Ilyalemvilwe na Luka
2 Lyene umu manda yaaya, Agusto kateeka* wa ku Loma wapeezile isunde lyakuti antu yonsi umu nsi yafwile ukulembwa. 2 (Kulembwa kuu kwa kutandikilako kwacitike lino Kuleniosi wateekanga umu mpanga ya Silya.) 3 Nupya antu yonsi yaile umu kulembwa, cila muntu ku musumba wa kumwao. 4 Na Jozefu wafumile ku Galili mu musumba wa Nazaleti nu kuya ku Yudeya, ku musumba wakwe Devedi uukaamwa ukuti Betelemu, pa mulandu wakuti wali uwa mu lupwa lwakwe Devedi. 5 Waile uku kulembwa pamwi na Maliya umuci wakwe, uwali apiipi nu kukwata umwana. 6 Lino yacili kuuku kwene, insita yafisile iyakuti Maliya akwate umwana. 7 Lyene waviile umwana umonsi iyeli, nupya wamupomvile mu nsalu nu kumulalika mu mulangu, pano mu muputule wa enyi mutaali incende.
8 Nupya umu musumba kwene uuwa mwali na ya kacema aalindanga iviteekwa vyao umu mpanga, mu nsita ya usiku. 9 Lyene lilyo kwene malaika wakwe Yeova wimilile pa nkoleelo yao nu luswepo ulwalangililanga ululumbi lwakwe Yeova lwayengesile pali aliyo, nupya yuvwile sana intete. 10 Lelo malaika wayanenyile ati: “Mutuvwa intete pano nkumunena ilyasi lisuma ilimalenga antu yonsi ukuya sana ni nsansa. 11 Pano ilelo, umu musumba wakwe Devedi mwatimuvyalwa kapususya, a Klistu, Umwene. 12 Nupya cino mwayamanyilako aeci: Mwayazana akanya ikapombwa umu nsalu nupya kaizi umu mulangu.” 13 Lilyo kwene iumba lyakwe ya malaika ya kwi yulu lyakolongine pamwi na malaika wiyo ala yakulumbanya Leza yakuti: 14 “Ululumbi luye kuli Leza wa papelapela nu mutende uye pa yantu ya pano nsi yano Leza watemwa.”
15 Lyene lino ya malaika yafumilepo nu kuswilila ukwi yulu, ya kacema yatandike ukulanzyanya iyati: “Lekini tuye uku Betelemu pakuti tukalole icaticicitika cino Yeova watusokolwela.” 16 Nupya yapisile zuwa iyaya iyazana Maliya na Jozefu na kanya ala kaizi umu mulangu. 17 Lino yaweni vivyo, yasimike vino malaika wayanenyile pa mwana wiyo. 18 Nupya yonsi auvwile vino ya kacema yalanzile yazungwike, 19 lelo Maliya wasunzile amazwi yayo yonsi umu mwenzo, nupya wayelenganyangapo. 20 Lyene ya kacema yaswilile ala yakucindika nu kulumbanya Leza pali vyonsi vino yuvwile nu kulola, wakwe vino yanenyilwe.
21 Lino manda 8 yakumine aakuti umwana azembululwe, yamutemile izina lyakuti Yesu, izina lino malaika wamutemile lino Maliya atatala wakwata inda.
22 Nupya lino insita yafisile iyakuti yasangululwe ukulingana na Masunde Yakwe Mose, yamutwazile uku Yelusalemu ku kumupeela kuli Yeova, 23 wakwe vino calembwa mu Masunde yakwe Yeova ukuti: “Umwana umonsi wensi iyeli afwile ukwamwa ukuti u wa muzilo kuli Yeova.” 24 Nupya yapeezile ilambo wakwe vino calanzilwe umu Masunde Yakwe Yeova: “Mulinzile ukupeela utwana twa nkunda twili nanti vipeele viili.”
25 Nupya mu Yelusalemu mwali umuntu umwi uwi zina lyakuti Simyoni, muntu wii wali umulungami nupya watiinanga Leza, waloleelanga insita ino aina Izlaeli yali nu kuteekeziwa, nupya umupasi wa muzilo wali pali aliwe. 26 Nupya Leza waomvizye umupasi wa muzilo ukumusokolwela ukuti atalafwa lino atatala walola Klistu, uwasoololwa na Yeova. 27 Lyene umupasi wa muzilo watungulwile Simyoni umwi tempele, nupya lino avyazi ingizye umwana umwi tempele pakuti yacite wakwe vino yacitanga lyonsi kulingana na vino Masunde yakwe Mose yalanzile, 28 Simyoni watozile umwana alino alumbanya Leza ati: 29 “Mwene wa Papelapela, lyene umaleka umuomvi wako afwe umu mutende ukulingana na vino walanzile, 30 pano indola inzila ino ulaletelamo ipusukilo 31 ino wapekanyizizya antu yonsi, 32 alaya u luswepo lwa kufumya imfinzi ku yantu ya mu nsi nu kuleta ululumbi ku yantu yako aina Izlaeli.” 33 Nupya isi wa mwana na nyina yazungukanga pali vino Simyoni walandanga pa mwana. 34 Nupya Simyoni wayapaazile nu kunena Maliya nyina wa mwana ati: “Lola! Pa mulandu nu mwana wii, aina Izlaeli yamwi yalapona, yauze nayo yalakatuka nupya aingi yalamupontela nanti cakuti Leza alayalanga ivimanyililo ivyakuti ali nawe 35 (lelo wemo ulacula kwati umuntu wino iyatota nu lupanga ulutali), pakuti vino antu aingi yakaelenganya vice visokololwe.”
36 Lyene kwali kasesema umwanaci uwi zina lyakuti Ana, mwana Faniweli uwa mu mutundu wakwe Aseli. Umwanaci wii wali u mukoloci nupya wikazile na iya pa myaka 7 ukufuma pano yatwaline,* 37 wali a mukamfwilwa nupya wali ni myaka 84. Atapuswanga api tempele, waombelanga Leza umusanya nu usiku nupya watanga ukulya* ala akupepa mapepo ya kupaapata. 38 Lyene apa nsita kwene iiya, Ana wizile umupiipi nu kutandika ukulumbanya Leza nu kulanda pa mwana kuli yonsi aalolelanga ukukululwa kwakwe Yelusalemu.
39 Fwandi lino yamazile ukucita vyonsi ukulingana na Masunde Yakwe Yeova, yaswilile ku Galili, ku musumba wa kumwao uwali ku Nazaleti. 40 Umwana wakulanga na maka na mano, nupya Leza wamutemilwe.
41 Lyene cila mwaka, avyazi yakwe yayanga ku Yelusalemu ku kuzevya Ucilo. 42 Nupya lino Yesu wali ni myaka 12, yaile uku kuzevya, wakwe vino yacitanga lyonsi. 43 Lino amanda ya kuzevya yasizile, yatandike ukuswilila ukumwao, lelo Yesu wasyazile ku Yelusalemu, nupya avyazi yakwe yataamanyile. 44 Yelenganyanga ukuti wali api umba lino yali nalyo, lyene pa cisila ca kupita uwanda onga, yatandike ukumulonda muli ya lupwa ni vyuza vyao. 45 Lelo yataamuzanyile, fwandi yaswilile uku Yelusalemu nu kuyamulonda sana. 46 Lyene pa cisila ca manda yatatu, yamuzanyile umwi tempele ala atenzi pakasi kakwe ya kasambilizya, akukutika kuli aliyo nu kuyuzya mauzyo. 47 Lelo yonsi aakutikanga kuli aliwe yazungukanga pali vino wamanyile ivintu alino na vino wasukanga. 48 Lyene lino avyazi yakwe yamuweni, yazungwike sana, nupya nyina wamunenyile ati: “We mwana we, u mulandu ci uno watucitila vii? Ya tata yako nani itukulonda sana.” 49 Lelo wayuzizye ati: “U mulandu ci uno mukundondela? Uzye mutamanyile ukuti ndinzile ukuya mu ng’anda yakwe Tata?” 50 Lelo yataamanyile muno walozizye amazwi yayo.
51 Lyene wapisile nayo uku Nazaleti, nupya watwalilile ukuya ni cuvwila kuli aliyo. Na nyina wasunzile amazwi yayo yonsi umu mwenzo. 52 Nupya Yesu wakulanga mu mano nu mu ciimo nupya Leza na antu yamutemilwe.