihera nipuro nihirivo anamalalyeera enci.