Isamu
Lwimbo luno Asafu wimvile.
79 We Leza, antu amu nko iyazanza ica upyanyi cako;
Iyakowezya itempele lyako ilya muzilo;
Iyonona Yelusalemu.
2 Iyapeela imili ya yaomvi yako uku vyunyi kuti vilye
Ni mili ya yantu yako aaya ni cisinka uku vilyanyi vya mu mpanga.
3 Iyapongolola uwazi wao wa manzi mu Yelusalemu monsi,
Nupya kusi uwatasyala uwa kuyaziika.
4 Ainamupalamano itu yakutuseka;
Antu aatuzinguluka yakututumfya nu kutusoweka.
5 We Yeova ulatwalilila ukusoka ukufika lilaci? Uzye a manda pe?
Uzye ukali wako ulatwalilila ukupya wa moto ukufika lilaci?
6 Leta ukali wako pa nko izitakumanya
Na pa mawene aasiama api zina lyako.
7 Pano yazanza Yakobo
Nupya yasya impanga yakwe umwaula icili consi.
8 Utatupingwila pali vino ivikolwe vitu vyaluvyanyizye.
Tuvwile uluse zuwa zuwa,
Pano tuli sana ni ntazi.
9 Twazwe we Leza, kapususya witu,
Pa mulandu ni zina lyako ilya lulumbi;
Tupususye nupya twelele imembu pa mulandu wi zina lyako.
10 U mulandu ci uno antu amu nko yangalandila ukuti: “Uzye Leza wao ali kwi?”
Leka tulole lino icilanduzi pa wazi wa yaomvi yako aakomwa
Cilamanyikwa uku yantu ya mu nko.
11 Si uvwa ukulila kwa mufungwa.
Omvya amaka yako akalamba ku kupususya antu aapingulwa ukufwa.
12 Si fulula ainamupalamano itu ukufika uku miku 7
Pa mulandu na vino yakakupontela, we Yeova.
13 Lyene swe yantu yako nupya imfwele zino ukacema,
Tulakutaizya manda pe;
Nupya tulakulumbanya umu nkulo zyonsi.