Ezaya
56 Yeova walanda wati:
“Mwaya nu mulinganya nupya mwacita ivilungame,
Pano ukupususya kwane kuli umupiipi
Nupya ulungami wane ulasokololwa.
2 Uwa nsansa u muntu aakacita vii
Nu mwana wa muntu aakalondela masunde yane
Aakasunga Isabata nu kukanalisaalula
Nupya aasicita iviipe ivili vyonsi.
3 Uwafuma uku mpanga yuze uwatandika ukuombela Yeova atalinzile ukulanda ati,
‘Yeova alampaatula uku yantu yakwe.’
Na mutungwi atalinzile ukulanda ati, ‘Nene umuti uume.’”
4 Pano Yeova akulanda pali ya mutungwi aakasunga masabata yakwe nupya aakacita ukulonda kwakwe nu kusunga upangano wakwe ati:
5 “Ndayapeela ica kuiusizyako ni zina umu ng’anda yane,
Icisuma ukucila ana aonsi na anaci.
Ndayapeela izina lya manda pe,
Ilitalalowa.
6 Lyene aku mpanga yuze aatandika ukuombela Yeova,
Aatemwa izina lyakwe Yeova
Nupya aiza yaya aomvi yakwe,
Yonsi aakasunga Isabata ukwaula ukulisaalula
Nupya aakasunga upangano wane,
7 Nayo kwene ndayaleta umu mwamba wane uwa muzilo
Nu kuyalenga yaye ni nsansa mu ng’anda yane iya mapepo.
Malambo yao yonsi aakoca na malambo yao yauze yalapokelelwa pa ulambo wane.
Pano ing’anda yane ilaamwa ukuti ing’anda ya mapepo iya yantu yonsi.”
8 Yeova Umwene wa Papelapela aakukolonganika Ina Izlaeli aasalangana walanda wati:
“Ndakolonganika na yauze kuli aliyo ukulunda pali yano nakolonganika mpiti.”
9 Mwe nyama zya mu mpanga mwensi izini mulye,
Kuli kuti mwe nyama zya mu mutengo.
10 Alinzi yakwe yapafula, kusi aakalola ivikucitika.
Yonsi kwene aasimbwa asiwata.
Yakaasela nu kulaala, nupya yatemwa ukukasula.
11 Aasimbwa apunuke;
Yasiikuta.
Aakacema aasiiluka.
Yonsi kwene yakaicitila sile ivyao;
Cila muntu akalonda ukulonka ivyuma mu ucenjezi ala akuti:
12 “Lekini ndete waini,
Nupya lekini tumwe mpaka tukoleke.
Uwanda wa mutondo utalapusana nu wi lelo nupya ulacilapo nu kuzipa!”