Ezaya
46 Leza aakaamwa ukuti Beli na leza aakaamwa ukuti Nebo iinama.
Vilubi vyao iiviya ivisendo uku vilyanyi vya mu mpanga,
Nupya wa visendo ivinyome uku nyama izyatizitonta.
3 “Uvwini kuno mwe ya mu ng’anda yakwe Yakobo, na mwensi mweyano mwasyala umu ng’anda yakwe Izlaeli,
Mweyano nkasakamala ukufuma lino mwaviilwe wakwe vino nyina akasakamala umwana.
4 Ntalasenuka kufikila muce mukote;
Ndaamutungilila suka muce mukwate imvwi.
Wakwe vino nkacita, ndaamusenda, ukumusakamala nu kumupususya.
5 A kuli weni kuno mungandinganya nanti ukunkolanya,
Pakuti tulingane nawe?
6 Kwaya aakafumfumula goldi umu tuvyola twao;
Yakapima siuva pali sikelo.
Yakalemba aakapanga ivintu ukuomvya ivyela, nawe akapangamo leza.
Lyene yakatandika ukufukamila leza wiyo nu kumupepa.
7 Yakamusendela pa viye vyao;
Nu kuyamwika pa ncende ino yamupangila, nupya akatwalilila ukwimilila sile papo kwene.
Asifumapo.
Yakalilila kuli aliwe, lelo asiasuka;
Atanga apususye nanti aumwi uku ntazi.
8 Iusyini ivintu vii nupya muye asipe.
Visungini umu myenzo inu mwe yakacita ya viipe.
9 Iusyini ivintu ivyacitike mpiti,
Mwiusye ukuti nene Leza nupya kutaaya muze.
Nene Leza nupya kutaaya aangalingana nani.
10 Kufuma pa kutandika nkalandila limwi ivilacitika,
Nupya ukufuma uku mpiti nkalandila limwi ivitatala vyacitika.
Nkalanda inti, ‘Mapange yane yalafikiliziwa,
Nupya ndacita consi cino nkulonda.’
11 Ndama lyang’anda ukufuma kuno ilanzi likatunkila,
Ndama umuntu ukufuma uku mpanga iya kutali aalacita vino nkulonda.
Iimvwanga nupya ndacita vivyo kwene.
Iimpanga nupya ndafikilizya.
12 Uvwini kuli nene mweyano mwakoma imyenzo,
Mweyano musicita ivilungame.
13 Insita ino ndaleta ulungami wane yatipalama;
Isi ukutali,
Ni nsita ino ndapususya antu ili umu mupiipi,
Ndapususya Zioni uwaya ali kuyemba kwakwe Izlaeli.”