2 Timoti

4 Nkukukonkomezya pa manso yakwe Leza na Klistu Yesu, aalapingula antu ya umi na afwe, lino alaloleka nu kuteeka umu Wene wakwe, nkuti: 2 uwasimikila izwi lyakwe Leza; uwaombesya umu nsita isuma ni itale; uwasunda, uwakalipila, nu kukonkomezya, uwateekela pa kucita vivyo nupya uwasambilizya ningo. 3 Pano kulaya insita ino antu yalata ukulondela ivisambilizyo vya mpomvu nu kutandika ukulondela ulunkumbwa lwao, nupya yalailondela ya kasambilizya aakuti yayasambilizya vino yakulonda ukuvwa. 4 Yalata ukuvwa icumi nu kutandika ukwika amano ku malyasi ya ufi. 5 Lelo wemo, uye na mano muli vyonsi, uwazizimizya intazi, uwasimikila ilyasi lisuma, nu kumalilila umulimo wako.

6 Pano nkupeela umwili wane wakwe waini aakwitulwilwa pa ulambo, nupya insita yane iyakuti nkululwe yatipalama. 7 Indwa ulwi usuma, insimula ukufika nu ku mpela, intwalilila ukuya nu utailo. 8 Kutandika ndakai, kwaya icilambu ca ulungami cino yansungila, cino Umwene, kapingula wa ulungami alampeela umu wanda uuwa, nomba atalapeela sile nene nenga, lelo alapeela na yonsi aakalondesya ukuti akaloleke.

9 Uwezye apapezile amaka yako kuti uwize zuwa kuli nene. 10 Pano Demasi wansya pa mulandu wa kutemwa uwikazi wa ndakai,* wapita nu ku Tesalonika, Klesensi nawe waya uku Galatiya, Tito nawe waya uku Dalamatiya. 11 Luka sile aliwe ali nani. Ukize na Mako pakuti ace aangazwa umu mulimo wakwe Leza. 12 Lelo natuma Tikikasi uku Efeso. 13 Lino uliza uce undetele icakuzwala cino nasiile umu Tuloa kuli Kapusi, ni vimfungwa, maka maka ivya mpapa.

14 Alekizanda kasula wakwe koopa wanduvyanyizye sana. Yeova alamulambula ukulingana ni milimo yakwe. 15 Naawe kwene ulinzile ukucenjela uku muntu wiyo, pano wakaanyanga sana mulimo witu.

16 Lino nalondololanga pa nkoleelo yakwe ya kateeka pa muku wa kutandikilapo kutali nanti aumwi uwangazwilizye, yonsi yantazyezile, lelo yatalinzile ukupeelwa umulandu. 17 Lelo Umwene wimilile umupiipi nani nu kumpeela maka, pakuti ukupitila muli nene ilyasi lisuma lingasimikilwa sana pakuti antu ya mu nko yalyuvwe, nupya wampokolwile mu kanwa kakwe cisama. 18 Umwene alampokolola uku viipe vyonsi nupya alampususya pa mulandu nu Wene wakwe uwa kwi yulu. Kuli aliwe kuye ululumbi amanda pe. Ameni.

19 Undamukileko Pulisika na Akwila na amu ng’anda yakwe Onesifolasi.

20 Elasita wasyazile umu Kolinto, lelo nemo nasiile Tulofimo pa Milete ala umulwale. 21 Uce uwezye apapezile amaka yako ukufika kuno lino insita ya mpepo itatala yatandika.

Yubulasi, Pudensi, Linusi, Kuludiya kumwi na ina yonsi yakulamuka.

22 Umwene aye nawe pa mulandu ni miyele yako isuma. Nupya icikuuku cikulu ciye namwe.