Ezaya
45 Vii avino ne Yeova nanena Sailasi, wino nasoolola,
Wino nalema ikasa lyakwe ilya kwi lunji
Pakuti ncimvye inko pa nkoleelo yakwe,
Kupoka ya mwene maka
Nu kuyula ivisaasa viili
Pakuti impongolo zya musumba zitaca ziyalwe, namunena nati:
2 “Ndakukoleelela,
Nu kupasa utu myamba.
Ndapandola ivisaasa vyakwe koopa,
Nu kukontola mifikilo ya cela.
3 Ndakupeela ivyuma ivya mu mfinzi
Ni vyuma ivyafiswa,
Pakuti umanye ukuti nene Yeova,
Leza wakwe Izlaeli, aakukwama ukuomvya izina lyako.
4 Nkukwama ukuomvya izina lyako pa mulandu na Yakobo umuomvi wane,
Na Izlaeli wino nasoolola.
Namakupeela izina lya mucinzi nanti cakuti utamanya.
5 Nene Yeova, kutaaya muze.
Kutaaya Leza na muze ukucila pali nene.
Ndakukomya nanti cakuti utamanya,
6 Pakuti antu ukufuma kuno ilanzi likatunkila ukufika kuno likawila
Yamanye ukuti
Kutaaya Leza muze ukucila pali nene.
Nene Yeova nupya kutaaya muze.
7 Nkaleka ikuya uluswepo ni mfinzi,
Nkapanga umutende nu kuleka ukuti kuye intazi;
Nene ne Yeova nkacita ivintu vii vyonsi.
8 Mwe mayulu, lekini ulungami utoonye wa mvula;
Lekini makumbi yapongolole ulungami.
Wakwe vino insi ikapokelela imvula nu kumezya ivyakulya,
Avino antu yane yalapusuka nu kuipakizya ulungami.
Nene ne Yeova, ndalenga ciye vivyo.”
9 Kalanda kuli wino akaapazyanya na Kapanga wakwe,
Pano waya wa cinga
Icili pa vinga vyuze!
Uzye ivu linguzya nakamata liti: “Ukupanga cani?”
Nanti uzye cino ukupanga cingalanda citi: “Utakwata makasa”?
10 Kalanda kuli wino akauzya isi ati: “I cani cino mwamvyalile?”
Na nyina ati: “U mwana wa musango ci wino mwavyala?”
11 Yeova Uwa Muzilo wakwe Izlaeli uwamupanzile, walanda wati:
“Uzye ungaanena pa vintu ivilacitika
Nu kuunena ivya kucita pa yana yane na pa vintu vino napanga?
12 Napanzile insi, impanga nu muntu uwa kwikalamo.
Nene napanzile mayulu,
Nupya nene nkatungulula intanda zyonsi izyayamo.”
13 Pa mulandu wakuti nene mulungami nasoolwile umwi,
Nupya ndolola inzila zyakwe zyonsi.
Aliwe alakuula umusumba wane
Nu kukulula azya ukwaula ukulipilwa nanti ukupoka mafisakanwa,” vikwene avino ne Yeova wa maumba nalanda.
14 Yeova walanda wati:
“Aomvi ya ku Ijipti na aculuzi ya ku Etiopia na aonsi atali Aku Seba,
Yaliza kuli mwemwe nu kuya antu inu.
Yalamulondela ala iyanyepwa umu maceni.
Yaliza nu kumufukamila.
Yalaalanda pali mwemwe umu mapepo iyati, ‘I cumi kwene Leza ali namwe,
Nupya kutaaya Leza muze.’”
15 I cumi kwene wewe Leza aakaifisa,
We Leza wakwe Izlaeli Kapususya.
16 Yonsi kwene yaluvwa insonyi nupya yalazewana;
Aakapanga ivilubi yonsi yalazewana.
17 Lelo Yeova alakupususya we Izlaeli.
Utalatala uvwepo insonyi nanti ukuzewana manda pe.
18 Yeova Kaumba wi yulu ni nsi,
Leza wa cumi uwapanzile insi nu kuleka ukuti itwalilile ukuyako,
Aataipanzile ukuti mutaya akantu nanti akamwi
Lelo uwaipanzile kuti iye umwa kwikala antu, walanda wati:
“Nene Yeova nupya kutaaya muze.
19 Ntalandiile umu ncende ifisame, nanti umu mpanga umwaya imfinzi;
Ntaanenyile ana yakwe Yakobo inti,
‘Ndondini apa sile sile.’
Nene Yeova aakalanda ivilungame ni vyololoke.
20 Kolonganini nu kwiza.
Palamini mwe yano mwakululwa ukufuma umu nko.
Yayo aakapitana ni vilubi yatamanya nanti acimwi
Nupya yakapepa leza aatanga ayapususye.
21 Letini imilandu inu.
Lanzyanyini umu mutende.
A weni uwasesime ivintu vii mpiti sana
Nupya a weni uwavilanzile?
Uzye asi nene ne Yeova?
Kutaaya Leza muze suka sile nene;
Ne mulungami nupya Kapususya, kutaaya na muze ukucila pali nene.
22 Welini kuli nene pakuti mupusuke mwe yantu ya mu nsi yonsi,
Pano nene indi Leza kutaaya na muze.
23 Amazwi iyafuma umu kanwa kane umu ulungami;
Nupya yalafikiliziwa
Ne mwineco indapa ukuti:
Antu yonsi yalamfukamila,
Nupya yalalapa ukuya acumi kuli nene
24 Yalalanda nu kuti, ‘Mu cumi Yeova waya nu ulungami na maka.
Yonsi aamupata yalaya kuli aliwe ala iyazewana.
25 Ana yakwe Izlaeli yonsi yalalola ukuti yacisile ningo ukuombela Yeova,
Nupya yalayuvwila muli aliwe.’”