Isamu
Lwimbo luno Devedi wimvile, luno antu yalinzile ukwiusya.
38 We Yeova, utansunda ala watusoka,
Nanti ukundungika ala watukalipa.
2 Pano inceto zyako izindasa nu kwingila sana umukasi,
Nupya ikasa lyako ilintininkizya sana.
3 Umwili wane onsi iulwala pa mulandu nu ukali wako.
Ntakweti umutende umu mafupa yane pa mulandu nu luyembu lwane.
4 Imembu zyane izifika na pa mutwe wane;
Izimfinila sana wa cisendo icinyome.
5 Vilonda vyane iviola nupya vikununka;
Pa mulandu nu uwelewele wane.
6 Indi sana nu ulanda nupya nkukongoza sile;
Nkupitana uwanda onsi ala indi sana nu ulanda.
7 Nkupya umukasi;
Umwili wane onsi iulwala.
8 Umwili wane uli ni canzi nupya ntakweti maka;
Nkuteta pa mulandu nu kucula kwa mwenzo.
9 We Yeova, wamanya vyonsi vino nkalonda,
Nupya ukuteta kwane kutaafisama kuli wewe.
10 Umwenzo wane ukukunta, maka iyasila,
Nupya uluswepo lwa manso yane ilunsya.
11 Antu yano natemwa na ya cuza yane yakuntaluka pa mulandu nu kucula,
Na inamupalamano yane kwene yakuntaluka.
12 Aakulonda umi wane yakunteya iviteyo;
Aakulonda ukuncitila iviipe yakulanda pa kunkoma;
Yakutotozana ivya ucenjezi uwanda onsi.
13 Lelo wakwe cipuuli, ntamauvwa kuli vino yakulanda;
Nupya wakwe ciulu, ntamavwanga.
14 Inja wa muntu aatanga auvwe,
Wino kanwa kakwe katanga kalande ivili vyonsi pa kuivwangila.
15 Pano naloleelanga pali wewe, we Yeova,
Nupya wangaswike, we Yeova Leza wane.
16 Pano natiile: “Si yatasansamukila pali nene
Nanti ukuitumika pali nene lino ulwazo lwane lwasyelemuka.”
17 Pano nali apiipi nu kupona,
Nupya lyonsi nawaikanga.
18 Nasokolwile ukuluvyanya kwane;
Nupya uluyembu lwane lwancuzyanga.
19 Lelo alwani yane yali nu umi usuma na maka,
Yayo aampata ukwaula umulandu iyavula.
20 Yancitiile iviipe pa visuma vino nayacitiile
Yankanyanga ukucita icisuma.
21 Utandekelezya, we Yeova
We Leza wane, utaya ukutali nani.
22 Ngazwe zuwa,
We Yeova, kapususya wane.