Milimo

2 Lyene pa wanda wa Pentekosti, antu yonsi yakolongine pa ncende ili imwi. 2 Mu kupumikizya kuvwisile icongo ukufuma umwi yulu, cali wa cipunga ca muza icikalamba, nupya cakumine umu ng’anda yonsi muno yatenzi. 3 Nupya ivimbilimbili vya moto ivyalolekanga wa lulimi vyalolike kuli aliyo, nupya vyasalangine nu kwikala pa muntu wenga na wenga, 4 nupya umupasi wa muzilo wizile pali yonsi iyatandika nu kulandila umu ndimi izipusanepusane, wakwe vino umupasi wayatungululanga.

5 Pa nsita iiya, Ayuda acindike sana Leza aafumile umu mpanga zyonsi iikalanga umu Yelusalemu. 6 Lino icongo cico cuvwisile, antu aingi yakolongine nu kuzunguka pano cila muntu uvwile yakulanda umu lulimi lwakwe. 7 Yazungwike nu kulanda iyati: “Lolini, uzye yonsi kwene yaa akulanda asi ina Galili? 8 Nga lyene caya uli ukuti swensi kwene twauvwa umu lulimi lwitu? 9 Aina Patiya, aina Medya, na ina Elamu; aina Mesopotamya, aina Yudeya na ina Kapadokiya, aina Ponto na aku citungu ca Asia, 10 aina Fulugiya na ina Pamfuliya, aina Ejipti na amu ncende ya ku Libya iyayela umupiipi na Kuleni; aafuma uku Loma, Ayuda na aizile iyasanguka Ayuda; 11 aina Kilete na ina Alabya, tukuvwa yakulanda umu ndimi zitu pa milimo yakwe Leza ikalamba.” 12 Yonsi yazungwike nupya cayapezizye mano, iyauzyanya iyati: “Uzye cii calola mwi?” 13 Nomba yamwi yayatumfyanga iyati: “Iyakoleka.”

14 Lelo Petulo wakatwike pamwi na atumwa yauze 11 nu kulanda ni izwi likalamba ati: “Mwe yantu ya mu Yudeya na mwensi mwe ikazi ya mu Yelusalemu, lekini cii cimanyikwe kuli mwemwe nupya mwikisye mano ku mazwi yane. 15 Antu yaa yatakolike wakwe vino mukwelenganya, pano insita yii a 9:00.* 16 Lelo vikwene i vyalanzilwe ukupitila muli kasesema Yoweli uwatiile: 17 ‘“Nupya umu manda ya kusyalikizya,” Leza walanda wati, “Ndapongolwela umupasi wane pa yantu amisango yonsi, nupya ana inu aonsi na ana inu akazyana yalasesema na alumendo yalalola ivilolwa na ikolo yalalota iviloto, 18 nupya umu manda yaaya, ndapongolwela umupasi wane pa yaomvi yane aonsi na anaci, nayo yalasesema. 19 Nupya ndacita ivizungusyo umwi yulu ni vimanyililo pano nsi; kulaya uwazi, umoto na makumbi ya cunsi. 20 Ilanzi lilasanguka imfinzi nu mwezi ulasanguka uwazi lino uwanda ukalamba wakwe Yeova nupya uwa lulumbi utatala wiza. 21 Nupya wensi aakaama api zina lyakwe Yeova alapusuka.”’

22 “Mwe ina Izlaeli uvwini mazwi yaa: Leza wamulanzile Yesu uwa ku Nazaleti apaswe ukupitila umu milimo ya maka ni vizungusyo ni vimanyililo vino Leza wacisile pali mwemwe ukupitila muli aliwe, wakwe vino mwamanya. 23 Umuntu wii wapeezilwe pa mulandu wakuti avino Leza walondanga nupya wamanyiile limwi, namwe mwalesile ukuti ya mpulamasunde yamupoopele pa cimuti, nupya mwamukomile. 24 Lelo Leza wamutuutulwile ukupitila umu kumusapula uku ukali wa mfwa, pano imfwa itaali na maka ya kutwalilila ukumulemelela. 25 Pano Devedi walanzile pali aliwe ati: ‘Namaikanga Yeova pa nkoleelo yane, pano ali ukwi kasa lyane ilya kwi lunji pakuti ntatenkana. 26 Ali mulandu kwene uno umwenzo wane wayelile ni nsansa nu lulimi lwane lwasansamwike sana. Nupya ndatwalilila ukukutaila; 27 pano utalansya umwi Lindi,* nanti ukuzumilizya umuntu wako uwa cumi ukuti aole. 28 Waleenga ukuti imanye inzila izikatungulula uku umi; ulalenga ukuti inje sana ni nsansa pa manso yako.’

29 “Mwe inane, cili ningo ukuti ndande nu kusipa kuli mwemwe pali Devedi icikolwe citu, ukuti wafwile nu kuzikwa, ni lindi lyakwe twaya nalyo ukufika na ndakai. 30 Pano wali a kasesema nupya wamanyile ukuti Leza walafile umulapo kuli aliwe uwakuti wenga pa yana yakwe alikala pa cilimba cakwe ica wene, 31 waloliile calimwi nu kulanda pa kutuutuluka kwakwe Klistu ukuti atalasyala umwi Lindi,* nupya umwili wakwe utalaola. 32 Leza watuutulwile Yesu, nupya swensi twailolela icintu cii. 33 Fwandi pa mulandu wakuti Leza wamucindamike pa kumwika ukwi kasa lyakwe ili lunji, nupya wapokelela umupasi wa muzilo uno Isi wamulavile, watapongolola vino mukulola nu kuvwa. 34 Pano Devedi ataaile ukwi yulu, lelo umwineco walanzile ati, ‘Yeova wanenyile Umwene wane ati: “Ikala ukwi kasa lyane ili lunji 35 ukufikila lino ndakupeela amaka pa yalwani yako.”’ 36 Fwandi lekini yonsi amu ng’anda yakwe Izlaeli yamanye ukuti umu cumi Leza wamucisile ukuya Umwene nupya Klistu, Yesu wii wino mwapoopiile pa cimuti.”

37 Lyene lino yuvwile vivyo, yuvwile sana ulanda, nupya yanenyile Petulo na atumwa yonsi iyati: “Ina itu i vyani vino tulinzile ukucita?” 38 Petulo wayanenyile ati: “Lapilini, nupya cila muntu abatiziwe umwi zina lyakwe Yesu Klistu pakuti imembu zinu zyelelwe, alino mulapokelela upe wa mupasi wa muzilo. 39 Pano Leza walaya ukuti alapeela umupasi wa muzilo kuli mwemwe na ana inu, nu ku yantu aikala uku mpanga zya kutali, na kuli yonsi yano Yeova Leza witu akaama umwineco.” 40 Nupya wayanenyile mazwi na yauze aingi nu kuyakonkomezya ati: “Ipaatulini ukufuma uku nkulo yii iipe.” 41 Fwandi antu apokelile amazwi yakwe yabatiziwe, nupya pa wanda uuwa kwalunzilwe antu umupiipi na 3,000. 42 Yatwalilile ukusambilila uku yatumwa, ukwikala pamwi,* ukuliila pamwi, nu kupepela pamwi.

43 Atumwa yatandike ukucita ivizungusyo ivingi ni vimanyililo, nupya cii calenzile antu yonsi ukucindika Leza. 44 Yonsi aataile ikazile pamwi nupya yankananga vyonsi vino yakweti, 45 yakazyanga vino yakweti nu kupeela impiya kuli yonsi, ukulingana na vino cila muntu walondekwanga. 46 Nupya cila wanda yazanwanga umwi tempele nu mwenzo onga, nupya yaliilanga ivyakulya umu mang’anda apusanepusane nu kwankana ivyakulya vyao ni nsansa alino ni myenzo ya cumi, 47 ala yakulumbanya Leza nu kutemwikwa uku yantu yonsi. Nupya cila wanda Yeova watwalilile ukulunda na yauze kuli aliyo apusukanga.