Ireferensia co Mwaalivuru o Mikutthaano makhalelo ni Miteko ceekristau — IBIBLIYOTEKA YO MWINTERNETINI yo Watchtower

Ireferensia co Mwaalivuru o Mikutthaano makhalelo ni Miteko ceekristau

1-7 YO SETEMBRO

MIHAKHU CO NNUULUMONI NA NLUKU MIRUKU 29

Nnyeme ikettelo ni ileema cihinvaranaca niitthu inhimyaaya Ibiibiliya

Sentinela 06/2016 ipaag. 6 Ikwaaturu

Ukhitiri woona ituninya yo mminepani

Atthu imiliyau cene ari khampa ipottha o moopuwelelo owiira citthu cikhwaawe cinaamphwanyiha ntthu isoorti ni cikhwaawe mena ni akiina anawoova minepa cootakhala. Vano, wiira yiikhikicere anaawara ihirisi ni uwurya mirette. Masi nyuuva khamunlamuliya uwehaweha nnyo citthunnyo. Nluku ikhweeli, Yehova, haana ikuru unvikana Sotwani. Mwankhuluvelaka, naahala wuukhikicerani. Ibiibiliya inaanikhuluveliha co: “Meetho a Yehova anawoona watuninyani wotheene, wiira oonihere ikuru cawe ukati unaakaviheraawe ale anonswalela” (2 Ikoronika 16:9).

Wiira Yehova ookhikicereni, nhaana wiitthuca itthu inoncivela ni weettela muukumini winyu. Wootakihera, ukati wo maapostolu, makristau o isittatti yo Efesu yahotakaniha ilivuru caya co macattuka cotheene ni yahopaha. (Miteko 19:19, 20) Inanna imocaaru, wiira nikhikiceriye ni Nluku, nihaana uriha khula itthu irineehu invaranaca ni macattuka. Iyo inaahela nhina ihirisi ni ilivuru co macattuka.

Ukhalenla 04/2019 ipaag. 17 iparaag. 13

Mwaakihere ikhweeli nhina ukhwa

¹³ Wakhalaka wiira nnawaanyihacera ileemeeyo inancivela Yehova awula mena, munlompe munlepelaka ucuwelaca. (Nsome Tiyaku 1:5.) Vano ntotha-tothe mmalivuruni wihu nhina uyo mwahooyo. Wakhitiryaaka nwoopane mwaha mahumu. Ayo khanhala wuuhimeryani itthu yoohala upanka, masi anaahala uwuupuserani ikano cofayita mbiibiliyani. Mwapankaka commo nnaahala wiitthuca mananna oolakela utthara itthu yomaana yooreera utthara woohiireliya nintthu.—Mabere. 5:14.

Sentinela 11/2018 ipaag. 11 iparaag. 12

“Akinhala uhiyerera weetta munttalani waa”

¹² Ileema coohinamaana. Pooti ukhalaka wiira mmuciinyu, ntthu nonvaraneenyu nteko awula ntthu nonsomaneenyu naamananiha wuukupalihani wiira mpankele mphantte ifesta cihinoncivela Nluku. Isiyani inhala unikavihera wiira nihipanke itthu yoohinamaana nlattu wookhanyererihiya? Ninlamuliya wuupuwela kontha isiyani Yehova cihinoncivelaaya nnyo ifestannyo. Pooti unwehaweheehu mmalivuruni wihu mananna nnyo ifestannyo cikhumakhumilyaaya. Nuupuwelaka ikano co mbiibiliyani cinniiriha uhipankela mphantte nnyo ifestannyo, ninaakhala oolipa wiira khweeliini nineettela iphiro inaatteeliha nrima apwiiyeehu. (Efesu 5:10) Nankhuluvelaka Yehova ni nuulumo nawe, “khaninhala umoova Pinaatamu.”—Miru. 29:25.

Ikano cowiipithya co mbiibiliyani

Sentinela 10/2017 ipaag. 9 iparaag. 11

Moonihere nifento neekhweeli

Nttottopele ninrimeenyu wotheene. Nihaana uwehaweha ukati wowaattottopela akhunanihu. Naattottopelaka mayamunneehu ninaawiiriha utepa upanka citthu comaana. (Miru. 29:5) Masi uttottopela wihu uhaana ukhalaka ninrima wotheene. Masi nuulumaka woohikhala ninrimeehu wotheene, iyo pooti umwiiriha munnooyo ukhala owiicoona ukhalana ifayita waavikana akhunanawe. (Miru. 29: 5) Ciicammo, khunreera unttottopela ntthuuyo hataa noonaka wiira nihaavo nipuro ninvonyaawe. Khinakhala itthu yomaana unttottopela ntthu, masi, aahikhaleke, umuuluma pusya. Apostolu Paulu anaattottopela akhunanawe ninrimaawe wotheene. Uyo ahaattottopela mayamunnaawe o nloko no Korintu nlattu wo citthu comaana caapankaaya. (1 Akor 11:2) Masi, citthu cikhwaawe capankaaya, canoonihera wiira khuwaapwanela uttottopeliya. Phimaana, nimananna omaana, Paulu ahoonihera wiira yaalamuliya urukunusa makhalelwaaya.— 1 Akor. 11:20-22.

8-14 YO SETEMBRO

MIHAKHU CO NNUULUMONINA NLUKU MIRUKU 30

“Nhikivahe uhuva hataa upuha”

Sentinela 01/2018 ipaag. 24-25 iparaag. 10-12

Nifento nihimphwanyiha utteeliya weekhweeli

¹⁰ Hiiva otheene wihu ninaapheela nsurukhu. (Ekles. 7:12) Masi nsurukhweene kavi? Niireke wiira ntthu pooti unkhalanaawe utteeliya weekhweeli, hataa akhalanaka nsurukhu vakaani? Woohitikhinaca, iyee! (Nsome Eklesyaste 5:12.) Akur, nswali a Yehova okhalayi, aholompa, eeraka: “Nhikivahe uhuva hataa upuha. Nkivahe iyoolya paahi.” Khunrika woona kontha isiyani Akur ahaaphenlyaawe uhuva. Khampa ciirilyaawe, khaapheela ukhalana nrima woopheela winnya. Ni Yehova unrusa winnya. Vano kontha isiyani weenryaawe khampheela upuha? Uyo heera: “Wiira kihincivane citthu mpaka wuunyanyala ni wiira: ‘Yehova tipani?’” (Miru. 30:8, 9) Wooriipiha nrima, atthu akhwaawe anaakhuluvela mihakhu cinene ni anaanliyala Yehova.

¹¹ Ntthu nofenta nsurukhu khankhitiri upanka ile inoncivela Yehova. Yesu eenre: “Khaavo nolamuliya waavarela nteko atthu eeli; kontha nohala unfenta mmoca, masi nkinooyo naahala unrusa, awula, nohala unvaresesa mmoca, masi nkinooyo unthanya. Nyuuva khannolamuliya unvarela nteko Nluku ni ciicammo Mihakhu.” Hinaaya wooluma commo, Yesu ahovaha ikano, eeraka coo: “Nhiye wiicaavyera mihakhu cinci va watuninyani vaa, kontha asinttunttu ni nrenci, pooti uhononaca, ni ukhala wiira nno nipuro malatarawu ninhalaaya waaka ni winnya. Uhiya commo, mwiicaavyere mihakhu cinci wiirimu, ukhala wiira nwo uweese ni nrenci khacinhala uhonona, ni ukhala wiira malatarawu khanhala waaka ni winnya.”—Mat. 6:19, 20, 24.

¹² Atthu akhwaawe ahoonenela wiira ankhala otteeliya kontha khanwehaweha citthu cinci. Uhiya commo, uhiwehaweha ukhalana citthu cinci unaanikavihera unswalela Yehova, kontha ninaakhalana ukati mwinci wiira niwacerace citthu co mminepani. Moone ntakihero na Jack, nokhala u Estados Unidos. Uyo hotumiha inupaawe, kontha apheela ukavihera khampa piyoneeru owiicaaverya nkhayi naamwaarawe. Uyo neera: “Hi naakhala inupa yooreera ni itereenu yuulupale. Wahonirikela ulakela utumiha. Mi kahoviriha myaakha cinci kihokolyaaka untekoni kinaryeene oorusiya nlattu wo nteko. Masi amwaaraka, yaari Piyoneera, yaakhala otteeliya. Ayo yeeraka: ‘Mi kihaana patarawaaka omaana hinlikananiya!’ Vano, nna va mi ciicammo ki Piyoneeru. Ni ooyeeli wihu nihaana iparakha yonvarela nteko Yehova.”

Sentinela 5/2017 ipaag. 26 iparaag. 15-17

Weeva unaakifenta upwaha nnya?

◆ 30:15, 16—What is the point of these examples?

Mahukwaala, atthu enci anoopuwela paahi ukhalana citthu co nsurukhu mwinci khampa ikuwo, telefooni, tablet ni citthu cikhwaawe. Ayo anoopuwela wiira ukhalana citthu cinci awula nsurukhu mwinci ikhanlee itthu yofayita muukumini waya. Masi Yesu enre wiira ninlamuliya wiikhikicera nhina citthu cotheene cinwaana ikhwilu. (Luka 12:15) Kontha isiyani Yesu wenryaawe commo? Kontha khaavo nolamuliya waavarela nteko atthu eeli. Yesu hohimya coo: “Nyuuva khannolamuliya unvarela nteko Nluku ni mihakhu.” (Mat. 6:24) Phimaana, nihaana uhihiyerera waanana upheela ukhalana mihakhu. Atthu anoopuwela paahi ukhalana mihakhu, khankhitiri uvirikaniha itthu yomaana ni yoohinamaana. Phimaana, wiira iyo itthwiiyo ihiniirannyeele, ninlamuliya uhihiyerera usoma Ibiibiliya mahuku otheene. Napankaka commo, ninaahala woonihera wiira ninanfenta Yesu, uhiya mihakhu.

Sentinela 1/06/2011 ipaag. 10 iparaag. 4

Ukhala niile inkhitiriihu uphwanya—Unkhitirya cani?

Muupuwelace toko nhinaaya uthuma itthu. Hataa ukhalaka wiira citthunnyo cinwa phiyaaru, wuupuwelaca nhinaaya uthuma itthu, ikhanlee inanna imoca yomaana yoonyema ukhalana itafaawuti nlattu woothwennya nsurukhu. Nlattu woopanka commo, atthu enci anaanyema ukopa-kopa ni ulokihiya cinene waahala waawiihera masakha . Ibiibiliya inawuuluma inenele wiira ihaana ucuwelaca, kontha inaasunka icoolya cinci cinhala uphiya uhoolo.—Miru. 6:6-8; 30:24, 25.

Ukhalenla 06/2024 ipaag. 13 iparaag. 18

Nkhale aletto a Yehova mpaka!

¹⁸ Otheene cihu wanreera wuupuwela mananna ninwehereehu nsurukhu. Mwiikohe co: ‘Kiireke miiva kinaakhala kuupuwelaka nsurukhu ni citthu caahalaaka uthuma kinarina nsurukhu? Kankopelaka ntthu nsurukhu, kiireke kinaapica nunliva kuupuwelaka wiira khunonthwa? Kiireke unaakirikela uvaha? Kiireke miiva kineecoona ukhala ntthu ofayita uvikana atthu akhwaawe nlattu wookhalana nsurukhu? Kiireke miiva kinawuupuwela wiira munna unciva mihakhu nlattu wookhalana nsurukhu? Kiireke asipatthannyaaka akhanle oopuha waahiya oohuva?’ Otheene cihu nihaana iparakha yuulupale yoolatthuliya wiira nikhale aletto a Yehova. Masi nihaana uhihiyerera ukhala aletto a Yehova ni unyema ufenta nsurukhu. Nanfentaka Yehova uhiya nsurukhu, Yehova khanla uninyanyala!—Nsome Maberewu 13:5.

Ikano cowiipithya co mbiibiliyani

Sentinela 15/04/2009 ipaag. 17 iparaag. 11-13

Cowumpiya cinawoonihera ucuwelaca wa Yehova

¹¹ Ipila ikhanlee mwannama mwankaani nimmwiitthucereehu citthu cofayita. (Nsome Miruku 30:26.) Ipila inkhala khampa hukula, masi iyo irina maaru macikaani ni inyaa cooyevaca. Iyo inkhala micoko co mwala. Mithwaaya ooyevaca anawaakavihera woona utthayi ni miliwi caya cowiiserya cinawaakavihera wiira ahikhuuriye niinama cikhwaawe. Ipila cumpiye wiira cikhale nkhayi ciiwananaka. Nnyo cinaakhikicerana.

¹² Isiyani ineetthucereehu ipila? Woopacera, iyo khinkhala nipuro nahaahalaaya uhirika uvariya. Iyo inaavarela nteko miithwaaya wiira imoone nwanannyaaya naryeene uttayi ni khineettakaca utthayi niwanliwini waya. Ni hiiva ciicammo ninlamuliya ukhalana miitho o mminepani owoona uttayi wiira nikhitiri woona citthu coohinamaana cinhala uhonona makhalelweehu o mminepani. Peturu aheera coo: “Nkhale oowehaweha.” (1 Pet. 5:8) Ukati waaryaawe watuninyani, Yesu kheetthaala. Phimaana, ankhitiri woona itapha ca Sotwani. (Mat. 4:1-11) Nlattu woopanka commo, haahiyera ntakihero nomaana attharyaawe.

¹³ Inanna imoca yookhala ookhikiceryaa nhina mminepani ukhanlee ukhuluvela inanna Yehova cinaakhikiceraawe apoovwaawe. Uyo nonikhikicera nasomaka nuulumo nawe ni naahiloveke woona mikutthaano. (Luka 4:4; Mabere. 10:24, 25) Uhiya commo, khampa vaavale ipila inkhalaaya nkhayi naamucyaaya, hiiva ciicammo nihaana waapatthanana mayamunneehu wiira anilipihe nhina mminepani. (Aroo. 1:12) Nakhuluvelaka inanna Yehova cinnikhikiceraawe, ninawoonihera wiira ninaakupaleela moolumo a Davidi aneera: “Yehova khanlee mwalaaka, nikhikicero naka ni moopolyaaka. Nlukwaaka khanlee mwalaaka, khanlee ntthawelo naka.”—Isaa. 18:2.

15-21 YO SETEMBRO

MIHAKHU CO NNUULUMONI NA NLUKU Miruku 31

Isiyani ineetthuceehu niikano ca nyari nthiyana oofenta?

Sentinela 1/02/ 2011 ipaag. 19 iparaag. 7-8

Mwiitthucihe makhalelo omaana asaaneenyu.

Mwaahimerye citthu cotheene nhina uruparupa. Ikhanlee itthu yofayita waahimerya citthu cinhala uwiirannyeela. (1 Akorintu 6:18; Tiyaku 1:14, 15) Khweeliini, Ibiibiliya inaahimya wiira uruparupa ikhanlee iparakha Nluku aavahilyaawe apinaatamu, kahi itapha ya Sotwani. (Miruku 5:18, 19; Ncipo na Salomau 1:2) Waahimerya paahi citthu coohinamaana cineerannyaa nhina uruparupa, pooti uwiiriha asaaneenyu wuupuwela pusya ni inanna yoovirikanaca niitthu inhimyaaya Ibiibiliya.

Mwaahimerye asaaneenyu citthu cootheene nhina uruparupa. Anuunu Nadia, ankhala u México, aneera: “Itthu yaapheelaaka wiira asaanaaka acuwele ukhanlee wiira uruparupa irii itthu yomaana ni khula ntthu naayaryaana upheela uruparupa. Iyo ikhanlee iparakha Yehova aavahilyaawe apinaatamu wiira aatteelihe nrima. Masi anlamuliya uruparupa anathelanne. Ciicammo, uruparupa pooti unitteeliha nrima awula uniriipiha nrima.”

Ajuda para a Família mwaha 4 iparaag. 11-13

Mananna omuulumana mwaninyu mwaha wo nipha

Mwancerihe wuuluma uyo mwahooyo. Nyari mmoca o Grã-Bretanha neehaniya Mark, neera: “Mwaha woowurya nipha pooti waarikarika wiiweeha asaana. Mi kahonkoha mwaamwanaka o myaakha 8 inanna cinoonelaawe uwurya nipha. Kaapheela ucuwela wakhala wiira noonela ukhala itthu yootakhala awula mena. Kaapacile unthukana kihinaaya unkoha, ni ayo manannaayo aheecoona saana wiira oolume.”

Moolumaka mwaha wo nipha ikwaha cinci, mwaamwaninyuuyo khanhala uliyala. Ukati nnomoopaneenyu khula mwaha mwaamwaninyu, muulume ifayita urinaaya uhiwurya nipha cinene awula uhipanka uruparupa woohiloka.

Nhimye ntakihero. Asaana ari khampa nsawu: ayo anawoonela citthu cootheene cinoonaaya. Ni anawaatakiha cinene miyaapaapaaya. Iyo maanaaya wiira wakhalaka wiira ukati nnonyoonyiyeenyu nnaakuvelela uwurya nipha, mwaamwaninyuuyo pooti wancera woona wiira uhapaliya unankavihera ntthu umalamaliha iwasiwaasi. Phimaana, nvahe ntakihero nomaana nhina nipha. Munlamuliya wiivaraca ukati woowurya nipha.

Despertai! 06/2017 ipaag. 9 iparaag. 5

Nwiitthucihe asaaneenyu ukhala owiiyeviha

Munsovenrihe mwaninyu ukhala namavaha. Mmoonihere mwaninyu wiira: “Uvaha unaatteeliha nrima cinene uvirikana ni uvahiya.” (Miteko 20:35) Nnaaryeene nkhayi ni uyo, nwantikhe atthu anooneenyu wiira anaapheela ukaviheriya. Atthu akhwaawe nnaacuweleenyu atthunaka anaapheela urwaa uthumeliya citthu umerkaatu, ulokiheriya itthu awula ulakiheriya nipuro nimpheelaaya uphiya. Mwapheelaka urwaa unkavihera ntthu, nrwee nkhayi nimwaamwaninyu. Mmoonihere inanna cinkhaleenyu ootteeliya nlattu wowaakavihera akhunaninyu. Mwapankaka commo, nnaahala umwiitthuciha mwaamwaninyu ukhala owiiyeviha.—Luka 6:38.

Ikano cowiipithya co mbiibiliyani

Ukhalenla 12/2023 ipaag. 21 iparaag. 12

Miyaanuunu—Nnohala woonihera cani ukhala ntthu ookhomaala?

¹² Ucuwele uwuulumana ratta akhwaa. Nkristau haana acuwelaka uwuulumana akhunanawe. Aacaka uyo mwahooyo, apostolu Tiyaku heera co: “Khula ntthu haana akhalaka owaakuva uviriyana, masi oopica wuuluma ni oopica uviruwa.” (Tiya. 1:19) Mwaaviriyanaka saana akhunaninyu, nnaahala ukhitiri woonihera wiira nnawaawacera. (1 Pet. 3:8) Moonaka wiira khankhitinri wiiweeha itthu yuulumilyaawe ntthuuyo awula mananna cineecoonaawe, mpanke makoho anrerana ni mwahooyo ni nkumihe ukati wowuupuwela nhinaaya uturuwela wuulumaca. (Miru. 15:28, niwehero.) Mwiikohe co: ‘Itthu impheelaaka wuuluma ikhanle yokhweeli ni inaahala waalipiha cani akhunanaka? Inaahala woonihera ihisima ni unamaana?’ Umananihe uwiitthucera mayanuunu anaaviriyana akhwaaya yoolumaka ni anooluma niihisima. (Nsome Miruku 31:26.) Moone mananna ayo cinoolumaaya. Ucuwela uwuulumana ratta akhwaa unaahala wuukavihera ukhalana apatthani omaana ni ukhalakhala ninnema naakhunanaa.

22-28 YO SETEMBRO

MIHAKHU CO NNUULUMONI NA NLUKU EKLESIYASTE 1-2

Nhihiye waatthenkaca atthu akhwaawe

Ukhalenla 09/2021 ipaag. 12-13 iparaag. 15-16

Mwaalemelihe mayamunna amirawo

¹⁵ Muupuwele ntakihero na apostolu Paulu ninthoonyihera cinreeraaya uwiitthuciha amirawo. Uyo ahonlattula Timotiyu wiira anveleele mapuro yaaviraawe alalyaaka moolumo a Nluku khampa misiyonaariyu. Athoonyeraka unamavaha, apostolu Paulu ahonlakihera uyo mmirawooyo mananna oolalya ni wiitthuciha saana moolumo a Nluku. (Mite. 16:1-3) Citthu Timotiyu caalakiheriyaawe ni apostolu Paulu cahonkavihera ucuwela ulalya ni wiitthuciha ratta ihapari comaana ca Nluku. (1 Akor. 4:17) Ni Timotiyu ahaalakihera akhunanawe citthu ceetthucihiyaawe ni apostolu Paulu.

¹⁶ Mayamunna owuuluvala khanoopuwela wiira yaalakiheraka amirawo citthu cincuwelaaya, anaahala uhiya ukhalana ifayita wanlokoni. Wootakihera, amunna Shigeo yahokhala myaakha cinci yaalakihaceraka mayamunna yaapaceriha upanka mphantte Ikhurupu yo Mahumu Anhoolela Ipeteli. Ayo amunnaayo yaapanka iyo itthwiiyo kontha yancuwela wiira waalakihacera amirawo wanhala ukavihera nteko wo Umwene wa Nluku urwaa uhoolo ile ilapweele. Ni nlattu amunneehu woopanka commo, wahokhitirya uphwanyiya munna oottiya nipuroni naya ukati waahiilyaaya waahoolela Mahumu Anhoolela Ipeteli. Amunna Shigeo nanlelo khanhiya waalakihacera amirawo citthu ciitthucalyaaya nhina myaakha 45 civinre yapankaka mphantte Ikhurupu yo Mahumu Anhoolela Ipeteli. Mayamunna oohoolelihera uvaha toko amunna Shigeo ankhala iparakha yuulupale iriyari wapoovu a Nluku!

Ikano cowoopithya co mbiibiliyani

Mphwanye Utteeliya Uhimmala! mwaha 37 ipontu 1

Isiyani Ibiiblya inoolumaaya nhina uvara nteko ni nsurukhu?

Nluku nopheela wiira nteko unvareehu unitteelihe nrima. Ibiiblya ineera wiira “khiivo itthu ikhwaawe yootepa unreerela pinaatamu uhikhanle . . . ulawa miteko cawe.” (Eklesyaste 2:24) Yehova naavara nteko venci. Hi nimpheela untakiha Yehova nikhalaka ananteko omaana. Napankaka iyo itthwiiyo, ninaahala untteeliha nrima uyova ni hiiva ninaahala wiicoona saana.

Uvara nteko ikhanlee itthu yofayita. Masi khaninlamuliya uhiyerera nteko ukhalaka itthu yootepa ukhalana ifayita uvikana unswalela wihu Yehova. (Joau 6:27) Yehova naakhuluveliha wiira nahooleliheraka upanka citthu cinoncivela, uyo naahala univaha citthu cimpheeleehu wiira nikhale akumi.

29 YO SETEMBRO–5 YO OUTUBRO

MIHAKHU CO NNUULUMONI NA NLUKU EKLESYASTE 3-4

Nlipihace nkhoyi wo watthokoni winyu

Ajuda para a Familia mwaha 10 iparaag. 2-8

Manannani anamathelana anlamuliyaaya unvarela nteko telefooni awula ikomputatoore?

● Anamathelana yavarelaka nteko saana ikaruma caya, khampa telefooni awula ikomputatoore, pooti ulipihaca uthelanaca waya. Wootakihera, anamathelana akhwaawe aholamalela winviyarelana imensagem khula nihuku. Naayo manannaayo, ayo anaakhitiri wuulumihana hataa akhalacaka nkhayi.

“Winviyari imensagem ni moolumo aneera ‘Kinaaciveliya’ awula ‘Kihoonukheliya’ pooti wiiriha anamathelana uhihiyerera waataana.”—Jonathan.

● Anamathelana yaahivareleke nteko saana ikaruma caya pooti ulolovihaca uthelanaca waya. Wootakihera, atthu akhwaawe, uhiya uviriha ukati yoopaka mwaha naamwaaraya awula naawannyaya, ayo anviriha ukati cinene yampotolacaka telefoone.

“Mi kinaakupali wiira kahaaviriha ukati mwinci kampotolacaka telefoone, awannyaka yanhala ukoopana mwaha ikwaha cinci.”—Julissa.

● Atthu akhwaawe, aneera wiira anaakhitiri wuulumana awannyaya awula amwaaraya yampotolacakoono telefoone awula tablet. Atthu enci anoopuwela wiira uvara citthu cinci wonkwaha mmoca unthoonyera ucuwelaca, masi upanka commo khinakhala itthu yomaana. Namasomasoma mmoca omakhalelo aatthu, neehaniya Sherry Turkle, neera wiira “wuupuwela wiira unaakhitirya uvara miteko cinci wonkwaha mmoca unkhala wiithepya.” Uyo neera wiira “namananihaka upanka citthu cinci wonkwaha mmoca, ninaatepa uhikhitiri upanka saana citthunnyo.”

“Ikhanlee itthu yomaana woopana mwaha awannyaka, masi uhikhaleke ukati unvaraaya miteko cikhwaawe. Ukati unwuulumanaka yampotolacaka telefoone, unkhala khampa ankirela phataari kikhale veekhaka kampotolacaka telefoonyaaka.”—Sarah.

Itthu ineetthuceehu: Mananna oovarela nteko ikaruma cihu, khampa telefooni awula ikomputatoore, pooti ulipihaca awula uhononaca uthelanaca winyu.

Ukhalenla 05/2023 ipaag. 24 iparaag. 12-14

Ntetherye “mooro wa Yehova”

¹² Manannani anamathelana anhalaaya untakiha Akila ni Pirisila? Muupuwele miteko nyuuva cirineenyu. Niireke wiira nyuuva pooti wanvareenyu nnyo mitekonnyo nkhayi? Nyuuva nnaaleehana wiira ikwaha cinci nrwee wuulalyeerani nkhayi? Akila ni Pirisila ciicammo yaavara nteko nkhayi. Pooti ukhalaka wiira nyuuva khannovara nteko mmocaaru, masi niireke khawaareera ukumiha ukati wiira nvare miteko co wapuwani nkhayi, toko ukwecakweca awula ulokihaca inupeenyu? (Ekles. 4:9) Wakhala wiira nnaakaviherana uvara nnyo mitekonnyo, nyuuva naahala wiicoona ukhala nkhayi ni nnaahala ukhalana ukati wiira moope mwaha. Amunna amoca aneehaniya Robert ni amwaaraya Linda ahoviriha myaakha 50 anathelanne. Ayo aheera: “Hi khanirina ukati mwinci wiira nikhale nkhayi nithukaka, masi mi karapihaka iparatho naamwaaraka awula kathikilacaka malasi wapuwani, vano amwaaraka yawaaka ukikavihera, mi unaakitteela nrima cinene. Upanka nnyo citthunnyo nkhayi unaanikavihera uviriha ukati nkhayi ni ufentana wihu unaavira utepaka winciva.”

¹³ Masi nhiliyale itthu imoca: uviriha ukati nkhayi khunthoonyera wiira nnawiiwanana. Athiya amoca ootheliya u Brasil aheera: “Mahukwaala, cihaavo citthu cinci cinniiriha wuupuwela wiira niri nkhayi nlattu wo wonkomaca nipuro nimoca paahi, masi khweeliini khaniri nkhayi. Mi kiheetthuca wiira ukhala nkhayi nipuro nimoca paahi khuntosa; itthu impheeliya ukhanle khula ntthu unwacera nkhunanawe, kahi ukhala nkhayi paahi.” Moone itthu munna Bruno ni amwaarawe Tays ampankaaya wiira awacerane. Uyo heera: “Nakhalanaka ukati wiira nikhale nkhayi, hi ninawaahiya waapotolaca atelefooniihu wiira nilawe ukati ninviriheehu nkhayi.”

¹⁴ Masi wakhalaka wiira nyuuva khunoocivelani uviriha ukati nkhayi? Atthunaka nyuuva ni amwaarinyu cinoocivelani citthu coovirikana awula khannopica uvirusana mwakhalaka nkhayi. Vano, isiyani nnolamuliyeenyu upanka? Muupuwele-tho ntakihero no mooro. Mooro khumpharela venci urwaa-nuurwa, uhaana utetheriya ikhuni cooyevaca vakaani-vakaani, vano phimpharelaaya venci. Nttharaka nna ntakiheronna, kontha isiyani nyuuva nhipacereenyu ukumiha ukati vakaani paahi wiira nkhale nkhayi? Mmananihe upanka citthu nkhayi ni nnyeme citthu caahala uwiirihani unyoonyihana. (Tiya. 3:18) Mwapaceraka vakaani-vakaani, nyuuva pooti uparihela mooro wo nifento ninyu.

Ukhalenla 05/2023 ipaag. 21 iparaag. 3

Ntetherye “mooro wa Yehova”

³ Wiira uhittiphye mooro wa Yehova, anamathelana ahaana yiikurumicaka ukhalana upatthani woolipa ni Yehova. Kontha isiyani ikhanlyaaya itthu yomaana anamathelana upanka iyo? Anamathelana yavahaka ifayita upatthannyaaya ni Yehova, ayo anaweettela ikano cawe ni iyo inawaakavihera unyema ni waanana masakha yaahala uririihaca ufentana waya. (Nsome Eklesyaste 4:12.) Ntthu oolipa nhina mminepani naapanka yotheene inkhitiryaawe wiira atakihe makhalelo a Yehova, toko unamaana, uvilela ni ulevelela. (Efesu 4:32–5:1) Anamathelana yooniheranaka ayo makhalelwaayo, nifento arinaaya ninaahala winciva. Arokorihu aneehaniya Lena, avirihile myaakha 25 anatheliye, aheera: “Khunrika ufenta ni uhisimu ntthu oolipa nhina mminepani.”

Ikano cowiipithya co mbiibiliyani

Ukhalenla 12/2022 ipaag. 4 iparaag. 7

Nyuuva pooti ukhala mpaka!

Yehova ciicammo numpale wiira hiiva nipheele ukhala mpaka. Ibiibiliya ineera wiira Yehova honihela wanrima ‘upheela ukhala mpaka.’ (Ekles. 3:11) Phimaana, ninooneehu ukhwa khampa nwananiihu. (1 Akor. 15:26) Wootakihera, niireke ntthu awerennyaka cinene khiivo impankaawe-tho ni noweherera ukhwa paasi? Mena. Uyo nampheelaca meetiku wiira avonihiye iretta inonwerya. Otheene cihu ninawiikhikicera wiira nihikhwe. Ni ntthu nonfenteehu akhwaaka, hataa ukhalaka wiira ahooluvala, hi ninaakhala oocukulaca cinene. (Joau 11:32, 33) Unari wiira Yehova numpale wiira nikhale uwakati vakaani paahi, khweeliini uyo khaahala uniiriha upheela ukhala mpaka. Masi ihaavo itthu ikhwaawe innikupaliha wiira ninaahala ukhala mpaka. Nttwee noone citthu cipankalyaawe Yehova khalayi ni cimpankaawe nnaco cinthoonyera wiira uyo kharukunusale moopuwelelwaawe.

6-12 YO OUTOBRO

MIHAKHU CO NNUULUMONI NA NLUKU EKLESYASTE 5-6

Manannani ninhaleehu woonihera unhisima Nlukwiihu nkhulupale

Sentinela 15/08/2008 ipaag. 15-16 iparaag. 17-18

Munttitthimihe Yehova ni makhalelweenyu omaana

¹⁷ Nihaana woonihera makhalelo omaana venci-venci ukati unonswaleleehu Yehova. Eklesyaste 5:1 ineera: “Khula ikwaha unrwaa nipuro ninswaleliya Nluku, weette ratta.” Yehova hopaca umwiirela Moceesi ni Josuwe wiira yaalamuliya urula isantaliya caya ahinaaya unyakela nipuro nowaarya. (Nkw. 3:5; Jos. 5:15) Upanka commo waanoonihera wiira anaahisima uswali weekhweeli. Ukati wa asarayeli, anankuttho yaalamuliya uwara ikuwo nhina wiira ahikhale ciico.(Nkw. 28:42, 43) Iyo yaneeriha uhoonihera mapuro ahinooniya ukati woovara nteko wakhilompini. Atthu otheene yaapankela mphantte imuci yaanankuttho yaalamuliya ukhala owiirattela.

¹⁸ Phimaana, woonihera makhalelo omaana muuswalini unaahela nhina uttitthimiha ni ihisima. Wiira nittitthimihiye ni nihisimiye nihaana waahisima akhunanihu. Nihaana nooniheraka unamaana ninrimeehu wotheene kahi nlattu woopheela wooniya naatthu. (1 Sam. 16:7; Miru. 21:2) Nihaana woonihera nhina meettelweehu mananna ninaawehereehu akhunanihu ni mpaka nineewehereehu mwaasineeneehu. Khweeliini, nihaana nooniheraka unamaana nhina wo citthu cotheene. Mananna ninwareehu, nimpankeehu citthu cihu, nihaana woonihera wiira ninaweettela moolumo apostolu Paulu, aneera: “Hiiva khanimpanka itthu inaakakathula akhunanihu, wiira nteko unonvareleehu Nluku uhuulumiye pusya; ni inanna cotheene hiiva ninawiicoonihera ukhala aswali a Nluku.”(2 Akor. 6:3, 4) Hi ninaareeriha citthu cineetthucihaawe moopoliihu nhina wo inanna cotheene.—Titu 2:10.

Sentinela 15/11/2009 ipaag. 11 iparaag. 21

Ntepe upanka mavekelo ni ninrimeenyu wotheene nlattu woosoma Ibiibiliya

²¹ Yesu anaalompa niihisima ni ooniheraka waamini. Wootakihera, hinaaya umunweleliha Lazaru, uyo ‘aahoweha wiirimu ni ulompa, eeraka: “Paapa, kihoosukhuruni kontha nhokiiwa. Kinnocuwela khweeli wiira munnokiiwelela.’” (Joau 11:41, 42) Vano nyuuva? Niireke wiira ulompa winyu unawoonihera wiira naahisima uswali weekhweeli ni nhaana waamini? Moone nivekelo Yesu neetthucihilyaawe ninooniheraaya ihisima. Uyo enree wiira ncina na Yehova nihaana nireerihiyaka, uwa umwene wa Nluku ni wiirannyeeha citthu cimpheelaawe Nluku va watuninyani vaa. Nnya citthunnya phiri cootepa ukhalana ifayita nhina nno nivekelonno. (Mat. 6:9, 10) Muupuwele mananna munpankeenyu mavekelo,niireke anawoonihera wiira nnaahoolelihera Umwene wa Nluku muukumini winyu?

Sentinela 04/2017 ipaag. 6 iparaag. 12

“Nwiirannyeehe anatiriinyu”

¹² Upattisiya wanceriha. Nimpheela wiiraneeha ile ilakenleehu: weettela ikano ca Yehova mpaka. Phimaana, unaareera wiikoha coo: ‘Kiireke upatthannyaaka ni Yehova uhotepa ukhala woolipa ikhumelo nenne kipattisiyaaka? Kineera kinswalelaka Yehova ninrimaaka wotheene? (Akol. 3:23) Kinnolompa woohihiyerera? Kinnosoma Ibiibiliya khula mahuku? Kinneekurumica urwaa umikutthaanoni khula isumana? Awula ihaavo itthu ihimpankaaka?’ Wiira iyo itthwiiyo ihiniirannyeele, nihaana utthara ikano ya apostolu Peturu: wiikurumica wuncerera waamini wihu, ucuwelaca wihu uvilela wihu ni unswalela wihu Nluku.—Nsome 2 Peturu 1:5-8.

Ikano cowiipithya co mbiibiliyani

Ukhalenla 09/2020 ipaag. 31 iparaag. 3-5

Makoho anamasoma

Eklesyaste 5:8 immuuluma nhooleli naatulumu amasikhini ni hinaawacera niisariya. Uyo haana oopuwelaka wiira nawooniya ni nhooleli ookuvernu nkiina ompwaha. Khweeliini, pooti ukhala wiira ahaavo ahooleli ookuvernu enci arina ukhulupale wompwaha uyova. Wooriipiha nrima, nhina ikuvernu caapinaatamu, ahooleli otheene pooti ukhala oohikhuluvelya, ni apoovu phinhuva nlattu woohihooleliya saana.

Hataa ukhalaka toko wiira nihovelavelaca, ihaavo itthu innimaaliha. Nhiliyale wiira Yehova nanweha “ule rina ukhulupale” nhina ikuvernu caapinaatamu. Hiiva pooti unlepela Nluku wiira anikavihere ni unhimyera masukhuliihu otheene. (Isaa. 55:22; Afili 4:6, 7) Hiiva ninaacuwela wiira “meetho a Yehova anaaweha ituninya yotheene, wiira aakavihere ale arina nrima wonvaresesa uyova paasi.”—2 Ikor. 16:9.

Phimaana, Eklesyaste 5:8 inooluma itthu inaakhumelela ahooleli apinaatamu; ithoonyeraka wiira khula ukati haavo ntthu rina ukhulupale wowaapwaha. Masi itthu yuulupale cinene inniitthucihaaya iyo iveeruswiiyo phi ila: Yehova phiri nkhulupale ooverihela; khweeliini uyo khanle Nkhulupale hinlikananiya. Nnava, Yehova nvahacenre Mwanawe, Yesu Kristu, wiira akhale Mwene muumweneni wawe. Ni Yehova Nakuru-Cotheene noweha citthu cotheene, khanle nasariya, ni Mwanawe Yesu ciicammo khanle nasariya.

13-19 YO OUTUBRO

MIHAKHU CO NNUULUMONI NA NLUKU EKLESYASTE 7-8

“Urwee inupa inonliya”

Ukhalenla 01/2022 ipaag. 16 iparaag. 9

Isiyani inniitthucihaaya miithori a Yesu Kristu?

⁹ Munkavihere ntthu khweliye. Yesu ahonla nkhayi ni Marta ni Maria; masi uyo ciicammo ahaaviriyana ukati wanhimyeeraaya itthu yaawiira ni ahaamaaliha. Hiiva ciicammo pooti untakiha Yesu. Humu mmoca nokhala u Austrália neehaniya Dan, neera: “Mi kahopheela cinene ukaviheriya amwaaraka waakhwilyaaya. Mayamunna enci yaheevaherera ukikavihera ni ukiviriyana khula ukati, uthana ni uhiyu. Ayo yankihiya wuuluma yotheene yaakiira ni khayaathoonyera wuuliya muru miiva kanceraka wunla. Ciicammo, ayo yaanaapanka citthu cikhwaawe wiira akikavihere. Ahaavo mahuku yahaakhitiryaaka upanka hataa itthu, masi ayo yaanaakipakherya nkaaroni waka, yankithumela citthu, yankaapyeela ni khayaahiya ulompa nkhayi ni mi. Ayo ahothoonyera wiira akhanle mayamunnaaka ni apatthannyaaka eekhweeli yeevaherenre ukikavihera ‘ukati wo masankiho.’”—Miru. 17:17.

Ukhalenla 06/2019 ipaag. 23 iparaag. 15

Waakavihere akhwaa uvilela masukhulyaaya

¹⁵ William, akhwaale amwaarawe myaakha civinre uttuli, neera: “Mi unaakicivela cinene kawiiwaka atthu yoopuwelaka citthu caapankaaya amwaaraka. Iyo inaakikupaliha wiira ayo khweeliini yaanaafentiya ni yaanaahisimiya. Ayo manannaayo kaanaakaviheriya cinene. Iyo itthwiiyo inaakimaaliha cinene, kontha amwaaraka yahaana ifayita cinene ni ayo yaari mphantte nkiina wookumyaaka.” Nankhweli mmoca neehaniya Biancan heera: “Itthu inkimaaliha ukhanle akhwaaka ulompa ni miiva ni ukisomela iveerusu imoca awula piili co mbiiblyani. Kinawiicoona ratta ayo yawuulumaka awanuwaka ni yakiviriyanaka ukati unwuulumaaka.”

Sentinela 07/2017 ipaag. 16 iparaag. 16

“Munle ni ale anonla”

¹⁶ Inanna imoca yooreera ummaaliha ntthu nonla nlattu wookhweliya ukhanlee ulompa nkhayi nuuyo. Atthunaka nyuuva unawuurikani ulompa yiirannyaaka itthu khampa iyo. Uhiya commo, atthunaka pooti ukhalaka wiira nnawunla awula khanokhitiri wuuluma saana. Masi nhiliyale wiira ulompa ninrimeenyu wotheene nkhayi nintthu khweliye ikhanlee inanna yonkavihera venci. Dalene neera: “Ikwaha cikhwaawe, mayanuunu akhwaawe yawaaka ukimaaliha, kanaalepela ulompa. Masi, hataa ukhalaka wiira ikwaha cikhwaawe khayaakhala saana, ayo yaneekurumica upanka yotheene yaakhitiryaaya wiira yuulume. Ni vakani-vakaani, ayo yankhitiri ulompa ninrimaaya wotheene. Nifento, unamaana ni waamini waya ayo mayanuunwaayo uhokikavihera cinene.”

Sentinela 07/2017 ipaag. 16 iparaag. 17-19

“Munle ni ale anonla”

¹⁷ Khula ntthu naaviriha ukati wiira akhalane ikuru akhweliyaka. Atthu akhwaawe anawiivaherera unkavihera ntthu noviriha itafaawuti khampa iyo, masi haana aturuwelaka ukhalana makhalelwaawe okhalayi. Ibiibiliya ineera: “Mpatthani eekhweeli naafenta ukati wotheene ni nkhala munnaawe ntthu ukati wo masankiho.” (Miru. 17:17) Phimaana, hataa ukhalaka wiira ntthuuyo naaviriha ukati mwinci wiira aanane itafaawuti invirihaawe nlattu wookhweliya, ninlamuliya ukhala owiitthenkaceene wiira nimmaalihe.—Nsome 1 Atesalonika 3:7.

¹⁸ Ikwaha cikhwaawe, pooti ukhalaka wiira ntthuuyo naanukheliya cinene, mpaka uhinkhitiryaawe urwaa woona nkutthaano muulupale wo isirikwiitu awula Nuupuwelelo nlattu awannyawe awula amwaarawe woohikhala. Yiirannyaaka iyo, ninlamuliya upanka yotheene ikhitiriihu wiira nimmaalihe ntthuuyo. (1 Joau 3:18) Gaby neera: “Mi kinansukhuru Yehova nlattu wookivaha mahumu oofenta ni ankikavihera ukati wotheene. Mi kinawoona moono wa Yehova uhoolo waka.”

Ikano cowiipithya co mbiibiliyani

Ukhalenla 03/2023 ipaag. 31 iparaag. 18

“Mwafentanaka, atthu otheene anaahala ucuwela wiira nyuuva nkhale attharyaaka”

¹⁸ Ikwaha cikhwaawe, hiiva ninaahala woona wiira ninaapheela umuulumana munna niveehile wiira nimalihace mwahooyo. Masi nhinarwaa umuulumana, unaareera wiikoha co: ‘Kiireke wiira miiva kihocuwelela saana itthu ikhumelenle?’ (Miru. 18:13) ‘Kiireke wiira pankile imweeni?’ (Ekles. 7:20) ‘Kiireke wiira kihotoko upanka itthu yoolikana toko iyo?’ (Ekles. 7:21, 22) ‘Kamoopanaka mwaha uyo ntthuuyo, itthu inrwaaka umananiha umaliha, kiireke akinhala utepihaca?’ (Nsome Miruku 26:20.) Mwakumihaka ukati wiira muupuwele ala makohwaala, unawoonannya wiira nnaahala wuupuwela upanka itthu yomaana, ukhala nanifento ni uliyala mwahooyo.

20-26 YO OUTUBRO

MIHAKHU CO NNUULUMONI NA NLUKU EKLESYASTE 9-10

Nwehere nimananna omaana masakha munviriheenyu

Ukhalenla 01/2023 ipaag. 15 iparaag. 4

Yehova khanhala uhiya unikavihera

⁴ Ibiiblya ineera co: “Citthu cinkhumelela uwakati uhinweherereehu cinawaaphwanya atthu otheene.” (Ekles. 9:11) Ayo moolumwaayo maanaaya wiira pooti unikhumelela citthu ‘cinaakhumelela atthu otheene.’ (1 Akor. 10:13) Uwakati nkiina, hi ninhuva nlattu wo waamini wihu. Atthu pooti unitarawaca awula unilupattha nlattu wo citthu cinkupaliihu. (2 Tim. 3:12) Hataa yanikhumelelaka marikarikoni, Yehova naahala wuukaviherani. Uyo aapankile cani iyo itthwiiyo ukati wa Yusufu?

Ukhalenla 09/2019 ipaag. 5 iparaag. 10

Yehova uncivela cinene atthu owiiyeviha

¹⁰ Wiiyeviha ciicammo khunrikarikiha makhalelweehu. Cinaahala unikhumelela citthu cinhaleehu woona wiira khacihimwena cosariya. Mwene oocuwelaca Salomau aheera: “Kihowoona ananteko yeettaka nkhavaluni, masi ahooleli yeettaka vathi khampa ananteko.” (Ekles. 10:7) Ukati nkiina atthu oocuwelaca venci khanttottopeliya. Ni atthu oohicuwelaca venci phinttottopeliya. Unookhalaru commo, Salomau hokupaleela wiira itthu inlamuliyeehu upanka ukhanle waaminnyeela wiira makhalelo phiryaaya ciicammo, ni uhikhala ni masukhuli nlattu wo citthu coohinamaana cinkhumelelela muukumini wihu. (Ekles. 6:9) Neeyevihaka, khunhala unirika ukupaleela citthu cinkhumelela cihinnicivela.

Sentinela 15/10/2011 ipaag. 8 iparaag. 1-2

Citthu cinthweelaneenyu cinawuukaviherani?

Mbiibiliyani, Yehova honivaha malakihero anoonihera wiira uhiya upheela wiira nikhale akumi paahi, uyo ciicammo nopheela wiira nikhalane ukumi womaana. Wootakihera, nhina Isaalimu 104:14, 15 ineera wiira Yehova ‘nawiimiha mihokhorokho, iviinyu ni iphaawu wiira aatteelihe nrima apinaatamu.’ Khweeliini, Yehova nawiiriha watuniyani umeela icoolya ni iviinyu wiira nilye. Masi iviinyu ciicammo “inaatteeliha nrima.” Iviinyu uhiya ukhala paahi iyoolya, iyo ciicammo inaanitteeliha nrima. (Ekles. 9:7; 10:19) Khweeliini, unawoonannya wiira Yehova noopheela wiira nikhalane nrima wootteeliya.—Mite. 14:16, 17.

² Phimaana, nihaana isariya yookhala ootteeliya nakumihaka ukati wiira noone inuni cinvaava uculu ni ifoloore contakhwani cinniitteeliha nrima cinene. (Mat. 6:26, 28; Isaa. 8:3, 4) Ukumi womaana ni wootteeliya ikhanle “itthuvo ya Nluku.” (Ekles. 3:12, 13) Woona uthuka khampa itthuvo Yehova inivahilyaawe, inaanikurumica uvarela nteko nimananna ontteeliha nrima Yehova nivahile iyo itthveeyo.

Ikano cowiipithya co mbiibiliyani

Mphwanye Utteeliya Uhimmala! Mpantta 29 ipontu 1

Isiyani inniirannyeela nakhwaaka?

Yesu holattaniha ukhwa nuurupa ikhove cowiiliyaliya. Ntthu norupa ikhove cowiiliyaliya khancuwela itthu ineerannya nipuro niryaawe. Manannani ukhwa unlikanacaaya niikhove? Ntthu akhwaaka khaneecuwela, uyo khanoona uweryaa ni khanhuvahuva. Ibiibiliya ineera “atthu ookhwa khanoopuwela hataa itthu.”—Nsome Eklesyaste 9:5.

27 YO OUTOBRO–2 YO NOVEMBO

MIHAKHU CO NNUULUMONI NA NLUKU EKLESYASTE 11-12

Nkhalane ukumi wootteeliya ni womaana

Despertai! 3/2015 ipaag. 13 ipaag. 6-7

Ncuwa ni iphyoo cooririya—Pooti wannikaviheraaya mwiirutthuni wihu?

Waarya wo ncuwa ciicammo pooti uwiivakaca asinttunttu ahinkhitiriihu woona ankhala mwiirutthuni wihu. Irevista Journal of Hospital Infection ineera: asinttunttu enci ankhala mwiirutthuni wihu ni ankumihera iretta cikhwaawe khaninaacivela ncuwa.

Munhala uphwanyera cani ifayita ncuwa ni iphyoo cooririya? Nnoonela cani urwa weettakaca vate ni wootta ncuwa vakaani? Upanka commo unaahala wuukaviherani.

Ukhalenla 02/2023 ipaag. 21 iparaag. 6-7

Nhisime ukumi Nluku univahilyaawe

⁶ Ibiiblya khinakhala ilivuru innihimerya mananna okhalana ukumi womaana awula mananna oolya. Masi iyo inaahimya mananna Yehova cinweheraawe nnyo citthunyo. Wootakihera, Yehova neera wiira nihaana ninyemaka citthu cinhala utankanya ukuminiihu. (Ekles. 11:10) Ibiiblya ineera wiira khaninlamuliya upanka citthu cinhala uhonona ukumiihu, toko ulya venci awula uwurya mapha venci. (Miru. 23:20) Yehova noweherera wiira khula ntthu akhitiri wiivaraca nhina ulya ni uwurya.—1 Akor. 6:12; 9:25.

⁷ Manannani ninlamuliyeehu ulakela citthu comaana cinoonihera wiira ninaahisima ukumi? Naavarelaka nteko ankhiliihu. (Isaa. 119:99, 100; nsome Miruku 2:11.) Wootakihera, hiiva nihaana nuupuwelaka ratta nihinaaya uthanla itthu yoolya. Hiiva yanicivaka iyoolya, masi nicuwelaka wiira inaanipanka pusya unaarera uhilya. Hi ciicammo ninawoonihera wiira nihaana ankhili neekurumicaka urupa wootosera, wookolaca irutthwiihu woohihiyerera—toko utthawatthawa, urapa, urattela irutthwiihu ni ureeriha inupa inkhaleehu.

Ukhalenla 09/2024 ipaag. 2 iparaag. 2-3

“Nkhale atthu oweettela nuulumo na Nluku”

² Nlattu wookhala aswali a Yehova, hiiva ninaakhala ootteeliya venci cinene. Nlattuni? Cihaavo citthu cinci cinnitteeliha nrima, masi itthu imoca ikhanle yofayita cinene ukhalaka wiira hiiva ninaasoma nuulumo na Nluku khula nihuku ni wiimananiha upanka yotheene inkhitiriihu wiira neettele citthu cineetthuceehu.—Nsome Tiyaku 1:22-25.

³ Cihaavo iparakha cinci cimphwanyeehu ‘neettelaka nuulumo na Nluku.’ Yoopacera, hi ninaacuwela wiira ikhanle itthu yofayita cinene untteeliha nrima Yehova. Nlattu woocuwela iyo, hiiva ninaakhala ootteeliya. (Ekles. 12:13) Neettelaka itthu insomeehu nnuulumoni na Nluku, ninaakhala ootteeliya wamoca naamuciihu ni upatthaniihu nimayamunneehu unaatepa ukhala woolipa. Atthunaka nyuuva nhopaca woona iwiirannyeelakani iyo itthwiiyo. Uhiya commo, hiiva khaninkhalana masakha ankhalanaaya ale ahinonswalela Yehova. Khweeliini hiiva ninawaamini itthu ihimilyaawe mwene Davidi. Wiipa wawe ncipo nomalamulo, nomalakihero ni nohukhumu ca Yehova, uyo ahomalihera eeraka: “Weettela ayo malamulwaayo, unaaphwanyiha itthuvo yuulupale.”—Isaa. 19:7-11.

Ikano cowiipithya co mbiibiliyani

Ukhalenla 02/2023 ipaag. 21 iparaag. 6

Nhisime ukumi Nluku univahilyaawe