Nheetthenkaca wiira mwakhitiri uvilela ukati wo masakha moolupale?

1. Kontha isiyani ikhanlyaaya itthu yofayita wiitthenkaca ihinakhumelela ihasara?

WIITTHENKACA unawoopola ukumi. Yakhumelelaka ihasara, atthu ankhala owiitthenkaceene anawoopwa ni anawaakavihera akhwaaya. Mphwinko mmoca unaakavihera atthu cinaakhumelela ihasara u Europa uheera co: “Wiitthenkaca ikhanle itthu yomaana ni unaakavihera.”

2. Kontha isiyani ninlamuliyeehu wiitthenkaca uhinaphiya ukati wo masakha moolupale? (Nwehe Matewus 24:44.)

² Ukati wo “masakha moolupale” uhanle vakaani upacera. (Mat. 24:21) Masi woovirikana nimasakha makhwaawe, hiiva ninaaweherera uwa uyo ukatyuuyo. Wookhalaka myaakha 2.000 uttuli, Yesu ahowiirela attharyaawe wiira yahaana yakhalaka owiitthenkaceene uhinaphiya uyo ukatyuuyo. (Nsome Matewus 24:44.b) Nakhalaka owiitthenkaceene, khunhala unirikela uvira uyo ukati woorikooyo ni waakavihera atthu akiina upanka iyo itthwiiyo.—Luka 21:36.

3. Manannani uvilela, uthunku ni nifento cinhalaaya unikavihera wiitthenkaca uhinaphiya ukati wo masakha moolupale?

³ Nttwee noone makhalelo mararu anhala unikavihera wiitthenkaca uhinaphiya ukati wo masakha moolupale. Ninhala upankani wakhalaka wiira nihaana nilalyeeraka moolumo ohukhumu ni nalupatthiyaka? (Apoka. 16:21) Nihaana nikhalaka oovilela wiira nimwiiwelele Yehova, nikhuluvelaka wiira uyo naahala unikhikicera. Ninhala upankani wakhalaka wiira mayamunneehu ihaakhumelela ihasara ni cihaarihya mihakhu caya? (Habak. 3:17, 18) Nihaana nithoonyeraka uthunku wiira naakavihere. Ninhala upankani wakhalaka wiira nlattu wootupheliya niikhurupu yaatthu olapo cotheene co ntuninyani, nihaana nikhalaka nipuro nimoca nankaani nimayamunneehu? (Ezek. 38:10-12) Nihaana nikhalanaka nifento noolipa ni mayamunneehu wiira nakhitiri uvilela uyo ukati woorikooyo.

4. Manannani Ibiiblya cinnikurumicaaya woonihera uvilela, uthunku ni nifento?

⁴ Nuulumo na Nluku ninaanikurumica wiira nihihiye woonihera uvilela, uthunku ni nifento. Luka 21:19 ineera: “Nlattu woovilela winyu nnaahala woopola ukumiinyu.” Akolosu 3:12 ineera: “Nthoonyere . . . uthunku.” Ni 1 Atesalonika 4:9, 10 ineera: “Nyuuva nneera mwaafentaka mayamunneenyu otheene. . . . Masi, nimpheela wuukurumicani mayamunna wiira nhihiye uvira ntepaka upanka iyo.” Ala moolumwaala yantikheliye atthari yoonihera uvilela, uthunku ni nifento. Waanookhalaru commo, ayo yahaana yahihiyereraka woonihera ayo makhalelwaayo. Hi nihaana naatakihaka. Wiira anikavihere, ninaahala woona mananna makristau oopacera yoonihenryaaya ayo makhalelwaayo. Ni ciicammo, ninaahala woona manannani ninlamuliyeehu waatakiha ayo attharyaayo ni naayo manannaayo woonihera wiira niheetthenkaca wiira navilele masakha moolupale.

NLIPIHACE UVILELA WINYU

5. Manannani makristau oopacera yaakhitinryaaya uvilela?

⁵ Makristau oopacera yahaana yavilelaka. (Mabere. 10:36) Ayo yahaana marikariko mamocaaru yaarinaaya atthu akiina yahaari makristau. Masi ayo yahaana marikariko ootepa nlattu wookhala makristau. Ayo yaholupatthiya kahi paahi naahooleli ottiini ayuuta ni naahooleli oorooma, masi ciicammo naamucyaaya. (Mat. 10:21) Ni wanlokoni, yahaana yawaananaka atthu yaahiile weettela ikhweeli ni yeetthuciha citthu cowoothiya caahala ukawaniha nloko. (Mite. 20:29, 30) Waahookhalaru commo, ale makristawaale yahovilela. (Apoka. 2:3) Manannani? Ayo yaaneemela ni wuupuwela matakihero aatthu yaavilenle yaaphwanyaaya nhina Cowantikhiya Cowaarya, toko Jó. (Tiya. 5:10, 11) Ni ayo yanlompa yalepelaka ikuru. (Mite. 4:29-31) Ni yaaweheeha paahi ifayitaaya uhihiya uvilela.—Mite. 5:41.

6. Itthu yaapankilyaaya anuunwiihu Merita wiira avilele, iwiitthucihileni isiyani?

⁶ Hiiva ciicammo pooti ukhitiri uvilela, nasomaka ni noopuwelaka matakihero aatthu yaavilenle anhimiya mbiiblyani ni mmalivuruni cihu. Iyo phi itthu yaapankilyaaya arokorihu amoca ankhala u Albânia aneehaniya Merita. Ni yahokhitiri uvilela venci ulupatthiya naamucyaaya. Ayo aheera: “Ihantisi ya Jó ihokivara nrima. Jó ahohuva cinene ni khaacuwela ayo mahuvihwaayo yaakhuma nipuroni. Waanookhalaru commo, uyo aheera: ‘Mpaka wanhalaaka ukhwa mi akinhala uhiya unvaresesa Nluku!’ (Jó 27:5) Mi kaanoopuwela mananna masakhaaka cahaalikanacaaya nimasakha yamphwanyale Jó. Ni uvirikana ni Jó, mi kaanaacuwela nlattuni waahuvaaka.”

7. Wakhalaka wiira khanrina masakha moolupale nna co, isiyani nnolamuliyeenyu wiitthuca upanka?

⁷ Ciicammo, hiiva ninhala ulipihaca uvilela wihu naahihiyeke unlompa Yehova ni unhimerya citthu cotheene cinnihela isukhuli. (Afili. 4:6; 1 Atesal. 5:17) Pooti ukhalaka wiira nyuuva khanookhumelelani masakha moolupale nna co. Masi niireke wiira munnonlompa Yehova khula ikwaha munkhaleenyu oorusiya awula oonyoonyiya nhicuwelaka itthu yoohala uvara? Mweelamalelihaka unlepela Yehova wiira ookavihereni uvilela masakha mankaani anookhumelelani khula nihuku, nyuuva khweeliini nnaahala ukhitiri upanka iyo itthwiiyo yookhumelelakani masakha moolupale wahoolo. Nyuuva nnaahala ukhuluvela wiira Yehova naacuwela manannani ni ukatini wowuukaviherani.—Isaa. 27:1, 3.

8. Itthu yaawiirannyenle arokorihu Mira, inoonihera cani wiira uvilela ilelo pooti unikavihera uvilela marikariko oohoolo? (Nwehe Tiyaku 1:2-4.) (Nwehe ciicammo ilatarato.)

⁸ Navilelaka masakha annikhumelela nna co, khunhala utepa unirika uvilela marikariko anhala uniphwanya ukati wo masakha moolupale. (Aroo. 5:3) Nincuwela cani iyo itthwiiyo? Mayamunneehu enci ahoonenela wiira khula ikwaha marikariko anttehaaya waamini waya, ayo anaatepa wiicoona ulipa yaakhumelelaka marikariko makhwaawe. Ayo mayamunnaayo yaakhumelelaka masakha ni yavilelaka, waamini waya wiira Yehova naahala waakavihera unaatepa ulipa. Nwo waamininwo unawaakavihera utepa ulipa wiira avilele marikariko anaakhumelela wahoolo. (Nsome Tiyaku 1:2-4.c) Iyo phi itthu yaawiirannyenle anuunwiihu anvara nteko weepiyonero ankhala u Albânia aneehaniya Mira. Nlattu wo marikariko yaakhumelenle khalayi, ayo anaatepa wiicoona ulipa wiira avilele masakha anaakhumelela ilelo. Aheera wiira uhaavo ukati woopuwelaaya wiira masakha yaarinaaya, yaakhumelela ayova veekha. Masi vano ayo yahoopuwela citthu cotheene Yehova caapankenlyaawe myaakha 20 yaavirihilyaaya yanswalelaka ni yaheeciirela co: ‘Uhihiye unswalela Yehova nna va, civinryaaya myaakha cinci ookaviheraka uvilela marikariko moolupale.’ Nyuuva ciicammo pooti wuupuwela mananna Yehova cuukavihenryaaweni uvilela. Nkhuluvele wiira Yehova naawoonani ikwaha cotheene cinvileleenyu ni uyo naahala wuutthuvelani. (Mat. 5:10-12) Ni waphiyaka ukati wo masakha moolupale, nyuuva nnaahala ukhitiri uvilela ni nnaahala ulakela uhihiya upanka iyo itthwiiyo.

MOONIHERE UTHUNKU

9. Manannani mayamunna o Antiyokiya coonihenryaaya uthunku?

⁹ Moone itthu yeerannyeele ukati makristau o Judeia waaphwanyilyaaya itala. Nloko no Antiyokiya u Síria waacuwenlyaaya iyo itthwiiyo, mayamunna o nno nlokonno khweeliini yahowoonela uthunku. Masi ayo khayaawonenle uthunku paahi, ayo yahopanka itthu. Ayo yaholakela khula ntthu “yaalakelaawe wanrimani waavelelihera itthu mayamunna yaakhala u Judeia.” (Mite. 11:27-30) Unookhalaru wiira mayamunna yaaphwanyile itala yaakhala uttayi cinene, makristau o Antiyokiya yaholakela waakavihera.—1 Jo. 3:17, 18.

10. Manannani ninhaleehu uwoonihera uthunku mayamunneehu cinaakhumelela ihasara?

¹⁰ Mahukwaala, hiiva ciicammo pooti woonihera uthunku nacuwelaka wiira mayamunneehu ihaakhumelela ihasara. Hi khaninpica upanka itthu. Hi pooti uwuulumana mahumu wiira naakavihera ale yaakhumelenle ihasara, pooti wanvaheehu micanko ni waalompela mayamunna yaakhumelenle ihasara.d (Miru. 17:17) Wootakihera, mwaakha wo 2020 cahotthenkaciya ikhurupu co mayamunna ookavihera cakhumelelaka ihasara coopwaha 950 wiira yaakavihere ale yaaphwanyile iretta yo koronaviiru. Hi ninawaasukhuru mayamunna ni mayanuunu avanre uyo ntekooyo. Uthunku hinaakurumica ayo mayamunna ni mayanuunwaayo. Phimaana, ayo ahaakawela mayamunna citthu cahaarinaaya toko icoolya ahaakavihera nhina mminepani ni ikwaha cikhwaawe aholokihaca inupa caya ni mapuro ooswali.—Nwehe ciicammo 2 Akorintu 8:1-4.

11. Manannani cinaattitthimiheehu Apaapeehu Yehova nawooniheraka akhwiihu uthunku?

¹¹ Yakhumelelaka ihasara ni hiiva nooniheraka uthunku, atthu akhwaawe anawoona wiikurumica wihu. Wootakihera. Mwaakha wo 2019, sikolooni muulupale eehaniye Dorian ahokhanyulaca Isalau yo Umwene u Bahamas. Ukati walokihaciyaaya iyo Isalawiiyo, mayamunna yahomuulumana mwaneene imperesa yootekateka ahaari Saahiti a Yehova. Ayo yahonlepela wiira alanle nsurukhu waapheelaawe uliviya. Uyo ahowiirela mayamunna co: “Pooti uhikiliveetthu . . . mi kinawuuvahani ikaruma cotheene cimpheeleenyu ni hataa ciicammo ananteko. Mi kimpheela ukavihera mphwinkweenyu mwaatthiva, kontha kinaakhala ootikhinihiya kawoonakani mananna anaawacereenyu asipatthaniinyu.” Atthu enci ntuninyani khanoncuwela Yehova, masi anawoona Masaahiti a Yehova. Hi ninaakhala ootteeliya venci ucuwela wiira wooniherana wihu uthunku unaawiiriha atthu enci upheela uncuwela Yehova, Nluku “oomwinciva uthunku!”.—Efesu 2:4.

12. Kontha isiyani woonihera uthunku ilelo unaanitthenkaca wiira nakhitiri woonihera uthunku ukati wo masakha moolupale? (Nwehe Apokalipise 13:16, 17.)

¹² Kontha isiyani nihaana nirwaaka woonihera uthunku ukati wo masakha moolupale? Ibiiblya inawoonihera wiira ale ahineekelakeliha isiyaasa co ntuninyani anaahala waaphwanya masakha—mahukwaala ni ciicammo wahoolo, waphiyaka ukati wo masakha moolupale. (Nsome Apokalipise 13:16, 17.e) Mayamunna ni mayanuunwiihu pooti upheela ukaviheriya wiira akhitiri uphwanya citthu cooyevaca cinhalaaya, upheela toko iyoolya. Uwakati Mweneehu Yesu unhalaawe uwa wiira aahukhumu atthu, hiiva nimpheela wiira anoone wiira naatthu ninoonihera uthunku ni anilattule wiira nikele ‘muumweneni wawe.’—Mat. 25:34-40.

NLIPIHACE UFENTANA WINYU

13. Toko cinhimyaaya Arooma 15:7, manannani makristau caalipihacilyaaya ufentana waya?

¹³ Nifento ikhanle ikhalelo yuulupale yaathoonya makristau oopacera. Masi niireke wiira ayo khawaarika ufentana? Moone mananna mayamunna o nloko no Roma caavirikanaaya. Nwo, yahaavo yeetthucihiye nlamulo na Moceesi ikhumelo inamwannyaaya, masi ciicammo yahaavo amalaponi yoonuwihiye nimananna makiina. Makristau akhwaawe yaari ipottha, akiina mena. Ni pooti ukhalaka wiira yahaavo makristau yaarina ipottha mmawannyaya. Manannani makristau cahaahiyalyaaya ufentana hataa yavirikanaka ayo manannaayo? Apostolu Paulu ahaakurumica mayamunna awiirelaka co: “Mwaakhelelane” (Nsome Arooma 15:7.f) Isiyani yaapheelaawe uhimya wiira wawe commo? Nuulumo noluuka ikereeku nitaphuleliye “mwaakhelelane” maanaaya wiira umwaakhelela ntthu sana-saana, awula khampa cinaakheliyaawe nletto, ni untthuna uyo ntthuuyo khampa apatthani oofentana cintthunanaaya. Wootakihera, Paulu ahomwiirela Filemoni wiira ahaana amwaakhelelaka sana-saana nantenkwaawe aatthawile eehaniya Onésimo. (File. 17) Ni Akila ni Pirisila ciicammo yahomwaakhelela sana-saana. Ayo yahomwiihana ni yahonkavihera ucuweleeha myaha ceekristau. (Mite. 18:26) Uhiya ukhala yahiiwananaka nlattu woovirikana, ayo makristawaayo yahohiya uvirikana waya mphanttyaayaru ni yahaakhelelana.

14. Manannani anuunu Ana ni awannyaya yoonihenryaaya ufenta?

¹⁴ Hiiva ciicammo pooti waafenta mayamunneehu ni mayanuunwiihu neekurumicaka waapatthanana ni uviriha ukati nkhayi naayo. Napankaka commo, ayo ciicammo anaahala wiikurumica unifenta hiiva. (2 Akor. 6:11-13) Moone itthu yaakhumelenle anuunwiihu Ana ni awannyaya. Ukati waalattuliyaaya wiira yancere uvara nteko weemisiyonaariyu ni waathamenlyaaya u África Ocidental, yahopacera iretta yo koronaviiru. Ayo yaathamenle naanaano uyo ncokooyo ni khayaalamuliya uwoonanana mayamunna co ni co. Isiyani yaapankilyaaya wiira yoonihere nifento? Ayo yanaawaalikarela mayamunna niividiyu ni yaanaawoonihera wiira yaanaapheela waacuwela. Mayamunna yahokhala oosukhurweela cinene nlattu wowoona mananna caafentiyaaya. Phimaana, naayo yahopacera waalikarela ni waaveleelihera imensagem. Nlattuni ayo mamisiyonaariywaayo weekurumicilyaaya waacuwela saana mayamunna? Anuunwiihu Ana aheera: “Mi akinhala uliyala itthu mayamunna ni mayanuunu yaapankilyaaya wiira yoonihere ukifenta miiva ni waafenta amucyaaka ukati womarikariko ni ukati waakhaleehu saana. Ntakihero naya ninaakikurumica woonihera nifento.”

15. Ntakihero naanuunu Vanessa niwiitthucihileni isiyani nhina waafenta mayamunna ni mayanuunu otheene? (Nwehe ciicammo ilatarato.)

¹⁵ Mmalokoni, ikwaha cinci hi ninkhala nimayamunna ni mayanuunu oovirikana nhina mananna cuunuwihiyaaya, mapuro yuunuwenlyaaya ni makhalelwaaya. Ninhala ulipihaca ufentana wihu neekurumicaka uweheeha makhalelo omaana akhwiihu. Anuunwiihu amoca ankhala u Nova Zelândia aneehaniya Vanessa, waanawaarika waatanaca nimayamunna o wanlokoni naya. Masi uhiya waanyema ayo mayamunnaayo yaholakela uviriha ukati nkhayi naayo. Nlattu woopanka commo, ayo yaheetthuca wiira Yehova nawaafenta ayo mayamunnaayo. Anuunwiihu Vanessa aheera: “Ukhuma ukati awannyaka ukhanlyaaya mootoli osirikwiitu, hi nahancera uviriha ukati mwinci ninari nkhayi nimayamunna ni nimayanuunu oovirikana. Nna co, khunkirikela waatanaca naayo ni unaakicivela uvirikana waya. Khweeliini, Yehova unancivela uwoona atthu oovirikana, kontha atthu naawaanaawe mumphwinkoni wawe akhanle oovirikana.” Neetthucaka waawehera akhunanihu khampa Yehova cinaaweheraawe, ninawoonihera wiira ninawaafenta.—2 Akor. 8:24.

16. Kontha isiyani inhalaaya ukhala itthu yofayita uthoonyihera nifento ukati wo masakha moolupale? (Nwehe ciicammo ilatarato.)

¹⁶ Ufentana unaahala unikavihera venci cinene waphiyaka ukati wo masakha moolupale. Muupuwele ila itthwiila: wanceraka ukati wo masakha moolupale, Yehova nohala unikhikicera cani? Moone mananna Yehova caawacenryaawe apoovwaawe ukati waatupheliyaaya naababilonia, uyo enre co: “Apoovwaaka nrwee nkele mmakwaartu winyu ni ntthukace mikhorannyo, mwiipithe mpaka wanhalaaya uvira mikhitto.” (Isai. 26:20) Pooti ukhalaka wiira iyo itthwiiyo inaaca ukati wo masakha moolupale. “Ikwaartu” ciromoliye atthunaka anaaciya maloko eekristau. Ukati wo masakha moolupale hi ninhala ukhikiceriya ni Yehova wakhalaka wiira niri nkhayi ni mayamunneehu. Phimaana nihaana niikurumicaka nenna co kahi paahi waavilela mayamunneehu ni mayanuunwiihu, masi ciicammo waafenta. Pooti ukhalaka wiira ninhala woopwa napankaka iyo itthwiiyo!

MWIITTHENKACE NENNA CO

17. Neetthenkacaka nenna co isiyani inhaleehu ukhitiri upanka ukati wo masakha moolupale?

¹⁷ “Nihuku nuulupale na Yehova” unhala ukhala ukati wowaarikela atthu otheene. (Sof. 1:14, 15) Ni apoovu a Yehova ciicammo anaahala uhuva. Masi neetthenkacaka nenna co khaninhala utepa usanka ni ninaahala waakavihera akhwiihu. Hi ninaahala ukhitiri uvilela khula nrikariko ninhala unikhumelela. Mayamunneehu yaaphwanyaka masakha ninaahala wiikurumica waakavihera ni waavaha yotheene inhalaaya upheela, nooniheraka uthunku. Ciicammo, khaninhala uhiya ukhala wamoca nimayamunneehu ni mayanuunwiihu nawooniheraka nifento. Yehova naahala unicaaliha nuukumi woohimala upeephoni unhalaaya uhikhumelela-tho ihasara ni masakha.—Isai. 65:17.